İstanbulda əməkdaşlıq müqaviləsi imzalandıAzərbaycan və qardaş Türkiyə qiymətləndiriciləri (değerleme uzmanları) İstanbul şəhərində əməkdaşlıq müqaviləsi imzaladı.

AQC-nin rəhbəri Vüqar Oruc Avrasiya.net-ə bildirib ki, bu müqaviləyə əsasən peşə sertifikatlarımız ölkələrimizdə tanınacaq, birgə projelərə imza atılacaq. TDUB başqanı Yaşar Bahçeci Türk Dünyası Uzmanları Dəyərləmə Uzmanları Birliyini yaxın müddətdə təsis etmək qərarı verdik. Türk dövlətlərinin inteqrasiyasını öz sahəmizdə irəlilətmək üçün Azərbaycan və Türkiyə hökumətlərinə müraciət edəcəyimizi razılaşdırdıq.

Bu birliyə Orta Asiyadakı türk dövlətləri və Quzey Kıbrıs Türk Cumhuriyyətinin də qoşulmalarını təmin etmək üçün birlikdə fəaliyyət göstərəcəyik. Bu birlik üçün çaba göstərən Cansel Yazıcı xanıməfəndiyə və AQC sədrinin Türkiyə Cumhuriyyətindəki təmsilçisi Mikayıl Mirzəzadəyə xüsusi təçəkkürümü bildirir, prosesdə iştirak edənlərə minnətdarlığımı ifadə edirəm. Türk millətinə, Azərbaycan və Türkiyə dövlətlərinə, AQC və TDUB cameələrinə xeyirli olsun!
Əhalinin banklardakı əmanətləri 30%-ə yaxın artıbAzərbaycanda əhalinin banklardakı əmanətləri bu il noyabrın 1-nə 11 milyard 500 milyon manata çatıb.

"APA-Economics" Azərbaycan Mərkəzi Bankına istinadən xəbər verir ki, bu, yanvar-sentyabr ayları ilə müqayisədə 2,4% çoxdur. Ötən ilin eyni dövrü ilə müqayisədə isə əhalinin banklardakı depozitləri 29,4% artıb.

Belə ki, 2021-ci ilin yanvar-oktyabr aylarında bu əmanətlərin həcmi 8 milyard 887.4 milyon manat təşkil etmişdi.
Tarixi nailiyyətlərAzərbaycanın hərbi, iqtisadi, siyasi, diplomatik sahədə artan imkanları ilə müqayisədə Ermənistan xeyli geridə qalıb

Azərbaycanda aparılan islahatların əhəmiyyətli nəticəsi özünü göstərməkdədir. Bununla Azərbaycan dövləti uğurlu siaysi və iqtisadi inkişafa nail ola bilib. Azərbaycan iqtisadiyyatı çoxşaxəlidir. Neft-qaz sektoru sahəsində görülən işlər Azərbaycanın iqtisadi imkanlarını böyük dərəcədə genişləndirib.

Ölkəmiz, eyni zamanda, elektrik enerjisinin ixracı ilə məşğuldur. Artıq elektrik enerjisini idxal edən ölkə deyil, ixrac edən ölkəyik. Azərbaycan bu imkanlardan səmərəli istifadə edərək iqtisadiyyatımızın digər sektorlarının inkişafına transfer edə bilib. Azərbaycan dövləti tərəfindən enerji təhlükəsizliyi məsələlərinin həllinə ciddi yanaşılır. Prezident İlham Əliyev noyabrın 25-də “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransdakı çıxışında bu məsələlərə toxunaraq deyib ki, Orta Dəhliz kimi irimiqyaslı layihəni icra etmək üçün təhlükəsizlik və iqtisadi bacarıq məsələləri müzakirə olunmalıdır.

“Təhlükəsizlik və iqtisadi potensial olmadan bütün region ölkələrinə fayda verəcək Orta Dəhlizin tam istismara verilməsi məqsədinə nail olmaq mümkün olmayacaq”, -deyə dövlətimizin başçısı əlavə edib. Azərbaycan nəinki neft, eyni zamanda qaz ixrac edən ölkə olaraq tanınır. Azərbaycan bütün qonşu ölkələrə qaz ixrac edir və ildən-ilə bu istiqamətdə əməkdaşlıq genişlənir. Bu baxımdan konfransda cənab Prezident cari ilin iyul ayında Avropa Komissiyası ilə təchizatı iki dəfə artırmaq üçün Anlaşma Memorandumu imzalandığını xatırladıb: “Bizim gələcək illərdə istismara verməyi planlaşdırdığımız yeni qaz yataqları var. Enerji şirkətimiz olan SOCAR-da ciddi islahatlar aparılıb.

Səmərəlilik siyasəti nəticəsində əlavə qaz tutumlarına qənaət etməyə imkan yaranır. Bərpaolunan enerji mənbələri ilə bağlı reallaşdırılan layihələr ölkəmizin mövcud istiqamətdəki potensialını artırır”.
Enerji təhlüksizliyi baxımdan bu kimi beynəlxalq əməkdaşlıq Azərbaycanın regionda mövqelərini daha da möhkəmləndirir. Bu, həmçinin iqtisadi potensialımızı da gücləndirir. Buna baxmayaraq Prezdent İlham Əliyevin dediyi kimi, Azərbaycanın ixrac qazının həcminin artırılmasına tələbat var: “Həcmin artırılması üçün TAP boru kəmərinin imkanlarının genişləndirilməsi zəruridir.

Nəzərə alsaq ki, Azərbaycanın TAP layihəsindəki payı cəmi 20 faizdir, biz bu işi təkbaşına yerinə yetirə bilmərik”. Azərbaycan öz milli sərvətimiz olan neft və qazdan səmərəli şəkildə istifadə edir. Ölkəmiz onları emal edirək həm bütün dünyaya xam neft ixrac edir, həm də qonşu ölkələrə neft məhsulları satır. Bütün bunlar tarixi nailiyyətdir.

Azərbaycanın nəqliyyat sektorunda da nəzərdə tutulmuş proqramların icra edilməsi böyük uğurdur. Artıq Azərbaycanın nəqliyyat infrastrukturu yenilənib. Buna avtomobil yolları, hava nəqliyyatı, dəniz nəqliyyatı, dəmir yolu daxildir. Və bütün bunlar dünya standartlarına cavab verir.

Məhz buna görə də bu istiqamətdə beynəlxalq əməkdaşlıq daha da möhkəmlənib. Konfransda cənab Prezident bu baxımdan da Azərbaycanın təcrübəsini bölüşüb və fəaliyyət istiqamətlərini qeyd edib. Xüsusən Şimal-Cənub dəhlizi, Şərq-Qərb dəhlizi, nəqliyyat-kommunikasiya layihələri, eləcə də dəniz ticarət, hava limanları layihələri ilə bağlı fikirlərini bildirərək prioritetləri açıqlayıb: “Azərbaycan infrastrukturun inkişafına uzun illər ərzində sərmayə yatırır. İndi dəmir yolları əlaqələrimizə, yol infrastrukturumuza baxdıqda biz Azərbaycanda hər şeyin hazır olduğunu görürük. Beş il bundan əvvəl biz tərəfdaşlarımızla birlikdə Bakı-Tbilisi-Qars dəmir yolu layihəsinin açılışını etdik. İndi isə ölkəmizdən keçən artan yük həcmlərini gördükdə biz Bakı-Tbilisi-Qarsın Gürcüstan hissəsinin genişləndirilməsinə sərmayə yatırmağa başladıq. Bu layihə ölkəmizə 100 milyon ABŞ dollarından daha baha başa gələcək və biz bu layihəni bir il və ya ola bilsin, bir il yarım müddətində bitirməyi planlaşdırırıq”.

Qarabağ münaqişəsi ilə bağlı danışıqlarda Azərbaycanın mövqeyi dəyişməzdir. Bu, bütün beynəlxalq normalara əsaslanır. 44 günlük Vətən müharibəsində Azərbaycan ərazi bütövlüyünü özü bərpa etdi, zəbt olunmuş torpaqları erməni işğalçılarından azad etdi.

“Böyük Qayıdış” Dövlət Proqramına uyğun olaraq insanlar öz torpaqlarında yaşayacaqlar. Azərbaycan öz prinsipial mövqeyini həm siyasi müstəvidə, həm də döyüş meydaında otaya qoydu. Ermənistan tərəfi isə hələ də real vəziyyəti nəzərə ala bilmir. Bu məsələ ilə bağlı hazırkı durumu cənab Prezident konfransdakı nitqində belə qeyd edib: “İkinci Qarabağ müharibəsindən sonra Ermənistanda müəyyən illüziya yaranıb ki, onlar bizimlə Qarabağla bağlı danışmağa davam edəcəklər. Bu qətiyyən mümkün deyil. Biz heç bir ölkə ilə, heç bir beynəlxalq qurumla Qarabağdan danışmaq fikrində deyilik. Qarabağ münaqişəsi həll olunub, bu bizim ərazimizdir, hamı tərəfindən tanınır və bizim daxili işimizdir”. Azərbaycanın hərbi, iqtisadi, siyasi, diplomatik sahədə artan imkanları ilə müqayisədə Ermənistan xeyli geridə qalıb. Ermənistan ədalətli razılaşmadan daimi qaçır. Ermənistanın danışıqlar masasında irəli sürdüyü təkliflər beynəlxalq normalara əsaslanmır. Azərbaycanın ərazi bütövlüyünə qarşı olan təkliflər heç bir halda qəbul edilə bilməz.

Paşa-zadə Kamal Çingiz oğlu
Qara Qarayev adına Mərkəzi İncəsənət Məktəbinin violonçel ixtisası üzrə müəllimi, Azərbaycan Respublikasının Əməkdar müəllimi
"DGK sistemində canlanma və dəyişikliklər hiss olunmağa başlayıb"Mən ölkənin gömrük sistemində son vaxtlar cərəyan edən prosesləri və eləcə də baş vermiş neqativ halları media üzərindən mütəmadi izləmişəm. Dövlət Gömrük Komitəsinin (DGK) sabiq sədri Səfər Mehdiyevin ölkə Prezidenti cənab İlham Əliyevin qarşıya qoyduğu tapşırıq və vəzifələri yerinə yetirmək əvəzinə, gömrük orqanlarını qohumbazlıq, yerlibazlıq məkanına, korrupsiya mənbəyinə çevirməsi barəfə şok faktları eşidəndə də əsla təəccüblənməmişdim. Çünki S.Mehdiyev dövlətə və xalqa xidmət etmək əvəzinə, sabotajla məşğul idi və o, özünü yüksək rütbəli məmur kimi yox, rəsmən oliqarx kimi aparırdı.

Lakin Dövlət Gömrük Komitəsi sədrinin birinci müavini, gömrük xidməti general-leytenantı Şahin Bağırov Prezidentin etimadına əsasən sədr vəzifəsini müvəqqəti icra edən şəxs kimi fəaliyyətə başladıqdan sonra DGK sistemində müəyyən canlanma və dəyişikliklər hiss olunmağa başlayıb. Şahin Bağırov ölkəmizdə gömrük işinin müasir çağırışlara uyğun şəkildə qurulması, gömrük inzibatçılığının təkmilləşdirilməsi məqsədilə bir sıra mühüm addımlar atıb, islahatlara start verib. Həyata keçirilən islahatlar şübhəsiz ki, DGK-nin fəaliyyətinin təkmilləşdirilməsi və səmərəliliyinin təmin olunmasına xidmət edir. Bu da öz növbəsində qarşıya yeni vəzifələr qoyur.

Belə ki, kadr potensialının gücləndirilməsi üçün kadr dəyişikliklərinin həyata keçirilməsindən tutmuş, insan resurslarının inkişafı və vətəndaşların qəbuluna qədər bütün sahələrdə DGK-nin fəallığı hiss olunur. Vətəndaşların qəbulunun necə təşkil edilməsi istənilən dövlət qurumunun fəaliyyətinin effektivliyini yoxlamaq üçün monitorinq rolunu oynaya bilər. Mən bu gün Dövlət Gömrük Komitəsi sədrinin birinci müavini, sədr vəzifəsini müvəqqəti icra edən, gömrük xidməti general-leytenantı Şahin Bağırovun Horadiz şəhərində yerləşən Muğam Mərkəzində Füzuli, Beyləqan və Xocavənd rayonlarından olan vətəndaşları qəbul etməsinə şəxsən şahidlik etdim və bir daha əmin oldum ki, sələfindən fərqli olaraq Şahin Bağırov öz işinə həqiqətən də çox ciddi və peşəkar şəkildə, məsuliyyətlə yanaşır.

Bildiyiniz kimi dövlət başçımızın tapşırığına uyğun olaraq nazirlik və komitə rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin, ərizə və şikayətlərinin müsbət həlli üçün müvafiq, operativ tədbir görürlər. Şahin Bağırovun Füzuli, Beyləqan və Xocavənd rayonlarından olan vətəndaşlarla görüşü də məhz mərkəzi icra hakimiyyəti orqanlarıının rəhbərlərinin şəhər və rayonlarda vətəndaşların qəbulu cədvəlinə uyğun olaraq təşkil edilmişdi. Mənim bu gün qəbul zamanı Füzuli, Beyləqan və Xocavənd rayonları sakinlərinin gömrük məsələləri ilə bağlı müraciətlərinin Şahin Bağırov tərəfindən diqqətlə dinlənildiyini şəxsən müşahidə etmək imkanım oldu.

Komitənin müvafiq strukturlarının rəhbərlərinin iştirakı ilə keçirilən qəbulda vətəndaşların müraciətlərinin əksəriyyəti işə qəbul, idxal-ixrac əməliyyatları və bir sıra digər spesifik gömrük məsələləri ilə bağlı olsa da, Şahin Bağırov hər bir vətəndaşın müraciətini axıra qədər təmkin və qayğıkeşliklə dinlədi. Nəticədə vətəndaşlar tərəfindən qaldırılan məsələlərin bəziləri dərhal yerində həll edildi, araşdırılmasına ehtiyac duyulan digər müraciətlər isə aidiyyəti strukturların görüşdə iştirak edən rəhbərlərinə yönləndirildi, onlara müvafiq tapşırıqlar verildi.

Mən əminəm ki, gömrük xidmətində çalışan heyətin hər bir üzvü öz işinə məhz Şahin Bağırovun sərgilədiyi nümunəvi fəaliyyət prinsipi ilə yanaşarsa, Dövlət Gömrük Xidməti Səfər Mehdiyevin sədrliyi dönəmində zədələnmiş imicini tezliklə bərpa edə və qarşıya qoyulmuş vəzifələrin öhdəsindən layiqincə gələ bilər. Bu gün isə hələlik bir məqamı tam əminliklə qeyd edə bilərəm ki, Şahin Bağırovun gömrükdə başlatdığı islahatlar və kadr dəyişiklikləri cəmiyyətdə müsbət qarşılanır. Gömrükçü adına layiq olmayan şəxslər (o cümlədən, Səfər Mehdiyevin gömrük orqanlarına daraşmış yaxınları, tələbə yoldaşları), həmçinin narkotik istifadə edən gömrükçülər işdən çıxarılır. Bir sözlə, hazırda gömrük sahəsində sağlamlaşdırma, optimallaşdırma işi aparılır. Ümid edək ki, bu sahədə əvvəllər yol verilmiş bütün nöqsanlar tezliklə aradan qaldırılacaq.

Əlisahib Hüseynov,
Milli Həmrəylik Partiyasının sədri
Təhlükəsizlik və müdafiə xərcləri artırılırTəqdim edilmiş layihədə 2023-cü il üçün büdcə gəlirləri 2022-ci illə müqayisədə 1 milyard 522,9 milyon manat çoxdur və 30 milyard 720,7 milyon manat nəzərdə tutulub. Artımın təqribən yarısı qeyri-neft-qaz sektorunun, yarısı isə neft-qaz sektorunun payına düşür. Vergi və gömrük orqanlarının vasitəsilə təmin olunan gəlirlərin 1 milyard 807 milyon manat artıq planlaşdırılmasını məqbul hesab edir, buna ölkədə gedən biznes mühitinin şəffaflaşması, dövlət-sahibkar arasında etimad mühitinin artması, həmçinin, inflyasiyanın və idxalın artmasının zəmin yaradacağını da qeyd edirik.

Avrasiya.net xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili parlamentin bu gün müzakirəyə çıxardığı “Azərbaycan Respublikasının 2023-cü il dövlət büdcəsi haqqında” qanununun layihəsinin müzakirəsi zamanı deyib.

Komitə sədri bildirib ki, neft sektorundan büdcə gəlirlərinin artmasının əsas səbəbi “Şahdəniz” yatağından hasil edilən təbii qazın ixracı üzrə mənfəət vergisinin təxminən 700 milyon manat çox, yəni 2 milyard 875 milyon manat planlaşdırılması olub:

“Ümumiyyətlə, ölkəmizin qaz ixracının həcm və coğrafiya olaraq genişlənməsi, bundan dövət büdcəsinin, demək həm də vətəndaşların faydalanması ölkə prezidentinin geo-iqtisadi siyasətinin bəhrəsinin bariz nümunəsidir”.

Deputat əlavə edib ki, bu ilin büdcə gəlirlərinin son 10 ayının göstəricisi gələn ilin büdcə gəlirlərinin planlaşdırıldığı kimi olacağını göstərir.

Komitə sədri bildirib ki, büdcədə neftin bir barreli 50 ABŞ dollarından götürülüb.

O, eyni zamanda deyib ki, nəqliyyat infrastrukturunun inkişaf etdiyi və gəlirlərin artdığı da müşahidə edilir.

“Müdafiə, təhlükəsizlik sahəsinə xərclər ötən illə müqayisədə 500 milyon manat artırılıb. Komitədəki müzakirələr zamanı həmkarlarım bu sahəyə daha çox maliyyə artırılmasını təklif edib. Düşünürəm ki, ehtiyac yaranacağı təqdirdə büdcədən bu istiqamətə vəsait artırıla bilər”, - Mirkişili qeyd edib.

Komitə sədri söyləyib ki, ötən illə müqayisədə səhiyyə sahəsinə 200 milyon manat çox ayrılıb.
AQC Direktorlar Şurasının yığıncağı keçirilib – Birgə bəyanat qəbul edilibAzərbaycan Qiymətləndiricilər Cəmiyyəti (AQC) Prezident İlham Əliyevin rəhbərliyi altında həyata keçirilən kompleks və institusional islahatlara dəstək verdiyini və bu istiqamətdə səylərini artıracağını bəyan edib

Toplantıda cəmiyyətə üzv olan 56 qiymətləndirmə şirkətinin rəhbərləri iştirak edib.

Yığıncaq torpaqlarımızın azadlığı urğunda canından keçən şəhidlərimizin xatirəsinin bir dəqiqəlik sükutla yad edilməsi və Azərbaycan Respublikasının Dövlət Himni ilə açıq elan olunub.

Giriş sözü ilə çıxış edən Azərbaycan Qiymətləndiricilər Cəmiyyətinin (AQC) sədri Vüqar Oruc bu ilin may ayında baş tutan hesabat yığıncağından keçən dövr ərzində görülən işlərlə bağlı hesabat məruzəsi ilə çıxış edib.

Sədr bildirib ki, hesabat yığıncağından sonra cəmiyyətin tam tərkibdə rəhbər heyəti formalaşdırılıb. Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili və komitənin üzvləri, Aqrar Kredit və İnkişaf Agentliyinin sədri Seymur Mövlayev, Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva, “Report” İnformasiya Agentliyinin baş direktoru Fuad Hüseynəliyev və adıçəkilən qurumların rəhbər heyətləri ilə Azərbaycan Qiymətləndiricilər Cəmiyyətinin (AQC) rəhbərliyi arasında görüşlər keçirilib. Bu görüşlərdə qarşılıqlı əməkdaşlıq və gələcək fəaliyyət istiqamətləri üzrə müvafiq razılaşmalar əldə olunub və işçi qrupları yaradılıb. Belə təmasların davamlı olacağını söyləyən AQC sədri əlavə edib ki, avqust ayında cəmiyyət tərəfindən “Daşınmaz əmlakın növləri üzrə” növbəti sertifikatlaşdırma kursları təşkil olunub. “Demirçi Tauer” biznes mərkəzində keçirilən kurslarda maliyyə və bank sektorundan, qiymətləndirmə şirkətlərindən 29 iştirakçı qatılıb və onlardan 17-si kursu müvəfəqiyyətlə başa vurub. Milli Məclisin deputatları və vətəndaş cəmiyyəti insitutunun nümayəndələri qaliblərə sertifikatlar təqdim edib.

Baş Prokurorluq yanında Korrupsiyaya qarşı Mübarizə Baş İdarəsi ilə Azərbaycan Qiymətləndiricilər Cəmiyyəti (AQC) arasında razılaşmaya əsasən, qiymətləndirmə şirkətlərin fəaliyyətindən olunan şikayətlər bundan sonra ilkin rəy verilməsi üçün AQC rəhbərliyinə göndəriləcək. Eyni zamanda Ədliyyə Nazirliyi də AQC-ni rəsmi tərəfdaş qismində tanıyıb və bu barədə cəmiyyətə məlumat verilib.

Kiçik və Orta Biznesin İnkişafı Agentliyi (KOBİA) ilə Azərbaycan Qiymətləndiricilər Cəmiyyəti arasında əməkdaşlıq memorandumunun imzalanması istiqamətində müzakirələrin yekunlaşdığını bəyan edən sədr bəzi dövlət satınalmaları və tender soğruları zamanı Azərbaycan Qiymətləndiricilər Cəmiyyətinin üzvlüyünün vacib meyar kimi irəli sürüldüyünü diqqətə çatdırıb. Rəhbəri olduğu qurumun beynəlxalq əlaqələrə xüsusi önəm verdiyini söyləyən AQC sədri Türkiyədə cəmiyyətin xüsusi nümayəndəliyinin təsis olunduğunu diqqətə çatdırıb. AQC sədrinin Türkiyə üzrə xüsusi nümayəndəsi Mikayıl Mirzəzadə ilə Türkiyə Dəyərləmə Uzmanları Birliyinin başqanı Yaşar Bahçeci arasında görüş keçirilib və AQC sədrinin bu ay baş tutacaq Türkiyə səfəri zamanı qarşılıqlı əməkdaşlıq memorandumu imzalanacağını xatırladıb.

Cəmiyyətə daxil olan qiymətləndirmə şirkətlərinin rəhbərləri və AQC rəsmiləri-Ramil Osmanlı, Nüsrət İbrahimov, Rəşad Əliyev, Azər Niftiyev, Emin Mehdiyev, Ramil Qasımzadə, Pərviz Qulami, İbrahim Quliyev, Qasım Əliyev, Rövşən Babaxanov, Səidə Şabanova, İlham Bağırov çıxış edərək AQC-nin fəaliyyət istiqamətləri ilə bağlı təkliflər səsləndiriblər. Yığıncaqda AQC sədri Vüqar Orucun hesabat məruzəsi yekdilliklə qənaətbəxş hesab edilib. AQC Direktorlar Şurası “Qiymətləndirmə haqqında” yeni qanunun tezliklə qəbul ediləcəyinə böyük ümid bəslənildiyini və bu qanunda nəzərdə tutulan zəruri dəyişikliklərlə birlikdə qəbul edildikdən sonra qiymətləndirmə bazarının tənzimlənməsinin mümkün olacağını vurğulayıb.

Üzvlük haqlarının meyarlar üzrə yenidən müəyyənləşdirilməsi ilə bağlı Direktorlar Şurası tərəfindən İdarə heyətinə müvafiq təkliflər verilib. AQC-nin elmi-metodiki jurnalının təsis olunması barədə qərar qəbul olunub. Operativliyin təmin olunması məqsədilə AQC sədri və Direktorlar Şurasının rəhbəri Vüqar Oruca 56 şirkəti tam hüquqla təmsil etmək səlahiyyəti verilib. Direktorlar Şurası ölkədəki ictimai-siyasi, sosial-iqtisadi vəziyyətlə bağlı bəyanat qəbul edib. Bəyanatda Prezident İlham Əliyevin rəhbərliyi altında həyata keçirilən kompleks və institusional islahatların ölkə vətəndaşlarının qarşısında geniş imkanlar açdığı, 44 günlük tarixi Zəfərdən sonra regionda yeni reallıqlar yarandığı öz əksini tapıb. Mürəkkəb beynəlxalq münasibətlər sistemi şəraitində ölkəmizin iqtisadi dayanıqlığını təmin etməsindən məmnunuluq ifadə olunub. Azərbaycan Qiymətləndiricilər Cəmiyyətinin də bu islahatlara dəstək verdiyi və bu istiqamətdə səylərini artıracağı bəyanatda qeyd olunub.

Xatırladaq ki, AQC 1998-ci ildə təsis olunub, 1999-cu ildə isə dövlət qeydiyyatına alınıb. 20 may 2022-ci ildə quruma iqtisadçı ekspert Vüqar Oruc sədr seçilib. AQC Direktorlar Şurası bu il AQC İdarə Heyəti tərəfindən cəmiyyətdə birləşən şirkətlərin fəaliyyətini koordinasiya etmək üçün təsis edilib. Direktorlar Şurasına AQC sədri rəhbərlik edir və Şurada 56 şirkət direktoru təmsil olunur.
Samir Şərifov partiyalara maliyyə yardımından DANIŞDI“Siyasi partiyalar və QHT-lərə maliyyə ayrılması hər zaman dövlətin diqqətində olacaq”.

Avrasiya.net xəbər verir ki, bunu maliyyə naziri Samir Şərifov deyib.

QHT-lərə vəsaitlərin ayrılmasından danışan nazir bildirib ki, bu istiqamətdə bir neçə təklif səsləndirilib:

“Həm siyasi partiyalar, həm də QHT-lərin fəaliyyətinin maliyyələşdirilməsinə dövlət tərəfindən yardım göstərilir. Bu yardım ola bilsin ki, ildən-ilə istənilən həcmdə artırılmır. Bu məsələ hər zaman dövlətin diqqət mərkəzində olacaq”.
Azərbaycan iqtisadiyyatında artım müşahidə olunur - Komitə sədriNoyabrın 4-də Milli Məclisin Gənclər və idman, Əmək və sosial siyasət, Aqrar siyasət, Regional məsələlər, Təbii ehtiyatlar, energetika və ekologiya komitələrinin birgə toplantısında “Azərbaycan Respublikasının 2023-cü il dövlət büdcəsi haqqında” qanun layihəsi birinci oxunuşunu müzakirə edilib.

Təbi ehtiyatlar, energetika və ekologiya komitəsinin sədri Sadiq Qurbanov bildirib ki, Prezident İlham Əliyevin yürütdüyü xarici siyasət və iqtisadi strategiya Azərbaycan iqtisadiyyatını dünyada baş verən siyasi-iqtisadi kataklizmlərdən qorumağa imkan verdi: "Bunun nəticəsində hazırkı böhranlı və çağırışlarla dolu beynəlxalq şəraitdə Azərbaycan iqtisadiyyatında artım müşahidə olunur. Bu il ərzində Ermənistan tərəfindən dəfələrlə bizə qarşı silahlı təxribatların törədilməsi və ölkəmizin milli təhlükəsizliyini təhdid edən digər halların baş verməsi hərbi qüdrətimizin artırılmasını labüd edir və bu zərurət dövlət büdcəsinin hərbi xərclər hissəsində öz əksini tapıb. Eyni zamanda, dövlətimiz büdcənin sosial yönümlü olmasına sadiq qalır. Digər prioritet istiqamət isə işğaldan azad edilmiş Qarabağ və Şərqi Zəngəzurun bərpasıdır. Bu yaxınlarda Zəngilan Beynəlxalq Hava limanının açılışı və Zəngilanın Ağalı kəndinə doğma sakinlərinin qayıdışı bu istiqamətdə görülən işlərin uğurundan xəbər verir. Böyük Qayıdış mühüm strateji məsələdir və təbii ki, bu amil 2023-ci ilin dövlət büdcəsində də nəzərə alınıb.

Təbii ehtiyatlar, energetika və ekologiya komitəsinin sədri olaraq növbəti ilin dövlət büdcəsində ətraf mühitin və təbiətin mühafizəsi, bioloji zənginliyin qorunması, torpaq və yer quruluşu, hidrometrologiya, meşə təsərrüfatı, balıqçılıq və ovçuluq, ərazilərin təmizlənməsi və digər sahələrlə bağlı ayrılan vəsait əvvəlki illə müqayisədə 79 milyon manat çox olduğunu, eyni zamanda ölkəmizdəki ekoloji vəziyyət və bununla mübarizə məsələləri ilə bağlı təkliflərimi də diqqətə çatdırdım".

Avrasiya.net
AQC sədri yeni qanunun qəbul olunmasını təklif edirAzərbaycan Qiymətləndiricilər Cəmiyyətinin (AQC) sədri, iqtisadçı ekspert Vüqar Oruc peşəkar birliklərinin hüquqi statusu ilə bağlı yeni qanun layihəsinin qəbul olunması təşəbbüsü ilə çıxış edib.

Cəmiyyətin İctimaiyyətlə Əlaqələr Departamentindən Avrasiya.net-ə verilən məlumata görə, AQC sədri peşəkar birliklərin fəaliyyətinin “Qeyri-hökumət təşkilatları (ictimai birliklər və fondlar) haqqında” Azərbaycan Respublikasının Qanunu ilə tənzimlənməsinin doğru olmadığını söyləyib.
Təklifi olduğu kimi diqqətinizə çatdırırıq:

Son dövrlər Azərbaycanda assosiativ birliklərin sayı artır. İqtisadiyyat Nazirliyi, Azərbaycan Respublikasının Kiçik və Orta Biznesin İnkişafı Agentliyi (KOBİA) və müxtəlif dövlət qurumlarının dəstəyilə peşəkar ticari birliklərin təsis olunması, dövlət qurumları ilə özəl sektor arasında sağlam münasibətlərin formalaşmasında bu birliklərin aparıcı rol alması yeni reallıqlar ortaya çıxarır. Bu xüsusda uzun müddətdir fəaliyyət göstərən və faktiki olaraq müxtəlif peşələr üzrə aparıcı mövqeyə sahib olan kollektiv ictimai birliklərin də əhəmiyyəti artır.

Azərbaycan Yazıçılar Birliyi, Azərbaycan Bəstəkarlar İttifaqı, Azərbaycan Rəssamlar İttifaqı, Azərbaycan Teatr Xadimləri İttifaqı, Azərbaycan Mətbuat Şurası, Azərbaycan Qiymətləndiricilər Cəmiyyəti, Azərbaycan Banklar Assosiasiyası, Azərbaycan Sığortaçılar Assosiasiyası, Azərbaycan Turizm Assosiasiyası, Azərbaycan Jurnalistlər Birliyi, idman federasiyaları və digər bu qəbildən olan təşkilatlar faktiki olaraq bu sahədə fəaliyyət göstərən müəssisə və şəxslərin kollektiv platforması rolunda çıxış edir.

Məlumdur ki, Cənab Prezident İlham Əliyevin rəhbərliyi altında son illər Azərbaycanda kompleks islahatlar aparılır. 2018-ci ilin prezident seçkilərindən sonra inaqurasiya çıxışı zamanı Cənab Prezident bu islahatlara start verildiyini bəyan etdi. Ötən dövr ərzində bütün hakimiyyət qollarında – qanunverici, Mərkəzi İcra Hakimiyyəti, yerli idarəetmə orqanları bu islahatlar prosesinin tərkib hissəsi olaraq yeniləndi. Elə bir sahə yoxdur ki, bu islahatlar prosesindən kənarda qalsın. Bu islahatların mahiyyətində isə idarəçiliyə yeni nəfəs gətirmək, hökumət-vətəndaş münasibətlərini daha yüksək səviyyəyə qaldırmaq, yeni yanaşma ilə vətəndaşlara xidmət etmək dayanır.

Hesab edirəm ki, mövcud şəraitdə peşəkar kollektiv birliklərin də yeni statusla meydana çıxmasına, onların fəaliyyətinin daha da artırılmasına və tərəqqisinə xidmət edəcək qanun layihəsinin hazırlanmasına ciddi ehtiyac var. “Peşəkar birliklər haqqında” Azərbaycan Respublikası qanunun hazırlanması müasir dövrün çağırışı və günün tələbidir. Hansı ki, “Qeyri-hökumət təşkilatları (ictimai birliklər və fondlar) haqqında” Azərbaycan Respublikasının Qanunu kollektiv peşəkar birliklərə də digər ictimai birliklər kimi, yalnız tövsiyyə vermək və könüllülük əsasında fəaliyyətə imkan verir.

Peşəkar birliklərin özünütənzimləmə mexanizmlərinin yaradılması və həmin sahələr üzrə müvafiq standarlatın hazırlanması peşəkar birliklərin fəaliyyətində keyfiyyətcə yeni mərhələnin əsasını qoyacaq.