“İnflyasiya sürətlənsə də, dövlət istiqrazlarının faizi azalır""Qlobal inflyasiya dövlət borcuna başqa istiqamətdən də təsir edir. Artan inflyasiya volatilliyi borclanma xərclərinə təzyiq göstərir və investorlar uzunmüddətli borc üçün daha yüksək “mükafat” tələb edirlər".

Bunu "Report"a müsahibəsində İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib.

"Məsələn, Beynəlxalq Valyuta Fondu (IMF) hesablayıb ki, inflyasiya volatilliyində standart kənarlaşmanın 1 vahid artması üç ildə hökümətin uzunmüddətli istiqrazlarının gəlirliliyini 0,5 vahid artıra bilər, eyni zamanda, dövlət borcu artdıqca bu trend də güclənir.

Azərbaycanda inflyasiyanın sürətlənməsinə baxmayaraq, dövlət istiqrazlarının nominal gəlirlilik səviyyəsi azalır: “Məsələn, ötən il üçillik istiqrazın gəlirlilik səviyyəsi apreldə 7,8 % olduğu halda, bu ilin aprelində 4,3%-ə düşüb, deməli, inflyasiyanı da nəzərə alanda real gəlirlilik faizi kəskin azalıb. Bu hal investorların dövlətə inamının artması və məhdud alternativ sərmayə imkanlarının olması deməkdir. Hətta Maliyyə Nazirliyi tərəfindən 5 illik və 7 illik istiqrazların dövriyyəyə buraxılması onu göstərir ki, investorların risk antipatiyası azalıb və daha uzunmüddətli dönəmdə dövlətə inanırlar. Daha uzun müddətə və daha aşağı real gəlirliliklə dövlət qiymətli kağızlarının emissiyası dövlət borcunun strukturunda yerli borclanmanı, özü də daha əlverişli şərtlərlə artırır. Bu yolla, dövlət borcunda xarici borcun xüsusi çəkisi azalır və məzənnə riski də daxil olmaqla, bir sıra risklər yumşalır”, - deyə o, qeyd edib.
Mikayıl Cabbarov: "Hər il 100 min yeni iş yeri açmalıyıq"Azərbaycan hər il 100 min yeni iş yeri açmağı hədəfləməlidir.

Bunu Bakıda keçirilən və "Sahibkarlar Günü"nə həsr olunmuş “İqtisadiyyatın inkişafında sahibkarlığın rolu” mövzusunda konfransda iqtisadiyyat naziri Mikayıl Cabbarov deyib.

"Son 30 ildə əhalimizin sayı 3 milyondan çox artıb. Biz hər il 100 min yeni iş yeri açmağı hədəfləməli, əmək bazarında çıxan gənclərin işlə təmin olunmasına zəmin yaratmalıyıq. Bu, həm də sahibkarlar üçün maraqlı olmalıdır. Çünki biznes maraqlarının ümumilli maraqlarla üst-üstə düşməsi önəmli məsələlərdən biridir. "Bir sıra sahibkarların təltif olunması ilə bağlı qərar verilib. Tədbir boyunca bu sahədə rəsmi şəkildə sahibkarları təbrik etmək şansımız olacaq", - o qeyd edib.
Azərbaycanın bank sektorunun aktivləri 22% artıbBu il aprelin 1-nə Azərbaycanın bank sektorunun aktivləri 39 673,2 milyon manat təşkil edib.

Azərbaycan Mərkəzi Bankına istinadən xəbər veririk ki, bu, ötən il aprelin 1-i ilə müqayisədə 22 % çoxdur.

Bankların aktivlərinin 16 350,0 milyon manatını müştərilərə verilmiş xalis kreditlər təşkil edib. Son 1 ildə sektorun kredit portfeli 24 % böyüyüb, kreditlərin aktivlərdəki payı isə 40,6 %-dən 41,2 %-ə yüksəlib.

Hesabat dövründə bank sektorunun öhdəlikləri 25,5 % artaraq 34 731,7 milyon manata, o cümlədən depozit portfeli 34,2 % artaraq 28 259,2 milyon manata çatıb. Bunun 10 200,8 milyon manatı fiziki, 18 058,4 milyon manatı isə hüquqi şəxslərin depozitləridir. İl ərzində əhalinin banklardakı vəsaitləri 27,3 %, şirkətlərin banklardakı vəsaitləri isə 38,5 % artıb.

Son 1 ildə bankların Azərbaycan Mərkəzi Bankı qarşısında öhdəliyi isə 14,6% azalaraq 317,2 milyon manat olub.

Sektorun balans kapitalı isə 1,9 % artaraq 4 941,5 milyon manat təşkil edib.

Avrasiya.net
Rusiyaya neft və qaz embarqosu tətbiq edəcəyik - ABRusiyaya neft və qaz embarqosu ilə bağlı gec-tez qərar veriləcək, çünki AB bu ölkədən enerji asılılığını dayandırmaqda qərarlıdır.

Axar.az xəbər verir ki, bunu Avropa İttifaqı Şurasının Prezidenti Şarl Mişel deyib.

"İndiyədək bir çox konkret ehtiyat tədbirləri görmüşük. Bu, yetərli deyil, ona görə də biz Rusiyaya təzyiqləri artırmaq üçün daim çalışırıq", - Mişel bildirib.
Azərbaycan Şimal-Cənub dəhlizinin əsas halqasına çevrilə bilər"Azərbaycan Şimal-Cənub nəqliyyat dəhlizinin əsas halqasına çevrilə bilər".

“Report” xəbər verir ki, bunu Rusiya hökumətinin sədr müavini katibliyinin rəhbər müavini Fedor Çernitsin iki ölkə arasında iqtisadi əməkdaşlığa dair Azərbaycan Dövlət İqtisad Universitetində (UNEC) keçirilən seminarda bildirib.

Onun fikrincə, Avrasiya İqtisadi İttifaqı (EEU) regionu, Rusiya və qonşu ölkələr arasında tarixən yaxın əməkdaşlıq əlaqələri qurulub, hazırda EEU ölkələri ticarət əlaqələrinin istiqamətlərini daha da genişlərndirirlər.

“Avrasiya inteqrasiya prosesləri Azərbaycan üçün də əhəmiyyətlidir, çünki Rusiya ilə Azərbaycan ticarət tərəfdaşlarıdır. O cümlədən Rusiya Azərbaycandan qeyri-neft məhsulları idxal edir”,- Rusiya rəsmisi qeyd edib.
SOCAR prezidentinin müşaviri işdən çıxarıldıAzərbaycan Respublikası Dövlət Neft Şirkətinin (SOCAR) Prezidentinin müşaviri Rəşad Əliyev vəzifəsindən ayrılıb.

Avrasiya.net Unikal.org-a istinadən xəbər verir ki, bununla bağlı SOCAR Prezidenti vəzifəsini icra edən Rövşən Nəcəf əmr imzalayıb.

Qeyd edək ki, Rəşad Əliyev SOCAR-a təyinat almazdan əvvəl ləğv edilmiş Milli Təhlükəsizlik Nazirliyində çalışıb. O, 2019-cu ilədək isə SOCAR-ın Təhlükəsizlik İdarəsinin rəisi olub. R.Əliyev daha sonra SOCAR-ın prezidentinin müşaviri təyin olunub.
Dövlət Vergi Xidməti sahibkarlara müraciət edibBu ilin I rübü üzrə sadələşdirilmiş vergi bəyannaməsi və muzdlu işlə əlaqədar ödəmə mənbəyində tutulan vergi, məcburi dövlət sosial sığorta, işsizlikdən sığorta və icbari tibbi sığorta haqları bəyannaməsi (hesabatı) aprelin 20-dən gec olmayaraq təqdim olunmalıdır.

Avrasiya.net xəbər verir ki, bu barədə İqtisadiyyat Nazirliyi yanında Dövlət Vergi Xidmətinin sahibkarlara müraciətində bildirilir.

Qurum bəyan edib ki, bəyannamələr vaxtında təqdim olunmadığı halda vergi ödəyicisinə hər bir bəyannamə üzrə 40 manat maliyyə sanksiyası tətbiq edilir.
Taleh Kazımov parlamentdə SÖZ VERDİ"Mənə göstərilən ali etimada görə möhtərəm Prezidentə minnətdarlığımı bildirirəm".

Bunu Mərkəzi Bankın İdarə Heyətinin üzvü seçilən Taleh Kazımov Milli Məclisin bugünkü iclasında çıxışı zamanı deyib.

"Milli Məclisin deputatlarına da mənim üzvlüyümü təsdiq etdiklərinə görə təşəkkür edirəm. Qarşıya qoyulacaq tapşırıqlara, vəzifə öhdəliklərindən irəli gələn vəzifələri peşəkarlıqla icra edəcəyimə söz verirəm", - T.Kazımov bildirib.

Qeyd edək ki, bu gün Taleh Kazımov Mərkəzi Bankın İdarə Heyətinin üzvü seçilib.
Yeni baş bankir kim olacaq? - DOSYEBu gün Milli Məclisin İqtisadi siyasət, sənaye və sahibkarlıq komitəsinin iclasında Elman Rüstəmovun Mərkəzi Bankın idarə Heyətinin üzvlüyündən azad edilməsi, Taleh Kazımovun isə Mərkəzi Bankın İdarə Heyətinin üzvü vəzifəsinə təyin edilməsi haqqında Azərbaycan Respublikası Prezidentinin təqdimatları müzakirə edilib.

Hər iki təqdimata müsbət rəy verən İqtisadi siyasət, sənaye və sahibkarlıq komitəsi onları Milli Məclisin plenar iclasında müzakirə üçün tövsiyə edib.

Mərkəzi Bankın İdarə Heyətinin üzvü vəzifəsinə namizəd olan Taleh Kazımovun dosyesini təqdim edirik:

T.Kazımov 11 sentyabr 1983-cü ildə anadan olub.

Azərbaycan Texniki Universitetinin “Avtomatika və hesablama texnikası” fakültəsinin bakalavr pilləsini bitirib, daha sonra Azərbaycan Dövlət Neft Akademiyasında MBA dərəcəsi və Georgia State University-də kommersiya üzrə dərəcə alıb.

2013 ildə T.Kazımov London Business School (Böyük Britaniya) və Harvard Business School (ABŞ) məzunu olub.

Peşəkar fəaliyyətə 2001-ci ildən başlayıb. 2004-cü ildən 2006-cı ilədək davam edən dövrdə “Bank Standard” QSC-də müxtəlif vəzifələrdə, o cümlədən Xəzinədarlıq departamentinin aparıcı mütəxəssisi, İdarəetmə uçotu və büdcə planlaşdırılması istiqamətinin rəhbəri, Korporativ kreditləşmə istiqamətinin direktor müavini vəzifələrində işləyib. 09.2006-cı ildən 01.2007-ci ilədək “Ernst & Young” şirkətində auditor vəzifəsini tutub. 01.2007-ci ildən 07.2007-ci ilədək “FinEko” İAA-nın Baş direktoru vəzifəsini tutub.

Taleh Kazımov 07.2007-ci ildən “PAŞA Bank”da Risklərin İdarəedilməsi Departamentinin meneceri vəzifəsində işləməyə başlayıb, 2009-ci ilin avqustundan isə Bankın Xəzinədarlıq Departamentinin direktoru vəzifəsini tutub.

7 dekabr 2011-ci ildən “PAŞA Bank”ın İdarə Heyətinin üzvü seçilib.

Korporativ və biznes-bankinq istiqamətləri, investisiya bloku, ticarət maliyyələşdirməsi, maliyyə institutları və kredit menecmenti sahələri onun kurasiyasında olub.

Elman Rüstəmovun gedişindən sonra Azərbaycanın baş bankiri postuna Taleh Kazımovun gətiriləcəyi gözlənilir.
Elman Rüstəmov Mərkəzi Bankın sədri vəzifəsindən çıxarılırBu gün Milli Məclisin İqtisadi siyasət, sənaye və sahibkarlıq komitəsinin iclasında Elman Rüstəmovun Mərkəzi Bankın İdarə Heyətinin üzvlüyündən azad edilməsi, Taleh Kazımovun isə Mərkəzi Bankın İdarə Heyətinin üzvü vəzifəsinə təyin edilməsi haqqında Azərbaycan Respublikası Prezidentinin təqdimatları müzakirə edilib.

Avrasiya.net xəbər verir ki, hər iki təqdimata müsbət rəy verən İqtisadi siyasət, sənaye və sahibkarlıq komitəsi onları Milli Məclisin Plenar İclasında müzakirə üçün tövsiyə edib.

Qeyd edək ki, E.Rüstəmov hazırda Mərkəzi Bankın İdarə Heyətinin üzvü və sədridir. O, İdarə Heyətinin üzvlüyündən azad edilməklə həm də MB sədrliyindən də azad olunacaq.