TAİB-in Gənclər Təşkilatının həmsədri Ankaraya səfər edib
Türk Ağsaqqallar İctimai Birliyinin (TAİB) Gənclər Təşkilatının həmsədri, fəal gənc Sübhan Xıdırzadə Türkiyənin Ankara şəhərinə səfər edib.
TAİB-dən verilən xəbərə görə, o, Atatürkün məzarını ziyarət edib. Səfərini dəyərləndirən gənc fürsətdən istifadə edərək MHP Genel sekreteri Bursa millət vəkili İsmet Büyükataman, MHP Genel başkan yardımcısı Ankara millət vəkili Sadir Durmaz, MHP Genel Sekreter Yardımcısı İzmir millət vəkili Tamer Osmanoğlu ilə də görüşlər keçirib. Görüşdə iki qardaş ölkə arasındakı əlaqələrin inkişafından danışılıb, türk gəncliyinin səmərəli fəaliyyətindən bəhs edilib.
S.Xıdırzadə görüşlərdə təmsil olunduğu TAİB-in fəaliyyətindən danışaraq ümumtürk kontekstində türk ağsaqqalları və gəncləri arasındakı əlaqələrin daha da dərinləşməsi və türk birliyinin inkişafı yönündə təşkilatın həyata keçirdiyi tədbir və layihələrdən söhbət açıb.
Bu barədə təəssüratlarını bölüşən S.Xıdırzadə deyib ki, bu görüş Gənclər Təşkilatının Türkiyədəki Nümayəndəliyi üçün böyük əhəmiyyət kəsb edir: “Biz gənclər hər zaman dövlətimizin yanında olmaq, dəstək vermək üçün böyüklərdən, müdriklərdən öyrənməyə, onların təcrübəsindən faydalanmağa çalışmışıq. Bu görüşlər də əvvəlki görüşlər kimi məndə dərin izlər buraxdı. Məni o qədər hərarətlə, mehribanlıqla qarşıladılar ki, köksüm qabardı. Qürurlandım! Bəli, biz bir ailəyik! Bir millət, iki dövlətik! Görüş üçün MHP-yə təşəkkürlər!”.
