İstanbul şəhərində Türk biznes forumu keçirilibNoyabrın 10-da Türkiyənin İstanbul şəhərində Türk Ticarət və Sənaye Palatasının assambleyası və biznes forum keçirilib.

Avrasiya.net xəbər verir ki, Azərbaycanı assambleyada Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayevin rəhbərlik etdiyi nümayəndə heyəti təmsil edib. Azərbaycandan olan nümayəndə heyətinə həmçinin Kiçik və Orta Sahibkarlığın İnkişafı Agentliyinin sədri Orxan Məmmədov, AZPROMO-nun prezidenti Yusif Abdullayev, Azərbaycan Sahibkarlar Konfederasiyasının vitse-prezidenti və Naxçıvan Sahibkarlar Konfederasiyasının sədri Vüqar Abbasov, Konfederasiyanın Rəyasət Heyətinin üzvləri Səkinə Babayeva, Şahmar Vəliyev də daxil olmaqla 35 sahibkar daxildir.

Assambleyada çıxış edən Rıfat Hısarcıklıoğlu Türk Ticarət və Sənaye Palatasının üzvlərinin İstanbul görüşündən gözləntiləri barədə danışıb.

Türk Şurası Baş katibi Bağdad Amreyev Türk Ticarət və Sənaye Palatasının İnvestisiya Fondunun yaradılması təklifinin həyata keçirilməsi perspektivləri barədə iştirakçılara məlumat verib.

Azərbaycan Sahibkarlar Konfederasiyasının prezidenti Məmməd Musayev, hər il noyabrın 10-da bütün türk dünyasının dahi şəxsiyyəti olan Atatürkün sevgi və rəhmətlə yad edildiyini bildirib. Qeyd edib ki, Prezident İlham Əliyevin rəhbərliyi ilə Azərbaycan iqtisadiyyatında yeni bir dövr başlayıb. Ölkə iqtisadiyyatının gələcək prioritetləri, potensial imkanları genişlənib. İşğaldan azad edilən torpaqlarımız yenidən iqtisadiyyatımızın bir parçası kimi inkişafımıza xidmət edəcək.

Türkiyə prezidenti Rəcəb Tayyib Ərdoğanın iştirakı ilə Naxçıvan üzərindən Türkiyə ilə Azərbaycanı birləşdirən Zəngəzur dəhlizinin təməlinin qoyulması və bu tarixi hadisələrin böyük Türk birliyi üçün mühüm əhəmiyyəti vurğulanıb.

Sonra davam edən işçi sessiyada Palatanın tərkibində gənc və qadın sahibkarlar komitələrinin yaradılması müzakirə edilib.

Açılış mərasimindən sonra keçirilən biznes-forumda Türkiyə, Azərbaycan, Qazaxıstan, Özbəkistan, Qırğızıstan və Macarıstanı təmsil edən 300-dən çox sahibkar iştirak edib.
Komitə sədri Tahir Mirkişili rüsumların artımından danışdı"Azərbaycanda rüsumların əksəriyyəti 15 il bundan əvvəl müəyyən edilib".

Avrasiya.net trend-ə istinadən xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında "Dövlət rüsumu haqqında" qanuna dəyişikliyin müzakirəsi zamanı komitənin sədri Tahir Mirkişili deyib. Rüsumların artımının vətəndaşların xərcinə təsir edəcəyini qeyd edən komitə sədri onların gəlirlərinin artması haqqında da tədbirlərin görüləcəyini qeyd edib.

Komitə sədri bildirib ki, Azərbaycanda hər bir vətəndaşın ödədiyi dövlət rüsumunun orta illik məbləği 35 manat təşkil edir ki, bu da vətəndaşın gəlirlərinin təqribən 0.5 faizini təşkil edir.

Mirkişili bildirib ki, bəzi ölkələrdə bu məbləğ 8 faizdən yuxarıdır.

Qeyd edək ki, "Dövlət rüsumu haqqında" qanuna dəyişikliklərə əsasən bəzi dövlət rüsumlarının məbləği dəyişdirilir və yeni dövlət rüsumları müəyyən edilir.
İpoteka faizləri aşağı salınmalı, şərtlər yumşaldılmalıdır - DeputatAzərbaycanda ipoteka faizləri aşağı salınmalı və şərtlər yumşaldılmalıdır.

Avrasiya.net xəbər verir ki, bunu Trend-ə açıqlamasında iqtisadçı ekspert, millət vəkili Vüqar Bayramov deyib. Onun sözlərinə görə, faizlərin yüksək olması ipoteka kreditləri üçün əlçatanlığı azaldır:

"Bu gün İpoteka və Kredit Zəmanəti Fondu tərəfindən adi və güzəştli ipoteka təklif olunur. Adi ipoteka üzrə maksimum faiz 8 faizdir. Faizin yüksək olması həm aylıq ödənişin, həm də bütövlükdə ödəniləcək vəsaitin artmasına gətirib çıxarır. Məsələn, vətəndaş adi ipoteka üzrə 150 min manat kredit götürürsə, 25 il ərzində aylıq ödənişi 1157 manat, bütövlükdə isə 347 min manat olur. Ödənilən vəsaitin həcmi göründüyü kimi kifayət qədər böyükdür. Götürülən kreditlə 25 il ərzində ödəniləcək vəsait arasında 3 dəfəyə yaxın fərq var. Yəni, vətəndaş aldığı pulu 3 misli isə geri qaytarır. Güzəştli ipoteka kreditləri üzrə şərtlər adi ipoteka ilə müqayisədə daha məqbuldur".

Hazırda Azərbaycanda fəaliyət göstərən 23 bankdan dövlət ipotekası almaq mümkündür. Həmin banklar aşağıdakılardır:

1. "AFB Bank" ASC

2. "AccessBank" QSC

3. "Azər-Türk Bank" ASC

4. "Azərbaycan Beynəlxalq Bankı" ASC

5. "Azərbaycan Sənaye Bankı" ASC

6. "Bank Avrasiya" ASC

7. "Bank Respublika" ASC

8. "Bank VTB (Azərbaycan)" ASC

9. "Bank of Baku" ASC

10. "Expressbank" ASC

11. "Günay Bank" ASC

12. "Kapital Bank" ASC

13. "Muğanbank" ASC

14. "PAŞA Bank" ASC

15. "Rabitəbank" ASC

16. "TuranBank" ASC

17. "Unibank" KB ASC

18. "Xalq" Bankı ASC

19. "YapıKredi Bank Azərbaycan" QSC

20. "Yelo Bank" ASC

21. "Ziraat Bank Azərbaycan" ASC

22. Bank "BTB" ASC

23. “Premium Bank” ASC

"E-gov" portalında qeyd olunan məlumata görə, hazırda İpoteka və Kredit Zəmanət Fondunun kommersiya banklarına güzəştli, yəni illik 4 faizli ipoteka ilə bağlı verdiyi limitlər bitib.

Adi ipoteka üzrə bəzi banklarda da vəsait azdır.

Güzəştli və adi kreditlər üzrə şərtlərə gəlincə müvafiq olaraq minimum 10 və 15 faiz ilkin ödəniş nəzərdə tutulsa da, demək olar ki, kommersiya banklarının əksəriyyətində minimum ilkin ödəniş 30 faizdir. Təkcə "Kapital Bank"da hər iki kredit növü üzrə və "Premium Bank"da normal ipoteka üzrə minimum ilkin ödəniş 15 faiz tələb edilir.

Digər tərəfdən hər bir ailə üzvünün saxlanması üçün xərclər banklar üzrə fərqlidir.

Ən aşağı rəqəm 98 manat olmaqla "TuranBank"da, ən yüksək məbləğ isə 300 manat olmaqla "Muğanbank" ASC-dədir. Həmçinin "Azər-Türk Bank"da 150, "Azərbaycan Beynəlxalq Bankı"nda isə 155 manat hesablanır. Digər banklara gəlincə bu rəqəm 190-200 manat arasında dəyişir.

Qeyd edək ki, ölkə üzrə yaşayış minimumu 190 manatdır. İpoteka şərtlərində qeyd olunub ki, borcalanın (borcalanların) və onun ailəsinin həyatı və fəaliyyəti ilə əlaqədar hər bir ailə üzvünün saxlanılması üçün xərc ölkə üzrə müəyyən olunmuş yaşayış minimumunun 50 faizindən az götürülə bilməz.
Ümumdünya Ticarət Təşkilatına üzv olsaq... - HəsənquliyevAzərbaycan Ümumdünya Ticarət Təşkilatına üzv olmalıdır.

Avrasiya.net xəbər verir ki, bunu parlamentdə çıxışı zamanı deputat Qüdrət Həsənquliyev deyib.

O bildirib ki, ölkədə ərzağın qiymətində artım müşahidə olunur: “Hesab edirəm ki, Ümumdünya Ticarət Təşkilatına üzvlük məsələsinə baxılmaldıır. Çünki bu halda kənd təsərrüfatı daxil olmaqla inkişaf, rəqabət mühiti müşahidə oluna bilər. Mən xahiş edirəm ki, parlament rəhbərliyi Ümumdünya Ticarət Təşkilatı ilə aparılan danışıqlarla bağlı Prezident Administrasiyası və digər aidiyyəti qurumlarla bunu müzakirə etsin”.


Manatın devalvasiya riski var? - Elman Rüstəmovdan AÇIQLAMAMərkəzi Bank diqqətlə medianı izləyir, gedən prosesləri dərindən təhlil edir. Xarakterik cəhət ondan ibarətdir ki, ekspertlər cəmiyyətə dəqiq proqnozlar verirlər, mənim dediyim fikirləri bu və ya digər formada təkrar edirlər.

Avrasiya.net xəbər verir ki, bu barədə AMB-nin İdarə Heyətinin sədri Elman Rüstəmov faiz dəhlizinin parametrlərinin elan edilməsinə dair onlayn mətbuat konfransında manatın devalvasiyasından danışarkən bildirib.

E.Rüstəmov deyib ki, mətbuata çıxarılan başlıqlar sensasiyaya xidmət edir:

“Amma spikulyativ xarakterli başlıqlar nəyə xidmət edir, onu anlamıram. Bu gün bütün ölkədəki situasiya makroiqtisadi sabitliyi özündə ehtiva edir. Bu gün Mərkəzi Bank və hökumətin qərarlarına əsasən nə bu il, nə də qarşıdakı illərdə manat üçün təhlükə gözlənilmir. Əksinə manat möhkəmlənməkdə davam edir”.

Baş bankir qeyd edib ki, əhalini hansısa məqalə və başlıqlarla narahat etmək yolverilməzdir
Kolumbiya EXPO Dubay sərgisində Azərbaycan sahibkarlarına ən yaxşı təkliflərini təqdim edəcəkKolumbiya iki min kvadratmetr sahəsi olan pavilyonla Ekspo Dubay 2020 sərgisində iştirak edir. Ekspo Dubay 2020 sərgisi cərçivəsində Kolumbiya, altı ay ərzində, ölkə ixracının təşviqi və bu Latın Amerikası ölkəsinə daha çox xarici investisiya və beynəlxalq turizmin cəlb edilməsi üzrə ambisiyalı kommersiya proqramını həyata keçirir.

Səfirlikdən Avrasiya.net-ə verilən məlumata görə, strateji olaraq ən yüksək insan axını olan dəhlizdə yerləşən pavilyonda Kolumbiyanın iştirakı ixracın, birbaşa xarici investisiyaların və turizmin təşviqi üzrə 60-dan çox tədbiri əhatə edir və tədbirin ümumi sayı 1,5 milyon olmaqla 182 gün ərzində hər gün təxminən 18 min ziyarətçi qəbul etməyə yönəlib.

Ölkənin məqsədi faydalı qazıntıların hasilatı ilə bağlı olmayan, Birləşmiş ərəb əmirlikləri və digər iştirakçı ölkələrlə enerji daşıyıcılarının ixracının artmasına birbaşa təsir göstərmək, Kolumbiyaya turistlərin sayının artırılması üçün bu regiondan olan aviaşirkətlərlə yeni birbaşa reyslərin yaradılması, turizm infrastrukturu, bərpa olunan enerji mənbələri, texnologiya və aqrobiznes sektorlarına iri investisiyaların cəlb edilməsi, və Kolumbiyanın dünyanın digər bölgələrindəki tərəfdaşları üçün ərzaq təhlükəsizliyini təmin etmək üçün Latın Amerikasında əsas müttəfiqə çevrilməsi strategiyasının inkişaf etdirilməsindən ibarətdir.

Pavilyonda «B2B Marketplace Expo Dubai» bölməsi kimi biznesin asanlaşdırılması üçün alətlər də var; məsəl üçün, qitənin bu hissəsi üçün özündə ixrac təklifini əks etdirən pulsuz rəqəmsal kataloq və mədəni, logistika və bazar aspektləri haqqında ən vacib məlumatları ehtiva edən rəqəmsal məlumat kitabçası var. Bundan əlavə, həftəlik gündəm güllər, qəhvə, kakao, ət, meyvələr, moda, yaradıcı sənayelər və turizm kimi strateji sektorlara həsr olunacaq.

2022 - ci ilin əvvəli isə Turizm həftəsi planlaşdırılır: yanvarın 9-dan 15-dək keçiriləcək “Kolumbiya dünya səviyyəli istiqamət”, və fevral ayında Kolumbiya Aqro Ayı baş tutacaqdır. Nəhayət, martın 23-dən 25-dək Latın Amerikasının qlobal biznes forumu çərçivəsində investisiya həftəsi planlaşdırılıb.

Kolumbiyanın Azərbaycandakı səfirliyi azərbaycanlı iş adamlarını Expo Dubai 2020 sərgisində Kolumbiya pavilyonuna baş çəkməyə və ölkənin təklif etdiyi ticarət, investisiya və turizm imkanları ilə tanış olmağa dəvət edir.

Əlavə məlumat üçün https://colombiaexpodubai.com/ səhifəsinə daxil olub və ya [email protected] e-poçt ünvanı vasitəsilə bizimlə əlaqə saxlaya bilərsiniz.
Antalya iş adamları AzərbaycandaTürkiyə-Azərbaycan iqtisadi və dostluq münasibətləri günü-gündən inkişaf etməkdədir. Qardaş ölkədən növbəti nümayəndə heyəti 21-22 oktyabr tarixlərində Azərbaycanda işgüzar səfərdə olublar.

Avrasiya.net xəbər verir ki, layihə Azərbaycan Respublikası Sahibkarlar Konfederasiyası (ASK), Azərbaycanda İxracın və İnvestisiyaların Təşviqi Fondu (AZPROMO), Azərbaycanda Qadın Sahibkarlığın İnkişafı Asossiasiyası (AQSİA) tərəfindən dəstəklənmişdir.

Layihənin təşkilatçısı SET Qrup şirkətinin rəhbəri Alper Alveroğlu öz çıxışında bildirib ki, bizim məqsədimiz hər iki ölkədəki dostluq və iqtisadi münasibətlərin daha da möhkəmləndirilməsində iştirak etmək, qardaş Azərbaycana daha da faydalı olmaqdır. Həmçinin Qarabağ müharibəsində müzəffər Azərbaycan ordusunun qələbəsindən qürur duyduqlarını bildirib.

Qeyd edək ki, səfər zamanı yerli şirkətlərə ziyarətlə yanaşı, yerli sahibkarlarla ikili iş görüşmələri də təşkil olunub.
İranlı sürücülər ölkələrinə qaytarılıbAzərbaycan humanizm, qarşılıqlı hörmət və mehriban qonşuluq prinsiplərindən çıxış edərək və xoş niyyət nümayiş etdirərək İran vətəndaşları Barzegar Haghı Jafar Ghazanfar və Norouzı Shahroud Heıdarı müvafiq razılaşmaya əsasən bu gün səhər saatlarında öz ölkələrinə qaytarıb.

"Report" bu barədə Dövlət Gömrük Komitəsinə istinadən xəbər verir.

Xatırladaq ki, adıçəkilən şəxslər malları sənədlərdən və gömrük eyniləşdirilməsi vasitələrindən aldatma yolu ilə istifadə etməklə Azərbaycanın gömrük sərhədindən qaçaqmalçılıq yolu ilə keçirmələri, habelə mühafizə olunan dövlət sərhədini müəyyən edilmiş sənədlər olmadan və nəzarət-buraxılış məntəqələrindən kənarda, qanunsuz olaraq keçdiklərinə görə saxlanılmışdılar.
Ekspert deputatın şirkətini boykota çağırdıMürəkkəb texniki mallardan, o cümlədən “Kontak Home”un satdığı mallardan və istehlakçılarla davranışlarından şikayət dayanmadan, yağış kimi yağır.

Bu sözləri Axar.az-a Azad İstehlakçıları Birliyinin sədri Eyyub Hüseynov “Kontak Home” mağazalar şəbəkəsi barədə yayılan şikayətlərə fikir bildirərkən deyib.

“Sanki bu sahədə 2 şirkət yarışır. Birinci yerdə əksər hallarda “Kontakt Home”, ikinci yerdə “Baku Electronics” dayanır. “Optimal” və digərlərindən də şikayətlər gəlir. Lakin “Kontakt Home”dan gələn şikayətlər həddən artıq əcaibdir. Elə hallar var ki, vətəndaş malı istifadə etmədən servisə qaytarıb. 1 il sonra ona məhkəmə iddiası gəlib ki, mağazaya pul ödəməlisən. Sonuncu şikayətlə bağlı isə artıq dövlət orqanlarına müraciət etmişəm. “Kontakt Home”da bir prinsip işləyir: pulunu ver mənə, itil cəhənnəmə. Reklamlarla qapıdan vətəndaşı içəri salırlar, menecerlər, satıcılar insanın başına dolanır. Hər şey pulunu alana qədərdir”, - sədr bildirib.

E.Hüseynov qeyd edib ki, “Kontakt Home” öz alqoritmi üzrə işləyir:

“Bir neçə saatdır telefon alan vətəndaş mağazaya müraciət edir. Satıcı malı vətəndaşın əlindən alır. Özləri telefona cızıq və ya su salırlar. Vətəndaşa deyirlər ki, telefonu işlətmisən. İstehlakçı sübut edə bilmir. Bütün hallarda telefonu servisə göndərirlər. O servisə ki, “Kontak Home”un sözünü təkrarlayır. Servis bildirir ki, mal qaytarıla bilməz, düzəldəcəyik. İstehlakçı qalır çarəsiz. Bundan sonra yazıq istehlakçı bizə müraciət edir”.

Ekspert bildirib ki, problemi danışıq yolu ilə həll etməyə çalışsalarda, istehlakçı haqlı olduğu halda belə bu, mümkün olmur:

“Bundan sonra isə proses bu cür davam edir: biz İqtisadiyyat Nazirliyinə məktub yazırıq, nazirlik onu Antiinhisar və İstehlak Bazarına Nəzarət Dövlət Xidmətinə göndərir, xidmət “şikayətə uyğun Kontakt Home”a məktub yazır, “Kontakt Home” vətəndaşa nə demişdisə, eynisini yazıb, nazirliyə göndərir, nazirlik də mənə və şikayətçiyə “Kontakt Home”un cavabını təqdim edib bildirir ki, istehlakçı məhkəməyə müraciət edə bilər. Məhkəmə də ekspertiza aparmır.

Belə bir anormal vəziyyət var. İnsanlar “Kontakt Home”un əməllərindən zinhara gəliblər. Ola bilsin ki, şirkətin sahibinin güvəndiyi kimlərsə var. Çox gərgin bir vəziyyətdir. Ona görə də istehlakçıları “Kontakt Home”u boykot eləməyə çağırıram. İnsanları aldadan bu şəbəkədən əl çəksinlər”.

Qeyd edək ki, alıcıların vaxtaşırı olaraq şikayət etdiyi “Kontakt Home” mağazalar şəbəkəsi deputat Elnur Allahverdiyevin himayəsindədir.
"Azəriqaz" rəhbəri qiymətlərin bahalaşma səbəblərini açıqladıAzərbaycanda təbii qazın qiyməti noyabrın 1-nə qədər köhnə qiymətlərlə hesablanacaq.

Avrasiya.net xəbər verir ki, bunu "Azəriqaz" İstehsalat Birliyinin Baş direktoru Ruslan Əliyev deyib.

O bildirib ki, oktyabrın sonuna qədər qiymətlər əvvəlki kimi olacaq: "Noyabrın 1-dək abonentlər 1200 kubmetrə qədər istifadə etdiyi qaza görə bir kubmetr üçün 10 qəpik, 1200 kubmetrdən 2500 kubmetrə qədər 20 qəpik ödəyəcək. Noyabrın 1-dən isə 1200 kubmetrə görə əhali 12 qəpik ödəyəcək. 1200 kubmetrdən yuxarı istifadə edənlər üçün isə qiymətlər dəyişməyəcək.

Sənaye və kənd təsərrüfatında isə qazın bir kubmetri 20 qəpikdən 25 qəpiyə qaldırılacaq".

Ruslan Əliyev təbii qazın bahalaşması səbəblərini də açıqlayıb. O bildirib ki, buna səbəb beynəlxaq bazarda qaz və qaz avadanlıqlarının bahalaşmasıdır:

"Bunun səbəbləri isə beynəlxalq bazarda qiymət artımı ilə bağlıdır. Əgər biz bu vaxta qədər qazın topdan satışını 110 manata alırdıqsa, artıq indi bu qiymət 118 manatdır.

Həmçinin, beynəlxalq bazarda qaz qurğularının, avadanlıqların qiymətləri bahalaşıb. On görə də bu bahalaşma qazın satış qiymətinə də təsirsiz ötüşməyib".