Bu ilin I rübü ərzində Azərbaycanda diplomların tanınması üzrə müraciətlərin statistikası açıqlanıb.

Avrasiya.net xəbər verir ki, ötən dövr ərzində Təhsildə Keyfiyyət Təminatı Agentliyinə 678 müraciət daxil olub.

Onlardan 493-ü barədə müsbət qərar verilərək müvafiq şəhadətnamələr təqdim edilib, 185 nəfərin müraciətinə isə mənfi cavab verilib. Tanınma üzrə müraciətlərin icrası yanvar ayı üzrə 21, fevral ayı üzrə 14, mart ayı üzrə isə 20 gün ərzində tamamlanıb.

Tədris dili üzrə bilik səviyyəsinin qənaətbəxş olmaması səbəbi ilə 103, tədris yükünü mənimsəmək üçün təhsil aldığı ölkənin ərazisində kifayət qədər olmaması səbəbi ilə 72 və digər səbəblərə görə 10 nəfərin müraciəti mənfi cavablandırılıb.

İxtisas seçimlərində iqtisadiyyat üzrə 112, hüquqşünaslıq üzrə 91, maliyyə üzrə 82, tibb üzrə 75, biznesin idarə edilməsi üzrə 49, mühəndislik üzrə 48, menecment üzrə 41, beynəlxalq münasibətlər üzrə 32, turizim üzrə 14, kompüter elmləri üzrə 13 və digər ixtisaslar üzrə 121 müraciət qeydə alınıb.

Ölkələr üzrə müraciətlərin sayına gəlincə, Ukraynadan 197, Türkiyədən 170, Rusiyadan 167, Gürcüstandan 50, Böyük Britaniya və Şimali İrlandiya Krallığından 11, digər ölkələrdən isə 83 müraciətin olduğu müşahidə edilib.

Ümumilikdə rüb ərzində verilən mənfi qərarların 29 %-i 10 ali təhsil müəssisəsinin (Tbilisi Humanitar Tədris Universiteti, Ukrayna Dövlət Dəmiryol Nəqliyyatı Universiteti, H.P.Konaşeviç-Saqaydaçnıy adına Kiyev Su Nəqliyyatı İnstitutu, “Sinergiya” Moskva Maliyyə-Sənaye Universiteti, Poltava İqtisadiyyat və Ticarət Universiteti, Simon Kuznets adına Xarkov Milli İqtisad Universiteti, Odessa Dövlət Ekologiya Universiteti, Voljsk Dövlət Su Nəqliyyatı Universiteti, Tbilisi Açıq Tədris Universiteti və Avropa Universiteti (Gürcüstan) payına düşür.

Oruc tutan şəxslərin imsak etməsi və imsakdan yarım saat əvvəl 4-5 stəkan su içməsi lazımdır.

Avrasiya.net xəbər verir ki, bunu ARB24-ün “İş vaxtı” verilişinə açıqlamasında həkim-dietoloq Leyla Zülfüqarova deyib.

O bildirib ki, doğru qidanlanmazlarsa, oruc tutanların səhhətində problemlər yarana bilər:

“Ramazan ayında oruc tutanların orqanizminin təmizlənməsi prosesi baş verir. Lakin düzgün qidanlanmasalar, onun ziyanları ortaya çıxa bilər. Orqanizmdə fəsadlar yaranmamasın deyə imsakda doymamış yağ turşularının qəbul edilməsi vacibdir. Bunun üçün günaşırı olaraq qoz, fındıq, badam kimi çərəzlər və 1-2 dilim çovdar çörəyi ilə 20 qram kərə yağı qəbul edilə bilər. Xurma isə əslində iftar zamanı deyil, imsakda qəbul edilməlidir. Çünki o, orqanizmin ehtiyac duyduğu şəkərin 80 faizini ödəyir. Buna görə səhərlər xurmadan istifadə edənlərin iftarda onu yeməsinə ehtiyac yoxdur.

Həmçinin onu da qeyd edim ki, imsakdan dərhal sonra yatmaq insan səhhətinə ziyandır. Yaxşı olar ki, imsaka duranlar yemək yedikdən yarım saat sonra yatsınlar.

İftarda isə ərik, gavalı və alma qurusu mütləq istifadə edilməlidir. Bu, həm oruc tutanları tox tutacaq, həm də orqanizmin vacib maddələrə olan ehtiyacını ödəyəcək”.

L. Zülfüqarova onu da bildirib ki, oruc tutanlar doğru qidalanmasalar, bu, onların koronavirusa yoluxma ehtimalına təsir edə bilər:

“Oruc tutanların doğru, yəni imsak və iftarda düzgün qidalanması onların immun sisteminin güclü olması üçün kifayətdir. İmmun sistemi üçün vacib olan vitamin D-ni günəş və qidalarla ala bilərik. Qidalarda bu vitamini dəniz məhsulları, yumurta, kərə yağı və süd məhsulları vasitəsi ilə almaq mümkündür. Həmçinin sink və vitamin C çərəzlər, dəniz məhsulları vasitəsi ilə alına bilər”.

Aprelin 9-da Binəqədi rayon Ağsaqqallar Şurasının konfransı keçirilib.

Avrasiya.net xəbər verir ki, Yeni Azərbaycan Partiyası Binəqədi rayon təşkilatının inzibati binasında pandemiya dövrünün şərtlərinə uyğun olaraq keçirilən tədbirdə Binəqədi Rayon İcra Hakimiyyətinin başçısı Elxan Allahverdiyev, Milli Məclisin deputatı Respublika Ağsaqqallar Şurasının sədr müavini Eldar İbrahimov, RİH başçısının müavini Sevinc Süleymanova, YAP Binəqədi rayon təşkilatının sədri Ramiz Göyüşov, aparatın şöbə müdiri Nicat Allahverdiyev, rayonun bir qrup ziyalıları və ağsaqqalları iştirak etdilər.

Tədbir iştirakçıları tərəfindən şəhidlərin xatirəsi bir dəqiqəlik sükutla yad edildikdən sonra tədbiri giriş nitqi ilə
YAP Binəqədi rayon təşkilatının sədri Ramiz Göyüşov açaraq Azərbaycan cəmiyyətində ağsaqqallıq missiyasının böyük əhəmiyyətindən danışdı. Sonra Rayon Ağsaqqallar Şurasının sədri Akif Rəfiyev hesabat məruzəsi ilə çıxış etdi. Daha sonra Milli Məclisin deputatı Respublika Ağsaqqallar Şurasının sədr müavini Eldar İbrahimov gündəlikdə duran məsələləri elan etdi. Ağsaqqallar Şurasının üzvləri və Şura üzvlərindən ibarət İdarə Heyəti səsvermə ilə müəyyən edildi. Binəqədi Rayon Ağsaqqallar Şurasının sədri vəzifəsinə yenidən İdarə Heyətinin üzvü, təqaüddə olan ədliyyə general-mayoru Akif Rəfiyev seçildi.

Tədbir Rayon Ağsaqqallar Şurasının sədri seçilmiş Akif Rəfiyevin çıxışı ilə davam etdi. A.Rəfiyev çıxışında ona göstərilən etimada görə konfrans iştirakçılarına minnətdarlığını ifadə etdi, bu şərəfli və məsuliyyətli işin öhdəsindən gəlmək üçün rayonun ziyalıları, ağsaqqallları ilə birgə bütün imkanlarını səfərbər edəcəyini bildirdi. Rayon Ağsaqqallar Şurasının sədr müavini vəzifəsinə rayon ziyalısı Cahangir Qocayev seçildi. Tədbirdə həmçinin rayon Ağsaqqallar Şurasının Təftiş Komissiyasının üzvləri, 9 ərazi təşkilatı üzrə - dörd mikrorayon və beş qəsəbə üzrə üzvlər və təşkilat sədrləri müəyyənləşdirildi.

Sonra Binəqədi Rayon İcra Hakimiyyətinin başçısı Elxan Allahverdiyev çıxışında ağsaqqala olan hörmət və ehtiramın Azərbaycan cəmiyyətinin əsas xüsusiyyətlərindən biri olduğuna toxunaraq bunun milli düşüncəmizin dərinliklərində möhkəm kök salmış ənənə olduğunu qeyd etdi. Rayon rəhbəri ağsaqqallara dövlət səviyyəsində göstərilən ehtiramdan danışdı, Ulu Öndər Heydər Əliyev siyasətinin davamı olaraq Prezident İlham Əliyevin ağsaqqallara dərin hörmət və ehtiramla yanaşdığını və onları xalqımızın mənəvi sərvəti kimi dəyərləndirdiyini vurğuladı. Natiq çıxışının sonunda koronavirus infeksiyasına qarşı aparılan mübarizədən, əhalinin maarifləndirilməsi, vaksinasiya olunması sahəsində görülən işlərdən danışaraq, ağsaqqalları görülən işlərdə daha fəal iştirak etməyə çağırdı.

Sonda Milli Məclisin deputatı, Respublika Ağsaqqallar Şurasının sədr müavini Eldar İbrahimov çıxış edərək ölkəmizdə ağsaqqal sözünün nüfuzundan, ulu öndər Heydər Əliyevin dövlət başçısı olmaqla yanaşı, el ağsaqqalı kimi beynəlxalq səviyyəli geniş fəaliyyətindən danışdı. Azərbaycan Respublikasının Prezidenti, Ali Baş Komandan cənab İlham Əliyevin müdrik siyasəti və Rəşadətli ordumuzun qüdrəti ilə 44 gün ərzində erməni işğalçılarını tarixi torpaqlarımızdan çıxarılmasının əhəmiyyətini qeyd etdi. Eldar İbrahimov ölkəmizdə aparılan siyasətə ağsaqqalların fəal münasibət bildirmələrini, əhali, xüsusilə gənclər arasında geniş maarifləndirmə işinin aparılmasının zəruriliyini bildirdi. Natiq vurğuladı ki, bu gün də gənclərin dövlətə, xalqa sadiq, vətənə bağlı, zərərli yad təsirlərdən uzaq və sağlam əsaslar üzərində tərbiyə olunması işində daim ağsaqqallara böyük ehtiyac vardır.

Sonda Binəqədi rayon Ağsaqqallar Şurasının sədri Akif Rəfiyev Binəqədi rayonunun sosial-iqtisadi, ictimai- siyasi həyatında fəal iştirakına görə, həmçinin 85 illik yubiley münasibətilə Binəqədi Rayon İcra Hakimiyyətinin Başçısı Elxan Allahverdiyevin imzaladığı Fəxri Fərmanla təltif edildi.

Azərbaycan Milli Konservatoriyasının rektoru, Xalq artisti Siyavuş Kərimi koronavirusa yoluxub.

Avrasiya.net xəbər verir ki, bu barədə Report-a Xalq artisti özü məlumat verib.

O bildirib ki, 8 gün əvvəl özünü narahat hiss edib:

“Koronavirusa görə verdiyim testin cavabı pozitiv çıxıb. Səhhətim yaxşıdır, müalicəmi ev şəraitində davam etdirirəm. Hər şey yaxşıdır”.

Konservatoriyanın mətbuat xidmətinin rəhbəri Anar Bəylərov isə bildirib ki, COVID-19 səbəbindən təhsil müəsissəsində əyani dərslər dayandırılıb.

“Yoluxmaların sayı çoxaldığına görə, rektorun tapşırığı ilə bu gündən etibarən əyani dərslər müddətsiz dayandırılıb. Bundan sonra dərslər onlayın formada davam etdiriləcək. Konservatoriyanın 3 əməkdaşının COVID-19 testinin nəticəsi pozitiv çıxıb”, - o deyib.

Türkdilli ölkələr arasında media sahəsində əməkdaşlığın inkişaf etdirilməsinə yönəlik yeni ictimai birlik təsis olunub.

Bu barədə "OLAYLAR"-a məlumat verən təşkilatın təsisçisi, Əməkdar Jurnalist Süleyman İsmayılbəyli deyib ki, "Türkdilli Ölkələrin Jurnalistlər Alyansı" İctimai Birliyi adlanan təşkilatı yaratmaqda məqsəd bu coğrafiyaya daxil olan ölkələr arasında media sahəsində əməkdaşlığı daha da inkişaf etdirmək, qarşılıqlı təcrübə mübadiləsi həyata keçirmək, eyni zamanda ayrı-ayrı ölkələrin media qurumlarında Azərbaycanın təbliği ilə bağlı məqalələr dərc etməkdir: "Bununla yanaşı həm Türkiyə-Azərbaycan Media Platforması, həm də bu günlərdə Bakıda keçirilən Türkdilli Dövlətlərin Əməkdaşlıq Şurasının (Türk Şurası) informasiya və media üzrə məsul nazirlərinin və yüksək vəzifəli rəsmilərinin 3-cü toplantısında qəbul edilən qərarların icrasına dəstək olmağı düşünürük".

Süleyman İsmayılbəyli deyib ki, İctimai Birlikdə ölkənin tanınmış KİV-lərinin nümayəndələri təmsil olunur: "Artıq başda Türkiyə olmaqla bir sıra türkdilli ölkələrin media qurumları, federasiya və jurnalist təşkilatları ilə ilkin danışıqlar aparılıb və gələcəkdə birgə qarşılıqlı əməkdaşlığa dair razılıq əldə olunub".

"Türkdilli Ölkələrin Jurnalistlər Alyansı" İctimai Birliyinin təsisçisi Süleyman İsmayılbəyli deyib ki, yaxın günlərdə müvafiq sənədlər dövlət qeydiyyatından keçmək üçün Ədliyyə Nazirliyinə təqdim ediləcək.

Şabranda xüsusi karantin rejimi qaydalarına riayət olunmaqla, Rayon Ağsaqqallar Şurasının yığcam tərkibdə tədbiri keçirilib. Tədbirdə Azərbaycan Ağsaqqallar Şurasının sədr müavini Tahir Süleymanov, Şabran Rayon İcra Hakimiyyətinin başçısı Asif Hüseynov, o cümlədən rayon ağsaqqalları və ziyalıları iştirak ediblər.

Tədbir iştirakçıları tərəfindən əvvəlcə ümummilli lider Heydər Əliyevin abidəsi önünə gül dəstələri düzülüb və xatirəsi ehtiramla yad edilib.

Toplantıda Azərbaycanın suverenliyi və ərazi bütövlüyü uğrunda şəhid olanların və ötən dövr ərzində dünyasını dəyişən ağsaqqalların xatirəsi bir dəqiqəlik sükutla anılıb.

Şabran Rayon İcra Hakimiyyəti başçısı Asif Hüseynov çıxış edərək, ağsaqqallara, Azərbaycanın hər bir bölgəsində olduğu kimi, Şabranda da böyük dəyər verildiyindən, onların da, öz növbəsində, rayonun ictimai-mədəni həyatında oynadıqları əhəmiyyətli roldan bəhs edib.

Qeyd olunub ki, gənclərimizin dövlətə, dövlətçiliyə və xalqa sədaqət, o cümlədən milli-mənəvi dəyərlərə hörmət və vətənpərvərlik ruhunda, sağlam təməl üzərində yetişdirilməsi işində ağsaqqallara həmişə böyük ehtiyac hiss edilib. İcra başçısı, həmçinin, Şabranın inkişafında rayon ağsaqqallarının da üzərinə müəyyən vəzifələr düşdüyünü və onların hər birinin fədakar əməyininin vacibliyini vurğulamışdır.

Tədbirdə Azərbaycan Ağsaqqallar Şurasının sədr müavini Tahir Süleymanov çıxış edərək bildirib ki, tariximizin şanlı səhifəsinə qızıl hərflərlə yazılmış 44 günlük Vətən müharibəsində müzəffər Ali Baş Komandan İlham Əliyevin başçılığı altında şanlı Ordumuzun qazandığı parlaq Qələbə ağsaqqallarda da böyük ruh yüksəkliyi, tükənməz fəaliyyət əzmi yaradıb. O qeyd edib ki, gənc nəslin tərbiyə edilməsi istiqamətində möhtərəm Prezidentimizin siyasi, iqtisadi, hərbi və mənəvi istiqamətlərdə apardığı məqsədyönlü siyasətin və bu siyasəti hər zaman dəstəkləyən xalqımızın, o cümlədən ağsaqqalların səyi nəticəsində yetişən gənclərimiz öz canlarını fəda edərək torpaqlarımızı azad etdilər.

Vətənpərvər gənclərimizin bu qəhrəmanlıq salnaməsi bütün dünya xalqlarının gəncləri üçün bir örnəyə çevrildi. Artıq azad edilmiş həmin torpaqlarımızda aparılan quruculuq işlərindən bəhs edən Tahir Süleymanov əmin olduğunu bildirib ki, tezliklə möhtərəm Prezidentimiz cənab İlham Əliyevin və Mehriban xanım Əliyevanın fədakar əməyi və tükənməz səyi nəticəsində Azərbaycanın bu dilbər guşəsi yenidən öz gözəlliyinə qovuşacaqdır. Respublika Ağsaqqallar Şurası da böyük ruh yüksəkliyi ilə həmin bölgələrdə öz fəaliyyətini bərpa edəcəkdir. Tahir Süleymanov onu da vurğulayıb ki, hal-hazırda millət vəkili, professor Eldar Quliyevin sədrliyi ilə Azərbaycan Ağsaqqallar Şurasının fəaliyyətində ciddi aktivlik müşahidə olunur.

Sonra təşkilati məsələlər müzakirə edilərək Şabran Rayon Ağsaqqallar Şurasının yeni Əsasnaməsi açıq səsvermə yolu ilə qəbul olunub.

Həmçinin Rayon Ağsaqqallar Şurasının sədri, o cümlədən İdarə Heyətinin və Təftiş Komissiyasının üzvləri seçiliblər.

Sonda yenidən Şabran Rayon Ağsaqqallar Şurasının sədri seçilmış Bəhlul Abbasov və yeni üzvlər onlara göstərilmiş yüksək etimada görə tədbir iştirakçılarına öz minnətdarlıqlarını bildirərək, bu etimadı doğrultmaq üçün əllərindən gələni əsirgəməyəcəklərinə söz veriblər.

Bu gün Şabran şəhər T.Abbasov adına məktəbin əbədiyaşar şəhidi Ağaquliyev İlkin Saməddin oğlunun əziz xatirəsini əbədiləşdirmək məqsədilə tikilən BULAĞIN açılışı olub.

Avrasiya.net xəbər verir ki, tədbirdə İcra Hakimiyyətinin nümayəndələri, məktəbin pedaqoji kollektivi, şəhidin valideynləri və qohumları iştirak ediblər.

Bulağın açılışını şəhidin atası Samaddin Ağaquliyev və rayonun qazisi Bayramzadə Sabit Arif oğlu edib.

Xatırladaq ki, Ağaquliyev İlkin Saməddin oğlu 04 oktyabr 2000-ci ildə Şabran rayonunda anadan olub. 2017-ci ildə Şabran şəhər T.Abbasov adına 1 saylı tam orta məktəbi bitirib və Azərbaycan Dövlət Pedoqoji Universitetinin nəzdində Azərbaycan Dövlət Pedoqoji kollecinin Fiziki tərbiyə müəllimliyi ixtisası üzrə qəbul olub. Orta məktəbdə oxuduğu dğvrdə isə “Qarmon İxtisası” üzrə təhsil alıb. Həmin dövrlərdə Cüdo İdmna növü ilə də məşgül olub rayon və zona yarışlarında mükafatçı olubr. 08 oktyabr 2018-ci ldə hərbi xidmətə yollanıb. 2020-ci ilin aprel ayında həqiqi hərbi xidməti başa vurub. İkinci qarabag döyüşləri başlayandan Müdafiə Nazirliyinin Xüsusi Əməliyyatlar Taborunda kəşfiyyatçı-Pulemyotçu kimi döyüşlərə qatılıb. 16 Oktyabr 2020-ci ildə Suqovuşan yüksəklikliyində gedən döyüşlərdə şəhidlik zirvəsinə ucalıb. Ölümündən sonra “Suqovuşan” və “Vətən Ugrunda” medalları ilə təltif olunub.

Allah bütün şəhidlərimizə rəhmət eləsin! Torpaqlarımızın bütövlüyü uğrunda canından keçən bütün şəhidlərimizin ruhu qarşısında baş əyirik!

Azərbaycan Respublikasında koronavirus (COVID-19) infeksiyasına 2 192 yeni yoluxma faktı qeydə alınıb, 1 554 nəfər müalicə olunaraq sağalıb.

Nazirlər Kabineti yanında Operativ Qərargahdan Avrasiya.net-ə verilən məlumata görə, COVID-19 üçün götürülən analiz nümunələri müsbət çıxmış 33 nəfər vəfat edib.

Daxili İşlər naziri, general-polkovnik Vilayət Eyvazov polis polkovnik-leytenantını xidmətdən qovub.

Nazirin əmri ilə Gəncə şəhər Nizami Rayon Polis İdarəsi rəisinin şəxsi heyətlə iş üzrə köməkçisi, polis polkovnik-leytenantı Şükürov Siyavuş Bəylər oğlu orqandan xaric edilib.

S.Şükürovun xidmətdə yol verdiyi nöqsanlara görə daxili işlər orqanlarından xaric edildiyi bildirilir.

Hüquq-mühafizə orqanlarından məlumatı təsdiqləyiblər. (qafqazinfo.az)

Bakı Şəhər və rayonlarının icra hakimiyyətlərinin təşkilatçılığı ilə bu gün paytaxt ərazisində mövcud karantin rejiminin tələbləri çərçivəsində təmizliklə bağlı daxili iməcilik və geniş dezinfeksiya tədbirləri keçirilib.

Avrasiya.net-in xəbərinə görə, Bakı Şəhər İcra Hakimiyyətinin şöbə müdiri Coşqun Cəbrayılov jurnalistlərə açıqlamasında bildirib ki, iməcilik zamanı Bakının kommunal və digər xidmətləri tərəfindən şəhərdə prospekt və küçələr, səkilərin kənarları, bordürlər və işıq dirəkləri, yol kənarındakı məhəccərlər və köşklər yuyulur.

İcra qurumlarının tövsiyələrinə uyğun olaraq, küçə və prospektlərdə yerləşən mağaza, ictimai iaşə və digər obyektlərin əməkdaşları öz obyektlərinin fasad və vitrinlərinin yuyulması, onların qarşısında səliqə-sahman yaradılması işlərində yaxından iştirak ediblər.

Təmizlik işləri çərçivəsində Bakı Şəhər İcra Hakimiyyətinin inzibati binası da daxil olmaqla, paytaxtdakı idarə və təşkilatların inzibati binalarının fasadlarının təmizlənməsi, Bakı Funikulyoru, müxtəlif turizm və gəzinti obyektlərinin də yuyulub təmizlənməsi işləri aparılır.

Bakı Şəhər Yaşıllaşdırma Təsərrüfatı Birliyinin əməkdaşları tərəfindən əsas magistral yol və prospektlərin kənarlarındakı ağacların üzərinə toplanan toz-torpaq təmizlənir, onların dibi yumşaldılır. Şəhər ərazisində Abşeronun iqliminə uyğun yeni ağaclar, kollar əkilir, mövcud ağaclara və yaşıllıq sahələrinə aqrotexniki qulluq göstərilir, təbii gübrələr verilir. Həmçinin ağacların qurumuş budaqlarının budanması, yaşıllıq zolaqları və parklarda qazon örtüyünün yenilənməsi işləri aparılır. Bu işlər mövsüm ərzində davam etdiriləcək.

Eyni zamanda, Bakı Şəhər İcra Hakimiyyəti tərəfindən paytaxtda koronavirus (COVID-19) pandemiyası ilə mübarizə tədbirləri çərçivəsində cari ildə üçüncü, pandemiyanın əvvəlindən isə 21-ci dəfə geniş dezinfeksiya tədbirləri həyata keçirilib.

Bakı Şəhər İcra Hakimiyyətinin kommunal təsərrüfat xidmətlərinin texnikası əsas küçə və prospektlərin dezinfeksiyasını aparıb, xidmət əməkdaşları tərəfindən balansda olan yaşayış binalarında, lift kabinələrində, həyət və yaşayış məhəllələrində, buradakı idman-əyləncə qurğularında, məişət tullantılarının atıldığı konteyner meydançalarında tibbi-profilaktik, dezinfeksiyaedici tədbirlər və əlavə təmizlik işləri görülüb.

İməcilik və dezinfeksiya tədbirləri gün ərzində paytaxtın bütün rayonlarında keçiriləcək və şəhərin təmizliyinin lazımi səviyyədə saxlanılması üçün bütün tədbirlər mütəmadi olaraq davam etdiriləcək.