Rəsulzadə haqqında filmin müəllifi AzTV-dən getdiAzTV-nin tarixi şəxsiyyətlərlə bağlı silsilə filmlərin çəkildiyi layihənin rəhbəri Fəxrəddin Həsənzadə işindən ayrılıb.

Avrasiya.net Bakipost.az-a istinadən xəbər verir ki, bu barədə F.Həsənzadə özünün Feysbuk hesabında yazıb:

“AzTV -də yayımlanan “Yüz ilin sirləri” proqramının layihə rəhbəri və Rəsulzadə ilə bağlı sənədli filmi hazırlayan biri kimi ümumi bir açıqlama vermək istədim. Kanal rəhbərliyinə və hər kəsə əsaslı veriləcək cavabım və dəlillərim var. Amma dostlarım bilir, mən belə məqamdan şou düzəltməyi sevmirəm, susmağı üstün bilirəm. Bu gündən etibarən AzTV ilə yollarımı ayırmaq qərarı verirəm. Məni tanıyan hər kəs siyasi mövqeyimi də bilir. Sadəcə bir məqsədim var idi. O da dünya tarixində iz qoyan azərbaycanlıları ətraflı tanıtmaq”.

Qeyd edək ki, Məhəmməd Əmin Rəsulzadənin anadan olmasının 138 illiyi ilə bağlı AzTV-də nümayiş etdirilməsi nəzərdə tutulan sənədli film efirdə yayımlanmayıb.

Belə ki, layihənin müəllifi Hüseyn Cavadzadə yanvarın 22-də səhifəsində filmin anonsunu paylaşaraq, verilişin yanvarın 30-da yayımlanacağını deyib. Bundan sonra isə yanvarın 27-də filmin yayımlanmayacağını bildirib.

Bu isə sosial şəbəkələrdə geniş müzakirələrə səbəb olub. Şəbəkə istifadəçiləri AzTV-nin səhifəsində #UtanAZTV #RəsulzadəÜrəklərdə həştəqləri ilə etiraz ediblər.

Məsələ ilə bağlı AzTV Feysbuk səhifəsində açıqlama yayıb. Paylaşımda qeyd edilir:

“Bu gün AzTV hansısa verilişi efirə verməməkdə ittiham olunur. Əvvəla, həmkarlarımızdan soruşmaq istərdik ki, söhbət hansı verilişdən gedir? Yaxud nəzərdə tutduqları verilişin adını çəksinlər, biz də maraqlanaq ki, həmin verilişin anonsu AzTV-nin efirində yayımlanıbmı? Efirdə deyilibmi, yaxud proqramda yazılıbmı ki, bu veriliş efirə gedəcək? Əgər yazılmayıb və deyilməyibsə, hansısa verilişin TV-də yayımlanmaması ilə bağlı ittiham irəli sürmək hansı əsasa və ya məntiqə sığır?

İkincisi, TV-də onlarla verilişlər hazırlanır, bəzən hətta anonsu verilsə də, efirə daha çox texniki səbəblərdən təqdim olunmur. Bu xəbərdirmi? Və ya bundan xəbər düzəltmək nə dərəcədə məntiqli və peşəkar yanaşmadır?

Mövzuya gəlincə, AzTV-də Azərbaycan Xalq Cümhuriyyətinin qurucuları barədə yüzlərlə material yayımlanıb və bu gün də efirə verilir. M.Ə.Rəsulzadənin nəvəsinin ilk olaraq məhz AzTV-də efirə çıxması və maraqlı açıqlamalar verməsini diqqətli tamaşaçılar, yəqin ki, unutmayıblar.

Odur ki, bu mövzuda hər hansı kampaniyaya start verilməsinin özü, düşünürük ki, ayıbdır".
“Nə? Harada? Nə zaman? “ İntellektual Oyunu üzrə gənclər arasında rayon çempionatı keçirilibYanvarın 28-də Gənclər Mərkəzində 2 Fevral “Azərbaycan Gəncləri günü”nün təsis edilməsinin 25 illiyinə həsr olunmuş “Nə? Harada? Nə zaman? “ İntellektual Oyunu üzrə gənclər arasında rayon çempionatı keçirilib.

Azərbaycan Respublikası Gənclər və İdman Nazirliyi tərəfindən elan olunmuş “Gənclər həftəsi” çərçivəsində Gənclər və İdman İdarəsi və Təhsil Şöbəsinin birgə təşkilatçılığı ilə baş tutan intellektual yarışda 6 komanda iştirak edib. Tədbirin açılışında çıxış edən Gənclər və İdman İdarəsinin rəisi Nadir Məmmədov və Təhsil Şöbəsinin müdiri Pərvin Ağasıyev yarışın məqsədləri haqqında iştirakçılara məlumat verərək iştirakçı komandalara uğurlar arzulayıblar. Çempionatın keçirilməsi gənclərin intellektual səviyyəsinin və dünyagörüşünün artırılması, intellektual oyunların gənclər arasında təbliği, eləcə də istedadlı gənclərin üzə çıxarılması məqsədi daşıyıb.

Maraqlı keçən oyunun nəticəsinə əsasən Avengers komandası (şəhər 2 saylı tam orta məktəb) I yeri tutaraq rayon kubokunun sahibi olub. Marşal (şəhər 1 saylı tam orta məktəb) və Legend (şəhər 3 saylı tam orta məktəb) komandaları isə müvafiq olaraq II və III yerləri bölüşüblər. Qalib komandalara təşkilatçılar tərəfindən kubok və fəxri fərmanlar təqdim edilib.




Dneprdə Azərbaycan multikulturalizmi təqdim olunubYanvarın 25-də Ukrayna-Azərbaycan Mədəniyyət və Biznes Mərkəzində Azərbaycan multikulturalizminə həsr olunmuş tədbir keçirilib.

Avrasiya.net xəbər verir ki, görüş zamanı Azərbaycan multikulturalizmi konsepsiyası haqqında məlumatlandırıcı videoçarx təqdim olunub.

Tədbiri Dnepropetrovsk vilayəti Azərbaycanlıları Konqresinin sədri Nəcəf Əhmədov açaraq gənclər üçün layihələrdən, həmçinin təşkilatın ümumi fəaliyyətindən danışıb. O, gələcək layihələr və tədbirlər haqqında məlumat verib.

Bakı Beynəlxalq Multikulturalizm Mərkəzinin Ukraynadakı nümayəndəsi Qonçaruk Marina çıxış edərək tələbələrin Azərbaycan multikultiralizmi haqqında daha çox məlumat əldə edə biləcəkləri layihələrdən danışıb.

Filologiya elmləri namizədi, dosent Gennadi Onişenko çıxışında tələbələrin multikulturalizm mərkəzinin fəaliyyətinə marağını qeyd edib.

Dnepr Milli Texniki Universitetinin “Mühasibat uçotu və audit” kafedrasının müdiri, professor, iqtisad elmləri doktoru Marina Paşkeviç tələbələrin Azərbaycan mövzularında gənclər üçün keçirilən müsabiqələrdə fəal iştirakından danışıb.

Tələbələr Azərbaycan multikulturalizmi və Mərkəzin proqramları ilə bağlı suallar veriblər, həmçinin Ukrayna-Azərbaycan layihələrindəki fəallıqlarından danışıblar.


Seymur Şıxəliyev
Müğənninin nəvələri eks-gəlininə VERİLDİBu gün Əməkdar artist Mətanət İsgəndərlinin oğlu Kərim və keçmiş gəlini Canana arasındakı çəkişmə ilə bağlı növbəti məhkəmə prosesi keçirilib.

Əməkdar artistin eks-gəlini bu barədə "Instagram" səhifəsində paylaşım edib.

“Balalarımın üçünü də mənə qaytardılar. Ədalətli qərar oldu. Sabahkı ad günümün ən böyük hədiyyədir", - deyə Canana paylaşımda bildirib.

Qeyd edək ki, Kərim və Canana ötən ilin oktyabrında rəsmi boşanıb və uşaqlar anadan alınaraq ataya verilmişdi.
Müşfiq Abbasov Premyer liqadan və 500 mindən imtina etdiKiViN-2022 festivalının hər iki turunda qalib gələrək, Sankt-Peterburq liqasına düşən “Şuşa” komandasının adını bərpa etmək üçün hansı imtiyazdan keçdiyi üzə çıxıb.

Bu barədə komandanın rəhbəri Müşfiq Abbasov Axar.az-a eksklüziv açıqlamasında bildirib ki, ikinci turda qalib gəldikdən sonra Aleksandr Maslyakovla görüşmək fürsəti əldə edib.

“A.Maslyakovun yanında “Şuşa” adına etiraz edən və bizim ikinci turda “Buta” adı seçməyimizə səbəb olan Ruben Ciqaryan da oturmuşdu. 40 dəqiqə çəkən çox qızğın müzakirəmiz oldu. A.Maslyakov KiViN-in siyasətdən kənar olduğunu və “Şuşa” adının siyasi çalar kəsb etdiyini israrla bildirirdi. Nəhayət ona izah edə bildim ki, Şuşa – Azərbaycanın mədəniyyət paytaxtıdır, Azərbaycan şəhəridir və bütün dünya bu şəhərin Azərbaycanın olmasına qətiyyən şübhə etmir. Həmçinin 10 noyabr 2020-ci il bəyanatını da xatırlatdım və bildirdim ki, bu bəyanatda Ermənistan da, Rusiya da Qarabağın, o cümlədən Şuşanın Azərbaycanın olduğuna imza atıblar, burda heç bir siyasi çalar yoxdur”, - M.Abbasov deyib.

Komanda rəhbərinin sözlərinə görə, uzun müzakirələrdən sonra komandaya şərt qoyulub:

“Bizə bildirildi ki, ya Premyer liqada, Maslyakovun birbaşa aparıcılığı ilə ORT-də yayımlanan proqramda “Buta” adı ilə çıxış edirsiniz, ya da Sankt-Peterburq liqasında oynayacaqsınız.

Məsələ bundadır ki, biz festivala yazılan 520, yarışmaya qatılan 420 komanda arasından seçilən 80 komandadan biri olduq. Üstəlik ən yaxşı 8 komandadan biri seçildi və 8 komanda arasında da ilk 3-lüyə düşdük. Bununla da ilk festivaldan Premyer liqaya təklif alan nadir komanda sayılırdıq.

Mən düşünmədən imtina etdim və Sankt-Peterburqu seçdim. AMİK rəhbərliyi şoka düşmüşdü. A.Maslyakov bildirdi ki, siz bilirsinizmi nələrdən imtina edirsiniz? Mən də dedim bilirəm - ORT-dən bütün dünyaya müraciət etməkdən və yüzminlərlə qazancdan. Dedi, siz bütün bunlardan “Şuşa” adına görə imtina edirsiniz? Mən də dedim, burda əsas məsələ prinsiplərdir, bir də bizim üçün xoşdur ki, Azərbaycanın mədəniyyət paytaxtının adını daşıyan komanda Rusiyanın mədəniyyət paytaxtında çıxış edəcək”.

M.Abbasov bir daha xatırladıb ki, “Buta” adı ilk turda erməni məkrinə qurban getməmək üçün seçilib və Sankt-Peterburqda komanda öz adı – “Şuşa” ilə təmsil olunacaq.

Qeyd edək ki, komanda hazırda Bakıya qayıdır.
2 nömrəli Uşaq-Gənclər İnkişaf Mərkəzinin “Mədəniyyətimizin incisi Şuşa” adlı rəsm sərgisi keçirilib13 yanvar 2022-ci il tarixində Xətai Sənət Mərkəzində Təhsil Nazirliyi 2 nömrəli Uşaq-Gənclər İnkişaf Mərkəzinin “Mədəniyyətimizin incisi Şuşa” adlı rəsm sərgisi keçirilib.

Sərginin keçirilməsində məqsəd, Azərbaycan Ordusunun Vətən müharibəsindəki zəfər yürüşünü, şanlı qələbəsini, işğaldan azad olunmuş şəhərlərini, kəndlərini uşaqlara və gənc nəsilə tanıtmaq, həmçinin onların yaradıcılıq qabiliyyətlərini inkişaf etdirmək, istedadlarını üzə çıxarmaqdan ibarətdir.

Mərkəzin “Gənc tərtibatçı rəssamlar” dərnəyinin üzvlərinin 2022-ci ilin “Şuşa ili” elan olunması ilə əlaqədar, “Mədəniyyətimizin incisi Şuşa” devizi altında çəkdikləri 60-a yaxın rəsm işi sərgidə nümayiş etdirilib.
Öncə YAP Xətai rayon təşkilatının sədri Vüqar Rəhimzadə və Mərkəzin direktoru Əminə xanım Musayeva Vətən müharibəsi dövründə təşkil olunmuş sərgi və müsabiqələrdə fəal iştirak edərək müxtəlif nailiyyətlər əldə edən dərnək üzvlərinin çəkdikləri rəsmlərlə yaxından sonra tanış oldular və ölkəmizin qazandığı qələbəni rəsmə çevirən uşaq və yeniyetmələrə uğurlar arzuladılar.

Daha sonra Vüqar Rəhimzadə Əminə xanım Musayevaya “Mədəniyyətimizin incisi Şuşa” rəsm sərgisinin təşklində fəal iştirakına görə rayon təşkilatının Fəxri fərmanını təqdim edib.
Sərgidə "Vokal" qrupu "Mən fəxr edirəm ki, azərbaycanlıyam” mahnısı ilə "Təbəssüm" rəqs qrupu isə “Qarabağım” və “Sarı gəlin” rəqsləriylə çıxış edərək qonaqların böyük marağına səbəb oldu.

Sonda “Gənc tərtibatçı rəssamlar” dərnəyinin üzvləri Vətən müharibəsi dövründə təşkil olunmuş sərgi və müsabiqələrdə fəal iştirak etdiklərinə görə Təşəkkürnamə ilə mükafatlandırıldılar.
Novruz Qartal vəfat etdiAzərbaycanın əməkdar artisti Novruz Qartal vəfat edib.

Avrasiya.net xəbər verir ki, bu barədə Akademik Musiqili Teatrın əməkdaşı Əjdər Dadaşov paylaşımında bildirib.

Qeyd edək ki, Novruz Yaqub oğlu 1947-ci ildə anadan olub. N.Y. Əliyev əmək fəaliyyətnə 1965-ci ildə Texniki təchizat idarəsində fəhləlikdən başlayıb. 1966-cı ildə M.Əliyev adına Azərbaycan Dövlət İncəsənət İnstitutunun aktyorluq fakültəsinə daxil olub. 1967-ci ildən Azərbaycan Dövlət Musiqili Komediya Teatrında çalışıb.

Çalışdığı illərdə Novruz Əliyev özünü epizodik və əsas rolların bacarıqlı ifaçısı kimi göstərib. Azərbaycan dramaturqlarının, eləcə də xarici ölkə yazıçılarının əsərlərində onlarla yaddaqalan surətlər yaradıb. Onun "Toy kimindir"də Qoşun, "Durna"da Dursun, "Hicran"da Balaəmi, "Lənət şeytana"da İsrafil, "Özümüz bilərik"də İbişov, "Milyonçunun dilənçi oğlu"nda xidmətçi, "Sevindik qız axtarır"da tələbə, "Nənəmin şahlıq quşu"nda Qədim Qədimoviç və başqa rolları tamaşaçıların dərin rəğbətini qazanıb.

1989-cu ildə Bakı Bələdiyyə "Tənqid-Təbliğ" teatrına dəvət alan aktyor burada da yüksək peşəkarlığı, zəhmətkeşliyi və intizamlılığı ilə fərqlənib. Bu dövrdə Novruz Qartal adı ilə tanınan N.Əliyev müntəzəm olaraq cəbhə bölgələrində, səngərlərdə, hərbi hissələrdə, qospitallarda maraqlı proqramlarla çıxışlar edib, dəfələrlə fəxri fərmanlarla təltif edilib.

1996-cı ildən Azərbaycan Dövlət Musiqili Komediya teatrında fəaliyyətini yenidən davam etdirən N.Əliyevin yaradıcılığında yeni obrazlar silsiləsi yarandı: "92 dəqiqə gülüş"də Xəstə, "On min dollarlıq keyf"də Dayıoğlu, "Hərənin öz ulduzu"nda Kələntər, "Dəli dünya"da tın-tın Əsəd, "O olmasın, bu olsun"da Məşədi Qəzənfər, "Bankir adaxlıda dilənçilər padşahı, "Əlin cibində olsun"da Dilənçi, "Məhəbbət oyunu"nda Daşdəmirov, "Volqalı canan"da Müqəddəsov, "Şeytanın yubileyi"də Şirvan, "Kələkbazlar"da Əlipaşa və s.

25 iyun 2013-cü ildə Azərbaycanın əməkdar artisti fəxri adına layiq görülüb. O, bir neçə dəfə Prezident mükafatına layiq görülüb.
“QARABAĞDA HESABAT KONSERTİ VERMƏYİ ƏHD ETMİŞDİM...”Gövhər Həsənzadə: “Düşünürəm ki, uyğun zamanda dünyanın hər tərəfindən gələcək qonaqları, ifaçıları dilbər guşəmizdə toplayım”

Müsahibimiz Əməkdar İncəsənət xadimi, Azərbaycan Bəstəkarlar İttifaqının üzvü, Azad Azərbaycan Televiziyasının Şura üzvü, Müəllif Hüquqları Uğrunda İctimai Birliyinin İdarə Heyətinin sədri Gövhər Həsən-zadədir. Gövhər xanımla söhbətimizdə yaradıcılığındakı yeniliklərdən başlayaraq, gündəmlə bağlı bir sıra suallara cavab tapmağa çalışdıq.

(Əvvəli bu linkdə: https://qafqaz.media/az/sanki-cdadlarimin-ruhlari-susada-mni-idar-edirdilr-govhr-hsnzad.html)

- Qarabağ dedikdə ilk olaraq fikrinizə nə gəlir, sizin üçün bu məkanın anlamı nədir?

- Qarabağ mənim üçün ilk növbədə musiqidir. Azərbaycanın “musiqi beşiyi” olan bu torpaqlarda nəfəs alan bir musiqiçi başqa necə düşünə bilər?! Nə təəssüratı ola bilər?! Son 30 ildə həmrəylik günlərində, dövlət tədbirlərində, gözəl məclislərimizdə hər zaman “bir gün bunu Qarabağda da edəcəyik”, - deyərək çox köklənirdik. Mən bunu xüsusi deyim ki, 30 ildir bu gün üçün məşq edirdik. Hər zaman demişəm, Azərbaycanda yeganə bəstəkaram ki, mahnılarımın albom toplusu yoxdur. Nə də kiçik də olsa yaradıcılıq gecəm, mahnılarımdan ibarət konsertim, heç bir törənim olmayıb. Baxmayaraq ki, 30 ilə yaxındır ciddi tədbirlərin rejissoru kimi çalışıram. Mən efirlərdən də dəfələrlə demişəm, mahnılarımdan ibarət konsertlərim, yaradıcılıq gecələrim olacaqsa, ilk növbədə Qarabağ torpağında olacaq. Görün, mən bunu nə qədər istəmişəm ki, qurban olduğum Allah da nəsib etdi, torpaqlarımız daha özümüzdədir. İnşallah, yəqin qismət olar, söz verdiyim yaradıcılıq gecəsi və ya mahnılarımdan ibarət tamaşaçı qarşısında ilk hesabat konserti arzuladığım, əhd elədiyim kimi Qarabağ torpağında keçirilər.

- “Musiqi beşiyi” olan Qarabağdan söhbət düşmüşkən, sizcə, son illər telekanallarda bayağı mahnılara daha çox üstünlük verilməsi nə ilə bağlıdır?

- Bilirsiniz, “bayağı” deyəndə, dövrün bəzi problemləri, çalarları, axıntıları, döngələri olur. Yəni həyat da material dünyanın özünə bənzər bir şeydir, yoxuşu var, çöküşü var. Bu həyatda hər şey olur. Musiqi də həyatın özüdür, eyni prossesi yaşayır. Hər dönəmin boşluğu da olur, imtahanı da. Mən düşünürəm ki, bu gün “bayağı” mahnı deyiriksə, bu fikir varsa, demək, hər şey normaldır... Yəni dinləyici əsl sənəti qeyri-peşəkar və keyfiyyətsiz musiqidən ilk dinləyişdən ayırırsa, demək, sənətimiz xalqımızın nəzarəti və ədalətli seçimi altındadır. Azərbaycan xalqı çox savadlı, dərin təfəkkürlü xalqdır. Çünki biz çox tələbkar tamaşaçıyıq. Dünyada çox az dövlətlər, xalqlar var ki, orda insanlar hərtərəfli savadlı və istedadlı olsunlar. Bizdə işinin peşəkarı olan, ağıllı insanlar daha çoxdur. Onlarin hər biri həm də yaradıcılıqla məşğuldurlar. Hobbi kimi qəbul etsələr də inanın, başqa ölkələrdəki peşəkarlardan daha peşəkar yanaşırlar incəsənət bacarıqlarına. Yəni musiqi duyumu, musiqi zövqü olmayan azərbaycanlı yoxdur. Sadəcə, musiqi janrları müxtəlifdir. Musiqinin hər üslubunun öz dinləyicisi var. Bu, normaldır. Xalq musiqisi, muğam-qəzəl, klassik, meyxana, caz, rok, pop, texno, rep və s. musiqi janrının cərəyan və üslublarının mükəmməl və peşəkar dinləyiciləri var. Çoxsəsli musiqini sevənlər, təksəsli musiqini sevənlər var. Bilirsiniz, mən musiqiçi kimi bunlar haqda çox danışa bilərdim, amma dinləyicini, tamaşaçını yormaq lazım deyil. Bəzən kimsə çox ağıllı, özünü fərqli hesab etmək üçün terminlərlə, elmi dildə nəyisə izah etməyə çalışır. Xeyr, əsl peşəkarın işi insanlarla səmimi, məntiqli danışmaq və onların suallarına dolğun cavab verərək qane etməkdir. Mən bunu qeyd etmək istəyərdim ki, elə bir azərbaycanlı yoxdur ki, bu dediklərimlə razılaşmasın. Belə bir şey yoxdur ki, “pis bir musiqidir, onun böyük tamaşaçı auditoriyası var”. Belə deyil. Sadəcə, indi texnika, texniki imkanlar real həyatı, real yaşananları qapadır, onun üstünə çökür, onu boğur. İndi süni sürətdə milyonlarla tamaşaçı yığmaq, onu efirdən səsləndirmək ki, “mənim bir ayda neçə tamaşaçım olub”, bunu hər kəs öz ağzı ilə deyir. Biz o, bir milyon adamı tanıyırıq? Yəni sübut olunmayacaq qədər yalanlar söylənilir və nəticədə elə bilirik ki, həmin musiqiləri hamı istəyir, hamı dinləyir. Xeyr!

Bilirsiniz, keyfiyyətsiz yazılan, keyfiyyətsiz səsləndirilən musiqilər var. “Bayağı” dediyiniz musiqilər sözlərindən başlayır. “Bayağı” nəyə deyirik: bu nə mahnıdır, gör nə deyir bu mahnıda, belə söz olar?.. Görürsünüz, biz həmişə sözlərə istinadən deyirik ki, bayağıdır. Əgər sözləri üstündən götürüb dinləsəz adi ritmik bir musiqi kimi səslənir. Heç kim məcbur deyil ki, Azərbaycan musiqisi kimi qəbul eləsin. Azərbaycan sözləri üstündə olanda deyirik ki, Azərbaycan mahnısıdır, azərbaycanca oxuyurlar. Amma sözləri üstündən götürsək, sübut olunmaz bir şeydir ki, keyfiyyətsiz səslənən ritmik nəsə Azərbaycan sənətidir. Buna yanaşma müxtəlif olmalıdır. Axı, səslənən mahnı mənim mahnım deyil. Kim bizi məcbur edir ki, deyək, Azərbaycan mahnısıdır?! Qəbul etmiriksə, əgər tamaşaçı deyirsə ki, “bu, bizim mahnı deyil”, deməli, bizim deyil. Gəlin buna belə yanaşaq.

O ki qaldı efirlərdə təbliğatı-filanı, mən yenə deyirəm, bu, texnikanın, bugünki material maraqların, maddi maraqlara iştahların, asan yolla pul qazanmaq istəyən bəzi insanların səhvləridir ki, onlar sadəcə madiyyatı düşünərək, bu işin dərinliyinə varmırlar. Nəticədə də onlar çoxalır. Və hər kəsə də deyirlər ki, Azərbaycan mahnıları... Onların heç biri Azərbaycan mahnısı deyil. Mən o mahnıların heç birini qəbul etmirəm.

Amma əvvəlkinə baxanda, son aylar bu cür hallar azalıb. İnşallah, çox tezliklə, ümumiyyətlə, o, mahnılar artıq efirlərdə öz əksini tapmayacaq. Siz də mənimlə razı olarsınız ki, artıq o, qaragüruh “mahnılar” efirlərdə yoxdur. Ona görə, buna nikbin yanaşaq. Sənətimiz dərindir, müqəddəsdir. Bizim heç kimə, heç kəsə ehtiyacımız yoxdur ki, kimdənsə istifadə edək. Bizim dünyaya təqdim etməyə, dünyanı heyrətləndirməyə və sevgi mesajı göndərməyə - istər Tanrıya sevgi, istər Vətənə sevgi, istər anaya-ataya sevgi, istər həyata - sevgi etirafları etməyə çox böyük əsərlərimiz var. İndi də yazılır, inşallah, gələcəkdə də yazılacaq.

-Son dönəmlər onun da şahidi oluruq ki, bəzi müğənnilər peşəkar bəstəkarlarla və musiqiçilərlə əməkdaşlıq etməkdənsə, diletantlara və texniklərə üstünlük verirlər...

- Sənətkar peşəkar musiqiçilərlə işləməlidir. Hər ifaçıya müğənni demək olmaz. Qeyri-peşəkar insanın işiylə, musiqisiylə səhnəyə çıxan heç kəs dinləyici rəğbətini qazana bilməz. Əgər sənətkardırsa, o, ifa etdiyi əsəri səhnə üçün hazırlayıb sonra səsyazma studiyasında lentə alıb efirə çıxmalıdır. Biz də isə əksəriyyəti tam əksini edir. Burda da rənglər qarışır...

Hər kəsin incəsənətdə özünü sınamağa və istedadını təqdim etməyə haqqı var.

Bilirsiniz, əgər bu gün kimsə məsləyinə görə həkimdirsə, mühəndisdirsə, musiqi təhsili yoxdursa, amma gözəl mahnı yazmaq qabiliyyəti varsa bu çox normal haldır. Belə ki, bir çoxları ya valideynlərinin təkidi ilə, ya da həyat belə gətirib ki, və hardasa özünü kəşf edə bilmədiyinə görə, başqa bir sənət seçib, amma görüb ki, içində nəsə çatmır. Müəyyən yaşda başa düşüb ki, onun içində melodiyalar, ya şeir, ya musiqi, ya rəssamlıq, incəsənət var. Demək, bu adamın içərisində istedad var. Bu insan bəlli yaşdan sonra bu sənətə müraciət edirsə, sənət aləminə gəlirsə, burda eyib bir şey yoxdur. İstedad 100 yaşında da insanda aşkarlana bilər. Söhbət not yazıb-yazmamaqdan, peşəkar, qeyri-peşəkar olub-olmamaqdan getmir. Əsl müğənni səhnədə musiqini elə səviyyədə ifa etməlidir ki, heç kəs hiss etməsin ki, onu peşəkar, ya qeyri-peşəkar yazıb. Gəlin, məsələyə belə yanaşaq.

Fikirlərim həmişə fərqli olub. Heç kəs də mənlə mübahisə etmir. Bəzən hansısa “ulduz”dur, nə bilim nədir, korifey sənətkarlarımızın, “qızıl fondumuz”un mahnılarını elə bərbad, zövqsüz, qeyri-peşəkarcasına ifa edirlər ki, o dəqiqə məlum olur ki, həmin müğənni sənətkar deyil. Belə ki, hansısa peşəkar bəstəkarın sayəsində, onun dediklərini icra edərək təqdim etdiyi ifalar məhz həmin bəstəkarın məhsuludur. Müğənni özü isə heç nə öyrənməyib və zövqü də formalaşmayıb. Nəticədə həmin bəstəkardan ayrılanda və individual iş görəndə çox eybəcər və qəbulolunmaz ifalar ortaya çıxır. Demək ki, hasısa peşəkar bəstəkarın mahnısı və işbirliyi ilə tanınan və sevilən ifaçı həm də öyrənməli, üzərində işləməli və özü də peşəkarlaşmaq üçün lazımınca sənət məktəbi keçməlidir. Biz niyə fikirləşirik ki, bütün müğənnilərimiz ideal ifaçıdır, amma oxuduqları mahnıları qeyri-peşəkardır... Bəstəkar mahnısı deyil deyə bərbaddır? Xeyr! Bərbad mahnıdırsa, o, necə oxuya bilər? Demək ki, burda söhbət yazılan notdan yox, yazılan notu ifa etməkdən gedir.

Rəhmətlik Rəşid Behbudovla, rəhmətlik Tofiq Quliyev 3-4 dəqiqəlik bir mahnının üzərində 3 aydan, 6 aya qədər çalışırmışlar. Bu iki dahi necə olub ki, 3 ay, 4 ay, 5 ay, 6 ay bir mahnının üzərində çalışırmışlar... Siz artıq burdan düşünün ki, mən nəyi deyirəm.

Mən hər dəfə səsyazma studiyasında olanda, sizə də məsləhət görərdim ki, şahidi olasınız, kimliyindən, yaşından, təcrübəsindən, ifaçılıq təcrübəsindən asılı olmayaraq, hər kəs deyir ki, zövq aldım, mən bu gün işlədim, bu gün istədiklərimi burdan aldım. Bilirsiniz nəyə görə? Çünki bəstəkar ifaçı ilə işləməlidir, çalışmalıdır, bir yerdə yaratmalıdırlar. Belə bir şey yoxdur ki, mən mahnını yazdım, sən dinlədin, bəyəndin, getdi aranjimana. Çox vaxt bəstəkar özü də getmir. Müğənni gedib ifa edir, ahəngləşməni özü edir, sonra mahnını bəstəkara göndərir ki, necə alındı. Bəstəkar da deyir, “çox gözəl”. Mən ona mahnı demirəm. Mən demirəm ki, aylarla oturaq mahnı yazaq. Yox, əsla! Amma səsyazma studiyasına sadəcə marağı olan gəlsin, iştirak etsin. Yenə də deyirəm 40 ilin müğənnisi ola bilər, amma hələ bu günə qədər o, iş prosesində mənimlə çalışan heç bir ifaçı, heç bir müğənni olmayıb ki, desin, getdim yarım saata oxudum, çıxdım. Elə bir şey yoxdur. Ona görə, düşünürəm ki, müğənnilərimizi həvəsləndirmək lazımdır.

- Sizi həm bəstəkar, həm də rejissor, təşkilatçı kimi tanıyırıq. Maraqlıdır, hansı sənətkarla işləmək, onun konsertini təşkil etmək istərdiniz?

- Artıq öz konsertimi təşkil etmək istərdim. Mən böyük təcrübə yığdım. Mənə etimad göstərən hər kəsə çox minnətdaram. Hər zaman da minnətdar olacağam. Göydə Allah, yerdə də mənə güvənən, mənə etimad göstərən insanlar məni bu gün Gövhər Həsən-zadə edib. Bu etimad göstərənlərin içərisində ən böyük yeri tamaşaçılar tutur. Çünki onlar mənə inanıblar ki, Gövhərin mahnısı yaxşı olacaq və ya rejissoru Gövhərdisə bu konsert yaxşı olacaq. Bilirsiniz ki, ideoloji baxımdan Vətəni, xalqı, mədəniyyətimizi təbliğ etmək ön planda olan tədbirlərin rejissorluğu və təşkili ilə məşğul olmuşam və oluram. Əyləncəli və kommmersiya xarakterli konsertlər mənim işimə aid deyil. Təşkilatçılıq işimdə də böyük sənətkarlarla, böyük kollektivlərlə işləmək, böyük sənət əsərlərimizi düzgün proqramlaşdırıb, düzgün təqdim etmək, əlbəttə, çox məsuliyyətli işdir. Çox böyük layihələrdə olmuşam. Düşünmürəm ki, bundan sonra bu qədər sayda daha böyük layihələr mənə təqdim oluna bilər. Çünki bu gün maşallah, təşkilatçılarımız, yaradıcı insanlarımız çoxdu. Amma indi mənim üzərimə düşən borcum illərdir tamaşaçı qarşısına çıxartmadığım hesabat konsertimdir. İstərdim ki, həm burda, həm də Türkiyədə, Avropada , Amerikada, fərqli tərzlərdə ifa olunan həmin sənət əsərlərimi Azərbaycan tamaşaçısına təqdim edim, hamısını bir yerdə. Bu, mənim borcumdur. Düşünürəm ki, bu borcu həyata keçirməliyəm. Mən bunu Qarabağda keçirəcəyimi əhd eləmişdim. Qurban olduğum Allah buyurdu ki, bu da canın, ciyərin - Ana Vətənin, Ana yurdun - hamımızın, bütün azərbaycanlıların Vətəni Qarabağımız, indi bu da meydan, bacarığını, məharətini göstər.

Bir sözlə, hazırda öz konsertim haqda düşünürəm. Çünki artıq nəyisə ertələmək, nəyisə planlaşdırmaq ki, “bu, olsaydı, belə olardı”, deyilən mərhələ keçdi. Mən bunu artıq hazırlamalıyam. Çünki siyahıda çox böyük sənətkarlar, çox böyük kollektivlər var. Dünyanın müxtəlif yerlərindən gələ biləcək - Nilufər, Mustafa Ceceli, Zərrin Özər, Bengü, İn-Grid, Kaan Yalçın, Pınar Aylin, Kanun Yıldırım, Zeliha Sunal, MİŞA, Ayla İşıl, Meyra, "Studio A" , Barbaross və digərləri kimi ümumilikdə otuza yaxın ifaçılar var. Onların hamısını mən cənnət məkan Qarabağımızda toplamaq istəyərdim. Düşünürəm ki, artıq zamanı çatıb. İnşallah, dünyanın hər tərəfindən gələcək qonaqları, ifaçıları dilbər guşəmizdə toplaya bilsəm çox xoşbəxt olaram. Bu, tək mənim seçimim deyil, lazım olan qurumlarla, təşkilatçılarla, yaradıcı, bədii, texniki heyətlərlə qərarlaşdırılıb, danışılıb, ondan sonra həyata keçiriləcək.



(Ardı var)

Söhbətləşdi: Fuad BİLƏSUVARLI,
İordaniya mətbuatında Nizami Gəncəviyə həsr olunmuş məqalə dərc edilibİordaniyanın “Cohina”, “Əl Ənbat” və “Nəbd Əl Balad” qəzetlərində rus mənşəli iordaniyalı jurnalist Yelena Neduqinanın “Nizami Gəncəvi irsi İordaniya və Azərbaycanı daha da yaxınlaşdırdı” sərlövhəli məqaləsi dərc edilib.

AZƏRTAC xəbər verir ki, məqalədə ötən il dahi Azərbaycan şairi və mütəfəkkiri Nizami Gəncəvinin 880 illik yubileyi ilə bağlı Əmmanda silsilə tədbirlərin keçirildiyi diqqətə çatdırılıb. Müəllif qeyd edib ki, ölkənin ən nüfuzlu ali təhsil ocağı – İordaniya Universitetində keçirilən “Nizami Gəncəvi ərəblərin gözü ilə” mövzusunda simpozium bu baxımdan ən əlamətdar tədbir olub. Dahi şairin zəngin irsinin təbliği və alimlər, tələbələrin iştirakı ilə təqdim edilən mühazirələr bir daha göstərdi ki, bəşəriyyətə, o cümlədən İslam aləminə görkəmli şəxsiyyətlər bəxş etmiş Azərbaycanla İordaniya arasında sıx mədəni bağlar mövcuddur. Xüsusən, Nizami Gəncəvi haqqında müxtəlif ölkələrin ədəbiyyatşünaslarının tədqiqat əsərlərindən ibarət olan kitabın ərəb dilində nüsxəsinin təqdimatı İordaniya Universitetinin filologiya fakültəsinin müəllim və tələbə heyətinə gözəl bir hədiyyə oldu.

Y.Neduqina vurğulayıb ki, ötən il “Nizami Gəncəvi İli” çərçivəsində keçirilən beynəlxalq tədbirlər Prezident İlham Əliyevin dahi Azərbaycan şairinin zəngin irsinin təbliği ilə yanaşı, Şərq-İslam mədəniyyətinin bütün dünyada tanıdılması istiqamətində atdığı möhtəşəm humanitar addım oldu.

Məqalədə Nizami Gəncəvinin əsərləri, humanizmi, insanlar arasında bərabərliyi və qardaşlığı təbliğ edən dərin fəlsəfi fikirləri haqqında da ətraflı məlumat verilib.
Azərbaycanda bank sektoruna aid ilk elmi jurnal işıq üzü görüb2021-ci ildən fəaliyyətə başlayan "Bank and policy" jurnalının beynəlxalq lisenziyası var və elmi jurnallar üçün tələb edilən bütün beynəlxalq standartlara cavab verir.

Jurnalı nəşr edən təşkilat isə Azərbaycanda yeni olan elmi İMCRA (International Meetings and and Conferences Research Association) şirkətidir. Bir sıra uğurlu naaliyyətlrə imza atan şirkətin "Bank and policy" jurnalını təsis etməkdən məqsədi, Azərbaycanda bank və iqtisadiyyat sektorunda gedən ciddi elmi islahatlara və yeniliklərə elmi dəstək verməkdir.

Jurnal yeni olmasına baxmayaraq Index Copernicus, Philosopher`s Index, DRJİ, ISSN ROAD, Citefactor kimi nüfuzlu beynəlxalq indekslərdən keçmişdir. Jurnal, öz qarşısına yaxın gələcəkdə Scopus və Web of Science kimi ciddi elmmetrik platformalarda Azərbaycanı layiqincə təmsil etməyi məqsəd qoyur. Jurnala bank sektoru və iqtisadi sahələrlə yanaşı, eləcə də sosial siyasət, təhsil siyasəti və təhsilin iqtisadiyyatı, sosial-statistik məsələlər və sair gündəm mövzularla bağlı alim və tədqiqatçı mütəxəssislər məqalə verə bilər. Qeyd edək ki, bu sahələrdə Azərbaycanda beynəlxalq səviyyədə tanınan elmi jurnalı yox dərəcəsindədir.

Maraqlananlar bu elektron ünvana öz məqalələrini göndərə bilərlər.

[email protected]
https://imcra-az.org/bank-and-policy/
"Bank and Policy"
P-ISSN - 2790 - 1041
E-ISSN - 2790 - 2366