Azərbaycanın iqtisadi artım tempi aybaay sürətlənirAzərbaycanın iqtisadi artım tempi aybaay sürətlənir.

Avrasiya.net xəbər verir ki, bu fikirləri İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı bildirib.

Onun sözlərinə görə, 2021-ci ilin ilk 9 ayında Azərbaycanda ÜDM-in artım tempi 6,2 faiz böyüyən qeyri-neft sektorunun drayverliyilə 4,8 faiz qeydə alınıb: “BVF Azərbaycan iqtisadiyyatının bu il 3 faiz artmasını proqnozlaşdırır ki, bu da əvvəlki proqnozları üstələyir və milli iqtisadiyyata güvənin artmasını göstərir. Lakin milli iqtisadiyyatın artım tempi həm BVF-nin, həm də Dünya Bankının proqnozlarını əhəmiyyətli şəkildə üstələyir. Artıq Azərbaycanda iqtisadi artım tempi “Dünya iqtisadi icmalı”nda Orta Şərq və Mərkəzi Asiya üçün proqnozlaşdırılan 4,1 faizlik həddi üstələyib”.

Vüsal Qasımlı bunun əsas səbəbini yüksək sənayeləşmə tempində görür: “Azərbaycanda ÜDM istehsalının 40,1 faizi sənayenin payına düşür ki, bu da orta dünya göstərici 24,8 faizdən əhəmiyyətli üstündür. Müqayisə üçün deyim ki, sənayenin ÜDM-də payı Mərkəzi Avropa və Baltik ölkələrində 27,2 faiz, Avrozonada 21,5 faiz və OECD ölkələrində isə 21,1 faizdir. Azərbaycanda sənayenin strukturunda da qeyri-neft-qaz sektorunun xüsusi çəkisi daha sürətlə artır. Azərbaycan dördüncü sənaye inqilabının tələblərinə uyğun inkişaf edir".

V.Qasımlı post-konflikt quruculuğu, həmçinin tədiyyə və icmal büdcə balanslarının profisiti şəraitində makroiqtisadi fundamentalların iqtisadi artımı stimullaşdırdığını qeyd edib: “BVF-nin proqnozlarına əsasən Azərbaycanın cari əməliyyatlar hesabının ÜDM-ə nisbəti 2021-ci ildə 7,8 faiz təşkil etməklə Orta Şərq və Mərkəzi Asiyanın eyniadlı göstəricisi – 1,7 faizdən əhəmiyyətli şəkildə üstün olacaqdır. Proqnozlara görə Azərbaycan cari əməliyyatlar hesabının ÜDM-ə nisbəti göstəricisinə görə 2021-ci ildə Orta Şərq və Mərkəzi Asiya bölgəsində ilk üçlükdə qərarlaşacaqdır”.

Azərbaycan post-neft dövrünə hazırlaşsa da, hazırda enerji bazarlarında yaşanan problemlərin fonunda neft-qaz ixracatçısı statusunu inamla qoruyur və ciddi təhdidlərlə üzləşmiş Avropanın enerji təhlükəsizliyində rolunu gücləndirir: “Dünyada təchizat zəncirlərində yaşanan problemlərin fonunda Azərbaycanın Şərq-Qərb dəhlizinin üzərində yeni bir arteriyanın – “Zəngəzur dəhlizi”ni gerçəkləşdirməsi təkcə ölkəmizin deyil, regionun iqtisadi artım potensialına töhfə verə bilər”.
50 min ailəyə rüsumsuz çıxarış veriləcəkBu barədə Milli Məclisdə “Dövlət rüsumu haqqında” qanuna edilən dəyişikliyi təqdim edən iqtisadi siyasət komitəsinin sədri Tahir Mirkişili bildirib.

O, qeyd edib ki: “1996-cı ildə qəbul edilmiş “Torpaq islahatı haqqında” Azərbaycan Respublikasının Qanununa uyğun olaraq ölkəmizdə 2032 kolxoz və sovxoz ləğv edilmiş, 869 268 ailəyə torpaq payı verilmişdir. Bu islahat ölkəmizdə sahibkarlığın inkişafına böyük təkan vermişdir.

Keçən müddət ərzində bu sahədə aprılmış təhlillər verilmiş torpaq paylarının sənədləşməsi zamanı bir çox nöqsanlara yol verildiyini üzə çıxarmışdır. Belə ki,
1. Torpaq islahatı zamanı hər bir vətəndaşa (ailəyə) torpaq payı verilsə də, təqribən 50 min ailənin həmin torpaq sahələri üzərində mülkiyyət hüquqlarını təsdiq edən sənədlər verilməmişdir. Halbuki, torpağa mülkiyyət hüququna dair sənədlər 10 gün müddətində Dövlət Torpaq Komitəsində qeydiyyatdan keçirildikdən sonra təqdim edilməli idi.

2. Bütün torpaq istifadəçilərinə verilmiş köhnə dövlət aktları, şəhadətnamələrin yeni təsdiq olunmuş nümunələrlə əvəz edilməsinə müvafiq dair tapşırıq olsa da, bir çox torpaq sənədləri çıxarışla əvəz edilməmişdir.
3. Bəzi hallarda torpaq üzərində hüquqları təsdiq edən sənədlərin verilməsində qanunvericiliyin tələblərindən kənarlaşma olmuşdur. Bəzi reyestrdən çıxarışlar torpağın plan və ölçü sənədi olmadan verilmiş, həmin sənədlərdə torpaq sahələrinin məqsədli təyinatı ya yazılmamış, ya da qanunvericiliyin tələblərinə uyğun müəyyən edilməmişdir. Belə əkin sahələrinin istifadəçiləri isə səhv rəsmiləşməyə görə subsidiya ala bilmirlər.

4. Bəzi mülkiyyətçilərin istifadəsində olan torpaq sahələrinin faktiki və sənəddə göstərilən koordinatları arasında fərqlər mövcuddur. Həmin torpaq sahələrinin əsas hissəsinin faktiki koordinatları onların sənədlərindəki məlumatlara uyğun deyildir.
5. Torpaq sahələrinin nömrələnməsinin unikallığı tam təmin edilməyib. Torpaq islahatı zamanı islahat təsərrüfatlar üzrə aparıldığından eyni kənddə birdən çox təsərrüfat olduğu halda eyni koda malik torpaq sənədləri verilmişdir.

Bütün bu problemlər isə ailələrin çıxarış olmadığına və ya düzgün olmadığına görə aqrar subsidiyalara çıxışını məhdudlaşdırır, dövlətin inzibati resurslarını aşındırır, iqtisadi siyasətdə düzgün tənzimləmə üçün problemlər yaradır.

Mövcud problemlərin aradan qaldırılması üçün cənab Prezident 07 oktyabr 2021-ci il tarixdə Aqrar sahədə dövlət dəstəyi tədbirlərinin davamı olaraq pay torpaqları üzərində mülkiyyət hüquqlarının rəsmiləşdirilməsi işlərinin başa çatdırılması, habelə istehsal təyinatlı torpaq mülkiyyətçilərinin əkin subsidiyalarından müntəzəm olaraq yararlanması məqsədilə fərman imzalamışdır.

Fərmana əsasən ləğv edilmiş sovxoz və kolxozların özəlləşdirilən torpaqlarından pay almış, lakin bu torpaqlar üzərində mülkiyyət hüququ rəsmiləşdirilməmiş şəxslərin hüquqlarının onların müraciəti əsasında dövlət büdcəsinin vəsaiti hesabına daşınmaz əmlakın dövlət reyestrində qeydiyyata alınmasını tapşırılmışdır. Qeyd edim ki, hazırda mülkiyyət hüquqlaırnın rəsmiləşdirilməsi rüsumları hər bir ailə üçün 80 manat təşkil edir.

Bu xidmətlərə görə xərclərin-rüsumların maliyyələşdirilməsi üçün 3.500.000,0 (üç milyon beş yüz min) manat məbləğində vəsaitin 2022 – 2024-cü illər üzrə dövlət büdcəsinin layihəsində nəzərdə tutulması da fərmanda öz əksini tapmışdır.
Beləliklə, təqdim edilən qanun layihəsi və imzalanan fərman 50 minə yaxın ailəyə verilmiş torpaq paylarının sənədləşməsini, sənədləşmə üçün lazım olan dövlət rüsumlarının vətəndaşın deyil, dövlət büdcəsindən ödənməsini, əmlakın qeydiyyatı və doğru olmayan məlumatların korrektə olunmasını özündə ehtiva edir.
Hesab edirik ki, bu qanunvericilik təşəbbüsü cənab Prezident tərəfindən vətəndaşlara sosial qayğının növbəti bariz nümunəsidir”

450-ə yaxın sahibkara xidmətlər göstərilibTəlim və məsləhət xidmətlərindən 450-ə yaxın sahibkar və biznes fəaliyyəti ilə məşğul olmaq istəyənlər faydalanıb

Kiçik və Orta Biznesin İnkişafı Agentliyinin (KOBİA) Masallı-Cəlilabad-Biləsuvar KOB inkişaf mərkəzi (KOBİM) tərəfindən sahibkarlara, biznesə başlamaq istəyənlərə və startaplara ehtiyaclarına uyğun olaraq təlim və məsləhət xidmətləri göstərilir.

Avqust və sentyabr aylarında Masallı-Cəlilabad-Biləsuvar KOBİM tərəfindən müxtəlif mövzularda təşkil olunan 39 biznes təlimlərindən 450-ə yaxın sahibkar və biznes fəaliyyəti ilə məşğul olmaq istəyən şəxslər faydalanıb. Təlimlər biznes planin hazırlanması, marketinq və satış, torpaq və əmlak vergisi, KOB-lar üçün mühasibatlıq, fiziki və hüquqi şəxs anlayışı və digər istiqamətləri əhatə edib.

Həmçinin, qeyd olunan müddət ərzində Masallı-Cəlilabad-Biləsuvar KOBİM tərəfindən 8 sahibkara biznes planın və layihələrin hazırlanması, biznes ideyanın reallaşdırılması üçün dövlət və özəl qurumlarla əlaqələndirmə, maliyyə resurslarına çıxış və digər istiqamətlərdə məsləhət xidməti göstərilib.
Qeyd edək ki, Masallı-Cəlilabad-Biləsuvar KOBİM -in xidmətlərindən faydalanmaq üçün (+994 51) 363 53 78 nömrəsi ilə əlaqə saxlaya və ya Biləsuvar rayonu, Mübariz İbrahimov küç, 219-da yerləşən Mərkəzin ofisinə müraciət edə bilərsiniz.

Masallı-Cəlilabad-Biləsuvar KOBİM tərəfindən göstərilən bütün xidmətlər ödənişsizdir.

QƏLƏBƏ üçün aparılan İQTİSADİ SİYASƏTTahir Mirkişili
Milli Məclisin İqtisadi siyasət, sənayə və sahibkarlıq komitəsinin sədri, YAP İdarə Heyətinin üzvi

Azərbaycanda dövlətçilik ənənələrinin əsrlərlə ölçülən tarixi vardır. Regionda tarixin müxtəlif dövrlərində böyük bir coğrafiyanı əhatə edən ərazilərdə güclü bir dövlət qurmağı və ədalətli idarəetmə sistemini yaratmağı bacarmaqla azərbaycan xalqı dövlətçiliyə əsaslan milli ideyaya sahib olduğunu hər zaman göstərmiş və taxirin müxtəlif mərhələlərində bu milli ideyanı güclü dövlət qurmaq formasında reallaşdıra bilmişdir.

Dayanıqlı və möhkəm dövlət quruculuğunun əsas tələbi milli inkişafın məqsəd və prioritetləri kimi çıxış edən milli ideyanın var olmasıdır. Müasir Azərbaycan dövlətçiliyinin əsas sütunu xalqın “azad və güclü olmaq” arzusu ilə formalaşan milli ideyasını güclü dövlətçiliyə çevirməyi bacaran Uluöndər Heydər Əliyev dühasi və siyasəti olmuşdur. Bütün uğurlarımızın əsas mənbəyi bu strategiyanın və yolun uğurla davam etdirilməsi və onun genişləndirilməsidir.

Məhz bu yolunun əsas davamçısı olaraq Prezident cənab İlham Əliyevin 18 illik fəaliyyəti Azərbaycana tarixdə heç bir zaman olmayan uğurlar gətirdi. Azərbaycan xalqı hər zaman arzuladığı hədəfinə nail oldu. Uzun müddət işğal altında olan torpaqlarımız, təhqir olunan mənəvi ocaqlarımız azad oldu. Xalqımızın qaməti dikəldi, layiq olduğu şərəfli həyata qovuşdu. Azərbaycan xalqı 2020-ci il 8 noyabrında yenidən doğuldu. Artıq o qalib xaldır, onun dövləti ən güclü dövlətdir, onun rəhbəri ən qüdrətli və ağıllı rəhbərdir!

Strateji, səbrli, uzaqgörən, soyuqqanlı, cəsarətli, xalqa arxalanan idarəetmə sistemi qurmaqla cənab İlham Əliyev bu möhtəşəm qələbəyə 2003-cü ildən başlayaraq addım-addım gələrək nail oldu. Bütün resursları “Qarabağ” hədəfinə yönəltməklə sonunda bütün dünyanın belə gözləmədiyi qələbəyə nail oldu, Azərbaycan xalqının düşmənlərinin başını əzdi.

Bu uzun yolda onun iqtisadi siyasəti, əldə etdikləri nəticələr hər zaman hər kəsdə həsəd yaratdı. Bu 18 ildə Azərbaycan iqtisadiyyatı 3 dəfədən çox böyüyərək inkişaf dinamikasına görə dünyada lider ölkə oldu, regionda ən çox xarici investisiya və texnologiya cəlb edən ölkəyə çevrildi. O, iqtisadi imkanlarımızın ixracı qarşısında olan bütün səddləri keçdi və əls iqtisadi müstəqilliyə nail oldu. Bakı-Tbilisi-Ceyhan, Bakı-Tbilisi-Qars, TANAP, TAP layihələri məhz onun səyləri və fədakarlığı ilə reallaşdı. Vaxtilə regionda infrastruktur cəhətdən blokada şəraitində olan Azərbaycan indi Şərq-Qərb, Şimal-Cənub nəqliyyat dəhlizlərinin kəsişdiyi yeganə ölkədir.

Öz iqtisadi siyasətini regionların inkişafı ilə başlayan cənab İlham Əliyev Azərbaycanın tarazlı inkişafında mühüm nəticələr əldə etdi. Ölkəmizin hər bir bölgəsi artıq həyat şəraitinin yaxşılaşması, abad infrastruktura sahib olmaq göstəricilərinə görə dünya reytinqlərində qabaqcıl yerlərə sahibdirlər.

İnsan kapitalının inkişaf etdirilməsi, milli kadrların hazırlanması daim dövlət başçısının diqqətinə olmuşdur. Məhz onun ideyaları nəticəsində ölkəmizdə son 18 ildə yeni bir gənclik yetişdi - vətənpərvər, qorxmaz, müasir, ağıllı. O, ölkəmizin gələcək inkişafını məhz insan kapitalın üzərində qurdu və möhtəşəm uğurlar əldə etdi.

Uğurlu siyasət nəticəsində əldə edilən neft gəlirləri hesabına ölkəmizdə qeyri-neft sektorunun güclənməsi, sahibkarlığın inkişafı onun sürətli və əhatəli iqtisadi islahatlarının əsas hədəfi oldu. Davamlı aparılan bu islahatlar nəticəsində iqtisadiyyatımızın əsas hərəkətverici qüvvəsi qeyri-neft sektoru oldu. Geniş şəffaflaşma prosesi, bürokratiyanın aradan qaldırılması, ədalətli rəqabətin təmin olunması iqtisadiyyatımızın dayanıqlı inkişafına böyük bir təkan verdi.


18 illik Prezidentlik fəaliyyəti dövründə cənab İlham Əliyevi ən çox fərqləndirən xüsusiyyət onun sosial dövlət konsepsiyasını inşa etməsi, əldə olunan hər bir uğurun xalqın güzəranın daha da yaxşılaşmasına, onun təhlükəsizliyinin qorunmasına və gələcəyə ümidlərinin daha da artmasına sərf etməsi oldu. Bu siyasətin nəticəsində ölkəmizdə yoxsulluq və işsizlik səviyyəsi dəfələrlə azaldı, sosial ödənişlərin həcmi dəfələrlə artdı, layiqli həyat şəraitinin səviyyəsinə görə Azərbaycan regionda bir çox ölkələri geridə qoydu.

O, əldə olunan güclü iqtisadi imkanları həm də ölkəmizin müttəfiqlərinin və dostlarının sayının artmasına, düşmənlərimizin neytrallaşdırılmasına, dünyada Azərbaycanın nüfuzunun artmasına sərf etdi. Bunun nəticəsində Azərbaycan həqiqətləri bütün dünyaya yayıldı, biz yaradıcı xalq kimi layiq olduğumuz rəğbətə sahib olduq, dünyanın aparıcı təşkilatlarına rəhbərlik etməkdəyik.

Cənab İlham Əliyev iqtisadi imkanları güclü ordu qurmağa sərf etməklə hər bir azərbaycan əsgərinə və hər bir azərbaycanlıya qalib olmaq inamı aşıladı. Məhz güclü Ali Baş Komandan, güclü əsgər və fədakar xalq hesabına biz döyüş meydanında qalib gəldik.

Dünyanın ən çətin dörü sayılan Covid-19 pandemiya dövründə məhz cənab İlham Əliyevin çevik idarəetməsi və böhranlı vəziyyətlərdə onun qəbul etdiyi düzgün qərarlar nəticəsində biz az itki ilə vəziyyəti idarəetməyi bacardıq. Azərbaycan dövlətinin iqtisadi gücü hesabına heç kimdən yardım istəmədən pandemiyadan əziyyət çəkən vətəndaşlara və sahibkarlara dövlət dəstəyi göstərildi və iqtisadi enişin kəskin olmasının qarşısı alındı.

Bu gün Azərbaycan dövləti hərtərəfli güclü dövlətdir. O, özünün ən şərəfli dövrünü yaşayır. Qarşımızda həm də ciddi çağırışlar yaranmaqdadır. İqtisadiyyatın davamı inkişadı, vətəndşalarımızın daha yaxşı yaşaması, müasir texnologiyalardan istifadənin genişləndirilməsi kimi mühüm çağırışlara nail olmaq yolunda Azərbaycan davamlı olaraq irəliləyir. Prezident cənab İlham Əliyevin rəhbərliyi ilə əldə olunan nəticələr bir daha göstərdi ki, müdrik dövlət rəhbəri, xalqın ona olan inamı və sevgisi ilə istənilən hədəfə nail olmaq mümkündür. Mən inanıram ki, biz cənab İlham Əliyevin rəhbərliyi ilə hələ çox uğurlara imza atacağıq.

"AzerGold"un geoloqlarının elmi tədqiqat işi beynəlxalq konfransda yüksək nəticə əldə edib4-5 oktyabr tarixlərində "AzerGold" Qapalı Səhmdar Cəmiyyəti (QSC) 15-ci Beynəlxalq Geologiya Mühəndisliyi və Yer Elmləri Konfransında təmsil olunub.

Şirkətdən verilən məlumata görə, ənənəvi olaraq hər il keçirilən və dünyanın nüfuzlu alim və tədqiqatçılarını bir araya toplayan elmi konfrans videobağlantı formatında təşkil edilib. Beynəlxalq konfransda Səhmdar Cəmiyyətin Geoloji kəşfiyyat şöbəsinin əməkdaşları Samir Verdiyev, Nabat Qocayeva və Nərminə İsmayılova "Mühəndislik və fizika elmlərinin tədqiqi" panelində qrup şəklində hazırlanan 3 elmi məqalə ilə çıxış ediblər.

Samir Verdiyev "Filizçay polimetal yatağının sedex tipli filizlərinin petroqrafik xüsusiyyətləri" (həmmüəlliflər: Samir Verdiyev, Fuad Huseynov, İslam Quliyev, Coşqun İsmayıl), Nabat Qocayeva "Çovdar" filiz sahəsinin şimal hissəsində epitermal qızıl sulfid satellit yataqlarının yaranmasının struktur-litoloji şərtləri" (həmmüəlliflər: Nabat Qocayeva, Mikayıl Nağıyev, Sultan Cəfərov, Gülər Mikayılova), Nərminə İsmayılova isə "Tülallar" filiz daşıyan quruluşun qızıl filizinin minerallaşmasının sənaye baxımından dəyərli yığımlarının konsentrasiya şərtləri" (həmmüəlliflər: Nərminə İsmayılova, Şamil Zabitov, Fuad Əsgərzadə, Raqif Seyfullayev) mövzularında çıxış edərək, elmi işlərin təqdimatını ediblər.

Konfransın ikinci günü sözügedən elmi məqalələrin qiymətləndirilməsi həyata keçirilib. Nərminə İsmayılova tərəfindən təqdim olunan məqalə komitə üzvləri tərəfindən yüksək qiymətləndirilərək fərqlənmə sertifikatına layiq görülüb. Hər üç məqalənin konfransın elmi dərgisində dərc edilməsi nəzərdə tutulur.

"AzerGold" QSC ölkənin milli dağ-mədən şirkəti olaraq, geologiya elminin inkişafı, gənc geoloqlar nəslinin yetişdirilməsinə də mühüm töhfələr verir. Səhmdar Cəmiyyət bu məqsədlə Azərbaycanda fəaliyyət göstərən bir sıra elmi tədiqat müəssisələri ilə sıx əməkdaşlıq edir. Bununla yanaşı, şirkətin geoloq mütəxəsisləri beynəlxalq elmi platformalarda təmsil olunur, tələbələrə mühazirələr oxuyur, ustad dərsləri həyata keçirirlər.
Kolumbiya "VII İnvestisiya Sammiti" təşkil edirKolumbiya Səfirliyi iş adamlarını 20-26 oktyabr 2021-ci il, virtual və üz-üzə formatda keciriləcək 7-ci İnvestisiya Sammitinə dəvət edir.

Sammitin açılışında Kolumbiya Respublikasının prezidenti İvan Duke, bir neçə nazir, ProColombia adlanan İxrac, Turizm və İnvestisiyaların Təşviqi Agentliyinin prezidenti Flavia Santoro və digər yüksək vəzifəli şəxslər Kolumbiyaya sərmayə perspektivlərini və imkanlarını təqdim edəcəklər.

İnvestorlar üçün müxtəlif imkanları bir araya gətirirən bu sammit, ölkəyə birbaşa xarici investisiyaların cəlb edilməsi baxımından ən əhəmiyyətli tədbir sayılır. Bu sammit Kolumbiya hökumət rəsmiləri, müxtəlif iqtisadi sektorlardan olan və xarici sərmayə və ya strateji ittifaqlar axtaran Kolumbiya şirkətləri və layihələri, müxtəlit təşkilatlar, birliklər, azad iqtisadi zonalar və regional təşviq agentlikləri ilə əlaqə qurmağa imkan verir.

7-ci İnvestisiya Sammitində xarici investorlar biznes imkanlarını müəyyən etmək, strateji ittifaqlar yaratmaq, layihələrə qoşulmaq və Kolumbiyaya gəlmək üçün əsas təşkilatlarla görüşmək üçün yerli şirkətlərlə virtual görüşlər təşkil etmək imkanı əldə edəcəklər.

2020-ci ildə keçirilən son İnvestisiya Sammiti, 2000-dən çox iştirakçının, o cümlədən 1085 ölkədən 50 investorun iştirakı ilə virtual və əyani formatda baş tutmuşdur. İnfrastruktur, texnologiya, aqrar-sənaye, energetika və turizm kimi sektorlarda öz inkişafı üçün müttəfiq axtaran 230 layihə təqdim olunmuş və ölkəyə 1.330 milyard ABŞ dolları dəyərində 14 yeni birbaşa xarici investisiya elan edilmişdir.

İştirak etməkdə xüsusi marağınız olduğu təqdirdə sizi aşağıdakı linkə daxil olmağa dəvət edirik. Burada siz həmçinin müvafiq sektorlar və altsektorları tapa bilərsiniz:

https://colombiainvestmentsummit.co/en
7-ci İnvestisiya Sammitində marağlı olan bütün şəxslərə iştirak etmək üçün qeydiyyat prosesini asanlaşdırmaq üçün Kolumbiya səfirliyi öz köməkliyini göstərməyə hər zaman hazırdır. Bunun üçün Kolumbiya Respublikasının Azərbaycandakı səfirliyi ilə [email protected] elektron poçt vasitəsilə əlaqə saxlamanızı xahiş edirik.
Səfirimiz Moldovanın iqtisadiyyat naziri ilə görüşübSentyabrın 27-də Azərbaycanın Moldovadakı səfiri Qüdsi Osmanov Moldovanın iqtisadiyyat naziri Serciu Qaybu ilə görüş keçirib.

Moldova İqtisadiyyat Nazirliyinin mətbuat xidmətindən verilən məlumata görə, tərəflər iki ölkə arasında iqtisadi əməkdaşlığa dair bir sıra məsələləri müzakirə edib, qarşılıqlı maraq doğuran sahələri və gələcək inkişaf barədə fikir mübadiləsi aparıblar.

Nazir S. Gaybu yaxın gələcəkdə nəzərdə tutulan prioritet vəzifələrdən danışıb. Öz növbəsində, diplomat azərbaycanlı investorların Moldovada iqtisadi fəaliyyətini davam etdirməkdə maraqlı olduqlarını vurğulayıb.

Qeyd edək ki, bu günə qədər Moldova Respublikası ilə Azərbaycan Respublikası arasında 51 ikitərəfli müqavilə imzalanıb. Moldovada ümumi sərmayə həcmi 35.253 milyon ley təşkil edən 122 Azərbaycan müəssisəsi qeydiyyatdan keçib.
BƏƏ səfirliyi DUBAI EXPO ziyarətçiləri üçün ın son məlumatı açıqlayırExpo 2020, bir məkanda bütün dünyadır - insanları, icmaları və millətləri bir araya gətirərək körpülər qurmağa, hərəkətə ruhlandırmağa və real həyat çətinliklərinə real həyat həlləri təqdim etməyə həsr olunmuş qlobal bir təcrübədir. Dubai Expo 2020, BƏƏ-nin Qızıl Yubiley ilində gələcəyin şəhərində təşkil edilən Yaxın Şərq, Afrika və Cənubi Asiya regionunda keçiriləcək ilk Dünya Sərgisidir.

Beləliklə, Expo 2020 -də iştirak etmək və ya Expo 2020 -ni məsafədən əhatə etmək (mediada işıqlandırmaq) üçün akkreditə olunmalısınız. Tawassul media məlumat sistemində qeydiyyatdan keçin

https://media.expo2020dubai.com/join-us?screenName=gLoginScreen&returnUrl=%2F

Ən son məzmunlu kontenti əldə edin və maraqlı olduğunuzu ifadə edən media akkreditasiyasını təqdim edin

https://media.expo2020dubai.com/join-us?screenName=gLoginScreen&returnUrl=%2Fen%2Fmedia-centre%2Fexpression-of-interest

Expo 2020 oktyabr 1, 2021 -ci ildən 31 mart 2022 -ci ilə tarixədək davam edəcək.

Altı ay ərzində Expo 2020, minlərlə ailəvi tədbirlər, heyrətamiz kəşfetmə təcrübələri və 18 yaşadək uşaqlar üçün ödənişsiz girişlə ziyarət edilməli olan bir ailə məkanı olacaq. Qeyd edək ki, Expo 2020, Dubayın cənubunda, Al Maktoum Beynəlxalq Hava Limanının yaxınlığında yerləşir. Dubay və Abu Dabinin beynəlxalq hava limanlarından və kruiz terminallarından asanlıqla ora çatmaq mümkündür.

Dubay Expo 2020 biletləri artıq satışdadır:
o Mövsüm Biletləri (AED 495/ ABŞ dolları 135 - Mastercard debet və kredit kartı sahiblərinə 25 % endirim verilir) Expo 2020 -nin bütün altı ayı ərzində limitsiz giriş təklif edir.
o Ailə Paketinə (AED 950/ABŞ dolları 258) iki valideyn və üstəlik dayə üçün Mövsüm Bileti daxildir; qida və içkilərdə endirimlər; beş əlavə Çox Günlük Kartlara 25 % endirim; və 125 AED dəyərində bir fotoşəkil vouçer
o Çox Günlük Kartlar (AED 195/ABŞ dolları 53) sahiblərinə ardıcıl 30 gün ərzində məhdudiyyətsiz giriş imkanı verir
o 1 günlük biletlər (AED 95/ ABŞ dolları 26)
o 18 yaşadək uşaqlar, 60 və yuxarı yaşı olan ziyarətçilər və dünyanın hər hansı bir akademik müəssisəsindən etibarlı tələbə kimliyi olan tələbələrə ödənişsiz giriş veriləcək. Fiziki özəlliyi olan insanlar üçün ödənişsiz biletlər də mövcud olacaq, onları müşayiət edənlə birlikdə 50 % endirim olacaq

Expo Proqramları:

- Expo Live, Expo-nun qlobal innovasiya və tərəfdaşlıq proqramı, 76 ölkədən 140 layihəni dəstəkləyir, hər biri çətin problemlərə innovativ həll yolları təklif edir, insanların həyatını yaxşılaşdırmağa və ya planetin qorunmasına kömək edir.
- Qlobal Ən Yaxşı Proqramı bütün dünyada genişləndirmək öhdəliyi ilə bəzi ən böyük problemlərə təsirli və davamlı həllər verən 50 layihəyə diqqət yetirir.
- Expo Təhsil Proqramı, orta məktəblərdən, BƏƏ və beynəlxalq universitetlərdən olan tələbələri həmyaşıdları, sənaye liderləri və qlobal mütəxəssislərlə əlaqə quraraq xüsusi seçilmiş turlara qatılmağa, praktiki bacarıqlara yiyələnməyə və gələcək karyeralarını formalaşdırmağa dəvət edir.
- Expo Məktəb Proqramı BƏƏ məktəbləri və müəllimləri ilə qarşılıqlı birgə fəaliyyətdə olaraq gənc nəsli ruhlandırır. Expo 2020 zamanı tələbələrə dörd fərdi–sifarişli məktəb turu çərçivəsində unikal öyrənmə təcrübəsi təklif edəcək
- BƏƏ rezidentlərinin və fərqli millətlərdən olan ekspatların müxtəlif və inklüziv qarışığı olan 30.000 Expo 2020 Könüllüsü, BƏƏ -nin inklüziv və qonaqpərvər ruhunu əks etdirən "Expo 2020 Dubai -nin üzü" olacaq.
- Exponun Dünya Məclisi qlobal düşüncə liderlərini ənənəvi Əmirlik məclisinə uyğun olaraq vacib söhbətlər üçün bir araya gətirəcək

COVID tədbirləri

Tədbirlərə məcburi maska taxmaq, əlləri dezinfeksiya edən məntəqələr və sosial məsafəni təmin etmək məhdudiyyətlər daxildir. Biletlərin əvvəlcədən sifariş edilməsi ciddi şəkildə təşviq edilir və ziyarətçilərdən pavilyon yerlərini sifariş etmək üçün Expo-nun Smart Queue sistemindən istifadə etmələri tövsiyə olunur.
Bütün Expo və Beynəlxalq İştirakçılar, könüllülər, podratçılar və xidmət təminatçıları aşılanmalıdır.
Vəziyyətin inkişafından asılı olaraq, Expo bu tədbirləri lazımi şəkildə izləməyə və tənzimləməyə davam edəcək.

Video: https://www.youtube.com/watch?v=0p9FJMkIaQ8
Bələdiyyəni borca salanlar: Kimdir günahkar?Vüqar Tofiqli

Bu günlərdə Dövlət Vergi Xidməti (DVX ) DSMF-yə borcu olan bələdiyyə sədrlərinə məktub göndərib. Və tələb edib ki, əgər borc on gün müddətinə ödənməsə onların ölkədən çıxışına qadağa qoyulacaq. Başqa yolu qalmayan DVX-i bu yolla sədrləri “güncə dirəyib” borcu almaq istəyir. Olsun. Razıyam. Əslində buna Qanunun tələbi kimi baxılmalıdıır. Və belə də olmalıdır.

Əlavə edim ki, bir neçə ildir ki, bələdiyyələrin DSMF-yə və digər orqanlara külli miqdarda borcları olması barədə ciddi müzakirələr aparılır. Bununla bağlı Adminstrasiyanın müvafiq sektoru da bir sıra addımlar atmışdır. Məhz bu addımlar sayəsində borcun həcmi 12 milyon manatdan 7 milyon manatadək azalıb. Bələdiyyələrlə iş Mərkəzinin də bu istiqamətdə son illərdə atdığı addımları da danmaq olmaz. Biz də dəfələrlə bu mövzuya həm münasibət bildirmiş, həm də ictimailəşdirmişik. Və bu günlərdə Biləcəri, Xocasən və Əhmədli bələdiyyəsinin üst-üstə bir milyon manatdan artıq borcu olması və bu vəziyyətdən çıxış yolları barədə fikirlərimi bidirmişəm. Bu məqamda bələdiyyələrə yuxarıda qeyd etdiyim məzmunda məktubun daxil olmasına təəcüblənmədim. Çünki gözlənilən müraciət idi. Lakin biz bu məsələyə başqa tərəfdən yanaşmaq istərdik.

Birincisi, Dövlət Vergi Xidməti (DVX)-nin rəsmilərinə sual edirəm, bu qədər borcun yaranmasında kimdir günahkar? Xidmət bu barədə araşdırma aparıbmı? Müəyyən edilibmi ki, borc hansı səbəbdən yaranıb.

Maraqlıdır, niyə məqamında DSMF bələdiyyənin bank hesabına “inkassa” qoymaqla öz işini bitmiş hesab edib. Niyə o borcu yaradan səbəblə tanış olmayıb, səbəbkarlarla bağlı ölçü götürməyib. Və bu qədərdə borcun üstünə faiz gəlib. Kimsə deyə bilərmi ki, DSMF rəsmiləri bələdiyyə sədrlərinə bu mövzu ilə bağlı vaxtında görüş keçirib, izahat verilib və ya Qanunların bir çox məqamlarına aydınlıq gətirilib. Proseslərdən xəbərdar olan bir şəxs kimi bizim məlumatımız yoxdur. Demək, qəti əminliklə demək oar ki, bəlkə də heç olmayıb da. Sadəcə göz yumublar və “əvvəl axır faiz qarışıq alacağıq” fikri ilə yaşayıblar.

Demək belə qənaətə gələ bilərik ki, borcun bu qədər şişməsində əsas günah sahiblərindən biri DSMF-dir, yəni elə DVX-nin özüdür. Çünki bu orqanlarda vaxtilə çalışan şəxslər öz işlərinə məsuliyyətlə yanaşmış olsaydılar yəqin ki, belə olmazdı.

İkinicisi, burda digər günah sahibi borclu bələdiyyələrin aid olduğu rayonların icra hakimiyyətlərinin başçılarını hesab etmək lazımdır. Vətəninə, dövlətinə və ən nəhayət özünə hörmət edən icra başçısı bələdiyyələrdə borcun bu qədər şişməsinə əslində imkan verməməliydi. Açıq etriaf edək ki, özləri məzuniyyətə getdikləri vaxtı, habelə rayonda hansısa bir irili-xırdalı layihələrin icrasına bələdiyyə sədrlərin məcbur edib hansısa formada “layihənin” icrasına “cəlb edəndə” düşünməliydilər ki, sədrlər də onu dövlətin vergi və rusumlarından “kəsib” gətirirlər. Ona görə, ikinci əsas günah sahibi borclu bələdiyyənin aid olduğu rayonların icra başçılarındadır. Bununla yanaşı bu gün onlarca və yüzlərcə bələdiyyənin bank hesabı bağlı olsa da bələdiyyəyə aid olan dotasiyaya göz dikilməsi, deyərdim, ən utancverici hadisədir. Hələ dotasiyanın ayrılmasında və öz ünvanına çatmasında məqsədli şəkildə yaradılan maneələri demirəm. Bir daha təkrar edirəm ki, burada söhbət o icra başçılarından və RİH-lərdə çalışan məmurlardan gedir ki, vəzifədə olduğu müddətdə bələdiyyələrdə yaranan borcun artmasının qarşısını almayıb, ya da almağa maraqlı olmayıb.

Üçüncüsü, ən böyük günah sabibi bələdiyyəyə borc yaratmış məsuliyyətsiz sədrlərdir. Sonradan borclu bələdiyyəyə sədr seçilən şəxs ilk növbədə borcun silinməsiylə bağlı strateji proqram hazırlamalı, bələdiyyə iclasında müzakirəyə çıxarıb təsdiq etməli və icrasına başlamalı idi. Lakin bu addımı atmaq əvəzinə bələdiyyəyə aid olmayan işin qulpundan yapışması ilk növbədə elə bələdiyyə sistemini aşağılamaq kimi başa düşülməlidir.

Necə olur ki, ötən iki ilə yaxın bir müddətdə Bibiheybət bələdiyyəsinin sədri 10 min manat, Gədəbəy bələdiyyəsinin sədri 25 min manat, Sahil bələdiyyəsinin sədri 38 min manat, Binədəqi bələdiyyəsinin sədri 145 min manat, Sabunçu bələdiyyəsinin sədri 100 min manat, Qala bələdiyyəsinin sədri 24 min manat, Vəndam bələdiyyəsinin sədri 12 min manat, Gəgəli bələdiyyəsinin sədri 10 min manat bələdiyyənin müxtəlif istiqamətlər üzrə-həm DSMF-yə, həm də əməkhaqqına olan borcunu “bağlaya” bilir, lakin Biləcəri, Xocasən və Əhmədli bələdiyyəsinin borcları isə əksinə artır. Mən hələ Tərtər, Gədəbəy, Şamaxı və digər bələdiyyələrin borclarına toxunmuram.

Faciə ondadır, Əhmədli bələdiyyəsindəki kimi bəzi sədrlər borcu özü min bir bəhanə ilə yaradır, artırır və elə bir vəziyyətə gətirir ki, digər bələdiyyə üzvlərindən heç biri bu məsuliyyət yükünü altına girmək istəmir. Və belə bir məqamda fikir yaranır ki “borcu özü yaradıbsa elə, qoy özü də yola verib bağlasın.” Amma əksinə vəziyyət daha da pisləşir. Nə isə...

Yekun olaraq bəzi məqamlara da fikir bildirmək istərdim. Bu gün borclu bələdiyyənin sədrləri o borcu təkbaşına qaytara biləməyəcək. Yəni bələdiyyələrə mənəvi və proqram xarakterli dəstək mütləq lazımdır. İndiki vaxtda məsələyə qanunvericilik baxımından hansısa formada dəstəyin verilməsi zəruriəti yaranır. Borclu bələdiyyənin fəaliyyəti isə daim müvafiq inzibati nəzarət orqanın, yəni Ədliyyə Nazirliyinin Bələdiyyələrlə İş Mərkəzinin və DVX-nin nəzarətində olmalı və mütəmadi olaraq göstərilən metodoloji dəstək istensiv şəkildə davam etdirməlidirlər. Hətta bu rayonlardakı məmurlara da izahat verilməlidir ki, bələdiyyələrə dəstək olsunlar, onları “sıxmasınlar”.

Birdə ki, səkkiz min manat borcu olana və 784 min manata borcu olana da eyni məzmunda məktubun göndərilməsi tamam ədalətsizlikdir. Bu məqamda da fərq qoyulmalı idi. Yəni 50 min manatadək borcu olanlara ölkədən çıxmağa “stop” qoyulursa, 50 min manatdan yuxarı məbləğdə borcu olana cinayət işinın açılması məsələsinə baxılmalıdır. Özü də cinayət işi o borcu yaradana açılmalıdır.

Son olaraq belə qənaətə gələ bilərik ki, bələdiyyələrin borc məsələsiylə bağlı müvafiq orqanlar da öz sözlərini deməli və vəziyyətdən çıxmaq üçün təkliflər paketini hazırlamaqla icrasını təmin etməlidirlər.

Hər halda düşünməyə dəyər.

“Azəriqaz”ın rəhbər şəxsləri vətəndaş qəbulu keçirdiAzərbaycan Dövlət Neft Şirkətinin (SOCAR) “Azəriqaz” İstehsalat Birliyinin rəhbər şəxsləri onlayn vətəndaş qəbulu keçirib.

Bu barədə Avrasiya.net-ə “Azəriqaz”dan məlumat verilib.

Məlumata görə, İstehsalat Birliyinin baş direktoru Ruslan Əliyev Kürdəmir rayonu, onun istismar üzrə müavini Cahid Hüseynov Göyçay rayonu, əsaslı tikinti üzrə müavini Ramil İsgəndərov isə Ucar rayonunun sakinləri ilə birbaşa videobağlantı yaratmaqla onlayn vətəndaş qəbulu keçiriblər.

Qəbulda qaz xətlərinin yerinin dəyişdirilməsi, fərdi qaz çəkilişləri və s. müraciətlər ünvanlanıb. Qaldırılan məsələlərin həllinə dair baş direktor və müavinləri Ağsu Regional qaz istismarı İdarəsinin məsul əməkdaşlarına vətəndaşların müraciətlərinə operativ baxılmasına dair müvafiq tapşırıqlarını veriblər.