Orxan Məmmədov: "Aqrar sahədə klasterləşmə işləri sürətləndirilməlidir"Aqrar sahədə sahibkarlıq fəaliyyətinin genişlənməsi bu sahədə vahid sahibkarlıq ekosisteminin yaradılmasını da zəruri edir ki, bu da klasterləşmə ilə bağlı təbliğat işlərin sürətləndirilməsini və müvafiq tədbirlərin görülməsini tələb edir.

Bunu İqtisadiyyat Nazirliyi yanında Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Bakıda keçirilən II Aqrobiznes Forumunda çıxışı zamanı deyib.

Onun sözlərinə görə, klasterlərin yaradılmasında məqsəd onun iştirakçıları arasında yeni texnologiyaların əlçatanlığının təmin edilməsi, risklərin asan bölüşdürülməsi, xarici bazara birgə çıxış, elmi biliklərdən və əsas vəsaitlərdən kollektiv istifadə etmək kimi qarşılıqlı fəaliyyətləri möhkəmləndirməkdən ibarətdir:

"Bu, ixracın həm əmtəə tərkibinin, həm də coğrafiyasının şaxələnməsinə geniş imkanlar açır. Azərbaycan Prezidentinin fərmanı ilə təsdiq edilmiş “Mikro, kiçik və orta sahibkarlıq subyektlərinin klasterləri haqqında Nümunəvi Əsasnamə” şübhəsiz ki, bu istiqamətdə həyata keçiriləcək işlərə təkan verəcək. Ümid edirəm ki, klasterləşməyə dair digər mövcud güzəşt və imtiyazlar da bu istiqamətdə ekosistemin qurulmasını sürətləndirəcəkdir".

O.Məmmədov hesab edir ki, aqrobiznes sahəsinin və ümumilikdə KOB sektorunun inkişafında keçid mərhələsinin şərtləndirilməsində 2022-ci ilin dekabrın 2-də imzalanan “Mikro, kiçik və orta sahibkarlığın inkişafı haqqında” Qanun mühüm rol oynayacaq: "Belə ki, qanunda mikro, kiçik və orta sahibkarlığın inkişafı sahəsində fəaliyyətin əlaqələndirilməsi, onların maraqlarının qorunması və problemlərinin həlli, həmçinin dövlət orqanlarının və özəl qurumların KOB subyektlərinə göstərdikləri xidmətlərin əlaqələndirilməsi məqsədilə dəqiq istiqamətlər müəyyən edilib".
Azərbaycanda depozit faizlərinə vergi tətbiqi təsdiqlənib - EKSKLÜZİVFiziki şəxslərin əmanəti üzrə ödənilən illik faiz gəlirlərinə tətbiq olunan vergi güzəştinin müddəti başa çatıb.

Bunu "APA-Economics"in sorğusuna cavab olaraq, İqtisadiyyat Nazirliyi yanında Dövlət Vergi Xidmətindən bildirilib. Qeyd edilib ki, Vergi Məcəlləsinin 102.1.22-ci maddəsinə əsasən, 2016-cı il fevralın 1-dən etibarən 7 il müddətində yerli banklar və xarici bankların Azərbaycan Respublikasında fəaliyyət göstərən filialları tərəfindən fiziki şəxslərin əmanəti üzrə ödənilən illik faiz gəlirləri, habelə emitent tərəfindən investisiya qiymətli kağızları üzrə ödənilən dividend, diskont (istiqrazların nominalından aşağı yerləşdirilməsi nəticəsində yaranmış fərq) və faiz gəlirləri gəlir vergisindən azad edilib. Qeyd olunan güzəştin müddətinin 2023-cü il fevralın 1-dən başa çatdığını nəzərə alaraq, həmin tarixdən etibarən bankların fiziki şəxslərin əmanətləri üzrə ödədiyi illik faiz gəlirlərindən ödəmə mənbəyində 10 faiz dərəcə ilə vergi tutulacaq.

Əlavə edilib ki, banklar tərəfindən fiziki şəxslərin əmanətləri üzrə 1 fevral 2023-cü il tarixədək hesablanmış, lakin əmanətçilərə ödənilməmiş faizlər onların ödənilmə tarixindən asılı olmayaraq gəlir vergisinə cəlb edilməyəcək. Bu baxımdan yerli banklar və xarici bankların Azərbaycan Respublikasında fəaliyyət göstərən filialları tərəfindən fiziki şəxslərin əmanətləri üzrə ödənilən illik faiz gəlirlərinin ödəmə mənbəyində gəlir vergisinə cəlb edilməsi yalnız 01.02.2023-cü il tarixindən sonra hesablanmış faizlərə münasibətdə tətbiq ediləcək.

Eyni zamanda, qiymətli kağızlar bazarında əlverişli vergi mühitinin formalaşdırılması, investorların kapital bazarında fəal iştirakının və investor bazasının genişləndirilməsi məqsədilə, 2023-cü il fevralın 1-dən etibarən 5 il müddətində yalnız kütləvi təklif edilmiş və tənzimlənən bazarda ticarətə buraxılmış səhmlər və istiqrazlar üzrə müvafiq olaraq ödənilən dividend, diskont və faiz gəlirləri vergidən azad edilib.
Əmanətçilərin nəzərinə: Sabahdan vergi tətbiqi başlayırBanklarda olan əmanətlər 2016-cı il fevralın 1-dən etibarən 7 (yeddi) il müddətində vergidən azad edilmişdi. Belə ki, Vergi Məcəlləsinin 102.1.22-ci maddəsinə əsasən, yerli bank və xarici bankın Azərbaycan Respublikasında fəaliyyət göstərən filialı tərəfindən fiziki şəxslərin əmanəti üzrə ödənilən illik faiz gəlirləri, habelə emitent tərəfindən investisiya qiymətli kağızları üzrə ödənilən dividend, diskont (istiqrazların nominalından aşağı yerləşdirilməsi nəticəsində yaranmış fərq) və faiz gəlirləri gəlir vergisindən azaddır. Lakin bu müddət sabah başa çatır.

Avrasiya.net xəbər verir ki, bunu millət vəkili Vüqar Bayramov qeyd edib.

O bildirib ki, bundan əlavə, Vergi Məcəlləsinə edilən son dəyişikliklərdə də bu maddə üzrə güzəşt müddətinin uzadılması nəzərdə tutulmayıb:

“Bu o deməkdir ki, əgər bu maddədə düzəliş edilməyəcəksə, onda sabahdan əmanətlərə vergi hesablanacaq.

Əmanətlərin gəlir vergisindən azad edilməsi banklara daha çox depozitin cəlb edilməsinə imkan yaratdı. Doğrudur, bu, yeganə səbəb deyildi. Amma vergisiz əmanətlər vətəndaşlar üçün daha cəlbedici idi. Əgər 2016-cı ildə dəyişikliklər qəbul edilən zaman banklarda fiziki şəxslərin 8 milyard 77 milyon manat əmanəti vardısa, ötən müddətdə bu göstərici 11 milyard 743 milyon manatadək yüksəlib. Bu artımlarda 2017-ci ildən sonra əldə edilən maliyyə stabilliyinin xüsusi rolunu da qeyd etmək lazımdır”.

Millət vəkili, həmçinin, vergi güzəştinin uzadılmamasının əmanətlərin həcminə və xüsusən də valyuta strukturuna neqativ təsir göstərə biləcəyini vurğulayıb:

“Bu milli valyutada yığımlara marağı da azalda bilər. Belə ki, bu dəyişikliklər qəbul edilən zaman əmanət portfelində manatla depozitlərin payı cəmi 18.0 faiz idisə, indi bu rəqəm 61.0 faizədək yüksəlib. Göründüyü kimi, manatın stabilliyi, milli valyutada depozitlərə daha çox dividendin ödənilməsi kimi faktorlar ilə yanaşı vergi güzəştləri də manatla yığımlara marağı artırıb.

Bu baxımdan, daha məqsədə uyğun olardı ki, ya məcəlləyə dəyişiklik edilib güzəşt müddəti daha 1 il uzadılsın və ya sığorta olunan əmanətlər gəlir vergisindən azad olunsun. Birinci halda növbəti 1 il müddətdə yeni mexanizm hazırlamaq mümkündür. Həmin mexanizm artıq 2024-ci ilin fevralında tətbiq olunan zaman hər hansı çətinlik yaratmaz. İkinci halda əmanətçilərin əksər hissəsinin depozitləri sığortalanan olduğu üçün bu əksər fiziki şəxsləri əhatə edəcək”.
"Avropanın artan tələbatını ödəmək üçün Azərbaycan gərgin çalışır"Dünyada böyük nüfuza malik olan Davos Dünya İqtisadi Forumuna dövlətimizin başçısı İlham Əliyev cənablarının dəvət olunması və forum çərçivəsində bir sıra mühüm əhəmiyyətə malik görüş və iclaslarda iştirakı Azərbaycana və onun rəhbərinə olan hörmət və ehtiramın bariz sübutu idi. Ölkəmizin təkcə Cənubi Qafqazda deyil, beynəlxalq diplomatiyada oynadığı rolu, xüsusilə son illərdə enerji təminatında Azərbaycanın mövqeyinin artması bütün dövlətlərin diqqətini ölkəmizə yönəldir.

Qeyd etməliyik ki, Davosda hər il keçirilən Dünya İqtisadi Forumu özlüyündə iqtisadi tədbir olsa da, aradan keçən müddət onu göstərir ki, Forumda iqtisadi məsələlərlə yanaşı, dünyanın geosiyasi vəziyyətindən irəli gələn digər məsələlər də müzakirə edilir. Məhz bunun nəticəsidir ki, keçirilən son Forum “Parçalanmış dünyada əməkdaşlıq” devizi altında keçirildi. Xüsusi olaraq qeyd etməliyik ki, bu gün dünyanın birləşməyə, birgə əməkdaşlıq etməyə daha çox ehtiyacı vardır. Çünki hazırda Rusiya-Ukrayna müharibəsi fonunda biz faktiki III Dünya müharibəsinə şahidlik edirik. Bir ilə yaxındır ki, davam edən bu müharibə dünyanı siyasi, iqtisadi və sosial cəhətdən ağır vəziyyətə salmaqdadır. Bütün bunların nəticəsi olarq Davosda keçirilən Forumun “Parçalanmış dünyada əməkdaşlıq” adı altında keçirilməsi heç də təsadüfü deyil.

Qeyd etməliyik ki, mövcud geosiyasi vəziyət yeni reallıqların və yeni düzənin formalaşmasına təkan verir. Davos Forumu çərçivəsində keçirilən “Avrasiya Orta Dəhlizi: Yoldan magistrala” mövzusunda panel iclası yeni yaranmış reallıqların təhlili və gələcək istiqamətlərini müəyyən etmək baxımından böyük əhəmiyyət kəsb edirdi. Son vaxtlarda Orta Dəhlizin reallığa çevrilməsi istiqamətində ciddi müzakirələr və qarşılıqlı əməkdaşlıq imkanları meydana çıxmaqdadır. Yanvar ayının 19-da keçirilən iclasda iştirak edən Azərbaycan Respublikasının Prezidenti cənab İlham Əliyev Orta Dəhlizin istər ölkəmiz, istərsə də dünya üçün böyük əhəmiyyət daşıdığını vurğulamış və qeyd etmişdir ki, reallaşacaq bu dəhliz eyni zamanda özündə dövlətlərarası səmimi əməkdaşlığın daha da möhkəmlənməsini ehtiva edir. Belə ki, bu nəhəng layihədə iştirak edən dövlətlər arasında mövcud münasibətlər olduqca yaxşıdır və bu münasibətlər bu layihənin üstünlüklərindən biridir. Çünki istənilən layihənin uğurlu icrası üçün ən vacib şərtlərdən biri qarşılıqlı münasibətlərin səviyyəsidir. Qeyd etməliyik ki, Orta Dəhliz enerji ilə yanaşı yükdaşımaların da həcminin armasına, eyni zamanda ticarət əlaqələrinin genişlənməsinə töhfə verəcəkdir. Bu baxımdan Azərbaycan hazırda zəruri infrastruktur layihələrini uğurla reallaşdırmaqdadır.

Rusiya-Ukrayna müharibənin başlanması və mövcud geosiyasi vəziyyət Avropanın enerji təminatında bir sıra problemlərin ortaya çıxması ilə nəticələnmişdir. Bununla yanaşı Şimal Dəhlizinin əhəmiyyətini itirməsi səbəbindən bütün diqqət hazırda Orta Dəhlizə çevrilmiş vəziyyətdədir. Enerji təhlükəsizliyinin təminatı istiqamətində ənənəvi bazardan imtina edən Avropa üçün Azərbaycan mühüm tərəfdaşa çevrilməkdədir. Cənab Prezident məhz bununla bağlı danışarkən qeyd etdi ki, təbii qazla bağlı Avropa Komissiyasından müraciət daxil olan kimi biz dərhal müxtəlif istiqamətlər üzrə işləməyə başladıq və biz Avropa istehlakçılarının artan tələbatını ödəmək üçün həqiqətən gərgin çalışır və mümkün olan bütün variantlardan istifadə edirik. İnanırıq ki, dövlət başçımızın yürütdüyü müdrik və məqsədyönlü siyasətin nəticəsində Azərbaycan Avropanın enerji təminatında aparıcı rol oynayan lider dövlətə çevriləcəkdir.

Samir Baxşiyev
YAP Siyəzən rayon təşkilatının sədri
Azərbaycanda bütün zəruri infrastruktur obyektləri daha çox yük qəbul etməyə hazırdırRespublikamızda nəqliyyatın bütün növləri az və ya çox dərəcədə inkişaf etmişdir. Ölkəmizin “Böyük İpək yolu” və Şimal-Cənub magistral yolları üzərində yerləşməsi onun nəqliyyatının yüksək inkişafına şərait yaradır.
Ən ucuz nəqliyyat növü olan dəniz nəqliyyatı əsasən yük və qismən sərnişin daşınmasında istifadə olunur. Xəzər dənizinin çox böyük nəqliyyat əhəmiyyəti vardır. Xəzər dənizində ən böyük liman 1902-ci ildə istifadəyə verilən Bakı Dəniz Ticarət Limanı olmuşdur.

Müasir dövrdə də Azərbaycan dövləti öz ərazisində müasir nəqliyyat infrastrukturu yaratmağa nail olmuşdur. Buna nümunə olaraq Dəniz Ticarət Limanını xüsusilə qeyd etmək lazımdır. Dəniz nəqliyyatı Xəzər hövzəsi ölkələrlə əlaqə saxlanmasında və onlarda çıxarılan neftin Azərbaycandan keçməklə dünya bazarına çıxarılmasında mühüm əhəmiyyət kəsb edir. Rusiyanın şərq rayonlarından və Mərkəzi Asiya ölkələrindən Azərbaycana gələn ən qısa yol məhz Xəzər dənizindən keçir. Bakı Dəniz Ticarət Limanı təkcə respublikada yox, həm də Xəzər dənizində ən böyük limandır. Bu limanın yükdaşıma dövriyyəsinin artırılması nəqliyyat infrastrukturunun təkmilləşdiriməsinə və Azərbaycanın tranzit imkanlarının artırılmasına diqqətinin təzahürüdür.

Ötən ilin sentyabr 16-da Səmərqənddə keçirilən Şanxay əməkdaşlıq Təşkilatına üzv ölkələrin Sammitində azərbaycan Respublikasının Prezidenti cənab İlham Əliyev çıxış edərkən Azərbaycan Şərq-Qərb və Şimal-Cənub nəqliyyat dəhlizləri bu regiondakı dövlətlər arasında əhəmiyyətli regional kommunikasiya layihələrinin həyata keçməsinə böyük təsir göstərdiyini bildirmişdir.B undan başqa Bakı Beynəlxalq Dəniz Ticarət Limanı 15 milyon ton yükdadaşıma qabiliyyətinə malik olduğu halda, bunu 25 milyon tona qədər artırıla bilər, öz çıxışında cənab prezident söyləmişdir.

2023-cü il 19 yanvar tarixində Davos Dünya İqtisadi Forumu çərçivəsində keçirilən “Avrasiya Orta Dəhlizi: Yoldan magistrala” mövzusunda panel iclasında Möhtərəm Prezidentimiz Cənab İlham Əliyev çıxışında söyləmişdir: Orta Dəhlizin üstünlüklərindən biri ondan ibarətdir ki, bu nəhəng layihədə iştirak edən ölkələr öz aralarında yaxşı münasibətlərə malikdir. İstənilən çoxmillətli təşəbbüsdə uğurun qazanılması üçün bu, ilkin şərtlərdən biridir. Azərbaycan özünün Qərbində olan qonşuları Gürcüstan və Türkiyə, Şərqində isə Mərkəzi Asiya ilə gözəl münasibətlərə malikdir. Qərb və Şərq arasında təbii coğrafi bağlantıya malik olduğumuz üçün biz ötən illər ərzində nəqliyyat infrastrukturuna böyük sərmayə yatırmışıq.

Cənab Prezidentin uzaqgörən siyasəti nəticəsində həyata keçirilən transmilli layihələr öz nəticəsini verir. Dövlət başçımız Azərbaycanın beynəlxalq aləmdə mövqeyini daha da gücləndirilməsi istiqamətində daima çalışır. Nəqliyyat yolları bu istiqamətdə mühüm rol oynayır. Sərnişin və yükdaşımaları üçün müasir infrastrukturun yaradılması , faydalı əməkdaşlığın inkişafı cənab prezidentin diqqətindədir.

Səkinə Hüseynova
Suraxanı rayonu 101 nömrəli tam orta məktəbinin direktor əvəzi
"Azərbaycan enerji təhlükəsizliyinin təmin edilməsi istiqamətində mərkəz rolunu oynayır"“Bəzi ölkələrin ambisiyaları və öz potensialının düzgün hesablanmaması etimadsızlığa, gərginliyə və müharibələrə gətirib çıxarır” – yanvar ayının 17-də Davosda Çinin CGTN televiziya kanalına müsahibəsi zamanı Azərbaycan Respublikasının Prezidenti cənab İlham Əliyev ona ünvanlanmış “Əməkdaşlığın mənasını nədə görürsünüz və əməkdaşlığı çətinləşdirən nədir?” sualını cavablandırarkən bu fikirləri bildirmişdir.

Cənab Prezident vurğulamışdır ki, Azərbaycan dövləti olaraq bizim siyasətimiz hər zaman, sözün əsl mənasında, qarşılıqlı əməkdaşlığa əsaslanıb. Çünki biz inanırıq ki, yalnız əməkdaşlıq sayəsində uğur qazanmaq mümkündür.

Davosda keçirilən Dünya İqtisadi Forumu da məhz ölkə başçımızın da qeyd etdiyi birgə əməkdaşlığın möhkəmləndirilməsi istiqamətində olduqca əhəmiyyətlidir. Xüsusi olaraq qeyd etməliyik ki, İsveçrənin kiçik qəsəbələrindən biri olan Davos dünyada iqtisadi beyin mərkəzi kimi qəbul edilir. Ötən əsrin 70-ci illərindən başlayaraq Davos qlobal iqtisadi məsələlərin müzakirə edildiyi platformaya ev sahibliyi etməkdədir. 1987-ci ildən etibarən isə Davosda keçirilən toplantı Dünya İqtisadi Forumu adlandırılmışdır. Azərbaycan dövləti də eyni zamanda keçirilən Forumlara böyük əhəmiyyət verməkdədir. Xüsusilə Azərbaycan Respublikasının Prezidenti İlham Əliyev cənablarının mütəmadi olaraq Davosda keçirilən Forumda iştirakı bunun bariz nümunəsidir. Cənab Prezident ardıcıl olaraq keçirilən toplantılara qatılaraq həm Azərbaycan həqiqətlərini dünyaya çatdırır, həm də ölkəmizin investisiya imkanları barədə dünyanın iqtisadi beyin mərkəzlərini və aparıcı şirkətlərinin nümayəndələrini məlumatlandırır. Cənab Prezidentin qətiyyətli iradəsi nəticəsində aparılan davamlı islahatların məntiqi nəticəsidir ki, hazırda Dünya İqtisadi Forumu öz hesabatlarında ölkəmizin islahatlar və iqtisadi inkişaf tempini yüksək qiymətləndirir.

Bildiyimiz kimi hazırda dünya yeni çağırışlarla üz-üzədir. Dünyanın mövcud geosiyasi vəziyyətinin mürəkkəbliyi və 1 ildir davam edən Rusiya-Ukrayna müharibəsinin fonunda qlobal siyasi sistemində mühüm mərhələnin əsası qoyulmuşdur. Enerji və nəqliyyat dəhlizlərində alternativlərə olan ehtiyac heç olmadığı qədər artmış vəziyyətdədir. Məhz bunun nəticəsidir ki, Azərbaycan yaranmış yeni reallıqlar fonunda mühüm tərəfdaş və enerji təhlükəsizliyinin təmin edilməsi istiqamətində mərkəz rolunu oynamaqdadır.

Samir Baxşiyev
YAP Siyəzən rayon təşkilatının sədri
Azərbaycan və Hindistan tekstil şirkətlərinin nümayəndələri görüşüblərHindistanın Bakıdakı Səfirliyi, Texprocil və Founder Klub ilə birlikdə 19 yanvar 2023-cü il tarixində Azərbaycan və Hindistan tekstil şirkətlərinin nümayəndələrinin iştirakı ilə hibrid rejim tekstil sektoru üzrə Hindistan-Azərbaycan Biznes Görüşü təşkil edib. 20-yə yaxın Azərbaycan şirkəti tədbirdə fiziki rejimdə iştirak etmək üçün JW Marriott Absheron Baku-da toplaşıb, hindistanlı həmkarları isə virtual rejimdə tədbirə qatılıblar.

1954-cü ildə yaradılan Pambıq Məhsulları İxracının Təşviqi Şurası və ya Texprocil pambıq tekstil sənayesinin beynəlxalq siması olub, Hindistan şikətlərinin bütün dünyaya pambıq məhsulları ixracını asanlaşdırır.

Hindistanın Bakıdakı Səfirliyinin Müvəqqəti İşlər Vəkili cənab Vinay Kumar açılış nitqində Hindistanın Azərbaycanla iqtisadi əlaqələrinin şaxələndirilməsi üçün geniş imkanların olduğunu vurğuladı. O, Hindistan tekstil məhsullarının və geyimlərinin dünyanın bir çox yerlərində olduğu kimi Azərbaycanda da həm yerli sahibkarlar, həm də digər qlobal françayzinqlər tərəfindən satışı vasitəsilə artıq yaxşı tanındığını xatırladıb və Hindistanın Azərbaycanda bu sektordakı bazar payının artırılması üçün böyük potensialın olduğunu vurğulayıb. O, həmçinin iştirakçıların nəzərinə çatdırıb ki, müxtəlif sektorlar üzrə Hindistan şirkətləri barədə daha ətraflı məlumatı www.indianbusinessportal.in portalından əldə etmək olar.

Tədbirdə əsas məruzə ilə çıxış edən Texprocil şirkətinin icraçı direktoru Dr Siddhartha Rajaqopal bu işgüzar görüşün Hindistan şirkətləri üçün Azərbaycan bazarı haqqında daha çox məlumat əldə etmək və bu bazara çıxış üçün faydalı bir platforma olduğunu bildirib. O, həmçinin Texprocil-in 22 və 23 mart 2023-cü il tarixlərində Yeni Dehlidəki Leela Ambience Convention otelində “Ind-Texpo” sərgisini təşkil edəcəyi barədə bəlumat verib. "Ind-Texpo" Sərgisi Texprocil-in ən önəmli tədbiri olub, idxalçılar və ixracatçılar arasında ikitərəfli görüş formatında təşkil olunacaq.

Azərbaycanlı iş adamlarının Hindistanda keçiriləcək sərgidə iştirak etməsi və Hindistanlı təchizatçılarla iş görmək imkanı əldə etməsi üçün Texprocil seçilmiş iştirakçıların (məbləğ məhdudiyyəti əsasıında) uçuş bileti və oteldə gecələmə xərclərini ödəyəcək. Sərgi zamanı, ziyarətçi şirkətlər üçün müvafiq sərgi iştirakçıları ilə xüsusi B2B görüşlər təşkil olunacaq.

Tədbir zamanı, Founder Klubun Beynəlxalq Əlaqələr üzrə Meneceri Ləman Əzizli Azərbaycan tekstil idxalçılarının əməkdaşlığa marağından və iki ölkə arasında tekstil sektorunda əməkdaşlıq potensialından danışıb.

Görüşdə, pambıq iplikləri, parçalar, uniformalar, ev tekstili və hazır geyim istehsalı ilə məşğul olan 10 Hindistan şirkətinin nümayəndələri öz şirkətləri, istehsal gücü və ixrac potensialı haqqında təqdimatlarla çıxış ediblər. Daha sonra, Azərbaycanın tekstil şirkətlərinin təqdimatları və sual-cavab hissəsində Hindistan və Azərbaycan şirkətləri arasında səmərəli işgüzar müzakirələr aparılıb.

Azərbaycanın statistikasına əsasən, 2022-ci ilin yanvar-noyabr aylarında Hindistan və Azərbaycan arasında ikitərəfli ticarət dövriyyəsi ötən ilin müvafiq dövrü ilə müqayisədə 156,5% artaraq 1,859 milyard ABŞ dolları təşkil edib. Bu dövrdə Hindistan Azərbaycanın beşinci ən böyük ticarət tərəfdaşı olub.
Azərbaycanda 13 sahibkar dövlət zəmanətilə aldığı krediti qaytarmaq istəmirAzərbaycanda bəzi sahibkarlıq subyektləri dövlət zəmanəti ilə verilmiş kreditlər üzrə öz borc öhdəliklərini yerinə yetirmirlər. Nəticədə müvəkkil banklar qarşısında zamin qismində çıxış edən Maliyyə Nazirliyi həmin borcu qaytarmalı olur.

Bunu “Report”un sorğusuna cavab olaraq nazirliyin İctimaiyyətlə əlaqələr və vətəndaş müraciətləri ilə iş şöbəsinin müdiri Mayis Piriyev bildirib.

"Nazirlər Kabinetinin müvafiq qərarına əsasən, koronavirus pandemiyasından zərər çəkmiş sahibkarlıq subyektlərinə maliyyə dəstəyinin göstərilməsi tədbirləri çərçivəsində 2020-2021-ci illərdə müvəkkil kredit təşkilatları 2 628 sahibkara ümumilikdə 499,5 milyon manat kredit ayırıb ki, onun da 291,6 milyon manat hissəsi dövlət zəmanəti ilə təmin olunub.

Qeyd olunan dövrdə 13 sahibkarlıq subyekti 2 banka kreditlərin qaytarılmasını təmin etməyib. Nəticədə, şərtlərə uyğun olaraq dövlət zəmanəti çərçivəsində həmin banklara “Dövlət borcu və zəmanəti üzrə öhdəliklərin Təminat Fondu”ndan 658,2 min manat vəsait ödənilib. Bu dövlət zəmanəti ilə təmin olunan ümumi kredit məbləğinin 0,23 %-ni təşkil edir”, - deyə o qeyd edib.

Bundan başqa, nazirlik rəsmisi əlavə edib ki, dövlət zəmanəti ilə sahibkarlara yuxarıda qeyd olunan təşfiq sxemi çərçivəsində bankların ayırdığı kreditlərin 1 yanvar 2023-cü il tarixinə 280,4 milyon manatı və yaxud 56 %-i banklara kredit müqavilələrində nəzərdə tutulan vaxtda qaytarılıb.

Nazirlər Kabinetinin “Koronavirus (COVİD-19) pandemiyasının ölkə iqtisadiyyatına mənfi təsirinin azaldılması üçün sahibkarlıq subyektlərinin kreditlərinə dövlət dəstəyinin verilməsi ilə bağlı bir sıra tədbirlər barədə” 9 iyul 2020-ci il tarixli qərarına əsasən, kredit təşkilatlarının sahibkarlara ayırdığı, ümumi məbləği 500 milyon manata qədər olan kreditlərin 60 %-nə (300 milyon manat) dövlət zəmanətinin verilməsi nəzərdə tutulub.
Yaqub Eyyubovun oğlunun 1 milyardı dondurulduAzərbaycan Respublikası Baş nazirinin birinci müavini Yaqub Eyyubovun oğlunun hesabına stop qoyulub.

Avrasiya.net Unikal-a istinadən xəbər verir ki, Yaqub Eyyubovun ölkədən çıxararaq Latviyanın paytaxtı Riqa şəhərindəki bankda oğlunun adına qoyduğu bir milyard dollar vəsait dondurulub.

Xatırladaq ki, Yaqub Eyyubov baş nazirin birinci müavini kimi hökumətin Silahlı Qüvvələrə nəzarət edən mühüm şəxsidir. O, hərbi təlimlərdə, eləcə də bir sıra yoxlama-nəzarət prosesində iştirak edib.

Onu da qeyd edək ki, bir müddət öncə Müdafiə Nazirliyinin Maliyyə idarəsinin bir neçə yüksək rütbəli zabiti külli miqdarda vəsaitin mənimsənilməsi ilə bağlı həbs edilib.
Gömrüyün daha bir generalı işdən çıxarıldıDövlət Gömrük Komitəsinin daha bir generalı işdən çıxarılıb.

Avrasiya.net-in Unikal-a istinadən məlumatına görə, bununla bağlı Komitə sədrinin birinci müavini, sədr vəzifəsini müvəqqəti icra edən Şahin Bağırov müvafiq əmr imzalayıb.

Əmrə əsasən, Gömrük Tariflərinin Tənzimlənməsi və Ödənişlər Baş İdarəsinin rəisi, general-mayor Mirqasım Fazil oğlu Vahabov təqaüdə göndərilib.