Ləğv olunmuş Naxçıvan Dövlət Gömrük Komitəsinin keçmiş sədri Səhət Həbibəylinin həbs olunması xəbəri doğru deyil.

Avrasiya.net Bakupost.az-a istinadən xəbər verir ki, o, korrupsiya faktına görə açılan cinayət işi ilə bağlı hər gün dindirilsə də, saxlanılmayıb.

Qeyd olunur ki, onun rəhbərliyi dövründə külli miqdarda dövlət vəsaitinin mənimsənilməsi faktı aşkarlanb və sübut olunub.

Cinayət işini araşdıran təhqiqat qrupu Səhət Həbibbəylidən həmin vəsaitlərin hara xərclənməsi ilə bağlı hesabat tələb edib və ona bu məsələyə aydınlıq gətirməsi üçün vaxt veriblər.

Xatırladaq ki, Naxçıvanda aparılan genişmiqyaslı antikorrupsiya əməliyyatları zamanı bir neçə vəzifəli şəxs həbs olunub.

Səhət Həbibbəyli ilə bağlı isə ziddiyətli informasiyalar yayılmaqdadır.

Bu barədə jurnalistlər Səhhət Həbibbəylinin atası, AMEA Prezidenti İsa Həbbibəyliyə də sualla müraciət ediblər. O, oğlunun harada olması barədə heç bir məlumatı olmadığını bildirib.

“Mənim oğlumla, Naxçıvanda baş verənlərlə bağlı deməyə sözüm yoxdur. Hesab edirəm ki, övladla bağlı ataya sual verməyin özü etikaya sığmır. Bilmirəm, oğlum haradadır, xəbərim də yoxdur” - İsa Həbibbəyli jurnalistlərə bildirib.

Jurnalist İlkin Zərbəliyev vəfat edib.

Avrasiya.net xəbər verir ki, bu barədə onun yaxınları məlumat verib.

Qeyd edək ki, televiziya sahəsində fəaliyyət göstərən İlkin Zərbəliyev 1977-ci ildə Kürdəmirdə anadan olub. O, uzun illərdi ki, dağınıq skleroz xəstəliyindən əziyyət çəkirdi.

Həbsdə olan Biləsuvar Rayon İcra Hakimiyyətinin sabiq başçısı Mahir Quliyevin səhhəti pisləşib.

Avrasiya.net xəbər verir ki, bu barədə Qafqazinfo-ya onun vəkili Ceyhun Yusifov məlumat verib. Müdafiəçi qeyd edib ki, Mahir Quliyev həbs olunmamışdan 10 gün öncə kəskin infarkt keçirib: "Ürəyinə 3 ədəd stend qoyulub. Şəkərli diabet, ürək çatışmazlığı və hepatit C xəstəliyindən əziyyət çəkir. Həbsdə olduğu müddətdə koronavirusa yoluxub və 2 ay komada qalıb. Əlavə olaraq əməliyyat yoluyla boğazından dəlik açılıb trixastom aparatı qoyulub.

Bakıda Reabilitasiya Mərkəzində çənə sümüyünün cərrahi əməliyyatı olunub. Onkoloji şübhə olduğu üçün biopsiya alınıb. Hazırda vəziyyəti zəif və halsızdır. Təngnəfəslik, yüksək təzyiq, şəkər ve aşağı saturasiyayla xəstəxana şəraitində müalicələr alır”.

Qeyd edək ki, M.Quliyev 2020-ci il aprelin 29-da DTX-nin keçirdiyi əməliyyatla saxlanılıb. O, mənimsəmə və israf etmə, vəzifə səlahiyyətlərindən sui-istifadə, rüşvət alma və vəzifə saxtakarlığında ittiham olunub. Lənkəran Ağır Cinayətlər Məhkəməsinin hökmü ilə 11 il müddətinə azadlıqdan məhrum edilib. O, səhhəti ilə əlaqədar olaraq cəzaçəkmə müəssəsinə köçürülə bilməyib.

İşğaldan azad edilmiş ərazilərə qeyri-qanuni keçən iki yüksək vəzifəli şəxs işdən çıxarılıb. Manset.az-ın əldə etdiyi məlumata görə, Füzuli Rayon İcra Hakimiyyətinin Hüquq şöbəsinin müdiri Əliyev Qənimət Eldar oğlu və Sənədlərlə və vətəndaşların müraciətləri ilə iş şöbəsinin müdiri Niftəliyev Bayram Qiyas oğlu işğaldan azad edilmiş ərazilərə müvafiq icazə olmadan qanunsuz keçdiyi üçün vəzifələrindən azad olunublar.

Füzuli Rayon İcra Hakimiyyəti iki şöbə müdirinin işdən çıxarılmasını təsdiqləyiblər.

Dövlət Təhlükəsizliyi Xidmətinin (DTX) əməkdaşları Naxçıvan Muxtar Respublikasının Standartlaşdırma, Metrologiya və Patent üzrə Dövlət Komitəsində əməliyyat keçirib.

Avrasiya.net xəbər verir ki, bu barədə Axar.az-a əslən Naxçıvandan olan ekspert Heydər Oğuz bildirib.

Onun sözlərinə görə, komitənin bir neçə rəhbər şəxsi sorğuya çəkilib. İddialara görə, komitənin fəaliyyətində ciddi yeyintilər və saxtakarlıqlar aşkarlanıb.

Qeyd edək ki, Naxçıvan Muxtar Respublikasının Standartlaşdırma, Metrologiya və Patent üzrə Dövlət Komitəsinin sədri Bəxtiyar İsmayılovdur.

Azərbaycan Tibb Universitetinin (ATU) Rektoryanı Şurasının növbəti iclası keçirilib.

ATU-dan verilən xəbərə görə, toplantıda universitetin bəzi əcnəbi tələbələrinin davranışı ilə bağlı qərarlar qəbul edilib, onların ikisinin ali məktəbdən xaric olunmasına dair qərar verilib.

Qeyd edilib ki, ATU-nun 6 əcnəbi tələbəsi universitetdən kənar məkanda digər tələbələrə fiziki zorakılıq və şiddət tətbiq etməklə yanaşı, onları qorxudublar. Zorakılıq aktını video lentə alan tələbələr bu çəkilişi sosial şəbəkələrdə paylaşacaqları ilə digərlərini hədələyiblər. Faktla bağlı Nəsimi rayon polis bölməsində aparılan araşdırma zamanı iki əcnəbi tələbənin - Al Khawaldeh Mohammad Khev Ahmad və Abdullah Mohammaed Sahrinin tələbələrə güc tətbiq edərək, fiziki şiddət göstərdiyi təsdiqlənib.

ATU-nun Rektoryanı şurasının üzvlərinin qərarına əsasən, adı çəkilən 2 tələbə universitetdən xaric edilib, hadisədə iştirak digər 4 tələbənin (Mohamad Eihab Ahmed Aldakach, Al Jivondi MHD Nabil Khalid, Al Ali Aussesami, Hafez Mohammed Ali) isə şəxsi işinə qeyd etməklə onlara şiddətli töhmət verilib.

Rektor yanı şuranın müzakirə etdiyi digər məsələ ATU-nun II müalicə-profilaktika fakültəsinin 1-ci kurs tələbəsi Orxan Bəhmənlinin davranışı ilə bağlı olub. O.Bəhmənlinin noyabrın 17-də anatomiya fənni üzrə keçiriləcək aralıq imtahanlarının suallarının cavablarını əldə edərək digər tələbələr arasında yayıb və bununla da imtahanı pozması təsdiqlənib. Rektoryanı şuranın qərarına əsasən, O.Bəhmənlinin şəxsi işinə yazılmaqla şiddətli töhmət elan edilib.

Müdafiə Nazirliyinin həbsdə olan Maliyyə və Büdcə İdarəsinin sabiq rəisi, general-mayor Nizami Məmmədovun səhhəti pisləşib, müalicə müəssisəsinə yerləşdirilib.

Avrasiya.net xəbər verir ki, bu barədə Report-a onun vəkili Rəşad Mirmehdizadə məlumat verib.

O bildirib ki, N.Məmmədov Dövlət Təhlükəsizliyi Xidmətinin (DTX) təcridxanasından Ədliyyə Nazirliyinin Penitensiar Xidmətin müalicə müəssisəsinə köçürülüb.

Vəkilin sözlərinə görə, general-mayorun ürəyində problem yaranıb və hazırda həkim nəzarətindədir.

R.Mirmehdizadə deyib ki, hazırda cinayət işi üzrə ibtidai istintaqın davam edir, iş üzrə dövlətə dəymiş ziyanın əksər hissəsi ödənilib.

Qeyd edək ki, Müdafiə Nazirliyinin Maliyyə və Büdcə İdarəsinin keçmiş rəisi, general-mayor N.Məmmədov DTX tərəfindən saxlanılıb. Bakı Hərbi Məhkəməsinin qərarı ilə onun barəsində həbs qətimkan tədbiri seçilib.

N.Məmmədov 80 milyon manat mənimsəməkdə təqsirləndirilir.

21 noyabr 2022-ci il tarixində ADA Universitetində keçirilmiş “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda çıxış edən Azərbaycan Respublikasının Prezidenti İlham Əliyev cənabları ona ünvanlanmış çoxsaylı sualları cavablandırarkən Cənubi Azərbaycanda yaşayan soydaşlarımızın taleyindən narahatlığını dilə gətirərək onlara mesaj xarakteri daşıyan müraciət ünvanlamış və bildirmişdir ki, “35 milyondan artıq azərbaycanlımız tək deyil və sizin hüquqlarınızı öz hüquqları bilən Azərbaycan vardır”.

Cənab Prezident həmçinin qeyd etmişdir ki, “Mən başqa bir misal da gətirə bilərəm. Azərbaycanda 340 məktəbdə tədris rus dilində aparılır. Azərbaycanda 10 gürcü məktəbi var. Gürcüstanda 200-300 minə yaxın azərbaycanlı yaşasa da, burada 116 Azərbaycan məktəbi vardır. İranda erməni məktəbləri var, ancaq Azərbaycan məktəbləri yoxdur. Bu necə ola bilər? Kimsə desə ki, bu, başqasının işlərinə qarışmaqdır, biz bunu qəti şəkildə rədd edirik. Bu, başqasının işlərinə qarışmaq demək deyil. Azərbaycanın xarici siyasəti çox aydındır. Biz heç vaxt heç bir ölkənin daxili işlərinə qarışmırıq. Amma bu, bizimlə eyni etnik mənşəyə, eyni dilə və eyni dəyərlərə sahib olan cəmiyyətin bir hissəsidir. Biz buna axı necə biganə qala bilərik? Niyə məktəblərdə öz dillərini öyrənə bilmirlər? Bilirsiniz, onlar dili itirirlər. Problem ondadır, biz bu məsələni ona görə qaldırırıq ki, İranda azərbaycanlıların danışdığı Azərbaycan dili ədəbi komponentini itirir, məişət dilinə çevrilir. Bu məsələlərə baxılmalı və bu məsələ qaldırılmalıdır, həm də ona görə ki, bu, bizi narahat edir”.

Bu gün dünya azərbaycanlıları xoşbəxtdir ki, cənublu soydaşlarımızı düşünən və Arazın o tayı, bu tayı deməyən bir liderimiz vardır. Cənab Prezident öz çıxışında həmçinin hazırki İran rəhbərliyinə mesaj göndərərək bildirmişdir ki, biz inanırıq ki, İran hökuməti ermənipərəst siyasətindən əl çəkəcək və bölgədə sülhə və təhlükəsizliyə xələl gətirməyəcəkdir. Bundan əlavə onlar çalışmalıdırlar ki, azərbaycanlıların hisslərini və maraqlarını nəzərə almağın zəruriliyi barədə düşünsünlər. Qeyd etməliyik ki, mövcud İran hakimiyyətinin açıq şəkildə ermənipərəst siyasət yürütməsi nəticəsində Azərbaycana qarşı nifrət və təhdid dolu sözlər işlədilməkdədir. Bütün bunlarla yanaşı sərhədlərimizin yaxınlığında qonşu dövlət tərəfindən hərbi təlimlərin keçirilməsi isə bu təhdid siyasətinin açıq şəkildə nümayişi idi. Dövlətimizin başçısının da dəfələrlə vurğuladığı kimi Azərbaycan dövləti heç bir zaman qonşu dövlətlərlə münasibətlərin gərginləşməsinin tərəfdarı deyil. Bizim xarici siyasətimizin əsas prioritetlərindən biri bütün qonşularımızla sülh və dostluq münasibətlərində əlaqələrin qurulmasıdır. Eyni zamanda bütün dünya anlamalıdır ki, biz həmişə öz ləyaqətimizi, müstəqilliyimizi, həyat tərzimizi müdafiə edəcəyik və heç bir aktora öz standartlarını və iradəsini hökumətimizə və xalqımıza tətbiq etməyə imkan verməyəcəyik.

Xüsusi olaraq qeyd etməliyik ki, Azərbaycan çoxmillətli, çoxkonfessiyalı bir ölkədir. Bu gün İrandan fərqli olaraq Azərbaycanda bütün xalqların nümayəndələri rahat yaşayır, onların hüquqları və təhlükəsizliyi dövlət tərəfindən hərtərəfli təmin edilir. Məhz bunun nəticəsidir ki, heç vaxt Azərbaycanda milli, dini zəmində ayrı-seçkilik və ya hansısa qarşıdurma baş verməmişdir. Məhz Azərbaycan xalqına xas olan humanizm dəyərləri ölkəmizdə ayrı-ayrı etiqad və inanclara malik etnosların min illərlə əmin-amanlıq şəraitində yaşamasında mühüm rol oynamışdır.

Rəşad Rəhmanov
Siyəzən şəhər 2 saylı tam orta məktəbin direktoru

Böyük Britaniya və Şimali İrlandiya Birləşmiş Krallığının ölkəmizdəki fövqəladə və səlahiyyətli səfiri Fergus Auldun, BP-nin vitse-prezidenti Bəxtiyar Aslanbəyli, “British Council” təşkilatının Azərbaycandakı nümayəndəliyinin direktoru Nərgiz Hacıyeva və təşkilatın digər əməkdaşları Gəncə şəhərinə səfərləri çərçivəsində Azərbaycan Dövlət Aqrar Universitetində (ADAU) olublar.

Avrasiya.net xəbər verir ki, qonaqlarla görüşən Universitetin rektoru vəzifəsini icra edən Zəfər Qurbanov ADAU-nun maddi-texniki bazası, beynəlxalq əlaqələri və ikili diplom proqramları haqqında məlumat verib. Z. Qurbanov deyib ki, Aqrar Universitet professor-müəllim və tələbə heyətinin dil biliklərinin artırılması istiqamətində “British Council” təşkilatı ilə birgə əməkdaşlıq etməkdə maraqlıdır.

Səfir Fergus Auldun Britaniyanın ali təhsil müəssisələri ilə Azərbaycan Dövlət Aqrar Universiteti arasında əməkdaşlıq əlaqələrinin qurulmasına dəstək olmağa hazır olduğunu deyib. Diplomat ADAU-nun tanınmış və qədim ənənələri sahib ali təhsil müəssisəsi olduğunu da bildirib.

Çıxış edən Bəxtiyar Aslanbəyli BP-nin həyata keçirdiyi layihələr və proqramlar haqqında məlumat verərək ADAU ilə birgə layihələrin həyata keçirilməsi üçün təkliflər verib.

Sonra birgə qarşılıqlı əməkdaşlıq perspektivləri müzakirə olunub.

Görüşdən sonra qonaqlar Universitetin Aqronomluq tədris binasında yerləşən laboratoriyalarada baş çəkiblər.

Fərhad Abdullayevin sədrliyi ilə Azərbaycan Respublikası Konstitusiya Məhkəməsi Plenumunun növbəti iclası keçirilib.

Konstitusiya Məhkəməsinin mətbuat xidmətindən verilən məlumata görə, iclasda “Sosial müavinətlər haqqında” Azərbaycan Respublikası Qanununun 4.0.1.13-cü maddəsinin Azərbaycan Respublikası Konstitusiyasının 25-ci maddəsinin II və III hissələrinə, 38-ci maddəsinin I və III hissələrinə, 149-cu maddəsinin I və III hissələrinə uyğunluğunun yoxlanılmasına dair Azərbaycan Respublikasının İnsan hüquqları üzrə müvəkkilinin (ombudsmanın) sorğusu əsasında konstitusiya işinə baxılıb.

Konstitusiya Məhkəməsinin Plenumu iş üzrə hakim İ.Nəcəfovun məruzəsini, maraqlı subyektlərin nümayəndələri Azərbaycan Respublikasının İnsan hüquqları üzrə müvəkkili (ombudsman) Aparatının Elmi-analitik sektorunun müdiri M.Məmmədov və Azərbaycan Respublikası Milli Məclisi Aparatının Sosial qanunvericilik şöbəsinin müdiri A.Vəliyev, mütəxəssislər Azərbaycan Respublikası Əmək və Əhalinin Sosial Müdafiəsi Nazirliyi, Azərbaycan Respublikası Ali Məhkəməsinin İnzibati Kollegiyası və Azərbaycan Respublikası Ailə, Qadın və Uşaq Problemləri üzrə Dövlət Komitəsi tərəfindən təqdim edilmiş mülahizələri, ekspert Bakı Dövlət Universitetinin Hüquq fakültəsinin Əmək və ekologiya hüququ kafedrasının professoru, hüquq elmləri doktoru M.Əliyevin rəyini və iş materiallarını araşdırıb müzakirə edərək qərar qəbul edib.

Qərarda deyilir ki, “Sosial müavinətlər haqqında” Azərbaycan Respublikası Qanununun 4.0.1.13-cü maddəsində nəzərdə tutulan beşdən çox uşağı olan qadınlara müavinət təyin edilməsi müddəası Azərbaycan Respublikası Konstitusiyasının 38-ci maddəsinin I və III hissələri ilə ziddiyyət yaratmır.

Azərbaycan Respublikası Konstitusiyasının 25-ci maddəsinin II və III hissələrinə, 149-cu maddəsinin I və III hissələrinə uyğunlaşdırılması məqsədilə “Sosial müavinətlər haqqında” Azərbaycan Respublikası Qanununun 4.0.1.13-cü və 7.0.10-3-cü maddələrində beşdən çox uşağı təkbaşına böyüdən ataların da nəzərdə tutulması ilə bağlı qanunvericilikdə müvafiq dəyişikliklərin edilməsi Azərbaycan Respublikasının Milli Məclisinə tövsiyə edilsin.

Qərar dərc edildiyi gündən qüvvəyə minir, qətidir, heç bir orqan və ya şəxs tərəfindən ləğv oluna, dəyişdirilə, yaxud rəsmi təfsir edilə bilməz.