Qəzetlərin abunə və satışı elektron qaydada təşkil ediləcək“Qabaqcıl texnologiyaların media sahəsində geniş tətbiqi, həmçinin digər innovativ yeniliklərin sahədə yaratdığı ehtiyaclar və müşahidə edilən müasir tendensiyalar nəzərə alınaraq hazırlanan “E-köşk” elektron platforması rəqəmsal çap mediası məhsullarının abunə və satışının təşkil edildiyi proqram təminatıdır”.

Avrasiya.net xəbər verir ki, bunu Medianın İnkişafı Agentliyinin (MEDİA) İcraçı direktoru Əhməd İsmayılov “E-köşk” qəzet və jurnalların rəqəmsal yayım platformasının təqdimat mərasimində deyib.

Onun sözlərinə görə, platforma ənənəvi çap mediasını hər kəs üçün daha əlçatan edir, oxuculara mütəmadi olaraq yenilənən məlumat bazasından qəzet və jurnalları zaman və məkandan asılı olmadan əldə etmək imkanı yaradır:

“E-köşk” platforması vasitəsi ilə oxucular ölkədə baş verən yeniliklərdən daim xəbərdar olmaqla yanaşı, sərbəst şəkildə rəqəmsallaşdırılmış arxivdən faydalana bilərlər.

Həm çap mediası subyektlərinin, həm də oxucuların istifadəsinə verilən platforma qəzet və jurnalların abunə və satışının elektron formada həyata keçirilməsinə vasitəçilik etməklə əldə olunan gəlirin birbaşa media subyektlərinin bank hesablarına köçürülməsini təmin edir. Qiymətlər subyektlərin özləri tərəfindən sərbəst şəkildə müəyyənləşdirilir. Əlbəttə ki, ilkin dövrlərdə öz məhsullarını oxucularına ödənişsiz təqdim etməklə platformadan istifadənin təşviqi və biznes mənafeyinin gələcəyə yönəlik şəkildə icrası çap mediası subyektlərinin öz seçimidir və platforma bu yanaşmanı da dəstəkləyəcək”.

Qurum rəhbəri qeyd edib ki, yazılı medianın müasir simasının formalaşması yönündə MEDİA Agentliyinin konseptual yanaşması gələcəyə hesablanıb və bu kimi proseslər davamlı xarakter daşıyır:

“E-köşk” platformasını Azərbaycanın çap mediası tarixində sadəcə yenilik yox, eyni zamanda innovativ düşüncəyə əsaslanan əhəmiyyətli bir addım kimi dəyərləndirəcəyinizi düşünürük”.
Çap mediası çətinliklə üz-üzədirMedia sahəsində yeni konseptual baxış tələb olunur.

Avrasiya.net-in məlumatına görə, bunu noyabrın 24-də Medianın İnkişafı Agentliyinin təşkilatçılığı, Media Təhlil Mərkəzinin tərəfdaşlığı ilə “E-köşk” qəzet və jurnalların rəqəmsal yayım platformasının təqdimat mərasimi zamanı Prezident Administrasiyasının Qeyri-hökumət təşkilatları ilə iş və kommunikasiya şöbəsinin Kütləvi informasiya vasitələri ilə iş sektorunun müdiri Kamran Həsənov deyib.

O qeyd edib ki, müasir dövrdə çap mediası çətinliklərlə üzləşib.

“Azərbaycanda bu problem reklam və yayım məsələlərindədir. Ümumilikdə götürüləndə son dövr ərzində çap mediasında forma və məzmun baxımından dəyişikliklər var. Müasir dövrün güclü mediası rəqəmsal texnologiyalara uyğunlaşmalıdır”, - deyə K.Həsənov bildirib.

Qeyd edək ki, “E-köşk” platformasının yaradılma məqsədi çap mediasının ekoloji və iqtisadi dayanıqlılığını artırmaq, ənənəvi medianın rəqəmsallaşmasını təşviq etmək, informasiya cəmiyyətinə keçidi sürətləndirməkdir.
Sülhməramlıların olduğu əraziyə hərbi texnika daşınır – DTXNoyabrın 23-də Dövlət Təhlükəsizliyi Xidmətinin (DTX) Heydər Əliyev adına Akademiyasının “Şöhrət” muzeyində Azərbaycan Respublikasının Təhlükəsizlik Şurası Katibinin Xidmətinin təşkilatçılığı ilə “Vətən müharibəsinin təcrübələri” mövzusunda konfrans öz işinə başlayıb.

Bu barədə Təhlükəsizlik Şurasından məlumat verilib.

Bildirilib ki, tədbirdə Azərbaycan Respublikasının Təhlükəsizlik Şurasının katibi, general-polkovnik Ramil Usubov, Azərbaycan Respublikasının müdafiə naziri, general-polkovnik Zakir Həsənov, DTX-nin rəisinin birinci müavini, general-leytenant Ceyhun Şadlinski, Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinin rəisi, general-leytenant İlqar Musayev, Azərbaycan Respublikasının Strateji Obyektlərin Mühafizəsi Dövlət Agentliyinin rəisi, general-mayor İlqar Abbasov, hüquq-mühafizə və digər dövlət orqanlarının rəhbər əməkdaşları, Türkiyə Respublikasının Silahlı Qüvvələrinin Baş Qərargahının və Milli Təhlükəsizlik Şurası Baş Katibliyinin nümayəndələri iştirak etmişlər. Konfransın məqsədi Vətən müharibəsinin nəticələrinin təhlilinin və müharibədə qazanılmış hərbi təcrübənin aidiyyəti qurumlar arasında mübadiləsinin təmin olunmasıdır.

Əvvəlcə tədbir iştirakçıları Ümummilli Lider Heydər Əliyevin “Şöhrət” muzeyinin qarşısında ucaldılan abidəsini ziyarət etmiş, önünə gül dəstələri düzmüşlər.

Ulu Öndərin və ölkəmizin suverenliyi və ərazi bütövlüyü uğrunda həlak olmuş Vətən övladlarının əziz xatirəsi bir dəqiqəlik sükutla yad edilmişdir.

Öncə çıxış edən Təhlükəsizlik Şurasının katibi, general-polkovnik Ramil Usubov tədbirin təşkilində göstərdiyi dəstəyə görə DTX-nin rəhbərliyinə minnətdarlığını ifadə etmiş, bu mövzuda konfransın keçirilməsinin əhəmiyyətindən danışmışdır. O, Müzəffər Ali Baş Komandan cənab İlham Əliyevin qətiyyətli rəhbərliyi altında şanlı qələbəmizlə yekunlaşan 44 günlük Vətən müharibəsinin tariximizdə silinməz iz buraxdığını, bu müharibənin ordumuzun döyüş təcrübəsinin artırılmasında əvəzsiz rol oynadığını, hərbi əməliyyatların planlaşdırılması və aparılmasının xarici ölkələrin hərbi müəssisələrində öyrənildiyini diqqətə çatdırmışdır. General-polkovnik Ramil Usubov müharibənin nəticələrinin təhlilinin və əldə olunan təcrübənin milli təhlükəsizliyin etibarlı təminatı, silahlı qüvvələrimizin müdafiə qabiliyyətinin artırılmasında önəmli amil olduğunu bildirmişdir.

Daha sonra müdafiə naziri, general-polkovnik Zakir Həsənov çıxış edərək ölkə rəhbərinin tapşırığı əsasında, Vətən müharibəsindən sonra Azərbaycan Ordusunun hərbi potensialının artırılması yönümündə həyata keçirilən islahatlar, yeni hərbi birliklərin yaradılması, qarşıya qoyulmuş vəzifələrin operativ və çevik yerinə yetirilməsi üçün silahlı qüvvələrimizin şəxsi heyətinin hərbi təhsil səviyyəsinin yüksəldilməsi, müasir hərbi texnika və avadanlıqlarla təchiz olunması barədə məlumat vermişdir.

DTX-nin rəisinin birinci müavini, general-leytenant Ceyhun Şadlinski çıxışında qeyd etmişdir ki, iki ölkə arasında münasibətlərin normallaşdırılması istiqamətində görülən işlərə Ermənistandakı revanşist qüvvələrin hər vəchlə maneçilik törətməyə çalışması, bu ölkənin silahlanmaya və ordu quruculuğuna öz imkanlarından artıq maliyyə vəsaiti ayırması, müxtəlif xarici dövlətlərdən müasir silahlar və hərbi təyinatlı avadanlıqlar almağa cəhdlər göstərməsi, sülh müqaviləsinin imzalanmasını bütün mümkün vasitələrdən istifadə etməklə yubatmağa meyl etməsi narahatlıq doğuran məqamlardır. Həmçinin vurğulanmışdır ki, Rusiya sülhməramlı kontingentinin müvəqqəti yerləşdiyi Azərbaycan ərazisinə hərbi texnikaların daşınması, orada müxtəlif təxribat xarakterli tədbirlərin keçirilməsinə şərait yaradılması da xüsusilə diqqət çəkir. İran xüsusi xidmət orqanlarının Azərbaycana qarşı aktiv şəkildə həyata keçirdiyi kəşfiyyat-pozuculuq fəaliyyətindən də danışan natiq bu istiqamətdə görülən kəsərli tədbirlərdən söhbət açmışdır.

Xüsusi Rabitə və İnformasiya Təhlükəsizliyi Dövlət Xidmətinin rəisi, general-leytenant İlqar Musayev bildirmişdir ki, həm Vətən müharibəsi zamanı, həm də müharibədən sonrakı dövrdə məkrli qüvvələr tərəfindən respublikamızın informasiya təhlükəsizliyinə yönələn təhdidlərin və kiberhücumların qarşısının alınması, savaş dövründə hərbi obyektlərimizin xüsusi rabitə avadanlıqları ilə təminatı, radiostansiyaların işinin səmərəli təşkili üçün digər qurumlarla birgə lazımi tədbirlər görülmüşdür.

Konfrans öz işini noyabrın 25-dək hərbi təhlükəsizlik, səfərbərlik hazırlığı, strateji kommunikasiya, informasiya təhlükəsizliyi, kibertəhlükəsizlik, mülki müdafiə və digər aidiyyəti mövzular üzrə mühazirələr və panel müzakirələrlə davam etdirəcəkdir.
Kəlbəcər şəhərinin Baş planı bölgənin təbii gözəlliyini özündə ehtiva edir25 noyabr tarixi xalqımızın həyatında ən mühüm və sevindirici günlərdən biridir. Belə ki, həmin gün mənfur düşmənimizin 27 il ərzində işğal altında saxladığı Kəlbəcər rayonu azad edildi və üçrəngli dövlət bayrağımız Azərbaycanın ən dilbər guşələrindən biri olan Kəlbəcərdə də dalğalanmağa başladı. Tariximizin ən şərəfli səhifələrindən biri olan Vətən müharibəsində qazandığımız Zəfər ölkəmizin qüdrətini bütün dünyaya nümayiş etdirdi. Bu Qələbə nəticəsində xalqımız tarixi ədaləti bərpa etdi və 30 ilə yaxın bir müddətdə işğal altında saxlanılan əzəli torpaqlarımızı düşmən tapdağından azad etdi.

Bununla da biz Azərbaycanın öz torpağının və öz taleyinin sahibi olduğuna bütün dünya göstərdik. Müzəffər Ali Baş Komandan cənab İlham Əliyevin rəhbərlik etdiyi rəşadətli ordumuz tərəfindən şanlı tariximiz yazıldı. Müharibənin ilk saatlarından etibarən düşmənə sarsıdıcı zərbə vuran Rəşadətli ordumuz düşmənin müdafiə sistemini darmadağın etməklə torpaqlarımızı azad edərək xalqımızı sevindirdi. Məhz bu darmadağının nəticəsi olaraq düşmən müqaviməti dayandırdı və ağ bayraq qaldırmağa məcbur oldu. Döyüş meydanında əldə edilən parlaq qələbə siyasi müstəvidə də öz nəticəsini göstərdi. 10 noyabr 2020-ci il tarixdə imzalanan üçtərəfli Bəyanata əsasən Ermənistan işğal altında saxladığı Kəlbəcər, Ağdam və Laçın rayonlarını Azərbaycana qaytarmağa məcbur oldu.

Məhz bu Bəyanat əsasında işğal altında olan rayonlarımızdan biri olan doğma Kəlbəcər rayonu düşmən tapdağından azad edildi və 27 illik vətən, torpaq həsrətinə son qoyuldu. Qeyd etməliyik torpaqlarımızın azad edilməsi ilə nəticələnən Vətən müharibəsindən və Kəlbəcərin işğaldan azad olunmasından artıq iki il müddət ötüb. Ötən iki il ərzində görülmüş işlər və əldə edilən nəticələrə baxsaq əminliklə deyə bilərik ki, bütün bunlar Azərbaycanın gücünü və potensialını nümayiş etdirir. Erməni vandalları tərəfindən tamamilə dağıdılmış ərazilərə qısa müddət ərzində həyatı qaytarmaq, insanları qaytarmaq böyük potensialdan xəbər verir. Biz bütün gücləri səfərbər etmişik və edəcəyik ki, qısa müddət ərzində Kəlbəcəri və bütün başqa rayonlarımızı yenidən quraq, bərpa edək. Buna nail olmaq üçün hazırda azad olunmuş şəhərlərin baş planları hazırlanmış və bu istiqamətdə işlər planlı şəkildə icra edilməkdədir. Ərazisinə görə ölkəmizin ən böyük rayonu olan Kəlbəcər özünün gözəl təbiəti, əlverişli relyefi, zəngin təbii ehtiyatları ilə fərqlənir. Xüsusi olaraq qeyd etməliyik ki, Kəlbəcər şəhərinin Baş planı bölgənin təbii gözəlliyini özündə ehtiva edir.

Azərbaycan Respublikasının Prezidenti cənab İlham Əliyevin birbaşa nəzarəti altında işğaldan azad edilmiş torpaqlarda vahid konsepsiya və plan əsasında bərpa-quruculuq işlərinə başlanılıb. Hazırda azad edilmiş ərazilərdə görülən işlər, həyata keçirilən infrastruktur layihələr bütün regionun gələcək inkişafına hesablanmış tədbirlərdir. İşğaldan azad edilmiş ərazilərimizdə o, cümlədən Kəlbəcər rayonunda aparılan tikinti-quruculuq və yenidənqurma işləri bizlərdə böyük sevinc və qürur hissi yaşadır. Görülmüş genişmiqyaslı işlər bizə deməyə əsas verir ki, artıq erməni vandalizminə məruz qalmış torpaqlarımıza həyat yenidən qayıdır. İnanırıq ki, aparılan bərpa və quruculuq işləri qısa vaxt ərzində yekunlaşacaq, doğma torpaqlarından qaçqın və məcburi köçkün vəziyyətinə düşmüş soydaşlarımız tezliklə öz evlərinə qayıdacaqdır.

Rəşad Rəhmanov
Siyəzən şəhər 2 saylı tam orta məktəbin direktoru
“Yurd”un təşkilatçılığı ilə Vətən müharibəsinə həsr olunmuş bilik yarışı keçirilibQuba rayonunda, Azərbaycan Dövlət Pedaqoji Universitetinin Quba filialında Azərbaycan Respublikası Gənclər və İdman Nazirliyinin maliyyə yardımı ilə “Yurd” Gənclərin İntellektual İnkişafına Dəstək İctimai Birliyi tərəfindən “Qəhrəmanlarımızı tanıyaq və tanıdaq!” gənclər arasında vətənpərvərliyin təbliği adlı layihə çərçivəsində Vətən müharibəsinə həsr olunmuş Nə? Harada? Nə zaman? formatında bilik yarışı keçirilib.

Tədbirin rəsmi hissəsində çıxış edən layihə rəhbəri, təşkilatın sədri Ramin Mahmudov bu layihənin əsas məqsədinin gənclər arasında vətənpərvərlik tərbiyəsinin yüksəldilməsinə dəstək vermək olduğuni bildirib.

Tədbirdə qonaq qismində iştirak edən Quba Rayon Gənclər və İdman İdarəsinin rəis müavini Mənsur Ağayev, Azərbaycan Dövlət Pedaqoji Universitetinin Quba filialının direktor müavini Aysel Şeydayeva bu əhəmiyyətli tədbiri Quba rayonunda, ADPU-nun Quba filialında təhsil alan tələbə-gənclər üçün təşkil etdiklərinə görə təşkilatçılara təşəkkürlərini bildiriblər.
Rəsmi hissədən sonra keçirilən bilik yarışında ADPU Quba filialının müxtəlif ixxtisaslarında təhsil alan tələbə-gənclərdən ibarət 6 komanda mübarizə aparıb.

Yekunda “Big Bang” komandası birinci, “Sirius” komandası ikinci, “Difai” biliciləri isə üçüncü yeri tutub.
Qalib və mükafatçılar diplom, kubok və medallarla təltif edilib.

Tədbirdə iştirak edən hər bir şəxsə Xızı, Siyəzən, Şabran, Xaçmaz, Qusar və Quba rayonlarından olan 185 nəfər Vətən müharbəsi şəhidi haqqında hazırlanmış “Ölümü ilə ölümsüzləşənlər” adlı kitablar hədiyyə edilib.
Qeyd edək ki, layihə çərçivəsində bu günədək Siyəzən, Şabran, Qusar və Xaçmaz rayonlarında da yeniyetmə və gənclərin iştirakı ilə tədbirlər keçirilib. Növbəti tədbirin Quba məktəbliləri arasında keçirilməsi nəzərdə tutulub.

“Tarix yazan igidlərimiz" sənədli filminin təqdimatı yüksək səviyyədə keçirildi“Tarix yazan igidlərimiz" sənədli filminin ADPU-nun 2-ci korpusunda geniş təqdimatı keçirildi. Tanınmış ictimai xadim, şair puplisist Fəxrəddin Meydanlı tədbiri açaraq filmin bədii, fəlsəfi. ictimai əhəmiyyətindən danışdı. Şəhidlərimizin əziz xatirəsi bir dəqiqəlik sükutla anıldıqdan sonra filmin ssenari müəllifi Əkrəm Bəydəmirli və rejissoru Mübariz Nağıyev bu möhtəşəm yaradıcı işin bir çox zəruri məqamlarına nəzər saldılar.

Daha sonra 32 dəqiqəlik “Tarix yazan igidlərimiz"sənədli filmi nümayiş olundu.
Xatırladırıq ki, bu film Azərbaycan Respublikasının QHT-yə Dövlət Dəstəyi Agentliyinin vəsaiti ilə Sosial Rifah və Tədqiqatlar İctimai Birliyi “Zəfər tariximizin yaratdığı reallıqlar və müasir dövrün çağrışları” layihəsi çərçivəsində çəkilib.
Şəhidlərimizin əziz xatirəsinə ehtiramımızı bildirirək “Tarix yazan igidlərimiz" sənədli filmini yüksək səviyyədə ərsəyə gətirilib.

Gənclərin dünyagörüşünə, həyata baxışına bu, filmlər təsir etmək gücündədir. Bu baxımdan qəhrəmanlarımızın həyat yolu və döyüş anlarından bəhs edən filmi çəkmək strateji mahiyyət kəsb edir. Hər bir Şəhidimiz qəhrəmandır. Onların hər biri haqqında kitablar yazılmalı, filmlər çəkilməlidir.
44 günlük Vətən müharibəsində böyük fədakarlıq göstərən 18 yaşlı gəncimiz Həsənağa Şirvaninin, I və II Qarabağ müharibəsinin iştirakçısı baş leytenant Samir Şükürovun, XTQ-nin əfasənəvi döyüşçüsü, Şuşanın fatehlərindən biri gizir Samir Mehdiyevin həyat və döyüş yolundan bəhs edən “Tarix yazan igidlərimiz" sənədli filmi geniş auditoriya tərəfindən böyük coşquyla qarşılandı.

Tədbirdə 20 Yanvar İctimai Birliyinin sədr müavini, ehtiyatda olan polkovnik Hikmət Ağayev, Şəhid Samir Mehdiyevin anası Mahirə Mehdiyeva, I və II Qarabağ müharibəsinin iştirakçısı baş leytenant Samir Şükürovun həyat yoldaşı Zümrüd Şükürova, XTQ-nin əfasənəvi döyüşçülərindən biri, qazi Elçin Fətullayev və digərləri “Tarix yazan igidlərimiz” filmi haqqında fikir və mülahizələrini bildirdilər. Filmin təqdimatına dövlət qurumunun nümayəndələri, media təmsilçiləri, QHT sədrləri, Azərbaycan Dövlət Pedaqoji Universitetinin müəllim və çoxsaylı tələbələri qatılmışdı.

Ümumilikdə filmin təqdimatında iştirakçıların sayı 130-a yaxın olub.
Səbuhi Məmmədlinin səhhəti ilə bağlı rəsmi məlumatJurnalist Səbuhi Məmmədlinin səhhəti istər TƏBİB rəhbərliyinin, istərsə də indiyədək müalicə aldığı tibb müəssisələrinin administrativ və tibbi heyətinin diqqətində olub.

Avrasiya.net xəbər verir ki, bu barədə TƏBİB məlumat yayıb.

Qeyd olunub ki, indiyədək TƏBİB-in tabeliyindəki tibb müəssisələrində qeydə alınan xəstəlikləri üzrə müalicə kursu keçib.

Respublika Klinik Xəstəxanasında, akademik M.A.Topçubaşov adına Elmi Cərrahiyyə Mərkəzində, Nərimanov Tibb Mərkəzində, M. Cavadzadə adına Respublika Kliniki Uroloji Xəstəxanasında müalicələr alıb.

Təəssüf ki, onda şəkərli diabet, ürək çatışmazlığı, ağciyərin aşağı payında pnevmoniya, aşağı ətrafların qan damarı mənşəli ağırlaşmış xroniki xəstəliyi qeydə alınıb. Eləcə də xroniki böyrək çatışmazlığı xəstəliyi səbəbilə davamlı olaraq dializlə təmin edilir.

Hazırda onun müalicəsi A.Topçubaşov adına Elmi Cərrahiyyə Mərkəzində davam edir. Nəzərdə tutulan əməliyyatı üçün bu gün zəruri müayinə və analizlərdən keçib. Sağlamlıq vəziyyəti imkan verdiyi təqdirdə sabah əməliyyat olunması planlaşdırılır.

Dəyərli həmkarımıza şəfa diləyir və onu da qeyd etmək istəyirəm ki, çoxsaylı jurnalist həmkarlarımız, çalışdığı kollektiv, rəhbərliyi, Mətbuat Şurası, Medianın İnkişafı Agentliyi Səbuhi Məmmədlinin səhhəti ilə daim maraqlanır və tibb personalın nəzarəti altında onu ziyarət edirlər.
Milyarder Əhmədov hansı generalların səsini yazıb? - Adlar bəlli olduAzərbaycanlı milyarder, Rusiya Federasiya Şurasının keçmiş üzvü Fərhad Əhmədov ətrafında qalmaqal getdikcə daha ciddi xarakter almağa başlayır.

Əgər ilk günlər onun saxlanılması, obyektlərində axtarış aparılması və DTX tərəfindən dindirilməsi barədə söhbətlər gedirdisə, hazırda milyarderin ünvanına olduqca ciddi və konkret ittihamlar irəli sürülür.

Belə ki, o, hansısa biznes məsələsi və ya iqtisadi cinayətlərə görə deyil, daha ağır cinayətdə - Azərbaycanda Rusiyanın xeyrinə casusluq fəaliyyətində günahlandırılır. Qeyd olunur ki, Fərhad Əhmədov Azərbaycan Silahlı Qüvvələrində yüksək vəzifə tutan zabitlərin danışıqlarını gizli şəkildə qeydə aldırıb.

Bəs, Fərhad Əhmədov bu danışıqları necə lentə aldırıb? Söhbət hansı ali rütbəli sabitlərdən gedir?

Avrasiya.net Bakupost.az-a istinadən xəbər verir ki, Fərhad Əhmədovun Azərbaycan Silahlı Qüvvələrinin ali komandanlığı ilə əlaqəli informasiya şəbəkəsi yaratdığı bildirilir.

Onun yaxın keçmişdə Azərbaycanın ordu komandanlığında yüksək vəzifələrdə çalışmış aşağıdakı şəxslərin konfidensial danışıqlarının audioyazısını apardığı bildirilir:

1) Rövşən Əkbərov

1965-ci ildə anadan olub, general-leytenantdır. Naxçıvanski adına Əlahiddə Ümumqoşun Məktəbi, Kiyev Ali Ümumqoşun Komandanlıq Məktəbi, eləcə də Ukrayna Hərbi Akademiyasında təhsil alıb. Azərbaycan Silahlı Qüvvələrində sonuncu vəzifəsi 4-cü Bakı Korpusunun komandiri olub. 2011-ci ildən korpus komandiri olan Rövşən Əkbərov 2020-ci ildə vəzifədən uzaqlaşdırılıb. 2021-ci il martın 16-da həbs olunan general Əkbərov Ukrayna ərazisində iş adamı Elçin Əliyevi qətlə yetirməkdə ittiham olunub və həmin il oktyabrın 27-də 10 il həbs cəzası alıb.

2) Vahid Əliyev

1969-cu ildə anadan olub, general-leytenantdır. Naxçıvanski adına Əlahiddə Ümumqoşun Məktəbini və Andropov adına Leninqrad Hərbi-Siyasi Akademiyasını bitirib. 1990-1991-ci illərdə SSRİ Silahlı Qüvvələrinin Xüsusi təyinatlı alayında xidmət edib. 2002-2017-ci illərdə müdafiə məsələləri üzrə Azərbaycan prezidentinin köməkçisi, eyni zamanda 2012-ci ildən 2017-ci ilə qədər Prezident Administrasiyası rəhbərinin müavini vəzifəsində çalışıb.

3) Hikmət Həsənov

1975-ci ildə anadan olub, general-mayordur. İngilis, türk, fars və erməni dillərində sərbəst danışır. 2003-cü ildə Çin Xalq Respublikasının Xalq-Azadlıq ordusu Quru Qoşunları Akademiyasını fərqlənmə diplomu ilə bitirib. 2013-cü ildə Almaniyada NATO-nun əməliyyat planlaşdırılması kursunu başa vurub, həmçinin NATO-nun Əməliyyat Qərargahında təcrübə keçib. 28 dekabr 2014-cü ildə Azərbaycan Respublikası Silahlı Qüvvələrinin Birinci Ordu Korpusunun komandiri təyin edilib. 2016-cı ilin aprel ayında Qarabağda keçirilən hərbi əməliyyatlar zamanı Azərbaycan Respublikası Silahlı Qüvvələrinin bölmələrinə komandanlıq edib. 2020-ci ildə İkinci Qarabağ müharibəsində iştirak edib. 2021-ci il avqustun 3-də tutduğu vəzifədən uzaqlaşdırılıb.

4) Babək Samidli

1974-cü ildə anadan olub, polkovnik idi. Naxçıvanski adına Əlahiddə Ümumqoşun Məktəbini, 1997-ci ildə isə Türkiyə Quru Qoşunları Məktəbini bitirib. Türkiyə Silahlı Qüvvələrinin tərkibində hərbi təcrübə keçib. 2016-cı ilin aprel ayında Azərbaycan Respublikası Silahlı Qüvvələrinin Birinci Ordu Korpusunun Əməliyyat İdarəsinin rəisi vəzifəsində (H.Həsənovun komandanlığı altında) Qarabağda döyüş əməliyyatlarında və İkinci Qarabağ müharibəsində iştirak edib. 2020-ci ildə Birinci Ordu Korpusu komandirinin ideoloji iş və mənəvi-psixoloji təminat üzrə müavini təyin edilib. 23 noyabr 2020-ci ildə müharibə bitdikdən iki həftə sonra mina partlaması nəticəsində həlak olub.

Göründüyü kimi, sadalanan şəxslərdən 3-ü 2000-ci illərin sonuna qədər ölkənin ən elit hərbi təhsil ocağı sayılan Naxçıvanski adına Əlahiddə Ümumqoşun Məktəbini bitirib. Bundan əlavə onların hər biri xaricdə (Ukrayna, Rusiya, Çin, Türkiyə) əlavə hərbi təhsil alıb. Siyahıdakılardan 3 nəfər 2020-2021-ci ilə qədər yüksək ordu komandanlığının tərkibində olub.

Həmçinin sadalanan şəxslərlə İkinci Qarabağ müharibəsi başlayandan az sonra Silahlı Qüvvələrin Baş Qərargah rəisi vəzifəsindən uzaqlaşdırılan Nəcməddin Sadıqov arasında əlaqə olub.

N.Sadıqovun Rusiyanın adamı olması, ona qarşı rəsmi Moskvanın xeyrinə casusluq etməsi ittihamı hər kəsə bəllidir.

Rusiyalı milyarderin yüksək vəzifə tutan 3 general və 1 polkovnikin danışıqlarının audioyazısını aparması isə əlbəttə, hansısa biznes maraqlarından irəli gələ bilməz. Nəzərə alsaq ki, həmin zabitlər ordu rəhbərliyində yüksək vəzifə tutub və bir çox məxfi məlumatlara malik olublar, onda Əhmədovun əməlinin səbəbi ilə bağlı yalnız bir versiya irəli sürmək olar: Milyarder məxfi məlumatları digər ölkəyə - Rusiyaya ötürmək üçün əldə edib.
DTX-nın əməliyyat keçirdiyi Gömrük Komitəsinin sədri İsa Həbibbəylinin oğludur - FOTOXəbər verdiyimiz kimi, Dövlət Təhlükəsizliyi Xidməti (DTX) Naxçıvan Muxtar Respublikası Gömrük Komitəsində əməliyyat keçirib. Əməliyyat nəticəsində saxlanılanların olduğu bildirilir.

Naxçıvan Muxtar Respublikası Gömrük Komitəsinin sədri Azərbaycan Milli Elmlər Akademiyasının prezidenti, Milli Məclisin deputatı İsa Həbibbəylinin oğlu, general-leytenant Səhət Həbibbəylidir.

Səhət Həbibbəyli 2019-cu ilin mart ayında bu vəzifəyə təyinat alıb.

Qeyd edək ki, Dövlət Təhlükəsizliyi Xidmətində Naxçıvan gömrük rəsmilərinin milyonlarla dəyərində qaçaqmalçılıqda iştirakı və büdcə pullarının yeyintisi araşdırılır.
Bərdəli fermerlərə ekoloji təmiz məhsul istehsal etməyin faydaları təşviq olunubAzərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə Ekoloji İnformasiya İctimai Birliyi tərəfindən həyata keçirilən “Qarabağ İqtisadi Rayonunun fermerləri arasında ekoloji təmiz məhsul istehsalının təşviqi” layihəsinin icra planına uyğun olaraq Bərdə rayonunun fermerləri üçün seminar təşkil edilib.

Tədbirdə əvvəlcə Azərbaycanın ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad olunub.

Layihə rəhbəri Musa Muradlı bildirib ki, layihə çərçivəsində Ağcabədi, Ağdam, Bərdə, Tərtər rayonlarının hər birində 25 fermerə seminarların təşkili, fermerlər üçün ekoloji cəhətdən daha faydalı məhsulların təşviqi nəzərdə tutulub. Layihənin əhəmiyyətindən danışan M.Muradlı qeyd edib ki, qida təhlükəsizliyinin təmin olunmasında fermerlərin böyük rolu var. Ekoloji təmiz məhsul istehsalı günün ən aktual tələblərinə çevrildiyindən fermerlər keyfiyyətli, kimyəvi maddələrdən uzaq məhsulların yetişdirilməsinə daha çox önəm verməlidir.

Layihənin eksperti ekoloq, aqrar elmlər üzrə fəlsəfə doktoru Xosrov Musayev ekoloji təmiz məhsul haqqında əhatəli çıxış edib. Bildirib ki, sağlamlığın qorunması baxımından ekoloji təmiz kənd təsərrüfatı məhsullarının istehsalı genişləndirilməlidir. İstehsalçı istehlakçıların ekoloji təmiz məhsullarla təmin olunmasında özündə məsuliyyət hiss etməli, kimyəvi mineral gübrələrlə yetişdirilmiş məhsulları bazara çıxarmaqdan çəkinməlidir. Belə bir məsuliyyət fermerin vətəndaşlıq mövqeyində, vətənpərvərlik hissində özünü göstərməlidir.

Xosrov Musayev bildirib ki, Qarabağ bölgəsi işğaldan azad olunandan sonra Prezidentimizin rəhbərliyi ilə genişmiqyaslı quruculuq işlərinə başlanılıb. İri infrastruktur layihələri həyata keçirilir, yollar, hava limanları inşa olunur. Gələcəkdə turizmin inkişafı üçün hərtərəfli işlər görülür. Qarabağın tezliklə yerli əhali ilə yanaşı, xarici qonaqlar üçün də cazibəli məkana çevrilməsi uzaqda deyil. Bütün bunlar bölgəyə gələn qonaqların təmiz ekoloji məhsullarla təminatını aktual edib. Fermerlərimiz ekoloji təmiz məhsulların istehsalını genişləndirməklə həm sağlamlığa töhfə vermiş olar, həm də iqtisadi gəlirlərini artıra bilərlər.

Müzakirələrlə davam edən tədbirdə fermerləri maraqlandıran suallar cavablandırılıb.