Bu günlərdə Ermənistanın Baş naziri Nikol Paşinyan komanda yoldaşları ilə söhbətində belə tezislər irəli sürüb ki, Rusiya bizim suverenliyimizi əlimizdən almaq istəyir, ona görə də biz onunla sağollaşıb Avropa və Amerikaya üz tutmalıyıq.

Bu barədə “Joxovurd” qəzeti məlumat yayıb.

“Hazırda hakimiyyət ancaq antirusiya əhval-ruhiyyəsini yayır. Paşinyanın antirusiya təbliğatından reallıq hissini itirərək Kommunist Partiyasının üzvləri belə Rusiya ilə bütün əlaqələri yavaş-yavaş kəsib, avropalılara və amerikalılara sevgilərini nümayiş etdirməli olduqlarını gizlətmirlər. Maraqlıdır, iqtisadiyyatımızın böyük hissəsi Rusiyanın əlindədirsə və Rusiya sərhədçiləri Ermənistanın suveren ərazisinə nəzarət edirsə, onlar Rusiya ilə necə vidalaşmaq istəyirlər? Təbii ki, balanslaşdırılmış siyasət və dünyanın fövqəlgücləri ilə öz maraqlarını irəli sürmək fantastik bir şeydir, lakin bunun üçün ilk növbədə zəka və bacarıq lazımdır”, - məlumatda deyilir.

Azərbaycanda akkreditə olunmuş diplomatik korpusun hərbi attaşelərinin Xocavənd rayonunun Edilli kəndinə səfəri başlayıb.

Avrasiya.net Report-a istinadən xəbər verir ki, onlar kənddə aşkarlanmış növbəti kütləvi məzarlığa baş çəkəcəklər.

Müvafiq dövlət qurumlarının əməkdaşları ölkəmizdə akkreditə olunmuş diplomatik korpusun hərbi attaşelərinə ərazidə aparılmış qazıntı işləri, tapılmış qalıqlar və bundan sonra görüləcək işlərlə bağlı ətraflı məlumat verəcəklər.

Qeyd edək ki, bir neçə gün bundan öncə Xocavənd rayonunun Edilli kəndində aşkarlanmış növbəti kütləvi məzarlıqda 12 nəfərə aid qalıqların üzərlərində və ətrafda tapılan əşyalardan onların hərbçi olduğu ehtimal edilir.

Bundan başqa, aşkarlanan qalıqlardan görünür ki, həmin şəxslər ölməzdən əvvəl əlləri və ayaqları məftil və ya kəndirlə bir-birlərinə bağlanıb.

***

Azərbaycanda akkreditə olunmuş diplomatik korpusun hərbi attaşeləri Xocavənd rayonunun Edilli kəndində aşkarlanmış növbəti kütləvi məzarlığa baş çəkiblər.

Onlara müvafiq dövlət qurumlarının əməkdaşları kənd ərazisində aparılmış qazıntı işləri, tapılmış qalıqlar və bundan sonra görüləcək işlərlə bağlı ətraflı məlumat veriblər.

Qeyd edilib ki, bir neçə gün öncə aşkarlanmış kütləvi məzarlıqda 12 nəfərə aid qalıqların üzərlərində və ətrafda tapılan əşyalardan onların hərbçi olduğu ehtimal edilir.

Məlumata görə, aşkarlanan qalıqlardan görünür ki, həmin şəxslər ölməzdən əvvəl əlləri və ayaqları məftil və ya kəndirlə bir-birinə bağlanılıb.

Vurğulanıb ki, müvafiq qaydalara uyğun olaraq həmin qalıqlar götürüləndən sonra qazıntı işləri yenə də davam etdiriləcək. Çünki aşkarlanan qalıqların altında yenilərinin də olduğu ehtimal edilir.

Daha sonra bildirilib ki, Edilli kəndinə daxil digər ərazilərdə də qazıntı işləri aparılacaq.

"İsrailin müdafiə naziri Benyamin Qansın Azərbaycana səfərinin məqsədi ölkələrarası və beynəlxalq əməkdaşlıqdır. Bu səfərə hansısa don geyindirməyə çalışmaq sadəcə, istehza doğurur".

Bunu "Report"a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov deyib.

O, İran Silahlı Qüvvələrinin Baş Qərargah rəisi general-leytenant Məhəmməd Hüseyn Baqerinin Azərbaycanın müdafiə naziri general-polkovnik Zakir Həsənova zəngindən də bəhs edib.

Bunun dövlətlərarası olan normal bir praktika olduğunu diqqətə çatdıran komitə sədri bildirib ki, dövlət başçıları, nazirlər və ümumiyyətlə rəsmi şəxslər arasında mütəmadi danışıqlar olur: "Bunu qeyri-adi bir hadisə kimi qəbul etmək lazım deyil. Lakin İran mətbuatının Məhəmməd Hüseyn Baqerinin Azərbaycanın müdafiə naziri Zakir Həsənova zəngini özlərinə sərf edən şəkildə təqdim etməsi təəssüf doğuran bir məsələdir. Azərbaycan müstəqil dövlətdir və müstəqil siyasət həyata keçirir. Dövlət olaraq heç kimə hesabat vermirik. Hansı dövlətlə nələri müzakirə etməsi isə Azərbaycanın daxili işidir".

Son bir neçə gündə Azərbaycana üç ölkənin - Səudiyyə Ərəbistanı, İsrail və Türkiyənin yüksək vəzifəli rəsmilərinin səfər etdiyini vurğulayan Z.Əsgərov bildirib ki, bunun adı beynəlxalq əməkdaşlıqdır və burada qeyri-adi heç nə yoxdur: "Bizim nazirlər də həmçinin xarici ölkələrə səfər edirlər. Lakin bu səfərlərə hansısa don geyindirməyə çalışmaq istehza doğurur. Azərbaycan heç kimə hesabat vermir və heç kim də bizdən hesabat tələb edə bilməz".

Politoloq Qabil Hüseynli isə bildirib ki, İran rejimi başdan-ayağa riyakarlıq içində üzür: "Ölkədə əhalinin az qala 25 faizi üsyanda iştirak edir və rejim başını itirib. Görünür, İsrail müdafiə nazirinin Azərbaycana rəsmi səfəri sanki Tehranda ildırım effekti yaradıb".

İsraillə İran arasındakı münasibətlərin gərginliyindən danışan politoloq bu gərginliyin əsas səbəbkarı kimi İranı göstərib: "Müşahidələrimiz əsasında demək mümkündür ki, İsrailin İrana qarşı kin-küdurəti də hiss olunmur. Nifrət təfəkküründən doğulan anormal hərəkətlər bu ölkənin xarici dövlətlərlə münasibətlərinə də mənfi təsir edir. Bu gün də Azərbaycana qarşı müəyyən ittihamlar irəli sürülür. Sözügedən səfərin heç bir üçüncü dövlətə aidiyyəti yoxdur və üçüncü bir dövlətin əleyhinə yönəlməyib. Azərbaycan qonşu dövlətlərin xarici siyasətinə qarışmır və öz qonşularından da adekvat davranışı tələb edir".

Qeyd edək ki, İsrailin müdafiə naziri Benyamin Qans oktyabrın 3-də Bakıya rəsmi səfər edib. O, Azərbaycanın müdafiə naziri general-polkovnik Zakir Həsənov və digər rəsmi şəxslərlə görüşüb.

Həmin gün Z.Həsənovla İran Silahlı Qüvvələrinin Baş Qərargah rəisi general-leytenant Məhəmməd Hüseyn Baqeri arasında telefon danışığı olub.

Heydər Əliyev tərəfindən müasir Azərbaycan dövləti qurularkən tolerantlıq siyasəti əsas meyar olaraq seçilmişdir və Azərbaycanda yaşayan qeyri müsəlmanlara‚ qeyri dinlərə və inanclara olduğu kimi‚ məhz yəhudilərə də hörmət və ehtiram göstərilmişdir.

Burada doğulan‚ yaşayan və xaricə‚ İsrailə köç edən yəhudilər hər zaman Azərbaycanı özünə vətən bilmiş və buraya son dərəcə doğma və sevgi ilə yanaşmaqdadır. Bunu yəhudi xalqının Azərbaycanda yaşayan və xaricə‚ İsrailə köç edən bir fərdində və nümayəndəsində aşkar görmək mümkündür.

Azərbaycan dövləti Heydər Əliyev tərəfindən qurularkən ali dəyərlərin mövcud olmasına‚ yəhudilərə göstərilən hörmət və ehtirama görə Azərbaycanın qurucusu Heydər Əliyev yəhudilərin və İsrailin böyük dostu adlandırılır. Azərbaycanın İsrail dövləti və Yəhudi lobbisi ilə münasibətlərin qurulması və əlaqələrin inkişaf etdirilməsi hələ dahi şəxsiyyət Heydər Əliyevin adı ilə bağlıdır. Məhz Heydər Əliyevin əsasını qoyduğu tolerantlıq ənənəsinə görə Yəhudilər Azərbaycanda son dərəcə dostluq və qadaşlıq şəraitində yaşayaraq buranı ana vətənləri hesab edirlər. Azərbaycanda yaşayan bütün qeyri-millətlər‚ qeyri-dinlər və inancların nümayəndələri kimi‚ yəhudilərə də göstərilən hörmət və ehtiram ənənəsi məhz Heydər Əliyevin parlaq və təqdirəlayiq tolerantlıq siyasətinin nəticəsidir.

Bu səbəbdən biz‚ İsrail Təhlükəsizlik Akademiyasının Azərbaycan Respublikasındakı Nümayəndəliyi olaraq‚ Azərbaycan Respublikasının Prezidenti‚ Zati-aliləri cənab İlham Əliyev tərəfindən 2023-cü ilin məhz "Heydər Əliyev İli" elan edilməsini çox vacib və əhəmiyyətli qərar hesab edirik. Qarşıdakı 2023-cü il‚ yəni "Heydər Əliyev İli" Azərbaycana xeyirli və uğurlu olsun. Azərbaycan və İsrail dövlətinin‚ Azərbaycan xalqı ilə yəhudi xalqının dostluğu və qardaşlığının daha da möhkəmlənməsini‚ sarsılmaz və əbədi olmasınə Tanrıdan diləyirik. AMİN.

İsrail Təhlükəsizlik Akademiyasının
Azərbaycan Respublikasındakı
Nümayəndəliyi

Azərbaycan Prezidentinin davamlı xarici siyasəti ölkəmizi daha nüfuzlu ölkələrdən birinə çevirməkdədir. Xarici səfərlər zamanı dövlət başçısına olan münasibət, qarşılanma marasimləri buun bariz nümunəsidir. Belə səfərlərdə biri də 30 sentyabr tarixində Bolqarıstanda rəsmi səfəridir. Səfər çərçivəsində aparılan görüşlər zamanı Prezident İlham Əliyev bir sıra məqamları diqqətə çatdırdı.

Bildirildi ki, bu gün Bolqarıstan və Azərbaycan iki dost və strateji tərəfdaş ölkələr kimi bir-biri ilə daha sıx əlaqədədirlər. 2015-ci ildə Bolqarıstanla Azərbaycan arasında imzalanmış strateji tərəfdaşlıq haqqında Birgə Bəyannamə əməkdaşlığımızın davamlılığını təmin edib. Bəyannamə əlaqələrimizi yüksək səviyyəyə qaldırmışdır və təsbit edilmiş bütün məsələlər həyatda öz əksini tapmışdır.

Ölkələrimiz arasındakı davamlı siyasi əlaqələr çərçivəsində nazirlər səviyyəsində çoxsaylı görüşlər keçirilib. Bir sıra məsələlər o cümlədən enerji təhlükəsizliyi məsələsi müzakirə edilib və bu yöndə əlavə addımlar atılacaqdır.

Cənab Prezident bildirmişdir ki, enerji təhlükəsizliyi məsələləri bütün dövrlərdə mühüm əhəmiyyət kəsb edir, ancaq indiki şəraitdə bu əhəmiyyət daha da artmışdır. Azərbaycan qazı artıq Bolqarıstandadır. Arşıda Bolqarıstana ixrac ediləcək Azərbaycan qazının həcminin artırılması nəzərdə tutulub.
Dünya və Avropa bazarlarına Azərbaycan uzun illərdir etibarlı tərəfdaş kimi xam nefti ixrac edir. Bu yöndə ölkəmiz əlindən gələni edirik ki, qaz hasilatını artıraraq öz tərəfdaşlarını təbii qazla təmin etsin.

Çıxış zamanı diqqət çəkilən əsas məsələlərdən biri də o idi ki, Yunanıstan-Bolqarıstan Qaz İnterkonnektoru layihəsi tarixi əhəmiyyətə malikdir. Bu interkonnektor həm Azərbaycan qazının Avropaya daha geniş miqyasda nəql olunmasına imkan verəcək, eyni zamanda, Avropa qitəsində enerji təhlükəsizliyinə də çox böyük faydası olacaqdır.

Eləcə də Avropa İttifaqı ilə Azərbaycan arasında imzalanmış enerji sahəsində strateji tərəfdaşlıq haqqında Memorandumunun böyük əhəmiyyəti var. Memoranduma əsasən, növbəti bir neçə ildə Azərbaycan Avropaya qaz ixracatını ən azı 2 dəfə artıracaqdır. Hazırda Azərbaycanın təsdiq edilmiş qaz ehtiyatları 2,6 trilyon kubmetrdir. Yeni və çoxşaxəli qaz nəqliyyat infrastrukturu ölkəmizə imkan verir ki, bir çox ölkələri təbii qazla təmin edək. Bu sahədə əldə edilmiş uğurlar gələcək planlar üçün də gözəl zəmindir.

Cənab İlham Əliyev onu da bildirdi ki, artıq SOCAR-ın Bolqarıstandakı ofisinin açılması vaxtı çatıb. Enerji sahəsində təkcə təbii qazın ixracı ilə işimizi bitmiş hesab etməməliyik. Elektrik enerjisinin ixracı və bu sahədə qarşılıqlı faydalı əməkdaşlıq, xam neftin Bolqarıstan istiqamətinə nəqli, habelə Bolqarıstanda enerji infrastrukturunun yenilənməsində SOCAR-ın imkanlarından istifadə olunacaqdır.

Önəmli məsələrdən biri də yeni geosiyasi vəziyyəti nəzərə alaraq nəqliyyat təhlükəsizliyin təmin olunmasıdır. Azərbaycan öz ərazisində çox müasir nəqliyyat infrastrukturu yaratmışdır - dəmir yolları, avtomobil yolları, yeni Beynəlxalq Dəniz Ticarət Limanı. Bütün bu infrastruktur obyektləri bir məqsədi güdür ki, Azərbaycan üzərindən tranzit yüklərin həcmi artsın.
Tranzit yüklərin həcmi 2022-ci ildə təqribən 50 faizə yaxın artmışdır. Gələcəkdə bu rəqəm daha da böyük olacaq. Ona görə Bolqarıstan və Azərbaycan nəqliyyatçıları indidən bir araya gələrək uzunmüddətli və genişmiqyaslı gələcək əməkdaşlıq haqqında fikir mübadiləsi aparacaqlar. O cümlədən yeni əməkdaşlıq imkanları araşdırılacaq. İqtisadiyyat və sərmayə sahələrində əməkdaşlığın dərinləşməsi üçün çox böyük imkanlar mövcuddur. Bolqarıstan şirkətləri Azərbaycanda daha genişmiqyaslı işlərin görülməsinə dəvət olunacaqdır. İşğaldan azad olunmuş ərazilər əməkdaşlıq üçün yeni imkanlar yaradır.

Əfqan Rzayev
Xətai rayon Gənclər və İdman idarəsinin rəisi

İranın Ali dini rəhbəri Əli Xamenei dünən İrandakı etirazlarla bağlı ilk dəfə rəsmi açıqlama verdi və “iğtişaşlar öncədən Amerika və İsrail tərəfindən təşkil edilib” dedi; İsrailin müdafiə naziri Azərbaycana gəldi və Bagiri Bakıya zəng etdi.

Bu üç hadisə İranın niyyətini ortaya çıxarır: etirazları xarici qüvvələrə bağlamağa çalışan Tehran Qantzın Bakıya səfərinə də bu kontekstdə baxır, yaxud bu səfəri Xameneinin “Amerika və İsrailin planıdır” iddiasını inkişaf etdirmək üçün fürsət bilir.

Xameneinin açıqlamasından sonra rejimin etirazları yatırmaq üçün maksimum gücdən istifadə edəcəyi aydın görünür, lakin “xarici qüvvələr” iddiasını əsaslandırmaq istiqamətində də çalışacaqlar.

Və bu prosesdə Azərbaycanın üzərinə gələcəkləri ehtimalı böyükdür: Qantzın Bakıya gəlişindən həm daxili etirazları “xaricə” bağlamaq, həm də sərhəd məsələsində Bakıya təzyiq etmək üçün isifadə edə bilərlər.

Bagirinin bir neçə gün öncə Azərbaycana qarşı təhdid xarakterli çıxışı da onun Bakıya zənginin xoş niyyət daşımadığı fikrini önə çıxarır.

1 oktyabr 2022-ci il tarixində Fransadakı Azərbaycan səfirliyinə qarşı bu ölkədəki radikal erməni qrupları tərəfindən törədilən növbəti vandalizm aktı ilə bağlı rəsmi Bakının Fransaya nota verməsini və bu ölkədən təzminat tələb etməsini Milli Həmrəylik Partiyası olaraq dəstəkləyir və alqışlayırıq!

Fransa hökuməti diplomatik əlaqələr haqqında 1961-ci il tarixli Vyana Konvensiyasından irəli gələn öhdəliklərini yerinə yetirmir və Azərbaycanın bu ölkədəki diplomatik nümayəndəliklərinin təhlükəsizliyi lazımi səviyyədə təmin olunmur. Ancaq bu o demək deyil ki, Fransanın bu cür saymazyana, məsuliyyətsiz davranışları cavabsız qalacaq. Biz ilk növbədə Birləşmiş Millətlər Təşkilatını (BMT) Fransa hökumətinə üzərinə götürdüyü öhdəlikləri, imzaladağı konvensiyaları xatırlatmağa çağırırıq.

Eyni zamanda Fransa prezidenti Emmanuel Makrona tövsiyyə edirik ki, qulağının dibində - Parisin mərkəzində yerləşən Azərbaycanın diplomatik nümayəndəliklərinə, o cümlədən Azərbaycan Mədəniyyət Mərkəzinə qarşı onun sevimli erməni əsilli seçiciləri tərəfindən indiyə qədər törədilmiş zorakılıq aktlarının, vandalizm hərəkətlərinin hərtərəfli araşdırılması və təqsirkar şəxslərin məsuliyyətə cəlb edilməsi üçün hərəkətə keçsin, Fransanın "cəngəlliklər vadisi" yox, gerçəkdən də bir hüquq dövləti, sivil ölkə olduğunu əməldə təsdiqləsin.

Azərbaycan Fransanın Bakıdakı səfirliyinin və digər nümayəndəliklərinin mühafizəsini qüsursuz şəkildə həyata keçirdiyi kimi Fransa hökuməti də Azərbaycanın diplomatik nümayəndəliklərinin mühafizəsini lazımi qaydada təmin etməyə borcludur. Bu baxımdan, biz Parisdəki səfirliyimizin inzibati binasına vurulmuş ziyanın aradan qaldırılması və müvafiq təzminatın ödənilməsinin təmin olunmasını tələb edən hökumətimizin yanındayıq.

Erməni vandallarının və təxribatçılarının Fransada at oynatması bu ölkə üçün ayıbdır. Dünyanın "demokratiya beşiyi" və "hüquq dövləti" adına iddialı olan Fransada Azərbaycanın diplomatik nümayəndəliklərinə qarşı zorakılıq və vandalizm hərəkətlərinə birdəfəlik son qoyulmalıdır!

Əlisahib Hüseynov,
Milli Həmrəylik Partiyasının sədri

Azərbaycan Silahlı Qüvvələrinin hərbçilərinin erməni əsgərlərini güllələməsi ehtimal olunan videonun dünya KİV-lərinin ilk səhifələrinə bu qədər tez düşməsi ümumilikdə Qərb hökumət kabinetlərində oturan bəzi rəhbərlərinin Bakıya qarşı açıq-aşkar qərəzli olduğunu göstərir.

Bu barədə Axar.az-a müsahibədə PolitRUS ekspert-analitik şəbəkəsinin rəhbəri, tanınmış rusiyalı politoloq Vitali Arkov bildirib.

“Onlarla video var ki, erməni əsgərləri Azərbaycan hərbçilərinin cəsədləri üzərində ağlasığmaz vəhşiliklər törədirlər. Bəs nəyə görə Qərb KİV-i “medalın bu tərəfini” dərc etmir? Qərb mediası səkkiz il Donbasda davam edən Ukraynanın hücumunu da görməzdən gəldi. Orada yüzlərlə uşaq, qadın və qoca öldürülüb. Amma bütün Qərb mediası, hüquq müdafiəçiləri yalnız Kiyev hakimiyyətinin maraqlarına uyğun bəyanat yayırlar. Ermənistan da hazırda Qərb təbliğatının siyasi sifarişini yerinə yetirir”, - deyə müsahibimiz qeyd edib.

Arkovun sözlərinə görə, süni surətdə uzadılan Ermənistan-Azərbaycan münaqişəsi regionda ABŞ-ın və ümumilikdə kollektiv Qərbin nəzarəti altında olmayan "Şimal-Cənub" layihəsinin və bir sıra digər güclü iqtisadi (müvafiq olaraq, böyük siyasi əhəmiyyəti olan) layihələrin tam reallaşdırılmasını ləngidir:

“Və üçüncüsü: əlbəttə ki, Qərbin, ilk növbədə, ABŞ-ın Ermənistanı Rusiyanın orbitindən çıxarmaq, həmçinin İrəvanı Tehrana təzyiq rıçağına çevirmək cəhdlərini müşahidə edirik.

Hazırda Qərb Bakıya başqa cür – birbaşa təsir edə bilməz, çünki Avropanın Azərbaycanın karbohidrogenlərinə ehtiyacı var. İndiki vəziyyətdə rıçaq rolunda yalnız İrəvan ola bilər.

Ermənistanın hazırkı siyasi rəhbərliyinin Qərbən gələn “sifarişləri” sevinclə yerinə yetirdiklərini müşahidə edirik. Bu insanlar hakimiyyətdə qalmaq naminə münaqişənin yenidən güclənməsinə və onun hətta Üçüncü Qarabağ müharibəsinə çevrilməsinə yol verə bilər”.

Ümummilli Lider, Ulu Öndər Heydər Əliyev adı dünya ictimai-siyasi tarixinə qızıl hərflərlə yazılmış şəxsiyyətlərdəndir. Heç kimə sirr deyil ki, 90-cı illərin əvvəllərində ölkəni bürüyən siyasi böhran Azərbaycanı parçalamağa, tamamilə dünya tarixindən silməyə aparırdı. 1993-cü ilin iyun hadisələrindən sonra xalqın tələbi ilə hakimiyyətə gələn Heydər Əliyevin gərgin əməyi və inanılmaz uzaqgörənliyi nəticəsində vətənimiz bu faciədən qurtardı.

1993-cü il 3 oktyabr. Qurtuluşa gedən yol. Məhz bu tarixdə keçirilmiş prezident seçkiləri zamanı xalq böyük səs çoxluğu ilə öz seçimini etdi və Heydər Əliyevi Prezident seçdi. Xalqın mütləq əksəriyyətinin səsini qazanaraq Azərbaycan Respublikasının Prezidenti seçilən Ulu Öndər ölkəmizi böyük bəlalardan, faciələrdən hifz edib, ölkəni sabitlik, iqtisadi inkişaf və tərəqqi yoluna çıxarıb, qlobal enerji-kommunikasiya layihələrini reallaşdırmaqla Vətənə sədaqətlə xidmətin əyani nümunəsini yaradıb.

Yaxşı xatırlayırıq Ulu Öndərin andiçmə mərasimindəki nitqini: “Bu gün mənim üçün tarixi, əlamətdar bir gündür. Mənə göstərilən bu böyük etimada görə Azərbaycan vətəndaşlarına, Azərbaycan xalqına hörmətimi, məhəbbətimi bildirir və əmin etmək istəyirəm ki, həyatımın sonuna qədər xalqıma sədaqətlə xidmət edəcək və bütün fəaliyyətimi Azərbaycan Respublikasının gələcək inkişafına sərf edəcəyəm.” Və biz bunun şahidi olduq. Bu gün də Ümummilli Liderin siyasi kursuna və ideyalarına sadiq olan möhtərəm prezidentimiz cənab İlham Əliyevin həyata keçirdiyi daxili və xarici siyasətdə bu siyasi xətti görür və izləyirik.

Heydər Əliyev çətin bir zamanda Azərbaycan hakimiyyətinin sükanı arxasına keçdi. Vaxtilə çörək verdiyi, karyera pilləkənində dəstək olduğu insanlar ona qarşı çıxdılar. Təkcə ona qarşı yox, xalqa qarşı çıxdılar. Vəzirov-Mütəllibov rejimi, daha sonra Xalq Cəbhəsi-Müsavat cütlüyü Azərbaycanı Heydər Əliyev yolundan döndərməyə çalışdı və bu yolun alternativi olmadığını başa düşmək istəmədilər. Müstəqilliyin ilk illərində sağlam düşüncənin səsinə qulaq asıb, böyük siyasi xadimi respublika rəhbərliyinə dəvət etsəydilər, Azərbaycan 20 Yanvar, Xocalı faciələrini görməz, Laçın, Şuşa xəyanətlərinin qurbanı olmaz, ölkə ərazisinin 20 faizi işğal edilməz, dövlət müstəqilliyimiz ağrılı və əzablı yollardan keçməzdi. Halbuku bunu Azərbaycan xalqı çox istəyirdi və tələb edirdi.

Prezident seçiləndən dərhal sonra Ümummilli lider ilk növbədə, ölkədə ictimai-siyasi sabitliyin bərpası istiqamətində gərgin işə başladı, qeyri-qanuni silahlı dəstələr zərərsizləşdirdi, respublikamızın sosial-iqtisadi yüksəlişinə yol açan ən mühüm amil kimi cəmiyyətdə ictimai-siyasi sabitliyə nail oldu. Azərbaycan inkişaf yoluna qədəm qoydu. Bu müddət ərzində bir sıra dövlət çevrilişlərinin qarşısı alındı, Azərbaycan vətəndaş müharibəsi təhlükəsindən xilas oldu. Müstəqil dövlətimizin ərazi bütövlüyünün bərpası və Ermənistan silahlı qüvvələrinin hücumlarının qarşısının alınması, ölkənin müstəqilliyinin qorunub saxlanması üçün ordu quruculuğu istiqamətində kompleks tədbirlər həyata keçirilmişdir.

1991-1993-cü illər ölkəmizin müasir tarixində hərc-mərclik, özbaşınalıq və qeyri-peşəkar idarəetmə dövrünə son qoydu. Bu bir yaxın keçmişdir. Dövlətin suveren mövcudluğuna təhdid yaradan bütün amillər həmin dövrdə dövlətə səriştəsiz və qeyri-peşəkar şəxslərin rəhbərlik etməsinə görə baş verirdi. Bu səbəbdən də belə bir vəziyyətdən çıxış yolunu axtaran Azərbaycan xalqı xilasını yalnız Heydər Əliyevin simasında görürdü. Dövlətçilik anlayışından bixəbər olan və hərbi birləşmələri əslində öz məqsədləri üçün istifadə edən ayrı-ayrı şəxslərin hədələrindən qorxub gizlənmiş və bu təhlükəli proseslərin qarşısını ala bilmədiyini dərk edən AXC-Müsavat cütlüyü sonda Heydər Əliyevdən imdad istəməyə məcbur oldu. Azərbaycan xalqı qanı və canı bahasına əldə etdiyi müstəqilliyin qorunması üçün əvəzsiz lideri Heydər Əliyevi Bakıya dəvət etdi. 1992-ci ilin oktyabrında Azərbaycanın “91-lər” adlanan ziyalılar Heydər Əliyevə hakimiyyətə qayıdışı üçün müraciət etmişdilər. 1993-cü il iyunun 9-da Heydər Əliyev xalqın və respublikanın hakim dairələrinin təkidli dəvətini qəbul edib Bakıya gəldi. Xilaskarlıq missiyasını öz üzərinə götürən Heydər Əliyev Bakıda hakimiyyət davasının getdiyi bir vaxtda həyatını təhlükə altında qoyaraq dərhal Gəncəyə yollandı və qiyamın qarşısını aldı.

Azərbaycan xalqının tarixində taleyüklü məsələlərin həllində müstəsna xidmətləri olan tarixi şəxsiyyətlər içərisində Azərbaycan xalqının Ümummilli Lideri adını qazanmış görkəmli dövlət xadimi, dünya miqyaslı siyasətçi, parlaq şəxsiyyət Heydər Əliyevin xüsusi rolu vardır. Müstəqilliyin ilk illərində xalqımız qarşıya çıxan çətin problemlərin həllini, xilaskarlıq missiyasını Heydər Əliyevdə görürdü.

Bu dahi şəxsiyyət qlobal düşüncəli, geniş dünyagörüşlü nəhəng bir siyasətçi idi. O, realist bir insan olaraq hadisələrə praqmatik yanaşırdı, tarixi şəraitdən düzgün baş çıxarırdı, ölkənin taleyi üçün uğurlu qərarlar qəbul edirdi. O, beynəlxalq aləmdə tarazlaşdırılmış siyasətin, ölçülüb-biçilmiş fəaliyyətin ustadı idi. Heydər Əliyev bütün fəaliyyəti boyu müdrik insan, peşəkar rəhbər, xalq məhəbbətini qazanan uzaqgörən siyasətçi və ağıllı dövlət xadimi olduğunu təsdiq etmişdir.

Siyasi fəaliyyətində nümayiş etdirdiyi yüksək peşəkarlıq sayəsində “siyasət nəhəngi”, “siyasət qrosmeysteri”, “siyasət patriarxı” və s. bu kimi adlar qazanmış Ulu Öndər siyasi uzaqgörənliyində, fitri istedadında, müdrikliyində, ölçülüb-biçilmiş qərarlarında, qətiyyətliyində, siyasi iradəsində, dərin zəkasında, ensiklopedik biliyə malik olmasında, geniş dünyagörüşündə, milli maraqlara əsaslanmasında, tarixi şəraitdən düzgün baş çıxarmasında, zaman və məkan amilini qiymətləndirməsində, dözüm və səbrliliyində, nəzəriyyəyə istinad etməsində və bir çox digər məsələlərdə Heydər Əliyevin fenomenallığı sübut olunmuş faktdır. Bunu bu gün də dünyanın məhşur siyasət adamları ehtiraf edirlər.

Ulu Öndər Heydər Əliyevin nitqi dərin və konkret idi, müzakirə olunan məsələni yüksək səviyyədə ümumiləşdirmək bacarığına malik idi. Heydər Əliyev müzakirə olunan məsələnin mahiyyətini açmağı, mövzunu milli mənafe, dövlətçilik mövqeyindən təhlil etməyi ustalıqla bacarırdı. Onun dərin məntiqli nitqi, natiqlik məharəti, söz seçmək bacarığı, auditoriya ilə ünsiyyət qurmaq səriştəsi onu dinləyənləri məftun edirdi.

Ulu Öndər Heydər Əliyevin dövlət quruculuğu fəaliyyətinin tərkib hissəsi milli ideologiyanın yaradılması idi. Tarixi, adət-ənənələri, milli fəlsəfi məfkurəni, təcrübəni və zəngin mədəniyyətimizin bütün çalarlarını özündə ehtiva edən azərbaycançılıq ideologiyasının müəllifi Heydər Əliyevdir.

Azərbaycançılıq ideologiyası təkcə bu dövlətin ərazisində yaşayan şəxsləri yox, eyni zamanda, bütün dünyada məskunlaşan azərbaycanlıları əhatə edən, dünya azərbaycanlılarını vahid ideologiya ətrafında birləşdirən milli məfkurəyə çevrildi. Milli ruhun yüksəlməsi, milli özünüdərkin inkişafı və xalqın tarixi yaddaşının özünə qaytarılması kimi fundamental prinsip və vəzifələrə xidmət edən azərbaycançılıq məfkurəsi dövlətin qüdrətinin artırılmasında real siyasi amilə çevrilmişdir.

İdarəetmənin ustadı, siyasətin kamil bilicisi kimi bütün dünyada məşhur olan Ulu Öndər Heydər Əliyev siyasi fəaliyyəti deməyə əsas verir ki, reallığı düzgün qiymətləndirən, zəngin təcrübədən yaradıcılıqla istifadə edən, sosial-siyasi və iqtisadi problemlərin bütün spektrini, mürəkkəbliyini nəzərə alan, qəbul olunan qərarların mümkün nəticəsini irəlicədən görməyə imkan verən siyasi xətt hökmən uğur qazanır. Eləcə də mülahizələri problemlərə dərindən bələdlik, hadisələrin məğzinə, səbəb-nəticə əlaqələrinə nüfuz etmək xüsusiyyəti ilə seçilirdi. Azərbaycanın daxili siyasətini istiqamətləndirən, xarici siyasətini beynəlxalq hüquq normalarına uyğun, məqsədyönlü və tarazlaşdırılmış şəkildə aparan qətiyyətli dövlət xadimi çox hallarda ən tanınmış siyasətçiləri belə təəccübləndirirdi və tərəf müqabilləri onun siyasətini birmənalı olaraq qəbul edirdilər.

Heydər Əliyevin dahiliyinin önəmli tərəflərindən biri də bir ictimai-iqtisadi formasiyadan digərinə keçid dövründə respublikanın qarşısında duran strateji vəzifə və hədəfləri düzgün müəyyənləşdirməsidir. Dünyanın qabaqcıl dövlətlərinin təcrübəsində uğurla sınaqdan çıxmış müsbət inkişaf modellərinin potensialına müraciət edərək, Ulu Öndər onları Azərbaycan reallıqlarına adaptasiyasına müvəffəq olmuşdur. Qısa müddətdə ölkəyə investisiya axınını stimullaşdıran müasir innovativ inkişaf modeli qurulmuşdur. Bu model özəl mülkiyyətçiliyə, sahibkarlığa, sərbəst rəqabətə yol açan, liberallığı özündə ehtiva edən və sosialyönümlü mahiyyət daşıyan iqtisadiyyat modeli idi.

1993-cü ildən başlayaraq bu günə qədər Azərbaycan müstəqil həyat yaşayır. Dövlətçiliyin əsasları qoyuldu, müstəqil dövlətin Konstitusiyası qəbul edildi, milli ideologiyamız qəbul olundu, azərbaycançılıq məfkurəsi bu gün bizim ideoloji əsaslarımızı təşkil edir. Siyasi islahatlar aparılmağa başlamışdır, demokratik inkişafla bağlı önəmli qərarlar, qanunlar qəbul edilmişdir. İqtisadi sahədə liberallaşma siyasəti aparılmağa başlamışdır və bazar iqtisadiyyatına keçid məhz Heydər Əliyevin təşəbbüsü ilə baş vermişdir.

Azərbaycanda müstəqil dövlət təsisatlarının qurulması, beynəlxalq normalara söykənən demokratik, hüquqi dövlətin yaranması, milli, mənəvi və əxlaqi dəyərlərimizin qorunub saxlanması, bu dəyərlərin ümumbəşəri ideyalarla daha da zənginləşdirilməsi, ilk Milli Konstitusiyamızın qəbul edilməsi, vətəndaş cəmiyyətinin formalaşdırılması və yeni iqtisadi kursun müəyyənləşdirilməsi prosesinin müvəffəqiyyətli həlli məhz Ümummilli Liderimiz Heydər Əliyevin xidmətləridir.

Qərbə inteqrasiya yolunu tutan Heydər Əliyev ən çətin anlarda belə yenilməz siyasi iradə nümayiş etdirdi, milli dövlətçiliyin, milli mənafelərin ifadəçisi kimi antiazərbaycan, antimilli qüvvələrin qarşısında sipərə çevrildi, Bakı-Tbilisi-Ceyhan neft, Bakı-Tbilisi-Ərzurum qaz kəmərinin çəkilişi məhz bu böyük insanın iradəsi və qətiyyətli mövqeyinin, uzaqgörənliyinin nəticəsi kimi reallığa çevrildi.

Qadın siyasətini dövlət səviyyəsinə qaldırılması Ulu Öndər Heydər Əliyevin adı ilə bağlıdır. Ulu Öndər insan hüquqları çərçivəsində qadın hərəkatının inkişafına güclü stimul vermişdi. Azərbaycanda qadın hüquqlarının qorunması, təbliğ olunması, onlara yüksək imtiyazların verilməsi, qadınların dövlət siyasətinin həyata keçirilməsində və qanunların qəbul edilməsində iştirakının artırılması Heydər Əliyev siyasətinin ayrılmaz tərkib hissələrindən olmuşdur.

Ulu Öndər Heydər Əliyevin neft strategiyasının təcəssümü olan "Əsrin müqaviləsi” Azərbaycanın dünya iqtisadi sistemindəki yerini müəyyənləşdirmişdir. 1994-cü ilin sentyabr ayının 20-də dünyanın 8 ölkəsinin 13 neft şirkəti ilə bağlanmış "Əsrin müqaviləsi” sonrakı illərdə daha 19 ölkənin 41 neft şirkəti ilə 26 müqavilənin imzalanmasına yol açmış, 1997-ci ildə Azərbaycan nefti Bakı-Novorossiysk neft kəməri ilə, 1999-cu ildə isə Bakı-Supsa neft kəməri ilə dünya bazarına çıxarılmışdır.

Ulu Öndər hüquqi dövlət və vətəndaş cəmiyyəti quruculuğu məsələsini daim diqqət mərkəzində saxlamış və bu istiqamətdə mühüm islahatlara başlamışdır. Məhz Heydər Əliyevin gərgin və məqsədyönlü fəaliyyəti nəticəsində respublikamızda cinayətkarlıq və hüquq pozuntularına qarşı barışmaz mübarizə elan edilmişdir. Bütün hüquq mühafizə orqanlarının fəaliyyəti cinayətkar təzahürlərə, ilk növbədə, mütəşəkkil cinayətkarlığa, korrupsiya və rüşvətxorluğa, terrorizmə, narkotik vasitələrin qanunsuz dövriyyəsinə qarşı mübarizəyə səfərbər olunmuş və “qanunun aliliyi” prinsipinin real təmin olunması üçün müvafiq tədbirlər görülmüşdür.

Davamlı siyasi-hüquqi islahatlar dövrü. İşlək siyasi sistemin, hüquqi dövlət və vətəndaş cəmiyyəti quruculuğu prosesinin, siyasi mədəniyyətin əsasının qoyulması, milli həmrəylik və xalqın bütövlüyü təmin edən ideologiyanın yaradılması, habelə bir çox digər təşəbbüslər dövlətçilik ənənələrin inkişafına xidmət edən Ulu Öndər Heydər Əliyevin bilavasitə xidmətidir. Ulu öndər Heydər Əliyevin rəhbərliyi ilə həyata keçirilən islahatlar sayəsində ölkənin siyasi-hüquqi sistemində müsbət dəyişikliklər oldu.

Ümummilli Liderin təşəbbüsü ilə kütləvi informasiya vasitələri üzərində senzura aradan qaldırıldı, insan və vətəndaş hüquq və azadlıqları yüksək səviyyədə təmin edildi. Dövlətin hüquqi bazasının möhkəmləndirilməsi istiqamətində mühüm addımlar atıldı: məhkəmə islahatlarının həyata keçirilməsi, Konstitusiya Məhkəməsinin, Ombudsman təsisatının və digər mühüm təsisatların yaradılması, yaradılması, ölüm hökmünün ləğv edilməsi və onlarla digər islahat xarakterli demokratik təşəbbüslər həyata keçirildi.
Heydər Əliyevin uğurlu siyasəti sayəsində Azərbaycan dünyada tanınan nüfuzlu bir dövlətə çevrilmişdir. 1993-cü ildə müstəqil Azərbaycan Respublikasının Prezidenti seçilən Heydər Əliyevin müdrik siyasəti sayəsində qısa müddət ərzində xarici siyasət sahəsində böyük dönüş yarandı və uğurlar əldə olundu. Dünyanın aparıcı dövlətləri və beynəlxalq təşkilatları Azərbaycana ciddi diqqət yetirməyə başlamış və ölkəmiz beynəlxalq münasibətlər sisteminin suveren aktoruna çevrilmişdir.
Ulu Öndər Heydər Əliyevin möhkəm təməllər üzərində əsasını qoyduğu milli maraqlara xidmət edən xarici siyasət uzaq hədəflərə hesablanmış strateji fəaliyyət konsepsiyası olmaqla, müstəqil Azərbaycanın beynəlxalq arenada nüfuz və mövqelərinin güclənməsinə, ümummilli problemlərinin həllinə yönəlmişdir. Uğurlu xarici siyasət kursu nəticəsində beynəlxalq təşkilatlarla bərabərhüquqlu səviyyədə əməkdaşlıq müstəqilliyin əsas dayaqlarından birinə çevrilib. Kollektiv sənədlərə və beynəlxalq müqavilələrə qoşulan Azərbaycan özünün coğrafi mövqeyindən, təbii ehtiyatlarından, iqtisadi potensialından istifadə etməklə bir çox dövlətlər və beynəlxalq qurumlarla əməkdaşlıq edərək Böyük İpək yolunun bərpası, Avropa-Qafqaz-Asiya nəqliyyat dəhlizinin yaradılması, Xəzərin karbohidrogen ehtiyatlarının işlənməsi və dünya bazarına çıxarılması layihələrini səmərəli şəkildə həyata keçirir.

Ermənistan tərəfindən Azərbaycan torpaqlarının işğal olunması faktını beynəlxalq təşkilatların siyasi gündəliyinə gətirən şəxs məhz Ulu Öndər olmuşdur. Ermənistan-Azərbaycan münaqişəsinin beynəlxalq hüquq normaları əsasında, yəni ölkəmizin ərazi bütövlüyü çərçivəsində həll edilməsi xarici siyasətimizin əsas prioritetinə çevrildi. Ulu Öndər Heydər Əliyev bir çox dünya dövlətləri ilə bu mövzuda danışıqlar apararaq beynəlxalq tədbirlərdə, o cümlədən sammitlərdə Azərbaycanın ərazi bütövlüyünün dəstəkləndiyi və Ermənistanın işğalçılıq siyasətinin pisləndiyi qətnamələrin və bəyanatların qəbul olunmasına nail olmuşdur.

Bir sözlə Heydər Əliyev dühasının müstəqil Azərbaycan inkişafına verdiyi töhfələr, Ulu Öndərin siyasi kursunun bu gün layiqli davamçısı möhtərəm Prezidentimiz İlham Əliyevin bütün dünyada qazandığı yüksək nüfuz bir daha göstərir ki, xalqımız xoşbəxt xalqdır və bu xalq cənab Prezidentin dediyi kimi ən üstün olanlara layiqdir.

Pənah İmanov
Xətai rayon İcra Hakimiyyətinin şöbə müdiri

“Beynəlxalq ictimaiyyət Azərbaycan ərazilərinin minalarla çirklənməsi məsələsi ilə bağlı Ermənistana təzyiq göstərməlidir”.

Avrasiya.net xəbər verir ki, bunu “Report”a açıqlamasında Ortaq Gələcəyə Malik Cəmiyyət üçün Pakistan Araşdırma Mərkəzinin icraçı direktoru Xalid Taymur Əkrəm deyib.

“Azərbaycan hökuməti işğaldan azad edilmiş torpaqları rəqəmsal mərkəzlərə və şəhərlərə çevirmək üçün fəal addımlar atır. Lakin bu prosesə minalanmış ərazilərin dəqiq xəritələrinin olmaması mənfi təsir göstərir. Təəssüf ki, ermənilərin qoyduğu minalardan xeyli insan həlak olub və minalar hələ də can almaqda davam edir”, - pakistanlı ekspert bildirib.

O vurğulayıb ki, Ermənistan Azərbaycana qarşı düşmənçilik edir və sülh yaratmaq istəmir: “Buna görə də bu ölkə hələ də minalanmış ərazilərin düzgün xəritələrini təqdim etməyib. Pakistan həm milli, həm də beynəlxalq səviyyədə həqiqətlərin və faktların yayılmasında Azərbaycana dəstəyini davam etdirəcək”.