İordaniyanın səfiri komitə sədri ilə görüşüb

İyulun 28-də İordaniya Haşimilər Krallığının Azərbaycandakı səfiri Omar Al Nahar Dövlət Şəhərsalma və Arxitektura Komitəsinin sədri Anar Quliyev ilə görüşüb.

Tərəflər şəhərsalma, tikinti və məskunlaşma sahələrində əməkdaşlıq imkanlarını müzakirə edərək aidiyyəti qurumlar arasında əlaqələrin qurulmasının vacibliyini vurğulayıblar.

İşğaldan azad edilmiş ərazilər də daxil olmaqla Bakıda və regionlarda həyata keçirilən layihələr səfir tərəfindən yüksək qiymətləndirilib. Quliyev həmçinin İordaniyanın COP29 çərçivəsində qəbul olunmuş bəyannaməyə dəstəyinə görə təşəkkür edib.

Görüşdə İordaniya tərəfi 3-cü Azərbaycan Milli Şəhərsalma Forumuna və 2026-cı ildə Bakıda keçiriləcək 13-cü Ümumdünya Şəhərsalma Forumuna dəvət olunub.