Ölkəmizə meymunçiçəyi ilə bağlı dərmanlar gətiriləcəkAzərbaycana meymunçiçəyi ilə bağlı testlər və dərmanlar gətiriləcək.

Avrasiya.net xəbər verir ki, bunu Report-a açıqlamasında səhiyyə naziri Teymur Musayev bildirib.

Onun sözlərinə görə, Azərbaycan səhiyyəsi istənilən epidemik və pandemik çağırışlara cavab verməyə hazırdır:

“Meymunçiçəyi ilə əlaqədar bütün lazımi qabaqlayıcı tədbirlər görülüb. Ümumdünya Səhiyyə Təşkilatı tərəfindən ölkəmizə bu günlərdə testlər gətiriləcək. Eyni zamanda meymunçiçəyinin müalicəsi üçün lazım olan və qeydiyyatdan keçmiş bütün dərman preparatları çox qısa müddətdə ölkəmizə gətiriləcək”.

Deputat veteranpulunun artırılmasını TƏKLİF ETDİ"Sosial müdafiə və təminat sahəsinə 3 milyarddan çox vəsait ayrılıb. Amma hazırda çoxlu müraciətlər, narazılıqlar var".

Avrasiya.net xəbər verir ki, bununla bağlı Milli Məclisin növbədənkənar sessiyasının bu gün keçirilən plenar iclasında deputat Tahir Kərimli məlumat verib.

O qeyd edib ki, həmin sahədə qənaət edilən vəsaitlər hesabına onların problemləri həll edilə bilər:

"Müharibə iştirakçılarına diqqət artırılmalıdır. Onlar şəhid olmayıbsa, yaralanmayıbsa, o demək deyil ki, diqqətdən kənar qalmalıdırlar. Müharibə iştirakçılarına verilən 80 manat veteranpulu azdır, artırmaq lazımdır".
SOCAR-a işə düzəltmək adı ilə... - Diqqətli olun!Son zamanlar Azərbaycan Respublikası Dövlət Neft Sirkətinin (SOCAR) adından istifadə edilərək maddi maraq qarşılığında hüquqi və fiziki şəxslərə fərdi və korporativ qaydada əməkdaşlıq, işə düzəltmə, investisiya yatırma imkanları və s. ilə bağlı müxtəlif təkliflər edilir.

SOCAR-dan verilən məlumata görə, müraciətlər əsasən sosial media platformaları, elektron ünvan və ya telefon zəngləri vasitəsi ilə həyata kecirilir.

"Bununla əlaqədar olaraq mənbəyi məlum olmayan və SOCAR-ın rəsmi mənbələrində əks olunmayan heç bir məlumata etibar etməməyinizi, bu kimi hallarla rastlaşarkən dərhal hüquq mühafizə orqanlarına müraciət etməyinizi, habelə həmin məlumatı SOCAR-ın [email protected] ünvanına göndərməyinizi təkidlə xahiş edirik!", - qurumdan bildirilib.

Həmçinin qeyd olunub ki, SOCAR-ın adından istifadə edərək dələduzluqla məşğul olanların şirkətə heç bir aidiyyəti yoxdur.

SOCAR onun adından istifadə edərək verilən vədlər üzrə heç bir məsuliyyət daşımır. SOCAR-da işə qəbul şirkətin müvafiq standartlarına və digər normativ sənədlərinə uyğun olaraq müsabiqə yolu ilə həyata kecirilir. SOCAR-ın müəssisə və təşkilatları tərəfindən təqdim olunan boş iş yerləri (vakansiyalar) yalnız şirkətin veb-saytının www.socar.az "karyera" bölməsinin "İşə qəbul" hissəsində elan olunur. Eyni zamanda SOCAR- ın vakansiyaları ilə bağlı məlumatlar "Linkedin" sosial şəbəkəsində mövcud olan "SOCAR Karyera" səhifəsində mütəmadi olaraq paylaşılır", - şirkətdən bildirilib.
“AzerGold” QSC-nin Müşahidə Şurasının iclası keçirilib“AzerGold” Qapalı Səhmdar Cəmiyyətinin (QSC) yeni tərkibdə formalaşdırılmış Müşahidə Şurasının ilk iclası keçirilib.

Müşahidə Şurasının yeni sədri Mətin Eynullayevin sədrliyi ilə keçirilən iclasda “AzerGold” QSC-nin fəaliyyəti ilə bağlı gündəliyə çıxarılan cari məsələlər, o cümlədən nizamnamə kapitalının artırılması, strateji inkişaf, maliyyə-investisiya, istehsalat və kadr məsələləri ilə bağlı müzakirələr aparılıb.

İclasda çıxış edən Müşahidə Şurasının sədri M.Eynullayev bildirib ki, dağ-mədən sahəsində ixtisaslaşmış dövlət şirkəti olan “AzerGold” QSC həyata keçirdiyi uğurlu və səmərəli fəaliyyət ilə ölkəmizin qeyri-neft sektorunun inkişafında, qeyri-neft ixracı potensialının artırılmasında önəmli rol oynayır.

M.Eynullayev Azərbaycan İnvestisiya Holdinqi tərəfindən qabaqcıl təcrübə və müasir idarəetmə tələbləri çərçivəsində Səhmdar Cəmiyyətin fəaliyyətində səmərəliliyin daha da artırılması, onun idarə edilməsinin müasir korporativ idarəetmə standartları nəzərə alınmaqla təkmilləşdirməsi istiqamətində görülən işlərin müsbət nəticələr verdiyini qeyd edib. O, Azərbaycan Respublikasının Prezidenti tərəfindən həyata keçirilən struktur islahatlarının məntiqi davamı olaraq ölkə iqtisadiyyatının müasir çağırışlara cavab verməsi məqsədi ilə yaradılan Azərbaycan İnvestisiya Holdinqi ilə QSC arasında fəaliyyətin qarşılıqlı əməkdaşlıq müstəvisində uğurla davam etdirildiyini diqqətə çatdırıb.

İclasda Azərbaycan Respublikası Prezidentinin müvafiq fərman və sərəncamlarından irəli gələn vəzifələrin icrasının təmin edilməsi məqsədilə həyata keçirilən tədbirlər nəzərdən keçirilib, gündəliyə çıxarılan məsələlərlə bağlı müvafiq qərarlar qəbul olunub.
Baş həkim istefa verdiRespublika Neyrocərahiyyə Xəstəxanasının baş həkimi Fərid Təqdirov işdən çıxıb.

Avrasiya.net xəbər verir ki, bu barədə o, rəsmi Feysbuk səhifəsində paylaşım edib.

"İki ilə yaxın Respublika Neyrocərahiyyə Xəstəxanasının baş həkimi vəzifəsində çalışdım. Bu şans və etimad üçün bütün TƏBİB və İTSDA rəhbərliyinə təşəkkürümü bildirirəm. Daha çox praktik cərrahiyyə ilə məşğul olmaq üçün istefa verdim. Bütün xəstəxananın kollektivinə uğurlar arzulayıram və mənimlə bu müddət ərzində işlədiklərinə görə minnətdarlığımı bildirirəm" - F.Təqdirov paylaşımda qeyd edib.
Ağsaqqallar Şurasının yerli təşkilatlarının Milli Qurtuluş Gününə həsr edilmiş tədbirləri keçirilibXəbər verdiyimiz kimi, Azərbaycan Ağsaqqallar Şurasının şəhər və rayon təşkilatlarının son birillik fəaliyyətləri ilə bağlı hesabat konfransları keçirilir.
Milli Qurtuluş Gününə həsr edilmiş növbəti tədbirlər Azərbaycan Ağsaqqallar Şurasının sədr müavini Bayram Yusifovun iştirakı ilə iyun ayının 14-də Gədəbəy və Ağstafa rayonlarında təşkil olunub. Bu toplantılarda Gədəbəy Rayon İcra Hakimiyyətinin başçısının səlahiyyətlərini icra edən Natiq Nağıyev, Ağstafa Rayon İcra Hakimiyyətinin başçısı Seymur Orucov, Milli Məclisin deputatı, akademik Nizami Cəfərov, Azərbaycan Ağsaqqallar Şurasının mətbuat katibi Rafiq Rzayev, rayon ağsaqqalları, şəhid ailələrinin üzvləri, qazilər, rayon idarə və təşkilatlarının rəhbərləri, digər ictimaiyyət nümayəndələri iştirak ediblər.

Tədbir iştirakçıları əvvəlcə xalqımızın ümummilli lideri Heydər Əliyevin abidəsi önünə gül dəstələri qoyaraq, Azərbaycanın xilaskarı, memarı və qurucusunun əziz xatirəsinə dərin ehtiramlarını bildiriblər.

Konfranslarda müqəddəs torpaqlarımızın azadlığı, Vətənimizin ərazi bütövlüyü uğrunda canlarından keçmiş şəhidlərimizin və hesabat dövründə dünyasını dəyişmiş ağsaqqalların xatirəsi bir dəqiqəlik sükutla yad edilib. Sonra çıxış edən hər iki rayonun İcra Hakimiyyətlərinin rəhbərləri Azərbaycan Ağsaqqallar Şurasının sədr müavini Bayram Yusifovu və tədbir iştirakçılarını salamlayaraq, onları 15 İyun – Milli Qurtuluş Günü münasibətilə təbrik ediblər. 1993-cü ilin iyun ayında ulu öndər Heydər Əliyevin siyasi hakimiyyətə qayıdışının əhəmiyyətindən, ölkəmizin parçalanma və vətəndaş müharibəsi təhlükəsindən xilas edilməsindən, bütün sahələrdə aparılan mühüm islahatlardan bəhs edən natiqlər Ümummilli Liderin layiqli davamçısı Azərbaycan Respublikasının Prezidenti cənab İlham Əliyevin rəhbərliyi altında həyata keçirilən inkişaf prosesindən danışıblar. Öz çıxışlarında ağsaqqalların rayonun ictimai-mədəni həyatındakı önəmli fəaliyyətlərinin, gənclərlə apardıqları maarifləndirici tədbirlərin əhəmiyyətini vurğulayan Natiq Nağıyev və Seymur Orucov onlara gələcək işlərində uğurlar arzulayıblar.

Sonra Gədəbəy Rayon Ağsaqqallar Şurasının sədri Kərəm Məmmədovun və Ağstafa Rayon Ağsaqqallar Şurasının sədr müavini Cəmaləddin Rzayevin son birillik hesabat dövrü ərzində yerli təşkliatlarda aparılan işlər və qarşıda duran vəzifələr barədə məruzələri dinlənilib. Koronovirus pandemiyasına qarşı apardıqları təbliğat işlərindən, şəhid ailələrinə və qazilərə göstərdikləri diqqət və qayğıdan, gənclərə milli vətənpərvəlik ruhunun aşılanmasından, xüsusilə narkomaniyaya, erkən nikahlara, son dövrdə artmaqda olan boşanmalara qarşı həyata keçirdikləri maarifləndirici tədbirlərdən söz açıblar. Xalqımızın qurtuluşu missiyasını həyata keçirən ulu öndər Heydər Əliyevin ağsaqqallara verdiyi yüksək dəyərin Azərbaycan Respublikasının Prezidenti cənab İlham Əliyev və Mehriban xanım Əliyeva tərəfindən böyük həssaslıqla davam etdirilməsindən bəhs ediblər. Gələcəkdə, koronovirus pandemiyasının zəiflədiyi bir dövrdə daha səmərəli və aktiv şəkildə fəaliyyət göstərəcəklərini bildiriblər.

Konfranslarda çıxış edən Azərbaycan Ağsaqqallar Şurasının sədr müavini Bayram Yusifov Şuranın sədri, Milli Məclisin deputatı, professor Eldar Quliyevin salamlarını tədbir iştirakçılarına çatdıraraq, hər bir kəsi Milli Qurtuluş Günü münasibətilə təbrik edib.

Ümummilli lider Heydər Əliyevin xalqımızın təkidli dəvəti ilə ikinci dəfə hakimiyyətə qayıdaraq xilaskarlıq missiyasını həyata keçirməsindən söz açan natiq məhv olmaq təhlükəsi qarşısında qalan ölkəmizin bütün problemlərinin Ulu Öndərin titanik fəaliyyəti sayəsində aradan qaldırılmasından, Azərbaycanının taleyini dəyişən bu önəmli tarixin – Milli Qurtuluş Gününün əhəmiyyətindən danışıb. Bayram müəllim ümummilli lider Heydər Əliyevin hakimiyyətə gəlişi ilə əsası qoyulan uzaqgörən və müdrik siyasətin Azərbaycan Respublikasının Prezidenti, müzəffər Ali Baş Komandan cənab İlham Əliyev tərəfindən müasir dövrün tələblərinə və reallıqlarına uyğun şəkildə uğurla davam etdirilməsindən, Vətən müharibəsində qazanılan möhtəşəm Qələbədən, şəhid ailələrinə göstərilən diqqət və qayğıdan, işğaldan azad edilmiş əzəli, əbədi torpaqlarımızda geniş vüsətlə aparılan abadlıq-quruculuq işlərindən, bir sözlə, qurtuluşdan tərəqqiyə böyük addımlarla irəliləyən ölkəmizin uğurlarından ətraflı bəhs edib.

Ümummilli lider Heydər Əliyevin qurucusu olduğu Azərbaycan dövlətinin ictimai-siyasi həyatında respublika ağsaqqallarının əhəmiyyətli rolundan danışan Bayram Yusifov onların hər zaman dövlətə, dövlətçiliyə, sabitliyə və inkişafa xidmət etdiklərini vurğulayıb. Qeyd edib ki, ağsaqqalın hər bir sözü, davranışı onun fəaliyyətidir və ağsaqqal nəsihəti, məsləhəti xalqımız üçün həmişə böyük dəyər kəsb edib. “Dahiləri kənarda axtarmamlıyıq” deyən natiq Azərbaycan, Türk millətinin böyük millət olduğunu, güclü tarixi şəxsiyyətlər yetişdirdiyini tədbir iştirakçılarına xatırladıb. O, ulu öndər Heydər Əliyevin “Azərbaycan dünyaya günəş kimi doğacaq” fikrini də yada salaraq bu gün Ümummilli Liderin layiqli davamçısı, dövlət başçısı cənab İlham Əliyevin respublikamızı regionun lider, dünyanın tanınan və qəbul edilən ölkəsinə çevirdiyini qürurla vurğulayıb və əlavə edib ki, bu gün biz böyük fəxrlə deyə bilərik: “Var millətimin imzası imzalar içində...”
Rayon təşkilatlarının fəaliyyətlərini təqdirəlayiq hesab edən Azərbaycan Ağsaqqallar Şurasının sədr müavini Bayram Yusifov onlara gələcək işlərində uğurlar arzulayıb və qeyd edib ki, əgər ağsaqqal yerindədirsə, hər şey öz qaydasında olacaqdır. Allah heç bir ailəni, eli, obanı, cəmiyyəti ağsaqqalsız etməsin.

Daha sonra çıxış edən Milli Məclisin deputatı, akademik Nizami Cəfərov, rayon ağsaqqalları, şəhid valideynləri, qazilər və digər natiqlər öz çıxışlarında qeyd ediblər ki, xalq arasında ağsaqqalların hər zaman böyük hörməti və nüfuzu olubdur. Ümummilli lider Heydər Əliyevin ağsaqqallara göstərdiyi yüksək qayğı və diqqətin bütün təzahürləri möhtərəm Prezidentimiz cənab İlham Əliyevin fəaliyyətində özünü aydın şəkildə göstərir. Habelə vurğulanıb ki, ölkəmizin hər bir regionunda olduğu kimi Gədəbəy və Ağstafa rayonlarında da Azərbaycanın tərəqqisi naminə həyata keçirilən bütün tədbirlərdə ağsaqqallar yaxından iştirak edərək, öz zəngin təcrübələrini və biliklərini əsirgəmirlər.

Səmimi şəraitdə keçən hər iki konfransda ağsaqqalların və rayon sakinlərinin müxtəlif məsələlərə dair bəzi təklif və iradları da dinlənilib və bu məsələlərlə bağlı müvafiq qurumlar tərəfindən lazımi tədbirlərin görüləcəyi qeyd olunub. Sonda yerli təşkilatlara yeni üzvlüyə qəbul edilən şəxslərə vəsiqələr, daha aktiv fəaliyyətləri ilə fərqlənən ağsaqqallara isə Fəxri fərmanlar təqdim edilib.

Azərbaycan Ağsaqqallar Şurasının sədr müavini Bayram Yusifov səfər çərçivəsində yerli təşkilatların iş otaqları, yaradılan şəraitləri və göstərdikləri fəaliyyətlə yaxından tanış olaraq öz məsləhət və tövsiyələrini verib. Tədbir iştirakçıları, həmçinin, Azərbaycanın Milli Qəhrəmanı, Qarabağ müharibəsi şəhidi Məzahir Rüstəmovun Gədəbəyin mərkəzində ucaldılan tunc abidəsini ziyarət edərək önünə gül dəstələri qoyublar, xatirəsini ehtiamla yad ediblər. Qeyd edək ki, Məzahir Rüstəmovun atası, Azərbaycan Respublikası Baş nazirinin keçmiş müavini, professor İzzət Rüstəmov hazırda Xətai Rayon Ağsaqqallar Şurasının sədri kimi fəaliyyət göstərir.




"AzerGold” QSC-də Milli Qurtuluş Günü qeyd olundu"AzerGold" Qapalı Səhmdar Cəmiyyətində (QSC) 15 İyun – Azərbaycan xalqının Milli Qurtuluş Günü münasibətilə tədbir keçirilib.

Tədbirdə "AzerGold" QSC-nin İdarə Heyətinin sədri Zakir İbrahimov, Milli Məclisin sədrinin birinci müavini Əli Hüseynli və Səhmdar Cəmiyyətin əməkdaşları iştirak ediblər.

Tədbirdə çıxış edən QSC-nin İdarə Heyətinin sədri Z.İbrahimov və Milli Məclisin sədrinin birinci müavini Ə.Hüseynli Azərbaycan xalqının ümummilli lideri Heydər Əliyevin mənalı ömür yolu, zəngin, çoxşaxəli fəaliyyəti, xalqımızın taleyində, dövlətçiliyimizin qorunması və inkişafında əvəzsiz xidmətlərindən bəhs ediblər.

Z.İbrahimov bildirib ki, müasir Azərbaycan Respublikasının memarı və qurucusu olan ulu öndər öz mənalı, zəngin ömrünü bütövlükdə xalqına və dövlətinə həsr edib. İdarə Heyətinin sədri dahi şəxsiyyətin ötən əsrin 90-cı illərində müstəqilliyini yeni bərpa etmiş dövlətimizin keçirdiyi ağır siyasi və iqtisadi böhran şəraitində Azərbaycan xalqının təkidli çağırışı ilə siyasi hakimiyyətə qayıdaraq xilaskarlıq missiyasını öhdəsinə götürməsi, əsasını qoyduğu müdrik siyasət kursu ilə ölkəmizi tənəzzül vəziyyətindən çıxarması haqqında danışıb. Qədirbilən xalqımızın məhz bu tarixi Milli Qurtuluş Günü kimi qürurla qeyd etdiyini deyən Z.İbrahimov ulu öndərin ölkəmizə ikinci dəfə rəhbərliyi dövründə qısa müddət ərzində ictimai-siyasi sabitliyin bərpa edildiyini, demokratik, hüquqi və dünyəvi dövlət quruculuğu prosesinə başlanıldığını qeyd edib. Fenomenal şəxsiyyətin dövlətimiz və xalqımız qarşısında ən böyük xidmətlərindən biri kimi ərazi bütövlüyümüzün bərpası yönündə aparılan ardıcıl və sistemli fəaliyyəti qeyd edən Z.İbrahimov ümummilli liderin layiqli davamçısı cənab Prezident, müzəffər Ali Baş Komandan İlham Əliyevin yüksək sərkərdəlik məharəti və dəmir iradəsi ilə qazanılan şanlı Qarabağ zəfərinin məhz bu siyasətin məntiqi nəticəsi olduğunu bildirib.

Milli Məclisin sədrinin birinci müavini Ə.Hüseynli qeyd edib ki, ümummilli lider Heydər Əliyev Azərbaycanda ikinci dəfə siyasi hakimiyyətə gələndə ona tənəzzülə uğramış, çox ağır durumda olan ölkə miras qoyulmuşdu. O bildirib ki, ulu öndər son dərəcə mürəkkəb ictimai-siyasi vəziyyətə baxmayaraq öz müdrikliyi və fədakarlığı sayəsində ölkəmizi uçurumdan xilas edə bilib, dövlət müstəqilliyimizi yenidən itirmək təhlükəsinin qarşısını qətiyyətlə alıb.

Dahi şəxsiyyətin Azərbaycanda dövlət quruculuğu, qanunvericlik bazasının təkmilləşdirilməsi, konstitusiyanın qəbul edilməsi, ordu quruculuğu, neft strategiyası, iqtisadiyyatın inkişafı və digər sahələrdə həyata keçirdiyi çoxşaxəli fəaliyyətindən danışan Ə.Hüseynli ulu öndərin qurub yaratdığı müasir Azərbaycan dövlətinin sonrakı illərdə cənab Prezident İlham Əliyev tərəfindən daha da inkişaf etdirildiyini, ölkəmizin hərtərəfli gücləndiyini və Vətən müharibəsi zamanı düşmən üzərində qazanılan parlaq tarixi qələbə ilə öz qüdrətini bütün dünyaya nümayiş etdirdiyini diqqətə çatdırıb.

Tədbirdə, həmçinin Vətən müharibəsində canlarını qurban verən şəhidlərimizin, o cümlədən “AzerGold” QSC-nin qəhrəman əməkdaşları Muxtar Qasımlı və Rauf Əsgərovun əziz xatirələri ehtiramla yad edilib, Azərbaycan Dövlət Televiziyasının ərsəyə gətirdiyi “Heydər Əliyev və 44 günlük Zəfər yolu” sənədli filmi nümayiş olunub.
Bərdədə Milli Qurtuluş Günü ilə bağlı silsilə tədbirlər keçirilirBərdə Regional Mədəniyyət İdarəsinin bu istiqamətdə keçirdiyi növbəti tədbir Şəhid Xudayar Yusifzadənin evində olub.

Görüşdə Bərdə Regional Mədəniyyət İdarəsinin rəisi Vəsilə Möhsümova, Şəhid anaları və şəhid Fərahim Quliyev adına 2 nömrəli uşaq musiqi məktəbinin kollektivi iştirak etmişdir.

Görüşdə Bərdə Regional Mədəniyyət İdarəsinin rəisi Vəsilə Möhsümova qeyd edib ki, Azərbaycan xalqının taleyində böyük əhəmiyyət daşıyan elə günlər var ki, həmin günlərdə onun gələcək həyatını müəyyən edən mühüm başlanğıcların əsası qoyulub.

Belə günlərdən ən önəmlisi tariximizə qızıl hərflərlə yazılmış 15 İyun – Milli Qurtuluş Günüdür. İyunun 15-i xalqımız üçün əsl qurtuluş tarixidir. Bu tarixi yaradan isə Azərbaycanın müstəqilliyinin qorunub saxlanmasında, möhkəmlənməsində, inkişafında müstəsna rol oynayan, daim xalqına arxalanan Heydər Əliyevdir. Ulu öndər Heydər Əliyevin siyasi kursunu uğurla davam etdirən Prezident İlham Əliyevin siyasəti nəticəsində Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətinə çevrilib, ötən dövr ərzində möhtəşəm iqtisadi uğurlara imza atılıb.

O, həmçinin, qeyd etmişdir ki, Müzəffər Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi altında şanlı ordumuz cəmi 44 gün davam edən Vətən Müharibəsində düşməni məğlub etmişdir. Xalqımız “Dəmir Yumruq” ətrafında sıx birləşərək 30 illik vətən həsrətinə son qoymuş, bütün şəhidlərimizin qisasını döyüş meydanında almışdır.

Tədbirdə çıxış edən Şəhid anaları Vətən Müharibəsində Azərbaycanın əldə etdiyi şərəfli qələbədən, ordumuzun göstərdiyi şücaətlərdən danışmış, vətənimizin bütövlüyü uğrunda canlarını fəda edən igidlərimizin şəhadətin uca məqamın olduğunu qeyd etmiş, ölkəmizdə şəhid ailələrinə və qazilərə dövlət səviyyəsində diqqət və qayğının göstərildiyini vurğulayıblar.

Tədbir Bərdə şəhər şəhid Fərahim Quliyev adına 2 nömrəli uşaq musiqi məktəbinin vətənpərvərlik ruhunda hazırladığı musiqili kompozisiya ilə davam edib.


Qazilərimizi və dövlətimizi qorumalıyıqƏliməmməd Nuriyev
(Konstitusiya Araşdırmaları Fondunun rəhbəri)


Cəmiyyətimiz, dövlətimiz üçün ən təhlükəlisi həssas məsələlərdən istifadə edib, dövlət, cəmiyyətin bütövlüyünə təhlükə yaratmaq, ən başlıcası MİLLİ HƏMRƏYLİYİMİZİN əsaslarını, zəminlərini zədələyəcək addımlar, təşəbbüslərdir.

44 günlük Vətən müharibəsi iştirakçılarının, qazilərin qayğı ilə əhatə olunması sahəsində ölkədə aparılan böyük həcmli işləri bütün ictimaiyyət yaxşı görür və yüksək də qiymətləndirir.

Lakin olur ki, bəzən hansısa bir qrup qazinin narazılığının və kimlərinsə hökumətin qazilərlə bağlı apardığı işlərə kölgə salmaq üçün bundan sui-istifadə edərək cəmiyyətə yanlış fikirlər aşılamasının da şahidi oluruq.

Birincisi, heç kimdə şübhə yoxdur ki, dövlət, müvafiq dövlət orqanları tərəfindən 44 günlük Vətən Müharibəsi iştirakçılarına, qazilərə, veteranlara qayğı göstəririlir, onlar üçün sosial təminatlar sistemi yaradılıb.

Bu sosial təminatlar sisteminin işləməsi üçün müvafiq hüquqi prosedurlar işlənib, həmçinin mexanizmlər yaradılıb. Məsələn, müharibədən sonra dövlət başçısının göstərişi ilə şəhid ailələri, müharibə iştirakçıları Əmək və Əhalinin Sosial Müdafiəsi Nazirliyi (ƏƏSM) tərəfindən sosial dəstək paketi icra olunur.

Bu sosial dəstək paketi artıq 100 min şəxsi əhatə edib, 190 min xidmət göstərilib. Vətən müharibəsi şəhidlərinin ailə üzvləri və müharibə iştirakçılarından ibarət 93 min şəxsə proaktiv qaydada 104 min sosial ödəniş təyin olunub.

Müalicə müddəti başa çatan qazilərdən artıq 3 min qazimizə əlillik dərəcələri və avtomatik şəkildə sosial ödənişlər təyin olunub. 2021-ci ildə əvvəlki ildən 5 dəfə çox olmaqla 3 min mənzil və fərdi evin verilməsi proqramı icra olunub. Postmüharibə dövründə 3500, ümumilikdə ötən dövrdə 12500 şəhid ailəsi və müharibə əlili mənzil və fərdi evlə təmin edilib. Son 4 ildə də 1450-dək, ümumilikdə ötən dövrdə 7400 müharibə əlilinə minik avtomobili verilib.

Bu statistika açıqdır və əlçatandır, görülən işlərin miqyasını göstərir. Daha bir vacib istiqamət şəhid ailələri və qazilərin məşğulluğuna dəstək verilməsidir. ƏƏSMN artıq 12,1 mindən çox qazini və şəhid ailəsini aktiv məşğulluq proqramlarına cəlb edib. Onlardan 8 minə yaxın şəxs özünüməşğulluq proqramına cəlb olunub.

Bu rəqəmlər də göstərir ki, iş gedir, hüquqi baza yaradılıb, mexnizmlər hazırlanıb. Dövlət siyasətinin necə olması, necə həyata keçirilməsi ilə bağlı qərarlar verilir. Vahid əlaqələndirmə mərkəzləri şəhid ailələrinin üzvləri və müharibə iştirakçılarından ibarət 41 mindən çox şəxsə müxtəlif qurumlara aid 26 xidmət istiqaməti üzrə bir pəncərədən xidmətlər göstərib.

İkincisi, şəhid ailələri və qazilərin sosial, məşğulluq, reablitasiya, müalicə, psixoloji dəstək göstərilməsi məsələləri ilə əlaqədar daha çox iş görülməli olduğunu və hər bir qazinin də bu dəstəklə əhatə olunacağını da yaxşı bilirik.

Əlbəttə, heç kim hansısa qazinin ona olan münasibətdən narazı qalmaq, etiraz etmək haqqını ondan ala bilməz. Bu günlərə onların sayəsində gəldik, onların fədakarlığı, şücaəti bizi yaşadıb və yaşadır. Onlar bu dövlətin fədailərdir.

Bütün bunlarla yanaşı, onların öz canları, qanları ilə qoruduqları dövləti də müharibədən sonra hər şeydən, bütün məsələlərdən uca tutacağını, qoruyacağını gözləyirik. Onları anlamayanın ürəyi daşdan olsun gərək, yanlışla üzləşəndə necə sarsıntı keçirdiklərini gərək başa düşək, anlayaq. Onlar da gərək onların bir çox hallarda bilməyərəkdən yanlışlarının cəmiyyətdə üçün necə böyük sarsıntı yaratdığının fərqinə varalar.

Tələblər irəli sürmək, etiraz etməyin üsulu gərək elə seçilsin ki, müsbət nümunə yaratsın, bunun əksi dövləti, cəmiyyətin bütövlüyünü zədələyir. Onlara qarşı yanlış olsa belə, bu səhvin, təqsirin miqyasından asılı olmayaraq dövləti zədələyən, cəmiyyətimizdə qütbləşmə yaradan addımlar atıla bilməz.

Dövlət haqqında təlimində tarixin ən böyük mütəfəkkirlərindən Konfutsi ilk növbədə mərhəmət, ədalət, qarşılıqlı hörmət prinsipini, cəmiyyətdə, insanlar arasında isə hər üçün hən də öhdəlik olan rituallar, qaydaları önə çəkirdi. O, hesab edirdi ki, dövlət qanunlara tabe olduğu qədər, cəmiyyətdaxili münasibətlər də müəyyən qaydalara əsaslanmalıdır.

Konfutsiyə görə rituallar, qaydalar harmoniyanı qorumaqla, cəmiyyətin bütövlüyünü təmin edir və hər kəsin öhdəliyini müəyyən edir. “İnsanlar hüquqlarına necə həssaslıqla yanaşırlarsa, vəzifələrinə münasibətdə də o qədər cavabdeh olmalıdırlar” prinsipi isə müasir insan hüquqları nəzəriyyəsinin əsasını təşkil edir.

Hazırda doğurdan da cəmiyyətimiz, dövlətimiz üçün ən təhlükəlisi bu cür həssas məsələlərdən istifadə edib, dövlət, cəmiyyətin bütövlüyünə təhlükə yaratmaq, ən başlıcası MİLLİ HƏMRƏYLİYİMİZİN əsaslarını, zəminlərini zədələyəcək addımlar, təşəbbüslərdir. Tələblər irəli sürmək, etiraz etməyin üsulu gərək elə seçilsin ki, bu məsələlər nəzərə alınsın.

Əlbəttə, qazilərimiz var ki, onların problemləri, maddi çətinlikləri, onlarla bağlı həll olunmamış məslələr var.

Lakin görülən işlər, Prezidentin yanaşması, diqqəti onu deməyə əsas verir ki, qısa müddətə bu məsələlər həllini tapacaq, İkinci Qarabağ müharibəsi Azərbaycan təcrübəsində bir çox məsələlərə, xüsusən özünüdərk məsələlərinə münasibəti dəyişdi, tam əminəm ki, dövlətin öhdəliklərə və onların icrası ilə bağlı da yanaşma da müsbətə doğru dəyişib, icra məsələsində çətinliklər qaldığı müşahidə edilir. Yaxın perspektivdə bu çətinliklərin da aradan qalxacağı aşkar görünür.

Əsas vəzifəmiz qazilərimizi və dövlətimizi qorumaqdır!
Baş prokuror İran səfiri ilə görüşübİyunun 14-də Baş prokuror Kamran Əliyev İran İslam Respublikasının Azərbaycandakı Fövqəladə və Səlahiyyətli səfiri Seyid Abbas Musəvi ilə görüş keçirib.

Baş Prokurorluqdan verilən məlumata görə, Kamran Əliyev ölkədə Azərbaycan Prezidenti cənab İlham Əliyevin rəhbərliyi ilə prokurorluq orqanlarında həyata keçirilən islahatlar, müasir normativ-hüquqi bazanın yaradılması, beynəlxalq təcrübənin öyrənilməsi istiqamətində görülən işlər barədə ətraflı məlumat verib.

Həmçinin qədim tarixi, mədəni, dini münasibətlərə malik Azərbaycan-İran əlaqələrinin bugün də müsbət dinamika ilə inkişaf etdiyi qeyd edilib.
Səmimi qəbula görə təşəkkürünü bildirən səfir Seyid Abbas Musəvi ikitərəfli münasibətlərə toxunaraq Azərbaycanla əlaqələrin əhəmiyyətini və iki ölkə arasında münasibətlərin bütün sahələr üzrə dinamik inkişaf etdiyini bildirib.

Səfir ölkələrimizin hüquq mühafizə orqanları arasında mövcud olan ikitərəfli əməkdaşlıq əlaqələrinin daha da inkişaf etdirilməsinin əhəmiyyətini vurğulayıb.

Görüş zamanı tərəflər arasında cinayətkarlığın müxtəlif təzahürlərinə, o cümlədən narkotiklərin qanunsuz dövriyyəsinə qarşı mübarizə, cinayət işləri üzrə hüquqi yardım, ekstradisiya və məhkumların verilməsi məsələlərində işin səmərəliyinin artırılması, habelə mövcud münasibətlərin daha da inkişaf etdirilməsi məqsədilə ikitərəfli səfərlərin təşkil edilməsi ətrafında səmərəli müzakirələr keçirilib.

Cinayətkarlıqla mübarizə sahəsində Azərbaycan və İran hüquq mühafizə orqanlarının səylərinin məqsədyönlü şəkildə əlaqələndirilməsinin perspektivləri barədə fikir mübadiləsi aparılıb.