Putin Əliyevə zəng etdiNoyabrın 26-da Rusiya Federasiyasının Prezidenti Vladimir Putin Azərbaycan Respublikasının Prezidenti İlham Əliyevə zəng edib.

Avrasiya.net xəbər verir ki, bu barədə Azərbaycan Prezidentinin Mətbuat Xidməti məlumat yayıb.

Telefon söhbəti zamanı Rusiya, Azərbaycan və Ermənistan liderləri arasında üçtərəfli razılaşmaların kompleks şəkildə həyata keçirilməsi üzrə qarşıdakı addımlar müzakirə edilib, regionda nəqliyyat və iqtisadi əlaqələrin açılmasının praktiki məsələləri vurğulanıb.
Erməni silahlı dəstələrinə məxsus kvadrokopter ələ keçirilibRusiya sülhməramlılarının müvəqqəti yerləşdirildiyi Azərbaycan ərazisindəki qeyri-qanuni erməni silahlı dəstələrinə məxsus kvadrokopter noyabrın 26-sı saat 11:28-də Xocalı rayonunun Şuşakənd yaşayış məntəqəsi, 11:46-da isə Ağdam rayonunun Yeddi Xırman yüksəkliyi ətrafında bölmələrimizin mövqeləri üzərində kəşfiyyat məqsədli uçuşlar həyata keçirməyə cəhd göstərib.

Bu barədə Avrasiya.net-ə Müdafiə Nazirliyindən (MN) bildirilib.

"Bölmələrimizin sayıqlığı nəticəsində aşkar edilən kvadrokopter xüsusi üsulla endirilərək ələ keçirilib", - məlumatda vurğulanıb.
Mən gecə rahat yatıram və oyaq qalmıram - PrezidentAzərbaycan iki ildən çoxdur ki, o işğalın ağırlığını öz üzərindən atıb.

Avrasiya.net xəbər verir ki, bunu Prezident İlham Əliyev noyabrın 25-də ADA Universitetində keçirilən “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda bildirib.

"Mən gecə rahat yatıram və oyaq qalmıram. Yox, həqiqətən belədir. Elədir ki, var. Gecə oyanmaq üçün mənə səbəb yoxdur. Xüsusən də indi, belə bir dinc şəraitdə. Çünki Azərbaycan iki ildən çoxdur ki, o işğalın ağırlığını öz üzərindən atıb. Eskalasiya riski yoxdur, çünki ola bilsin, siz eşitmisiniz ki, işğal zamanı Ermənistanın yüksəkrütbəli rəsmiləri bizi “yeni ərazilər uğrunda yeni müharibə” ilə hədələyirdilər. Bu, hazırda cənab Paşinyanın həbs etdirdiyi Ermənistanın keçmiş müdafiə nazirinin kəlamıdır. Lakin həmin sözlər Azərbaycana açıq təhdid idi. Başqa çox yekəxana şərhlər də səsləndirildi ki, əgər müharibə başlasa, erməni tankları Bakının küçələrində olacaqlar. Əslində, bu lovğa şərhlər reallığa çevrildi. Erməni tankları Bakının küçələrinə gəlib çıxa bildi, amma hərbi parad üçün gətirdilər. İndi isə onlar Hərbi Qənimətlər Parkındadır.

Beləliklə, bu cür möhtəşəm Qələbədən sonra, gecəni yatmaq üçün istifadə etməməyin səbəbi yoxdur", - dövlət başçısı qeyd edib.
Böyük özəlləşmə başlamalıdırİlin sonunadək 1 milyon 200 min məhkəmə qərarının icraya yönəldilməsi gözlənilir: Bu, kifayət qədər böyük rəqəmdir. Ona görə də maliyyə naziri Samir Şərifova müraciət edirəm. Vəsait ayrılmalıdır ki, məhkəmə qərarları icra olunsun. Əgər məhkəmə qərarları tam şəkildə icra olunmursa, bu, investorları da ölkəyə investisiya qoymağa çəkindirəcək.

Avrasiya.net xəbər verir ki, bu sözləri millət vəkili Qüdrət Həsənquliyev Milli Məclisin planera iclasında büdcə zərfinin müzakirəsi zamanı deyib.

Q.Həsənquliyevin Sovet İttifaqının iqtisadi islahatların həyata keçirilməməsi, böyük özəlləşməyə gedilməməsi səbəbindən dağıldığını xatırladıb:

“Bu gün Azərbaycanda iqtisadiyyatın əsas sahələri dövlətin nəzarətindədir. Biz böyük özəlləşdirməyə getməliyik. Biz büdcəni daha da artıra bilərik. Amma böyük islahatlara gedilməsə, nəticə bizim arzuladığımız kimi olmayacaq”.
"Azərbaycan daim xarici siyasətdə aktivlik göstərmiş bir dövlətdir"Azərbaycan prezidenti İlham Əliyevin son dönəmlərdə kifayət qədər fəal xarici siyasət yürütməsi, dövlətimizin milli maraqlarının müdafiəsi istiqamətində gördüyü işlər təqdir olunur. Əslində Azərbaycan daim xarici siyasətdə aktivlik göstərmiş bir dövlətdir. Sadəcə olaraq Qarabağ probleminin mövcudluğu bizim imkanlarımızın və enerjimizin daha çox bu istiqamətə sərf olunması ilə nəticələnirdi.

Bunu "Xalq Cəbhəsi"nə Müasir İnkişaf Birliyinin sədri, siyasi şərhçi Mübariz Göyüşlü deyib.

Siyasi şərhçi vurğulayıb ki, hazırda isə biz bu problemi uğurla həll etmiş Azərbaycanın bölgənin və dünyanın problemlərinin həllində aktiv rol aldığını müşahidə edirik: "Azərbaycanın digər dövlətlərlə istər ikitərəfli, istər çoxtərəfli formatlarda gördüyü işlər sülhə, sabitliyə ciddi töhfədir. Dövlət maraqlarını xarici siyasətdə peşəkarlıqla müdafiə və təmin edən İlham Əliyevin davranışı təlatümlü dünyamızda ölkəmizin çətinliklərdən problemsiz çıxmasına səbəb olur. Dövlət başçısının Brüssel, Əlcəzair, Serbiya səfərləri məntiqi çıxışlar, önəmli məqamların gündəmə gətirilməsi, siyasi, hərbi, iqtisadi sahələrdə imzaladığı sənədlər Azərbaycanın uğurlu diplomatik gedişləri kimi qiymətləndirilə bilər.

Geosiyasi məkanda böyük dövlətlərin siyasi maraqlarını dövlətimizin maraqları ilə uzlaşdırmağı bacaran Azərbaycan prezidenti örnək sayıla biləcək gedişlər etməkdədir. Azərbaycan regional və qlobal anlamda baş verən proseslərdə ciddi töhfə verməkdədir. Ölkəmiz bu işləri Qoşulmama Hərəkatının sədri, Türk Dövlətləri Təşkilatının həmtəsisçisi, İslam Əməkdaşlıq Təşkilatı və s. bu kimi önəmli beynəlxalq qurumlarda olan imkanları vasitəsilə gündəmə daşıyır. Bütün bu uğurlu diplomatik gedişlər gələcəkdə Azərbaycanın daha geniş imkanlar əldə etməsinə gətirib çıxaracaq".
Fransa sülh danışıqlarında iştirak edə bilməz - İlham ƏliyevPraqa görüşündən bir həftədən də az sonra Fransa Prezidenti Makron müsahibəsində Azərbaycanı tənqid etdi və bizi törətmədiyimiz işlərdə ittiham etdi. Daha sonra Fransa Senatının tamamilə qəbuledilməz və təhqiredici məlum qətnaməsi qəbul olundu. Fransa Milli Assambleyasının daha bir anti-Azərbaycan qətnaməsi qəbul etməsi də gözlənilir. Bunun ardınca Fransanın Frankofoniya Sammiti vasitəsilə bizə qarşı hücum cəhdi oldu. Bu, qəbuledilməzdir, çünki Frankofoniya humanitar təsisatdır.

Avrasiya.net xəbər verir ki, bunu Prezident İlham Əliyev noyabrın 25-də ADA Universitetində keçirilən “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda çıxışında deyib.

Dövlətimizin başçısı qeyd edib ki, qətnamənin mətninin Fransanın Ermənistanla birgə hazırladığı, ittiham və uydurma dolu ilkin versiyası Azərbaycan tərəfində var. Lakin bizim təkcə Qoşulmama Hərəkatında deyil, Avropada da dostlarımız var. Beləliklə, bu anti-Azərbaycan qətnaməsi formallıqdan başqa bir şey deyil.

“Bütün bunlar nəzərə alınsa, aydındır ki, Fransa sülh danışıqlarında iştirak edə bilməz. Bu bizim deyil, onların günahıdır. Çünki heç vaxt nə ABŞ, nə də Rusiya rəsmi səviyyədə tərəfkeşlik etməyib. Bu o deməkdir ki, 7 dekabr görüşü baş tutmayacaq və biz digər alternativləri nəzərdən keçirəcəyik. Görək, vasitəçi rolunu kim həyata keçirəcək və bu hansı platformada baş tutacaq?”, - deyə Prezident İlham Əliyev qeyd edib.

Dövlətimizin başçısı vurğulayıb ki, o, Paşinyanın Brüssel görüşündə Makronun iştirak etməsi tələbini irəli sürməsini sülh danışıqlarını pozmaq cəhdi kimi qiymətləndirir.
"Azərbaycanın xarici siyasətdəki uğurları ölkəmizin beynəlxalq nüfuzunu daha da artırır"Azərbaycan bir çox mötəbər qurumlarla əməkdaşlıq edir. Onların sırasında dünya siyasətinin axarını müəyyənləşdirən, iqtisadi, eləcə də humanitar-sosial əlaqələri intensivləşdirən təşkilatlar var. Dövlət müstəqilliyimizin bərpasından bu günədək həyata keçirilən hərtərəfli islahatlar sayəsində beynəlxalq münasibətlərin güclü aktoruna çevrilən Azərbaycan bu gün etibarlı tərəfdaş kimi nüfuz qazanıb. Prezident İlham Əliyevin yürütdüyü siyasət bu nüfuzu hər keçən gün daha da artırır.

Bunu "Xalq Cəbhəsi"nə iqtisad elmləri fəlsəfə doktoru Xaliq Məmmədov deyib.

O, qeyd edib ki, son dövrlər Azərbaycan Prezidenti İlham Əliyev müxtəlif regionları əhatə edən fəal xarici siyasət kursu həyata keçirir. Bir region çərçivəsində ikitərəfli və bəzi hallarda çoxtərəfli formatlar kontekstində yürüdülən adi diplomatiya bir çox ölkəyə xas olan xüsusiyyətdir. Prezident İlham Əliyevin diplomatik fəallığı isə multiregional və strateji xarakterlidir, böyük coğrafiyada Azərbaycanın maraqlarına uyğun tərəfdaşlıq əlaqələrinin formalaşmasını ehtiva edir, siyasi, hərbi, iqtisadi və humanitar sahələri əhatə edən yeni hədəflər müəyyənləşdirir:

"Müasir dövrdə Azərbaycan Cənubi Qafqaz regionunda əsas söz sahibi olan dövlət kimi çətin və mürəkkəb geosiyasi şəraitdə müstəqil xarici siyasət həyata keçirir. Bu gün Azərbaycan regionun yeganə ölkəsidir ki, düşünülmüş daxili və xarici siyasəti ilə həm inkişaf edir, iqtisadi sistemini təkmilləşdirir, həm də regional təhlükəsizliyin təmin olunması istiqamətində ardıcıl və sistemli addımlar atır. Azərbaycanın son illər ərzində xarici siyasət strategiyasının uğurla həyata keçirilməsi ölkəmizin dünya miqyasındakı nüfuzunu xeyli artırıb. Bu illər ərzində Azərbaycan daim dəyişən beynəlxalq mühitə uyğunlaşmaqla, eyni zamanda, regional liderə çevrilib".

X.Məmmədov onu da vurğulayıb ki, Azərbaycanın daha geniş çərçivədə Asiya ölkələri ilə əməkdaşlığını inkişaf etdirməsi də xarici siyasətin uğurlarından biridir: "Prezident İlham Əliyevin oktyabrın 13-də Astanada Asiyada Qarşılıqlı Fəaliyyət və Etimad Tədbirləri üzrə Müşavirənin 6-cı Zirvə Toplantısının plenar iclasında iştirakı, 2022-ci il sentyabrın 16-da Şanxay Əməkdaşlıq Təşkilatının Sammitində iştirakı dövlət başçımızın dünya miqyasında nüfuzunun və dövlətimizin başçısına göstərilən yüksək ehtiramın əyani təsdiqidir. Azərbaycanın ŞƏT ölkələri, xüsusilə Çinlə əlaqələrini inkişaf etdirməsi, Şərq-Qərb nəqliyyat-tranzit dəhlizində önəmli yer tutması rəsmi Bakının dünyadakı nüfuzunin göstəricisidir. Ölkəmizin əldə etdiyi bütün uğurlar Prezident İlham Əliyev düşünülmüş, uzaqgörən daxili və xarici siyasətinin nəticəsidir.".

X.Məmmədov Azərbaycanın Cənubi Qafqazda yaranmış yeni reallıqla uzlaşan siyasətinə də toxunub. Bildirib ki, Prezident İlham Əliyevin Gürcüstana səfəri, Azərbaycan-Gürcüstan-Ermənistan formatı təşəbbüsünün irəli sürülməsi buna əyani sübutdur: "Bundan başqa, Brüssel formatı, Avropa İttifaqı ilə əlaqələrin inkişafı, Aİ-yə üzv olan 10 ölkə ilə Azərbaycanın strateji tərəfdaş olması da rəsmi Bakının diplomatiyasının uğurları sırasındadır. 2022-ci il oktyabrın 6-da Praqada Prezident İlham Əliyevin Avropa qitəsində sülh və təhlükəsizlik” mövzusunda dəyirmi masada iştirakı, Balkan ölkələri ilə əlaqələrin inkişaf etdirilməsi, Albaniya və Serbiyaya səfərləri, enerji sahəsində əməkdaşlıq, Avropa ölkələrinin enerji təhlükəsizliyinin təmin olunmasında Azərbaycanın rolunun yüksəlməsindən xəbər verir. Elə bu ayın ilk günündə Ərəb Dövlətləri Liqasının Əlcəzair Xalq Demokratik Respublikasının paytaxtı Əlcəzair şəhərində keçirilən 31-ci Zirvə toplantısına Azərbaycan Prezidenti İlham Əliyevin dəvət olunması bu təşkilatla ölkəmiz arasında mövcud əlaqələrin yüksək səviyyədə olduğundan xəbər verir. Dövlətimizin başçısı bu tədbirdə çıxışı zamanı yenə də Azərbaycan həqiqətlərini dünyaya çatdırdı. Bundan başqa, türk dövlətləri ilə tərəfdaşlığın inkişaf etdirilməsi, tərəfdaşlıqdan inteqrasiyaya keçid, Türk Dövlətləri Təşkilatının inkişafı, güçlənməsində rəsmi Bakının xüsusi rolu var. Azərbaycanın bu təşkilatda xüsusi yeri və rolu bütün türk dünyasının inkişafı və həmrəyliyi üçün faydalıdır. Mərkəzi Asiya ölkələri ilə tərəfdaşlıq əlaqələrinin inkişaf etdirilməsində də Azərbaycanın xüsusi fəallıq göstərib. Prezident İlham Əliyevin son iki ayda bu ölkələrə səfərləri, qarşılıqlı siyasi, iqtisadi və humanitar əlaqələrin inkişafına xidmət edən fəal siyasətin nümunəsidir. İsraildə səfirliyin və Fələstində nümayəndəliyin açılması multiregional siyasətin, ardıcıllıq və məqsədyönlülüyün təzahürüdür".

X.Məmmədov sonda vurğulayıb ki, diplomatiyamızın uğurları, Azərbaycanın beynəlxalq mövqeyinin güclənməsi Prezident İlham Əliyevin düşünülmüş, strateji hədəfləri aydın olan və məqsədyönlü şəkildə, ardıcıl həyata keçirdiyi xarici siyasət kursunun nəticəsidir.
Prezidentdən İrana: Bu sualın cavabı var?Azərbaycan ərazilərinin işğalı dövründə İran silahlı qüvvələri Azərbaycan sərhədinin Ermənistan tərəfindən işğal olunmuş hissəsində heç vaxt heç bir təlim keçirməyib. Onlar bunu edə bilərdilər. Azərbaycan sərhədinin 132 kilometri işğal altında idi. Bu da Azərbaycanla İranın sərhədidir. Bəs niyə bu sərhəddə hərbi təlimlər keçirmədilər?

Bunu Azərbaycan Prezidenti İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” adlı beynəlxalq konfransında çıxışı zamanı deyib.

“İran rəsmiləri, o cümlədən yüksək rütbəli şəxslər Ermənistanın ərazi bütövlüyünün İran üçün “qırmızı xətt” olduğunu bildirir. Niyə onların heç biri bizim haqqımızda da danışmır? 30 il ərazilərimiz işğal altında olub. İran rəsmilərindən Azərbaycanın ərazi bütövlüyünün İran üçün “qırmızı xətt” olduğunu eşidən varmı? Yox. Bu, Azərbaycan xalqının verdiyi sadə sualdır. Tək mən yox”, - Prezident bildirib.
Əliyev elan etdi: Bu görüş baş tutmayacaq!Ermənistanın Baş naziri Nikol Paşinyanla dekabrın 7-də Brüsseldə keçirilməsi planlaşdırılan görüş baş tutmayacaq.

Avrasiya.net xəbər verir ki, bunu Azərbaycan Prezidenti İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” adlı beynəlxalq konfransında çıxışı zamanı deyib.

“Brüsseldəki görüş dekabrın 7-də baş tutmalı idi. Amma dünən Hikmət Hacıyev mənə Şarl Mişelin ofisindən onunla əlaqə saxlandığını bildirdi və dedi ki, Ermənistanın Baş naziri Nikol Paşinyan görüşə yalnız Fransa Prezidenti Makronun iştirak edəcəyi təqdirdə razıdır. Bu o deməkdir ki, bu görüş baş tutmayacaq”, - Prezident bildirib.
Qarabağ probleminin həlli Ulu Öndər Heydər Əliyevin siyasi vəsiyyəti idiBildiyimiz kimi noyabr ayının 21-də Heydər Əliyev Mərkəzində Yeni Azərbaycan Partiyasının yaradılmasının 30 illiyi münasibətilə tədbir keçirilmişdir. Yubiley tədbirində çıxış edən Azərbaycan Respublikasının Prezidenti, Yeni Azərbaycan Partiyasının Sədri İlham Əliyev cənabları Yeni Azərbaycan Partiyasının yaranması tarixindən və Ulu Öndər Heydər Əliyevin çoxşaxəli fəaliyyətindən geniş bəhs etmişdir. Cənab Prezident öz çıxışında əsası Ümummilli Liderimiz tərəfindən qoyulmuş Yeni Azərbaycan Partiyasının müstəqil dövlətçilik tariximizdə oynadığı roldan danışaraq qeyd etmişdir ki, güclü lider ətrafında yaradılan Yeni Azərbaycan Partiyası qısa müddət ərzində cəmiyyətin ən sağlam qüvvələrini öz ətrafında sıx birləşdirərək ümumxalq partiyasına çevrilə bilmişdir. Yeni Azərbaycan Partiyasının qısa müddətdə xalqın sevimli partiyasına çevrilməsinin isə tək bir səbəbi var idi - xalqın partiyanın sədrinə olan sevgisi, inamı. Çünki zaman göstərdi ki, xalq Ulu Öndər Heydər Əliyevə arxalanmaqla, onun ətrafında sıx birləşməklə öz gələcəyini təmin etmiş oldu. Taleyimizin keşməkeşli, təlatümlü və sınaqlı dövründə Ulu öndər Heydər Əliyevin xalqın tələbi və arzusu ilə hakimiyyətə ikinci dəfə gəlişi bu acınacaqlı mənzərəni tamamilə dəyişdi. Qısa vaxt ərzində dərin böhrandan çıxış yolları tapıldı. Ölkə vətəndaş müharibəsi alovundan, parçalanıb dünya xəritəsindən silinmək təhlükəsindən qurtuldu. Müstəqilliyimiz daimi və dönməz prosesə çevrildi. Uzunmüddətli sarsılmaz sabitlik yaradıldı.

Ümummilli Liderin ölkəmizə rəhbərlik etdiyi 1993-2003-cü illərdə Azərbaycanda elə bir sahə olmadı ki, diqqətdən kənarda qalsın. Xüsusi olaraq qeyd etməliyik ki, Qarabağ məsələsinin həlli Ulu Öndərin fəaliyyətində ən əsas istiqamətlərdən birini təşkil edirdi. Lakin Ümummilli Liderimizin vəfatı onun ən böyük arzusunun reallaşmasına imkan vermədi. 2003-cü ilin oktyabrın 15-də keçirilən prezident seçkilərində namizədliyinin irəli sürülməsinə razılıq vermiş Heydər Əliyev səhhətində yaranmış problemlərlə əlaqədar seçkilərdə iştirak etməkdən imtina etmişdir. Ulu öndər xalqa ünvanladığı müraciətdə qeyd etmişdi ki, “sizləri mənim siyasi varisim, Yeni Azərbaycan Partiyası sədrinin 1-ci müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”. Ulu öndərin bu müraciətində söylədiyi fikirlərin Azərbaycan cəmiyyətində bu gün real təsdiqini tapması bir daha onun nə qədər uzaqgörən və dahi siyasətçi olduğunun bariz sübutudur.

Cənab Prezident öz nitqində bu barədə danışaraq qeyd etmişdir ki, “Ulu Öndər Heydər Əliyev öz siyasi vəsiyyətində bir şey də demişdir. Artıq bunu dəfələrlə demişəm, Azərbaycan xalqı da bilir ki, başa çatdıra bilmədiyimiz işləri davamçılarımız başa çatdıracaq. Onların arasında yəqin ki, mən belə hesab edirəm, ilk növbədə, Qarabağ probleminin həllini nəzərdə tuturdu. Biz, onun davamçıları bu problemi bütün işlərimizin mərkəzinə qoyduq. Yəni, hər bir addım, hər bir təşəbbüs, hər bir sərmayə, hər bir beynəlxalq təmas bu məqsədi güdürdü ki, bu, bizi müqəddəs hədəfimizə yaxınlaşdırır, yoxsa uzaqlaşdırır?! Ona görə bütün işlərimizin mahiyyəti məhz bu idi - Qarabağı azad etmək, tarixi ədaləti bərpa etmək. Biz bu hədəfə doğru gedirdik. Bizim yolumuz çox çəkdi. Ancaq elə gedib, elə nöqtə vurmalı idik ki, bu, birdəfəlik olsun. Biz avantüraya heç vaxt gedə bilməzdik. Biz səhv addım, yaxud da ki, vaxtsız addım ata bilməzdik. Biz hər şeyi ölçüb-biçib öz gücümüzü, eyni zamanda, digər amilləri nəzərə alaraq ən düzgün vaxt seçməli idik, ən düzgün vaxt üçün ən yaxşı vəziyyətdə olmalı idik. Xalqımız Ordumuzla tam birləşdi. Ona görə biz hamımız deyirik ki, bu, ümumxalq Qələbəsidir. Çünki xalq-iqtidar bir yumruq kimi birləşdi və cəmi 44 gün ərzində biz istədiyimizə nail olduq, tarixi ədaləti bərpa etdik, düşməni torpaqlarımızdan qovduq. 8 noyabr 2020-ci il hamımızın yaddaşında əbədi qalacaq, o cümlədən mənim. O vaxt Ulu Öndərin məzarını ziyarət etdim, ondan sonra şəhidlərin qəbrini ziyarət etdim. Şəhidlər xiyabanında Azərbaycan xalqına Şuşa müjdəsini verdim. Ulu Öndərin məzarı önündə özümə dedim ki, bu vəsiyyət də, bu sonuncu vəsiyyət də yerinə yetirildi”.

Beləliklə Azərbaycan Respublikasının Prezidenti, partiyamızın Sədri İlham Əliyev cənablarının rəhbərliyi ilə 44 günlük Vətən müharibəsində əldə etdiyimiz tarixi zəfərlə Azərbaycan xalqının, Ulu Öndər Heydər Əliyevin ən mürəkkəb və ən çətin, eyni zamanda həm də ən ali məqsədini reallaşdırmış olduq.

Rəşad Rəhmanov
Siyəzən şəhər 2 saylı tam orta məktəbin direktoru