Yeni binamızı öz hesabımıza tikəcəyik - RüstəmovAzərbaycan Mərkəzi Bankının (AMB) sədri Elman Rüstəmov rəhbərlik etdiyi qurum üçün 218 milyon avroya yeni inzibati bina tikilməsinə münasibət bildirib.

Avrasiya.net xəbər verir ki, o, bu barədə onlayn keçirdiyi mətbuat konfrasında danışıb.

"Xəzinəmizin böyük bir hissəsi Nərimanov rayonunda bir dalanda yerləşir. Bu isə heç bir tələbə cavab vermir. Ümumilikdə isə biz 3 ünvanda fəaliyyət göstəririk. Biznes prosesinin avtomatlaşdırılması üçün yeni bina tikməliyik. Bina 4-5 il ərzində hazır olacaq. Ondan sonra biz hazırda fəaliyyət göstərdiyimiz binaları dövlətə qaytaracağıq. Bu isə əhəmiyyətli aktivlərdir.

Biz yeni inzibati binamızı öz vəsaitimiz hesabına tikəcəyik. Mənim bu bina ətrafında gedən müzakirələrdən xəbərim var. Onu qeyd edim ki, son 3 ildə dövlət büdcəsinə 7,8 milyard manat vəsait köçürmüşük. Bu il isə 250 milyon manat köçürməyi düşünürük", - deyə E.Rüstəmov əlavə edib.
"Ölkəmiz üçün yeni iqtisadi üfüqlər açılır"Qardaş Türkiyənin əsasını qoyduğu ənənəni dost və müttəfiq İtaliyanın davam etdirməsi, Azərbaycanı “Böyük İyirmilik” (G20) ölkələrinin Zirvə toplantısına dəvət etməsi olduqca xoş və təqdirəlayiq haldır. 2015-ci ildə Antaliyada Türkiyənin ev sahibliyi etdiyi “Böyük İyirmilik” sammitinə Azərbaycan ilk dəfə xüsusi qonaq qismində qatılmışdı.

Ölkəmiz 2021-ci ilin 30-31 oktyabr tarixlərində İtaliyanın paytaxtı Romada keçiriləcək “Böyük iyirmilik” (G20) ölkələrinin Zirvə görüşünə də hazırda xüsusilə diqqət mərkəzində olan bir ölkə kimi dəvət edilib. Belə ki, Azərbaycan “Böyük İyirmilik” ölkələrinin Roma sammitinə həm İkinci Qarabağ müharibəsində qələbə qazanmış ölkə kimi, həm də İtaliya ilə sıx əməkdaşlıq və müttəfiqlik münasibətlərinə malik olan ölkə kimi qatılacaq.

Azərbaycanın dünyanın aparıcı iqtisadiyyatlarının sammitinə dəvət alması həqiqətən də böyük tarixi hadisədir. Bu şans Cənubi Qafqaz ölkələri arasında yalnız Azərbaycana verilir. Bunun da obyektiv səbəbləri var. Hər kəsə bəllidir ki, “G20”-nin toplantılarına qatılan ölkələr bir qayda olaraq öz inkişafları ilə diqqəti cəlb edən ölkələrdir. Azərbaycan da gənc ölkə olmasına baxmayaraq qısa müddətdə böyük iqtisadi uğurlar qazanıb. Bu da dünyada Azərbaycana olan marağı artırmaqla yanaşı, həm də ölkəmizin beynəlxalq imicini yüksəldib. Bu mənada Azərbaycanın “G20” sammitinə dəvət olunması ölkəmizin dünya iqtisadiyyatında oynadığı mühüm rolunun göstəricisi sayıla bilər. Bu eyni zamanda onu göstərir ki, regionumuz üzərindən həyata keçirilməsi nəzərdə tutulan istənilən qlobal, beynəlxalq əhəmiyyətli layihənin reallaşması Azərbaycanın iştirakı olmadan mümkün deyil.

Azərbaycanın böyük geoiqtisadi layihələrə cəlb olunması onun dünya iqtisadi proseslərində mühüm aktorlardan birinə çevrilməsinə zəmin yaradır. “G20” sammitində iştirak imkanını qazanmağımız ölkə iqtisadiyyatına, xüsusən də işğaldan azad edilmiş Qarabağımızın bərpa-quruculuq işlərinə xarici sərmayələrin cəlb olunması baxımından da olduqca əhəmiyyətlidir. Bir sözlə, ölkəmiz üçün yeni iqtisadi üfüqlər açılır.

Əlisahib Hüseynov
Milli Həmrəylik Partiyasının sədri
Deputat komitənin iclasında maliyyə amnistiyasından danışıbBu gün Milli Məclisin İqtisadi siyasət, sənaye və sahibkarlıq komitəsinin iclası keçirildi. İclasda komitənin rəhbəri Tahir Mirkişili (Tahir Mirkishili) 2020-ci ildəki fəaliyyətə dair geniş hesabatla çıxış etdi və 2021-ci ilin yaz sessiyası üçün iş planı haqqında məlumat verdi. Həmkarlarımızın iştirakı ilə hesabat ətrafında müzakirələr aparıldı, qarşıdakı fəaliyyət üçün bir sıra təkliflər verildi.

Avrasiya.net xəbər verir ki, bunu Milli Məclisin deputatı Elnur Allahverdiyev sosial şəbəkə hesabında yazıb.

Deputat qeyd edib ki, Vətən müharibəsində qazandığımız qələbə komitə müzakirələrinin də əsas mövzularından oldu. Həmkarlarımızın çoxsaylı təkliflərinin böyük qismi işğaldan azad olunmuş torpaqlarımızın bərpası və infrastruktur layihələrinin həyata keçirilməsinə həsr olunmuşdu. Bu təkliflərin hər biri əlbəttə ki, daha detallı şəkildə müzakirə olunacaq.

Komitə iclasında mən də təkliflə çıxış etdim. Bu gün Qarabağımıza ediləcək investisiya, onun miqdarı və təmayülü ən çox müzakrə edilən məsələlərdəndir. Biz bilirik ki, dövlət sərmayesi ilə yanaşı özəl sfera və xarici kapitalın da bu prosesdə payı olacaq.

Dünyanın bir sıra ölkələrində maliyyə amnistiyası təcürbəsi mövcuddur. Fikrimcə, maliyyə amnistiyası nəticəsində biz həm özəl sektora dəstək verə bilərik, həm də qanuni müstəviyə çıxmış maliyyə kütləsinin torpaqlarımızın bərpası istiqamətində sərf olunmasına şərait yaratmış olaraq. Eyni zamanda, leqallaşan vəsaitdən dövlət büdcəsinə müəyyən ödəmələr də edilə bilər. Fikrimcə, qarşıdakı fəaliyyət müddətində “Maliyyə amnistiyası haqqında” qanun layihəsinin hazırlanması istiqamətində müzakirələr aparıla bilər.

Sonra "İşsizlikdən sığorta haqqında" və "Dövlət rüsumu haqqında" Qanunlarda dəyişiklik edilməsi barədə Azərbaycan Respublikası qanunlarının layihələri (birinci oxunuş) müzakirə edildi.

#MilliMəclis #Deputat #ElnurAllahverdiyev
"Bu əməkdaşlıq iqtisadi, nəqliyyat xarakterli məsələlərin həlli üçün geniş perspektivlər açır"Azərbaycan Liberal Demokrat Partiyasının (ALDP) sədri Fuad Əliyev KİV-ə açıqlamasında Azərbaycanla Türkmənistan arasında imzalanan müqavilədən danışdı.

ALDP sədri bildirib ki, Xəzəryanı ölkələr arasında əməkdaşlığın vacibliyini, 2008-ci ildə keçirilən prezident seçkiləri zamanı prezidentliyə namizəd kimi seçki proqramında göstərmişdi.

“Çox müsbət haldır ki, bu əməkdaşlıq başlanıb və bu günə kimi davam olunur. Xəzəryanı ölkələr arasında yüksək səviyyədə əməkdaşlıq və qarşılıqlı fəaliyyət mövcuddur ki, bu da təhlükəsizliyin, sabitliyin qarantıdır. Bu əməkdaşlıq iqtisadi, nəqliyyat xarakterli məsələlərin həlli üçün geniş perspektivlər açır. Xəzəryanı ölkələrin əməkdaşlığının nəticəsi olaraq Azərbaycan və Türkmənistan arasında uzun müddət mübahisəli olan, bizim "Kəpəz", türkmənlərin isə "Sərdar" adlandığı neft-qaz yatağının "Dostluq" adı ilə istismara açılmasına razılaşması çox böyük hadisədir".

Fuad Əliyevin sözlərinə görə, imzalanan Anlaşma Memorandumu ölkəmizin neft-qaz strategiyasının inkişafında böyük əhəmiyyətə malikdir. Azərbaycan tranzit ölkə kimi mövqeyini möhkəmləndirəcək:

«Bu tarixi hadisə ölkəmizin tranzit ölkə kimi rolunun artmasına da öz müsbət təsirini göstərəcək.»

ALDP sədrinin fikirincə, bu razılaşmanın İqtisadi səmərəsi ilə yanaşı, onun siyasi əhəmiyyəti də var:

“Türkmənistan qazının TANAP-TAP yolu ilə tranzit olunması gözlənilir. Azərbaycan “Dostluq” yataqda olan enerji resurslarının birgə işlənməsi, dünya bazarına çıxarılmasından dövlət gəlirlərini artırmaq imkanı qazanacaqla bərabər, tranzit ölkə kimi mövqeyini daha da gücləndirəcək. “Dostluq” yatağından hasil edilən neft və qazın dünya bazarına çıxarılması təmin olunaxaq. Bu da, öz növbəsində Azərbaycanın tranzit ölkə olaraq əhəmiyyətini artıracaq.”
Zavod direktoru işdən çıxarıldıMüdafiə Sənayesi Nazirliyinə məxsus Xaçmaz Kondensator Zavodu MMC-nin direktoru Maarif Bağırov vəzifəsindən azad edilib.

Avrasiya.net xəbər verir ki, müəssisəyə rəhbərlik Sübhan Süleymanova həvalə olunub.

Xatırladaq ki, "Xaçmaz Kondensator Zavodu" 1981-ci ildə SSRİ-nin Elektronika Sənayesi Nazirliyinin “Elektrolit” İstehsalat Birliyinin Severo-Zadonsk Kondensator Zavodunun filialı kimi yaradılıb, 1982-ci ildən fəaliyyətə başlayıb. Zavod 1993-cü ildən Dövlət Xüsusi Maşınqayırma və Konversiya Komitəsinin tərkibində fəaliyyətini davam etdirib, 2006-cı ildə isə Müdafiə Sənayesi Nazirliyinin tabeliyinə verilib. Onun nizamnamə kapitalı 15 217 935 manatdır.
"G-20 dəvət Azərbaycan üçün daha bir tarixi qələbədir"Azərbaycan Romada keçiriləcək “Böyük iyirmilik” (G-20) ölkələrinin zirvə görüşünə dəvət edilib. Tədbirə həmçinin BMT, Avropa İttifaqı, əsas beynəlxalq maliyyə təsisatları da dəvət alıb. İtaliyanın sədrliyində “İnsanlar, Planet, Rifah” deyə üç başlıqla ifadə olunan ətraf mühitin mühafizəsi, yeni təhlükələrin qarşısını almaq kimi hədəflər qarşıya qoyur.

Zirvə görüşü ərəfəsində may-sentyabr ayları ərzində nazirlər səviyyəsində 10 sahəvi (innovasiya və tədqiqat, iqtisadiyyat və maliyyə, kənd təsərrüfatı, mədəniyyət və turizm, ətraf mühit, iqlim və enerji, ticarət, əmək və təhsil, səhiyyə, xarici işlər və inkişaf, cari məsələlər) görüş keçiriləcək.

Avrasiya.net xəbər verir ki, məsələyə münasibət bildirən Azərbaycan Liberal Demokrat Partiyasının (ALDP) sədri Fuad Əliyev bunun Azərbaycan üçün iqtisadi baxımdan çox əhəmiyyətli olacağını bildirib:

“Azərbaycan Romada keçiriləcək “Böyük iyirmilik” (G20) ölkələrinin zirvə toplantısına dəvət edildi. G-20 dəvət Azərbaycan üçün daha bir tarixi qələbədir. Vətən-İkinci Qarabağ müharibəsinin və düzgün yürüdülən siyasətin uğurlu nəticəsidir. Bu onu göstərir ki, siyasi və hərbi gücümüzü artıq bütün dünya qəbul edir. Azərbaycan regionun aparıcı ölkəyə çevrilib. G-20 toplantısında iştrakımız iqtisadi baxımdan əhəmiyyətli olacaq. Azərbaycan regionda və daha geniş coğrafiyada transmilli kommunikasiya xətlərinin, müasir infrastruktura malik nəqliyyat-tranzit dəhlizlərinin yaradılması işində fəal rol oynayır və artıq demək olar ki, bölgənin nəqliyyat-logistika mərkəzinə çevriləcək”.

Qeyd edək ki, G-20-nin daimi üzvləri Almaniya, ABŞ, Argentina, Avstraliya, Böyük Britaniya, Braziliya, Cənubi Afrika Respublikası, Cənubi Koreya, Çin, Fransa, Hindistan, İndoneziya, İtaliya, Kanada, Meksika, Rusiya, Səudiyyə Ərəbistanı, Türkiyə, Yaponiya, habelə Avropa İttifaqıdır.

Azərbaycanla İran arasında yeni körpü tikiləcəkAzərbaycan və İran arasında Astara sərhəd gömrüyündə yeni avtomobil körpüsü tikiləcək.

Avrasiya.net xəbər verir ki, bunu İranın yol və şəhərsalma naziri Məhəmməd Eslami Azərbaycan Baş nazirinin müavini Şahin Mustafayevlə görüşdə deyib.

M.Eslaminin sözlərinə görə, bununla əlaqədar gələn ay müqavilə imzalanacaq və Astarada körpü və terminalın təməli qoyulacaq.

O əlavə edib ki, hazırda Astarada mövcud olan avtomobil körpüsü iki ölkə arasında məhsul mübadiləsi və tranziti üçün yetərli deyil.

İranlı nazir qeyd edib ki, yeni körpü və terminal vasitəsilə Bakı-Astara magistral yolu İranın Ərdəbil-Astara-Rəşt magistral yoluna birləşəcək.

M.Eslami qeyd edib ki, Azərbaycan vasitəsi ilə digər ölkələrə çıxış İran üçün böyük fürsətdir. Bu baxımdan Şimal-Cənub Nəqliyyat Dəhlizinin aktivləşdirilməsi diqqət mərkəzindədir.

Nazir bildirib ki, koronavirus pandemiyası dövründə İran və Azərbaycan arasında ticarət münasibətlərinin inkişafında hər hansı azalma olmayıb, çünki sərhədlər idxal-ixrac prosesi üçün bağlanmayıb:

“Astara-Astara dəmiryolu vasitəsi ilə iki ölkənin ticarət mübadiləsi 25% artıb. Bu isə ikitərəfli münasibətlərin inkişaf etməkdə olduğunu göstərir. Həmçinin tranzit haqqında da iki ölkə arasında anlaşmalar əldə olunub”.
Azərbaycan-İran əlaqələrinin perspektivləri müzakirə edildiTehranda səfərdə olan Azərbaycanın baş nazirinin müavini, Azərbaycan ilə İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədri Şahin Mustafayev yanvarın 18-də İranın Prezident Administrasiyasının rəhbəri Mahmud Vaezi ilə görüşüb.

Avrasiya.net xəbər verir ki, görüşdə qarşılıqlı əlaqələrin bugünkü vəziyyəti və perspektivləri müzakirə edilib.

Şahin Mustafayev Dövlət Komissiyasının İranda keçirilən 14-cü iclasından danışıb və qarşılıqlı əlaqələrin inkişafı baxımından komissiyanın işini yüksək qiymətləndirib.

Baş nazirin müavini bildirib ki, İran ilə Azərbaycan yaxın qonşu və dost dövlətlərdi. Qarşılıqlı əlaqələrin inkişafı hər iki dövlətin mənafeyinə uyğundur. Bu günədək Azərbaycan Prezidenti İlham Əliyevlə İran Prezidenti Həsən Ruhani arasında 13 görüş keçirilib. Hər iki prezident münasibətlərin yüksək səviyyəyə inkişafı üçün siyasi iradə nümayiş etdiriblər. Bunu nəticəsidir ki, dövlətlərimiz arasında 100-dən çox sənəd imzalanıb.

Azərbaycan ərazilərinin işğaldan azad edilməsi istiqamətində aparılan hərbi əməliyyatlar zamanı Azərbaycanın ədalətli mövqeyini dəstəklədiyinə görə Şahin Mustafayev İran xalqına və dövlətinə minnətdarlığını bildirib. Nəzərə çatdırıb ki, Qarabağın işğaldan azad edilməsi regionda yeni vəziyyətin yaranmasına səbəb olub. Bu, region dövlətlərinin qarşılıqlı iqtisadi əlaqələr qurması üçün geniş imkanlar yaradıb.

Qeyd olunub ki, Bakı-Naxçıvan dəmir yolunun yenidən qurularaq istismara verilməsi Rusiya, Azərbaycan, İran, Türkiyə və Ermənistanın bir-biriləri ilə iqtisadi-ticarət əlaqələri yaratmasına imkanı verəcək. Nəqliyyat və tranzit sahəsində faydalı əməkdaşlıq əlaqələri qurulacaq.

Şahin Mustafayev dövlətlərimiz arasında imzalanan sənədlərin icrası üzrə işlərin davam etdiyini nəzərə çatdırıb.

İranın Prezident Administrasiyasının rəhbəri Mahmud Vaezi müştərək iqtisadi komissiyanın fəaliyyətini yüksək qiymətləndirərək bu komissiyanın işi nəticəsində bir çox məsələlərin həll olunduğunu bildirib. Nəzərə çatdırıb ki, İran hər zaman Azərbaycanın ərazi bütövlüyünü tanıyıb. Azərbaycan rayonlarının işğaldan azad olmasının sevindirici olduğunu qeyd edən Mahmud Vaezi bildirib ki, artıq regionda yeni imkanlar yaranıb və bu imkanlardan istifadə edib iqtisadi əlaqələri daha da genişləndirmək zərurəti meydana çıxıb. Yeni şəraitdə ölkələr arasında çoxtərəfli əməkdaşlıq üçün zəmin yaranıb.

Administrasiya rəhbəri vurğulayıb ki, Qarabağın bərpasında İran şirkətləri də iştirak etməyə hazırdı.

Görüşdə qarşılıqlı maraq doğuran məsələlər ətrafında geniş fikir mübadiləsi aparılıb.
Cavid Qurbanov İran səfiri ilə müzakirələr apardı“Azərbaycan Dəmir yolları” Qapalı Səhmdar Cəmiyyətinin sədri Cavid Qurbanov İranın ölkəmizdəki səfiri Seyid Abbas Musəvi ilə görüşüb.

QSC-nin mətbuat xidmətindən Avrasiya.net-ə bildiriblər ki, görüşdə dəmir yolları sahəsində əlaqələrin perspektivləri, Azərbaycanın nəqliyyat-logistika imkanları, beynəlxalq nəqliyyat dəhlizləri barədə danışılıb.

Cəmiyyətin sədri Cavid Qurbanov ölkəmizdə diplomatik fəaliyyətə yeni başlayan səfiri “Azərbaycan Dəmir Yolları” QSC-də ilk dəfə görməkdən məmnun olduğunu bildirib, ona uğurlar arzulayıb. O, dəmir yolları sahəsində əməkdaşlığın bundan sonra da inkişaf etdiriləcəyinə, işlərin koordinasiyasında səfirliyin dəstəyini əsirgəməyəcəyinə inamını vurğulayıb.

Səfir Seyid Abbas Musəvi Vətən müharibəsində Azərbaycanın qazandığı böyük Zəfər münasibətilə sevincini bölüşüb, görüş iştirakçılarını təbrik edib. Bildirib ki, İran hər zaman Azərbaycanın beynəlxalq hüququn norma və prinsiplərinə əsaslanan ədalətli mövqeyini dəstəkləyib. Qonaq qısa fəaliyyəti müddətində işçi qrupları səviyyəsində dəmir yolları layihələri ilə bağlı bir neçə müzakirələrdə iştirak etdiyini, həmin layihələrin yekunlaşması istiqamətində dəstək göstərəcəyini diqqətə çatdırıb. Səfir Azərbaycanın işğaldan azad edilmiş ərazilərində aparılan bərpa-quruculuq işlərində İran şirkətlərinin də maraqlı olduğunu bildirib.

Görüşdə “Şimal-Cənub” dəhlizinin nəqliyyat sahəsində beynəlxalq əməkdaşlıq baxımından strateji əhəmiyyəti, Rəşt-Astara dəmir yolunun icra vəziyyəti ilə bağlı fikir mübadiləsi aparılıb. Qeyd olunub ki, həmin dəhliz yalnız İran, Azərbaycan və Rusiyanın deyil, bu marşrutla ixrac-idxal əməliyyatlarını həyata keçirərək ticarət dövriyyəsini artıran digər region ölkələrinin də inkişafında əhəmiyyətli rol oynayacaq.
Azərbaycanda İran Ticarət Evi yaradılırAzərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayev İran İslam Respublikasının Azərbaycana yeni təyin olunmuş fövqəladə və səlahiyyətli səfiri Seyid Abbas Musəvi ilə görüşüb.

ASK-dan Avrasiya.net-ə verilən məlumata görə, yanvarın 8-də keçirilən görüşdə ölkələrimiz arasında iqtisadi əlaqələrin daha da genişləndirilməsi və bu məqsədlə özəl sektoru təmsil edən sahibkarların işbirliyinin artırılması yolları müzakirə edilib.

Konfederasiya prezidenti İranın iri biznesə dəstək təşkilatları ilə ASK arasında məhsuldar əməkdaşlıq münasibətlərinin qurulduğunu qeyd edib. Məmməd Musayev işğaldan azad olunan ərazilərin böyük hissəsinin İranla Azərbaycan sərhəddinə düşdüyünü və bunun da həmin ərazilərdə investisiya üçün geniş imkanlar yaratdığını vurğulayıb.

Öz növbəsində, S.A.Musəvi hər iki dövlət başçılarının müdrik siyasəti nəticəsində münasibətlərin yüksək səviyyədə olduğunu, səfir kimi əsas fəaliyyət istiqamətinin ölkələrimiz arasında iqtisadi əlaqələrin genişləndirilməsinə yönələcəyini bildirib. O, Azərbaycanda İran Ticarət Evinin yaradılmasının, İran-Azərbaycan Müştərək Ticarət Palatasının fəaliyyətinin daha səmərəli şəkildə qurulması üçün səylərini artıracağını vurğulayıb.

Səfirin sözlərinə görə, ölkəmizə gəlməzdən öncə Azərbaycanla həmsərhəd olan İranın dörd vilayətinə səfər edib, orada fəaliyyət göstərən sahibkarlarla, ticarət-sənaye palatalarının rəhbərləri, eləcə də, İran Ticarət, Sənaye, Mədən və Kənd təsərrüfatı Palatasının rəhbərliyi ilə görüşüb. İran sahibkarları Azərbaycanla əlaqələr qurmaqda çox maraqlı olduqlarını bildiriblər.

Eyni zamanda, Seyid Abbas Musəvi cari ilin 18-19 yanvar tarixlərində Tehranda keçiriləcək birgə hökumətlərarası komissiyanın iclasının da iqtisadi əlaqələrin inkişafına töhfə verəcəyini qeyd edib.

Daha sonra, S.A.Musəvi Təbriz Ticarət və Sənaye Palatasının ASK ilə birgə video- konfrans keçirməkdə maraqlı olduqlarını görüş iştirakçılarının diqqətinə çatdırıb. O, Azərbaycanla həmsərhəd bölgələrdə fəaliyyət göstərən şirkətlərlə əlaqələrin qurulması üçün geniş imkanlar olduğunu və eyni zamanda, ixtisaslaşmış sərgilərin keçirilməsinə hazırlaşdıqlarını bəyan edib. İran məhsullarının həm quru, həm dəmiryolu, həm də dəniz vasitəsilə daşınması üçün müştərək şirkətlərin yaradılmasını təklif edib.

ASK prezidenti Məmməd Musayev 2020-ci ilin dünya iqtisadiyyatı üçün çətin il olduğunu, lakin ölkəmizin iqtisadi dayanıqlığını qoruyub saxladığını, 30 illik işğala son qoyduğunu bildirib. O, Azərbaycan Respublikası Prezidenti cənab İlham Əliyevin qonşu ölkələrlə qurduğu yüksək siyasi dostluq əlaqələrinin iqtisadi münasibətlərin inkişafı üçün böyük rol oynadığı söyləyib. Konfederasiya prezidenti hər iki ölkə arasında ticarət dövriyyəsinin artırılması üçün Ticarət Evinin açılmasının vacibliyini vurğulayaraq bunun üçün ASK-nın hər cür dəstək verməyə hazır olduğunu bildirib.

Həmçinin, Məmməd Musayev Beynəlxalq Sənayeçilər və Sahibkarlar Konqresi haqqında qonaqlara məlumat verərək, orada sədr müavini olduğunu nəzərə çatdırıb. O, Konqresə üzv ölkələrə çıxış üçün iranlı sahibkarlara dəstək verməyə hazır olduğunu bildirərək, Rusiya-Azərbaycan-İran Biznes Şurası formatının yaradılmasını təklif edib.

Səfir S.A.Musəvi təkliflərə və səmərəli müzakirələrə görə ASK prezidentinə təşəkkürünü bildirib.