“Paşinyan 5 min əsgərin başını yedi, azı 10 min yaralımız var” - Erməni deputat“Çiçəklənən Ermənistan” partiyasının deputatı Gevorq Petrosyan baş nazir Nikol Paşinyanı dərhal istefa verməyə çağırıb.

Avrasiya.net azvision.az-a istinadən xəbər verir ki, deputat baş nazirin həbs etdirdiyi şəxslərin bu cür cəzalardan qorxmadığını bildirib.

“İstefa verməli olduğunuzu yaxşı başa düşürsünüz, başqa bir seçiminiz yoxdur. Müharibədə məğlub olan və torpaqları təhvil verən siyasətçinin liderliklə heç bir əlaqəsi yoxdur”, - deyən Petrosyan artıq heç kimin Paşinyanı dövlət başçısı kimi görmək istəmədiyini diqqətə çatdırıb:

"Yaxşı, utanmırsanmı Nikol? Komandana bir az töhmət ver. Onlar sonda sənə qarşı yönələcəklər. 5000 əsgərin başını yedin. Bu gün yaralanan 10 000 vətəndaşımız var. Üstəlik yaralıların barmağının və ya qulağının ucu kəsilməyib, onlar ayaqlarını, əllərini itiriblər. O insanların problemlərini necə həll edəcəksiniz? Niyə hərbi vəziyyətə son qoymursunuz? İndi vəzifənizi tərk etməyinizə nə mane olur?".

Petrosyan sonda qeyd edib ki, Paşinyan hələ müxalifətçi olduğu dövrdə ona hörmət edib. Bu gün isə baş nazirə nifrət edir.
Erməni könüllüsü Qarabağ müharibəsinin iç üzünü açdıBütün dünyadan vuruşmaq üçün Qarabağa gəlmiş erməni döyüşçüləri müharibə ilə bağlı qeydlərini paylaşmağa başlayıblar. Könüllülər Dağlıq Qarabağdakı təminat problemləri, komandanlığın onlara etinasız münasibəti, texnika çatışmazlığı, bölüklər arasındakı pərakəndəlik və səngər həyatının digər çətinliklərindən bəhs edirlər.

Münaqişə iştirakçıları bildirir ki, erməni bölüklərinin çoxu hətta 50% belə, komplektləşdirilməyibmiş. Azərbaycan Ordusunun qələbəsinə də elə bu səbəb olub. Könüllülər öz xatirələrini sosial şəbəkədə bölüşürlər.

Dağlıq Qarabağda sentyabrın 27-dən noyabrın 10-dək davam etmiş müharibə sülh razılaşmasının imzalanması, Ermənistan ordusunun de-fakto məğlubiyyətilə başa çatıb. Döyüşlər zamanı tanınmamış “Dağlıq Qarabağ Respublikası”nın tərəfində bütün dünyadan erməni diasporunu təmsil edən könüllü dəstələr də vuruşub. Suriya, Livan, İrak, Fransa və əlbəttə ki, Rusiyadan olan ermənilərin də döyüşlərdə iştirak etdikləri məlumdur.

Döyüş əməliyyatlarının dayandırılması və bölgəyə Rusiya sülhməramlı kontingentinin yeridilməsindən sonra könüllülər Cənubi Qafqazı tərk etməyə başlayıblar. Bəzi mənbələrin məlumatına görə, onlar döyüş zamanı isti geyim, ayaqqabı və s. ilə təchiz edilməyibmiş. Əslində, bu haqda KİV-də hələ müharibə gedən zaman xəbərlər yayılırdı. İndi deyilənləri erməni döyüşçülərdən biri də təsdiqləyir. O, öz qeydlərini “LostArmour” forumunda “Andrewbek1974” adı altında dərc edib.

Keçmiş döyüşçü yazır ki, Moskvadan gəlmiş könüllülərə döyüş geyimi belə, vermirlərmiş, onlara “özünüzdə olan geyim kifayətdir” deyirlərmiş. Müəllif qeyd edir ki, döyüşçü dəstələrində vahid geyim standartları olmayıb. Zirehli jiletləri belə, döyüşçülər özləri əldə edirmiş. Atıcı silahlarla bağlı vəziyyət isə daha pis imiş: “Silahlardan yalnız köhnə “Kalaşnikov” pulemyotları, “Makarov” tapançası və “AK-74” avtomatı verirdilər. Düzdü, sursat sarıdan çatışmzlıq yox idi. Ancaq tapança üçün hərədə cəmi bir daraq olurdu. Köhnə olmasına baxmayaraq, pulemyot çox yaxşı saxlanılmışdı, “AK-74” isə (bu yerdə döyüşçü söyür - MK) çox pis vəziyyətdə idi. Onu dəyişmək istədik (yenə söyür - MK), üstümüzə qaytardılar ki, birtəhər işlədin. Yenisini vermək olmazdımı? Axı bölükdə əlavə silahlar var idi”.

Müəllifin sözlərinə görə, xaricdən gəlmiş könüllülər özbaşına buraxılıbmış. Gürcüstanla Ermənistan arasındakı sərhədi keçdikdən sonra onlar Yerevan ətrafında harasa yerləşdiriliblər və elə orada da unudulublar: “Söhbət yerlilərin könüllülərə münasibətindən gedir. Onları təşkilatlandıran, məlumatlandıran yox idi”.

Nəhayət, dəstə Qarabağa çatıb və bu zaman onları Şuşanın şərqində müdafiəni saxlayan könüllü bölüyünə göndəriblər. Ştat cədvəlindəki 122 döyüşçüdən bölükdə cəmi 50-60 nəfər var imiş. Onların da əksəriyyəti yerli sakinlər: “Döyüşçülərin əksəriyyəti yerli sakin olduğundan, döyüş mövqelərində gecələmirdi”.

“Bölüyə rəsmi olaraq guya tipik erməni adı daşıyan Hamlet rəhbərlik edirdi. O, “Artsax” ordusunun mayoru olduğunu desə də, bunu təsdiq edən heç bir əlamət müşahihə edilmirdi. “Mayor”un açıq-aşkar kriminal keçmişi var idi, bəlkə elə indi də belə idi… Faktiki isə bölüyə Aşot adlı yerli dayı komanda verirdi. 1969-cu il təvəllüdlü bu adam Sovet İttifaqının Sərhəd qoşunlarında, haradasa Uzaq Şərqdə xidmət edibmiş. Birinci Qarabağ müharibəsi veteranı idi”, - deyə “Andrewbek1974” yazır.

Bu da son deyil. Onun sözlərinə görə, könüllülər hələ birinci müharibə zamanı qazılmış köhnə müdafiə istehkamlarında yerləşdiriliblərmiş. Bölüyün rabitə vasitələrisə ümumiyyətlə olmayıb. Olan ratsiyaları Moskvadan könüllülər özlərilə gətiriblərmiş: “Hərəkət pərakəndəliyi və döyüş təcrübəsinin olmaması kuryoz hadisələrə gətirib çıxarırdı. Məsələn, sən demə, könüllülərin ilk düşməni donuz sürüsü imiş. Oktyabrın 23-ü gecə ilk fövqaləda hal yaşadıq. Rəşadətli gecə gözətçiləri səhərə yaxın atəş açmağa başladı. Sonra qalanlarımız da onlara qoşulduq. Düz 20 dəqiqə durmadan atdıq. Guya məkrli azərbaycanlıların hücumu dəf edilmişdi. Səhər tezdən isə hadisə yerindən yalnız iki ölü donuz tapdıq”.

“Andrewbek1974” yazır ki, erməni qüvvələrinin Dağlıq Qarabağdakı məğlubiyyəti həm də bu problemlərlə bağlıdır. O, yaxın vaxtlarda cəbhədə rastlaşdığı digər problemlərdən də ətraflı yazacağını bildirir.

Xatırladaq ki, Ermənistanla Azərbaycan arasında Rusiyanın vasitəçiliyi ilə sülh razılaşması əldə olunduqdan sonra Yerevanda etiraz aksiyaları başlayıb. Bir sıra müxalif siyasətçilər baş nazir Nikol Paşinyanı xaricdən könüllü dəstələri qəbul etməməkdə, onların cəbhəyə göndərilməsinə mane olmaqda günahlandırır.

(Rus dilindən tərcümə - WorldMedia.Az)

Mənbə: Moskovskiy komsomolets
"Fransa Azərbaycan tərəfindən bunun cavabını alacaq"İndiyə qədər Fransa ATƏT-in Minsk qrupunun həmsədrlərindən biri idi. Əfsuslar olsun ki, birtərəfli qaydada Ermənistanı dəstəkləməyə davam edir. Bu illər ərzində biz onsuz da Minsk qrupunun həmsədrlərinin fəaliyyətindən narazı idik, azmış kimi, Azərbaycanın əks hücunları başlayan gündən Fransa tərəfindən prezident səviyyəsində ölkəmizə qarşı təhdidlər səsləndirilir.

Bu sözləri Publika.az-a açıqlamasında Prezident yanında QHT-lərə Dövlət Dəstəyi Şurasının üzvü, BMAM sədri, siyasi elmlər üzrə fəlsəfə doktoru Rufiz Qonaqov deyib.

Ekspert bildirib ki, Emmanuel Makronun ədalətsiz mövqe sərgiləyərək birmənalı şəkildə Paşinyan ailəsini dəstəkləməsi və ümumilikdə onun erməni sevgisi Azərbaycan ictimaiyyəti və dövləti tərəfindən də pislənilir:

“Əgər Fransa demokratiya sahəsində özünü inkişaf etmiş Avropa ölkəsi adlandırırsa, bu hərəkəti etməməli idi. Eyni zamanda düşünmürəm ki, Makronun çıxışları və Senatda qondarma Dağlıq Qarabağ Respublikasının tanınması barədə qətnamənin müzakirəyə çıxarılması bütün Fransanın mövqeyini əks etdirir. Bu, əslində Fransanın hazırkı Prezidenti Makronun və onun adminstrasiyasının fikridir. Fransada Azərbaycanla münasibətlərin inkişaf etdirilməsinə maraqlı olan kifayət qədər partiya və siyasətçilər var. Azərbaycanın prezidentləri ilə Fransanın əvvəlki dövlət rəhbərlərinin münasibətləri əvvəllər normal olub. Amma Makronun siyasəti təəssüflər olsun ki, Ermənistanı dəstəkləmək və ağa qara demək üzərində qurulub.

Dağlıq Qarabağ da daxil olmaqla, Azərbaycanın bütövlüyünü Fransa və bütün dünya ictimaiyyəti, beynəlxalq təşkilatlar və dövlətlər tanıyıb. Belə olan halda Fransanın hansı qondarma respublikasını tanımas ilə bağlı qətnaməni senatda müzakirəyə çıxmarması başa düşülən deyil. Üstəlik, artıq orda heç bir qondarma rejim və status-kvo yoxdur. Bu qondarma rejim isə separatçılardan, eyni zamanda terroçulardan ibarət idi. Belə görünür ki, Fransa məğlub edilmiş, oradan qovulmuş Ermənistanın yaratdığı terroçu dəstəni müdafiə edir. Əgər belədirsə, Azərbaycan da bundan sonra Fransanı terrora dəstək verən, eyni zamanda bizə qarşı ikili standartlardan yanaşan ədalətsiz bir dövlət kimi tanıdacaq. Fransada Makronun hakimiyyətinin başa çatmasına az bir vaxt qalıb. Makron heç vaxt bu siyasətlə hakimiyyətdə qala bilməz. O, bu siyasətini dəyişdirməlidir. Fransa Prezidenti bu addımları atmaqla orada yaşayan ermənilərin səslərinə ümid edir. Amma anlamır ki, artıq cənubi Qafqazın lider ölkəsi olan Azərbaycanla sərt və ya hər hansı təhdid dilində danışmaq mümkün deyil. Azərbaycan artıq öz ordusu ilə qalib gələn və ərazi bütövlüyünü təmin edən bir dövlətdir. Yaxşı olardı ki, Makron Fransa ilə məşğul olsun. Hər halda Fransanın "sarı jiletlilər"hərəkatı üzvlərini döyüb demokratiyanı boğmaq cəhdləri unudulmayıb. Yaxşı olardı ki, özünün rüsvayçı hakimiyyətini zor gücünə saxlamasın, istefa versin və imkan versin ki, demokratiya Fransada qalib gəlsin və Fransanın mövqeyini əhali özü müəyyən etsin”.

Politoloq bildirib ki, bu gün hər hansı separatçı və işğalçını dəstəkləməklə, Ermənistanda həyat yoldaşı ilə qol açıb oynamaqla onlara dəstək vermək Fransaya utanc verir, gözdən salır: “Makron Fransanı dünyada elə bir rüsvayçı vəziyyətə gətirib ki, bu addımı atarsa, olan-qalan nüfuzunu da itirəcək. Odur ki, bu məsələ Azərbaycan ictimaiyyətinin nümayəndəsi kimi məni də hiddətləndirir. Fransa Azərbaycan tərəfindən bunun cavabını alacaq. Cənab Prezidentin dediyi kimi, əgər Fransa Ermənistanı bu qədər sevirsə, qoy bir ərazisini Araikin terroçu dəstəsi üçün ayırsın və bunu tanısın”.
Putin: Razılaşmanı mən, Əliyev və Paşinyan hazırlamışıqDağlıq Qarabağa dair saziş bağlanarkən Rusiya yalnız vasitəçi rolunu yerinə yetirib və tərəflərin sülh yolu ilə ayrılmalarına dair öhdəlik götürüb.

Bunu Rusiya Prezidenti Vladimir Putin "Rossiya 1" telekanalının efirində deyib.

O vurğulayıb ki, sazişin müəllifləri üç tərəf - Rusiya, Ermənistan və Azərbaycandır.

"Mətnin özünə gəldikdə isə, biz bunu üçlükdə edirdik-mən, təbii ki, Prezident Əliyev və baş nazir Paşinyan. Başqa cür mümkün deyildi, çünki əslində bu, iki tərəf arasında razılaşma idi", - deyə Rusiya Prezidenti bildirib.


"Heç kimə silah daşımağa icazə verməmişik" - İranİran Dağlıq Qarabağ münaqişəsində heç kimə silah daşımağa icazə verməyib.

Xarici KİV xəbər verir ki, bunu İran Xarici İşlər Nazirliyinin mətbuat katibi Səid Xətibzadə mətbuat konfransında deyib.

S.Xətibzadənin sözlərinə görə, İran bu münaqişə, ümumiyyətlə heç bir münaqişəyə etinasız olmayıb.

Xətibzadə əlavə edib ki, İran münaqişələrin sülh yolu ilə həll edilməsinə çalışır.

“Münaqişələrin son həll yolu hərbi həll yoludur. Bütün tərəflər təxminən 30 ildir davam edən bu münaqişənin həlli yolunu tapa bilərlər”.

İran xarici işlər naziri Məhəmməd Cavad Zərifin Azərbaycan və Rusiyaya səfərinin təxirə salınmasına münasibət bildirən İran XİN rəsmisi deyib ki, Ermənistan Xarici İşlər Nazirliyində baş verən dəyişikliklərə görə, bu səfər sadəcə Rusiya və Azərbaycana baş tutacaq:

“İran dövlətinin gələnilki büdcəsi ilə əlaqədar bütün hökumət üzvlərinin səfərləri təxirə salınıb. Bu səbəbdən İran xarici işlər nazirinin də səfəri təxirə salındı. Səfərlə əlaqədar proqram hazırlanacaq.

Bu səfərin əsas mövzusu Qarabağ böhranı olacaq. Əlbəttə İranın bu ölkələrlə strateji münasibətləri var. İranın Azərbaycanla münasibətləri inkişaf etməkdədir. İran və Azərbaycanın münasibətləri tarixi səviyyədədir və İran bu münasibətlərin daha da yüksəldilməsinə çalışır”.

Xətibzadə əlavə edib ki, İranın siyasəti yaxşı qonşuluq münasibəti üzərindədir. İran region ölkələri arasında problemlərin həll edilməsinə və qonşu ölkələrlə bərabər münasibətlərə sahib olmağa çalışır. Bu arada bəzi ölələrlə dərin tarixi ortaqlıqlar yüksək əhəmiyyət kəsb edir.
Şuşa əməliyyatı necə baş tutdu? – Rus hərbi ekspertŞuşa əməliyyatı, xüsusən isə Qırmızı Bazar bölgəsinə endirilən zərbə, habelə düşmənin müdafiəsinin uzandığı ərazilərə bir neçə yalançı zərbə ilə onun (düşmənin — red.) diqqətini yayındıraraq müdafiə ehtiyatlarını cəbhə xətti boyunca uzatmaq - bir klassikadır.

Bunu Axar.az-a açıqlamasında tanınmış rusiyalı tarixçisi, hərbi ekspert, politoloq Oleq Kuznetsov bildirib.

“Sözügedən əməliyyat Azərbaycan Ordusunun komandirləri və hərbi rəhbərləri arasında həqiqi generalların olduğunu göstərdi. Şuşanın xüsusi coğrafi mövqeyinə əsaslanaraq azad edilməsinə gəlincə isə deyə bilərəm ki, bir neçə əsas mövqeyi ələ keçirib, əsas yardımçı qüvvələrin şəhərə daxil olmasını təmin edən Azərbaycan Ordusunun xüsusi təyinatlıları çox möhtəşəm bir iş gördülər.

Ermənilər mövqelərinə güvənərək Şuşanın müdafiəsinin təşkilinə çox məsuliyyətsiz reaksiya göstərdilər. Lakin bu, heç bir halda Azərbaycan xüsusi təyinatlılarının xidmətlərini azaltmır, əksinə, onlar düşmənin müdafiəsindəki bütün çatışmazlıqları çox dəqiq müəyyənləşdirərək bu əskikliklərdən ustalıqla istifadə etdilər”, - deyə Kuznetsov qeyd edib.

Politoloqun sözlərinə görə, Rusiya mənbələrinə istinad etsək, Şuşa yaxınlığında ölmüş erməni hərbçilərinin sayı 300 yox, təxminən 700-800 nəfərdir, bu isə Ermənistan ordusu üçün böyük itkidir:

“Atəşkəsin ardınca öncə 150 cəsəd çıxarıldı, bundan sonra isə Ermənistan rəsmiləri döyüş meydanında ən azı 500 cəsədin qaldığını elan etdi. Bu, həqiqi döyüş idi, cəbhənin çox vacib bir sektorunda erməni ordusu tamamilə məğlubiyyətə uğradı. Və bu mənada Şuşa şəhərinin azad edilməsi Azərbaycan Ordusunun ən müasir, ən gözəl, ən şərəfli səhifəsidir”.
Səfirimizin bu sözləri niyə qalmaqal yaratdı?  - VideoAzərbaycanın Ukraynadakı səfiri Elmira Axundovanın “Svoboda slova” verilişinə açıqlaması birmənalı qarşılanmayıb.

Axar.az xəbər verir ki, Elmira Axundovanın Qələbəni yalnız Azərbaycanın özünün qazandığını deməsi, “Hansısa Türkiyə və ya Rusiyanın” yardım etmədiyini bildirməsi sosial şəbəkələrdə müzakirələrə səbəb olub.

Maraqlıdır ki, səfirin “Hansısa Türkiyə və ya Rusiya” ifadəsindən də “Rusiya” sözü çıxarılıb və bu ifadənin birbaşa Türkiyəyə aid edildiyi vurğulanmaqla, onun ciddi siyasi yanlışlığa yol verdiyi hallandırılmaqdadır.

Bəs, əslində səfir verilişdə nə deyib?

Mətni olduğu kimi təqdim edək:

“Bilirsiniz, xalq öz işğal altında olan torpaqlarını düşmən tapdağından azad etmək istəyirsə, buna uzun və əsaslı şəkildə hazırlamalıdır. Biz bütün bu illər ərzində həm texnoloji, həm hərbi, həm də siyasi cəhətdən müharibəyə hazırlaşırdıq və bu heç kəsə gizli deyi. Ən başlıcası isə biz iqtisadi cəhətdən möhkəmlənirdik. Yalnız sabit iqtisadiyyata və güclü orduya sahib olan ölkə bu cür qısa müddət ərzində (44 gün — red.) müharibəni qazana bilər. Unutmayın ki, bu illər ərzində Ermənistan əlini əlinin üzərinə qoyub oturmayıb. Ermənilər ən azından 5 rayonu boşaltmağa hazır olduqlarını bildirsələr də, biz paradoksal mənzərə ilə qarşılaşırıq — onların yaratdıqları çox sayıda blindajlar, yeraltı keçidlər, minalanmış tarlalar və s. Bütün bunlar nəyə lazım idi? Madam ki, ermənilər bizə o əraziləri geri qaytarmağa hazırlaşırdılar, nəyə lazım idi bu həngamə?

Azərbaycanın çağırdığı sülh danışıqlarına qoşulmaq üçün dəfələrlə şans yaranıb və siz bunu çox gözəl bilirsiniz. Daha sərfəli şərtlərdə sülh imzalamaq əvəzinə ermənilərin başı blindajları, minalanmış tarlaları qurmağa və Azərbaycan ərazisində olan hər şeyi məhv etməyə qarışmışdı. 26 il öncə xalqımız öz torpaqları gözəl və çiçəklənən vəziyyətdə qoyub. Ağdam, Füzuli və bu kimi şəhərlərimiz muzeylər, mədəniyyət abidələri, məbədlərlə zəngin idi. Bu gün isə bütün bunların əksini görəndə, özünü “ən qədim” millət kimi tanıdan varlıqların torpaqlarımızda olan hər şeyin 99 faizini necə məhv etdiyi görürük. Axı buna nə ad vermək olar?

Biz çiçəklənən, daim inkişaf edən, güclü ölkəyik və məhz birliyimiz sayəsində düşmənə qalib gəldik. Nə Türkiyə, nə də Rusiya, bunu biz özümüz bacardıq, bizim ordumuz, bizim əsgərimiz!"

Türkiyə, əlbəttə, Azərbaycana misilsiz mənəvi-siyasi dəstək göstərir və qardaş ölkənin bu siyasi dəstəyi olmasa, həddən artıq böyük siyasi təzyiqlərin öhdəsindən gəlmək çətin olardı. Ancaq erməni siyasətçiləri və təbliğatçıları Türkiyənin bu savaşda hərbi baxımdan iştirakını, hətta türk kommandosların birbaşa savaşa girdiyini iddia etməyə çalışır. Bu baxımdan “Nə Türkiyə, nə də Rusiya, bunu biz özümüz bacardıq, bizim ordumuz, bizim əsgərimiz” sözləri ilə Türkiyənin Vətən müharibəmizdə hərbi iştirakının təkzib edilməsi istəyi anlaşılandır.
Azərbaycana qarşı muzdlu döyüşən terrorçuları ələ verən sübutlar - Videoİkinci Qarabağ müharibəsində Azərbaycana qarşı döyüşən terrorçular kustar üsulla hazırlanmış raket atan qurğulardan istifadə ediblər.

“Report”un işğaldan azad olunmuş Füzuli rayonuna ezam olunmuş əməkdaşlarının lentə aldığı görüntülərdə düşmənin qoyaraq qaçdığı döyüş postlarında kustar üsulla hazırlanmış raket atan qurğu və onlarla mərmi aşkarlanıb.

Ərazilərin Minalardan Təmizlənməsi üzrə Milli Agentliyin (ANAMA) əməkdaşı Musa Məmmədovun bildirdiyinə görə, bu mərmilər və onun atılması üçün hazırlanmış qurğular Suriyada gedən döyüşlərdə İŞİD və PKK terrorçular tərəfindən istifadə edildiyi məlumdur.

Bu da onu bir daha sübut edir ki, ermənilər tərəfindən Azərbaycana qarşı muzdlu terrorçular da döyüşüb.
Düşmənin ələ keçirilən texnikaları Bakıya gətirilir - FotoAzərbaycan Ordusunun İkinci Qarabağ müharibəsi zamanı düşməndən hərbi qənimət kimi götürdüyü döyüş texnikaları dəmir yolu vasitəsi ilə Bakıya gətirilir.

Avrasiya.net xəbər verir ki, bu barədə sosial şəbəkələrdə fotolar yayılıb.

Yaxın günlərdə həmin texnikaların Azadlıq meydanında nümayiş etdiriləcəyi bildirilir.