"Yeni texnologiyaların tətbiq olunmasına çalışırıq, yeniliklərə açığıq"Azərbaycan su ehtiyatları az olan ölkələr siyahısına daxildir. Su resurslarının böyük əksəriyyəti ölkəmizdən kənarda formalaşır. Daxildə formalaşan suyun böyük bir hissəsi 30 il işğal altında qalmış Qarabağ torpaqlarımızda idi. Tərtər çayı Kürün, Həkəri çayı isə Arazın Azərbaycan daxilində ən çox sululuğa malik olan qolu hesab edilir və su mənbələri burada formalaşır.

Bu sözləri Publika.az-a açıqlamasında millət vəkili Sadiq Qurbanov deyib. O bildirib ki, son illərdə dünyada quraqlıq prosesi sürətlənib:

“Azərbaycanda da su qıtlığı problemi yaşandı. Son iki ildə bu, özünü daha çox göstərdi. Həm Kürün quruması, həm də çəkilməsi prosesi baş verirdi. Azərbaycanda bütün əkin sahələrində suvarma problemi yaranmışdı. Bununla bağlı cənab Prezident keçən il müşavirə keçirdi. Həmin müşavirədə problemləri qaldırdı və bu istiqamətdə görüləcək işləri diqqətə çatdırdı.

Su təsərrüfatının inkişafı üçün yeni texnologiyaların tətbiqi lazımdır. Suyumuz azdır, üstəlik də su itkiləri çoxdur. Suvarılma zamanı əksər hallarda 30, 40, 50, bəzi hallarda isə 60% su itkisinə yol verilirdi. Meliorasiya və su təsərrüfatı sahəsində çatışmazlıqların aradan qaldırılması, idarəetmədə müasir yanaşmanın, müasir texnologiyaların ölkəmizə gətirilməsi və tətbiq edilməsi artıq günün tələbidir. Dünyada baş verən quraqlıq proseslərinin fonunda Azərbaycanda da su və meliorasiya təsərrüfatına yeni baxış lazım idi. Cənab Prezidentin sözü ilə desək, yeni və müasir yanaşma tələb olunurdu. Ölkə başçısı Azərbaycan Meliorasiya və Su Təsərrüfatı Açıq Səhmdar Cəmiyyətininin sədri vəzifəsinə Zaur Mikayılovu təyin etdi və böyük ümidləri olduğunu xüsusi qeyd etdi”.

Millət vəkili qeyd edib ki, Azərbaycan su təsərrüfatı sahəsində bir çox yeniliklərə imza atmağa hazırlaşır:

“4-cü sənaye inqilabının regional mərkəzinin məhz Azərbaycanda yaradılması qarşıda duran əsas hədəflərdən biridir. Yeni texnologiyaların tətbiq olunmasına çalışırıq, yeniliklərə açığıq. Bu yeniliklər insanların xidmətində dayanacaq və dövlətin inkişafına gətirib çıxaracaq. Kiçik də olsa, yeni su anbarlarının tikilməsi planlaşdırılır. Bütün bunlar böyük vəsait tələb edən layihələrdir. Ümid edirəm ki, dövlətimizin gücü və siyasi iradəsi bu problemlərin həll olunmasına yetərlidir”.
Milyonlar mənimsəyən şirkət rəhbəri ilə bağlı - Rəsmi açıqlamaSahibkarlıq fəaliyyəti adı altında qanunsuz əməllər törədən vəzifəli şəxslər barəsində cinayət işi məhkəməyə göndərilib.

Bu barədə Avrasiya.net-ə Baş Prokurorluğun Mətbuat xidmətindən məlumat verilib.

Ölkəmizdə sahibkarlığın inkişafı sahəsində yaradılmış şəffaf və rəqabətqabiliyyətli mühitdən sui-istifadə etməklə vətəndaşların hüquqlarını pozan fiziki və hüquqi şəxslərə qarşı prokurorluq orqanları tərəfindən hüquqi tədbirlərin görülməsi davam etdirilir.

Belə tədbirlərdən biri kimi, Avangard Travel MMC-nin direktoru vəzifəsində işləmiş Yeganə Ələddin qızı Nağıyeva və həmin şirkətin təsisçisi Ədalət Tağı oğlu Nağıyevin vəzifə səlahiyyətlərinin icrası zamanı qanun pozuntularına yol vermələri barədə Baş Prokurorluğun rəsmi İnstaqram səhifəsində keçirilən “sual-cavab” sessiyası zamanı daxil olmuş çoxsaylı vətəndaş müraciəti əsasında Azərbaycan Respublikası Cinayət Məcəlləsinin müvafiq maddələri ilə başlanmış cinayət işi üzrə Baş prokuror yanında Korrupsiyaya qarşı Mübarizə Baş İdarəsində istintaq aparılıb.

Aparılmış istintaq-əməliyyat tədbirləri ilə qeyd olunan vəzifədə işləyərkən Yeganə Nağıyevanın əri Ədalət Nağıyev ilə birlikdə özlərini turizm sahəsində uzun müddət ərzində işləyən peşəkar şəxslər kimi təqdim edib birgə biznes fəaliyyəti quraraq yüksək gəlir əldə edəcəkləri barədə yalan vəd verilməsi yolu ilə ümumilikdə 16 şəxsə cəmi 2 milyon 583 min manat məbləğində ziyan vuraraq dələduzluq etmələrinə dair əsaslı şübhələr müəyyən edilib.

Bundan başqa, Yeganə Nağıyevanın Ədalət Nağıyev ilə qabaqcadan əlbir olaraq 2019-2020-ci illər ərzində ayrı-ayrı ölkələrə səyahət etmək üçün şirkətə müraciət edən ümumilikdə 73 vətəndaşı tur paketləri və aviabiletlərin guya adi və güzəştli şərtlərlə satışının həyata keçirilməsi adı ilə aldadaraq həmin şəxslərin cəmi 652 min manat məbləğində pul vəsaitini ələ keçirməsinə əsaslı şübhələr müəyyən edilib.

Habelə, Yeganə Nağıyevanın Ədalət Nağıyev ilə birlikdə 2020-ci ilin iyun ayında xarici ölkədən mobil telefonlar alıb ölkə ərazisində sataraq birgə qazanc əldə edəcəkləri adı ilə vətəndaşdan 6 min 900 manat məbləğdə pul vəsaitini alıb öz aralarında bölüb şəxsi ehtiyaclarına sərf edərək təkrarən dələduzluq etməsinə əsaslı şübhələr müəyyən edilib.

Qeyd edilən faktlarla bağlı hər iki şəxs Cinayət Məcəlləsinin 308.2-ci (vəzifə səlahiyyətlərindən sui-istifadə ağır nəticələrə səbəb olduqda) və 178.4 (xüsusilə külli miqdarda ziyan vurmaqla dələduzluq) maddələri ilə təqsirləndirilən şəxs qismində cəlb edilməklə Yeganə Nağıyeva barəsində məhkəmənin qərarı ilə həbs, Ədalət Nağıyev barəsində isə polisin nəzarəti altına vermə qətimkan tədbirləri seçilib, cinayət işinin ibtidai istintaqı tamamlanaraq baxılması üçün Bakı Ağır Cinayətlər məhkəməsinə göndərilib.

İbtidai istintaq dövründə vurulmuş ziyandan 902 min manat vəsaitin ödənilməsi təmin edilmiş, həmçinin məhkəmənin qərarı ilə təqsirləndirilən şəxs Ədalət Nağıyevə məxsus 203 min manat dəyərində daşınmaz əmlak üzərinə həbs qoyulub.

Eləcə də, hüquqi şəxs Avangard Travel MMC barəsində həmin məcəllənin 308.2-ci maddəsinə münasibətdə cinayət-hüquqi tədbirlərin tətbiq edilməsinə dair icraata başlanılıb.
“Mahmudovçu” generalların həbsinin sirriKeçmiş Milli Təhlükəsizlik Nazirliyinin (MTN) sərəncamında olan 2 general - nazirliyin İstintaq Baş İdarəsinin keçmiş rəisi Mövlan Şıxəliyev və Hərbi Əks-Kəşfiyyat Baş İdarəsinin keçmiş rəhbəri Nizami Şirinov Baş Prokurorluğun İstintaq İdarəsində araşdırılan cinayət işi üzrə məsuliyyətə cəlb olunublar. Generallar aprelin 5-də İstintaq İdarəsində dindiriləndən sonra barələrində həbs qərarı çıxarılması üçün Nəsimi Rayon Məhkəməsində aparılıblar. Hakim onların istintaq dövründə həbsdə saxlanması barədə prokurorun təqdimatını təmin edib. Hər 2 generalın barəsində həbs qətimkan tədbiri seçilib.

Həm Şıxəliyev, həm də Şirinov keçmiş milli təhlükəsizlik naziri Eldar Mahmudova yaxın şəxslər sayılırdı. 2015-ci ilin oktyabrında MTN-dəki məlum əməliyyatdan - Mahmudovun nazir postundan uzaqlaşdırılmasından, nazirliyin 20-yə qədər vəzifəlisinin, o cümlədən 5 generalın həbsindən sonra Mövlan Şıxəliyev və Nizami Şirinov da vəzifədən çıxarılmışdılar. MTN vəzifəlilərinin haqda cinayət işində özəlliklə Mövlan Şıxəliyevin adı çox hallanırdı. Zərərçəkmiş şəxslərin bir çoxu onunla bağlı ittiham xarakterli ifadələr veriblər. Bu səbəbdən Mövlan Şıxəliyev məhkəmədə şahid qismində də dindirilmişdi. Hətta məhkəmə 2017-ci ildə onunla bağlı araşdırma aparılması üçün xüsusi qərar da çıxarmışdı. Aylar illəri əvəzləsə də, Mövlan Şıxəliyev istintaqa cəlb olunmamışdı. Buna görə də əksəriyyət düşünürdü ki, “MTN işi” bitdi. Mahmudovçu generalların, nazirlərin bir qismi həbsdən qurtuldu... Lakin qəfildən 2 generalın qandallanması çoxlu suallar yaradır. Əcəba, bu simalar niyə indi həbs olundu? Bu həbslərin son zamanlar daxili siyasətdə baş verənlərlə, xüsusilə intim videoların yayılması ilə hansı bağlantıları var, ya da ola bilər? 65 ay sonra MTN işi təkrar niyə aktivləşsin? Eldar Mahmudov və onun çetesi mütləq və mütləq bir sıra hərəkətlər, sabotaj və dövləti qızdıran əməllər etməsəydilər, bu generallar həbsə atılmazdı. “5-ci kolon”a qarşı adekvat addımlar başladı, demək olarmı?

Avrasiya.net xəbər verir ki, təhlükəsizlik məsələləri üzrə ekspert İlham İsmayıl Musavat.com-a açıqlamasında həbs edilən hər 2 şəxsin açar fiqurları olduğunu bildirib:

“Nizami Şirinov MTN-də Hərbi Əks-Kəşfiyyat İdarəsinin, Mövlan Şıxəliyev isə İstintaq Baş İdarəsinin rəisi idi. Bu həbslər perspektivdə Eldar Mahmudovun həbsinə apara bilər. Azərbaycanda belə bir ənənə var, hətta zamanında tədbir görülməsə də, material toplanılıb saxlanılır. Biz bunu Rövşən Əkbərovun işində də gördük. Onu 20 il sonra Ukraynada törətdiyi cinayətə görə həbs etdilər. Eldar Mahmudovun da törətdiklərinə görə həbs ediləcəyini də istisna etmirəm”.

İlham İsmayıl deyir ki, Eldar Mahmudovun yaxın ətrafına daxil olan bu şəxslərin həbsi “5-ci kolon”la əlaqələndirənlər var:

“Ola bilər ki, bu adamların ”5-ci kolon"la əlaqələri olub. Amma bu əlaqələr daha çox pul əldə etmək, mənimsəməkdən ibarət olub. Bu adamlar daha çox orduda 2005-ci, 2007-ci və 2017-ci ildə baş verən cinayətlərə görə həbs ediliblər. Eldar Mahmudovun dövründə Nizami Şirinov orduya nəzarət edirdi. Onların orduda baş verənlərdən xəbəri olub. Sadəcə, pul alıb və ört-basdır ediblər. Orduda isə bu işlərin aparılmamasının nəticəsi olaraq cinayət tərkibli əməllərin baş verdiyi sonralar üzə çıxdı. Ona görə də əgər hərtərəfli istintaq işi aparılarsa, cəmiyyət yalnız dediyiniz adamların deyil, başqalarının da əməllərinin ifşasının şahidi ola bilər. Mövlan Şıxəliyevə gəlincə isə onu istintaqa cəlb etməyəndə 40-a yaxın DTX-iı müraciət edərək onun həbsini istəmişdi. Qeyd olunurdu ki, bu adam bütün işləri pulla görüb. Bu adamların “5-ci kolon”la əlaqələri də istisna olunmur. Ortada bir arzuolunmaz şəxs var, bu gün bunların əksəriyyəti onunla əlaqə qurmağa çalışırlar. İstədikləri də budur ki, həmin şəxsi üzərindən digər ölkənin gücündən istifadə etməklə hakimiyyətə gəlmək istəyirlər".

Qeyd edək ki, 2015-ci ilin oktyabrında MTN-dəki əməliyyat nəticəsində nazirliyin 21 vəzifəlisi cinayət məsuliyyətinə cəlb olunub. Onların arasında 5 general da vardı.
Bakıda 9 bağça koronavirusa görə BAĞLANIBHazırda Bakı şəhərindəki bütün dövlət uşaq bağçaları Nazirlər Kabineti yanında Operativ Qərargahın qərar və təlimatlarına uyğun mövcud vəziyyət nəzərə alınmaqla və müvafiq sanitar-gigiyenik normalara əməl edilməklə fəaliyyət göstərir.

Bu barədə Bakı Şəhər İcra Hakimiyyətindən (BŞİH) Avrasiya.net-ə verilən məlumatda bildirilib.

Rəsmi məlumata görə, bununla əlaqədar Bakı Şəhər İcra Hakimiyyətinin Məktəbəqədər Təhsil Müəssisələri və Uşaq Evləri İdarəsi tərəfindən müvafiq tədbirlər həyata keçirilir:

"Bağçalar tibbi maskalar, əlcəklər, hərarət ölçən aparatlar, dezinfeksiya məhlulları ilə tam təmin edilib. Otaqların havalandırılması və təlimata uyğun dezinfeksiyası üçün tədbirlər həyata keçirilir. Mətbəx və sanitariya qovşaqlarına diqqət artırılıb, burada mütəmadi dezinfeksiya işləri aparılır.

Hər bir bağçanın girişində xüsusi dezinfeksiyaedici məhlullar qoyulub. Hər gün bağçaya gələn işçi heyəti və uşaqların temperaturu ölçülür, tərbiyəçilər tez-tez valideynlərlə əlaqə saxlayırlar. Həftə sonu bütün bağçalarda tam dezinfeksiya işləri aparılır".

Bakı Şəhər İcra Hakimiyyətinin şöbə müdiri Elmin İmanov bildirib ki, bu gün Bakı Şəhər İcra Hakimiyyəti Təhsil Müəssisələri və Uşaq Evləri İdarəsinin tabeliyində 348 məktəbəqədər təhsil müəsisəsi var:

"Hazırda onların 330-u fəaliyyət göstərir. Yalnız 9 bağça koronavirusla səbəbilə bağlıdır.
Qeyd edilməlidir ki, son 9 il ərzində 169 məktəbəqədər təhsil müəssisəində əsaslı təmir, yenidənqurma və sökülərək yenidən tikinti işləri həyata keçirilib. 19 bağça sökülərək yenidən tikilib, 6 bağçanın həyətində yeni tədris korpusu inşa edilib, 7 yeni müəssisə yaradılıb.

Bu məktəbəqədər təhsil müəssisələrində 2177 qrupda 41074 uşaq təlim–tərbiyə alır və orada ümumilikdə 11781 nəfər əməkdaş fəaliyyət göstərir ki, onlardan 4578 nəfəri bu günə vaksinasiya prosesindən keçib və qısa müddət ərzində bütün işçilərin vaksinasiyası başa çatdırılacaq".
“İdeal” mağazalar şəbəkəsinin keçmiş sahibi həbs olundu“İdeal” mağazalar şəbəkəsinin keçmiş sahibi İlqar İsmayılov həbs olunub.

Avrasiya.net Unikal.org-a istinadla xəbər verir ki, bu barədə onun vəkili Gülnar Quluzadə məlumat verib.

O bildirib ki, İlqar İsmayılov Baş Prokurorluq yanında Korrupsiyaya qarşı Mübarizə İdarəsinin keçirdiyi əməliyyatla Cinayət Məcəlləsinin 179.3.2 və 308.2-ci maddələri ilə təqsirli bilinərək saxlanılıb.

İ. İsmayılov ötən gün Binəqədi Rayon Məhkməsində hakim qarşısında çıxarılıb və barəsində 1 ay 20 gün həbs qətimkan tədbiri seçilib.
Ölkədə vaksinasiya olunanların sayı açıqlandıSon sutkada Azərbaycanda yeni koronavirus (COVID-19) infeksiyasına qarşı 34 344 nəfər vaksinasiya olunub.

Avrasiya.net xəbər verir ki, bu barədə Nazirlər Kabineti yanında Operativ Qərargahdan məlumat yayıb.

Bildirilib ki, son sutkada birinci mərhələ üzrə 20 459, ikinci mərhələ üzrə vaksinasiya olunanların sayı isə 13 885 olub.
“Vikipediya”nın alman dili bölməsində Azərbaycanla bağlı məqalələr zənginləşdirilir“Qorduq” Vikipediya Metodik Klubunun təlimləri fəaliyyətini uğurla davam etdirir. Bir müddətdir ki, Alman-Azərbaycan Vikipediya Klubunun könüllüləri tərəfindən onlayn ensiklopediyanın alman dili bölməsində ölkəmizin tarixi, mədəniyyəti, memarlığı, görkəmli şəxsiyyətləri haqqında məqalələr yaradılır və yerləşdirilir.

Bu barədə AZƏRTAC-a “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk məlumat verib.

“Vətənpərvər və intellektual insanlardan ibarət komanda qısa müddət ərzində ortaya peşəkar iş qoyub. Könüllülər məqalələri etibarlı istinadlarla, mənbələrlə zənginləşdirirlər. Mövcud boşluqlar aşkar edilir və aradan qaldırılır. Klub Almaniyada yaşayan soydaşlarımızın təşəbbüsü ilə yaradılıb. Onlar, həmçinin “Vikipediya”nın alman dili bölməsində gedən müzakirələrdə iştirak edir, sualları cavablandırırlar. Klubun üzvləri bir müddətdir “Qorqud” Vikipediya Metodik Klubunun təşkil etdiyi onlayn “Vikipediya” təlimlərə də qatılırlar”, - deyə E.Eltürk bildirib.

Qeyd edək ki, “Qorqud” Vikipediya Metodik Klubu Milli Məclisin deputatı Elnur Allahverdiyevin təşəbbüsü ilə yaradılıb.

Müşahidə Şuraları müasir idarəçiliyin inkişaf platforması kimiAzərbaycanda həyata keçirilən struktur islahatlarının təməl fəlsəfəsini və hədəfini ölkə həyatının bütün sahələrində çevik, dinamik, dürüst, şəffaf, kollegial, müasir və yaradıcı idarəçiliyin tətbiqi təşkil edir.

Prezident İlham Əliyev Azərbaycan Meliorasiya və Su Təsərrüfatı Açıq Səhmdar Cəmiyyətinin sədri vəzifəsinə təyin olunan Zaur Mikayılovu videoformatda qəbulu zamanı islahatların mahiyyətini əks etdirən bu mühüm məqamlara bir daha aydınlıq gətirdi. Sitat: “...Hər bir yerdə müasir menecment olmalıdır, idarəetmə olmalıdır. Son vaxtlar apardığım kadr islahatları onu göstərir. Harada ki, müasir menecment, müasir idarəetmə, dürüstlük, təmizlik, vicdan varsa, orada nəticə də olacaqdır”.

Şübhəsiz ki, struktur islahatları çərçivəsində həyata keçirilən tədbirlərin, o cümlədən dövlət müəssisələrində Müşahidə Şuralarının yaradılmasının əsas məqsədi də, dövlət başçısının elan etdiyi idarəçilik keyfiyyətlərinə və prioritetlərə uyğun kadrların önə çıxarılması, müasir menecment, peşəkarlık, dürüstlük, təmizlik və vicdanın istisnasız dəyərləndirmə meyarına çevrilməsidir. Bu yanaşma təkcə ənənəvi, klassik məmur obrazının yenisi ilə əvəzlənməsi deyil, idarəçiliyin mahiyyətinin, fəlsəfəsinin dəyişməsi, tamamilə yeni və şəffaf münasibətlər sisteminin formalaşdırılması, qanunun aliliyinin, peşəkarlıq və mənəvi keyfiyyətlərin iç-içə olması, proseslərə vahid bir mexanizm kimi reaksiya verməsi və daxil olmasıdır.

Gözümüzün önündə Azərbaycan dövlətin və onun bütün subyektlərinin reformasiyası prosesi baş verir. Azərbaycan xalqına məxsus dəyərlər, milli dünyagörüşümüz və mədəniyyətimiz müasirliyin faydalı və inkişafa xidmət edən komponentləriylə çulğalaşır. Azərbaycan bayrağının rənglərində olduğu kimi... Müasirlik, inkişaf Azərbaycançılıq məfkurəsinin mərkəzini, ana xəttini, nütfəsini təşkil edir. Müasirlik, inkişaf, yeniliyə, tərəqqiyə meyllilik bizim genetik kodlarımızdan, dünyagörüşümüzdən, milli mədəniyyətimizdən qaynaqlanır. Biz bir xalq, toplum olaraq öz həyat fəlsəfəmizi yeniləşməkdə, müasirləşməkdə, inkişafda görürük. Bizim ən böyük düşmənimiz ətalət və durğunluqdur.

Qeyd edim ki, ölkəmizdə həyata keçirilən islahatların ən önəmli cəhətlərindən biri, onun konseptual əsaslara və real mexanizmlərə malik olmasıdır. Belə mexanizmlərdən biri də Azərbaycan İnvestisiya Holdinqidir. Holdinq dövlət müasisələrində müasir idarəçiliyin təmin edilməsi, səmərəliliyin artırılması üçün çoxsaylı komponentlərin bir arada yer aldığı unikal inkişaf platformasıdır.

Azərbaycan İnvestisiya Holdinqinin fəaliyyətinin əsas məqsədi onun idarəetməsinə verilən dövlət müəssisələrinin vahid prinsiplər əsasında idarə olunması, onların fəaliyyətinin təkmilləşdirilməsi, o cümlədən həyata keçirdikləri investisiya proqramlarının şəffaflığının və iqtisadi səmərəsinin yüksəldilməsi, rəqabət qabiliyyətinin artırılması, maliyyə sağlamlığının və dayanıqlılığının yaxşılaşdırılmasıdır.

Məlum olduğu kimi, Azərbaycan İnvestisiya Holdinqi onun idarəetməsinə verilmiş dövlət müəssisələrinin fəaliyyətinin effektivliyinin təmin edilməsi üçün ali idarəetmə orqanının səlahiyyətlərini Azərbaycan Respublikasının Prezidenti ilə razılaşdırmaqla həyata keçirir və dövlətin adından onları idarə edir.

Dövlət müəssisələrinin fəaliyyətinə effektiv nəzarət, onların hesabatlılığının və fəaliyyətinin şəffaflığının təmin edilməsi onlarda daxili idarəetmənin qanunvericiliyə və qabaqcıl korporativ idarəetmə prinsiplərinə uyğun qurulması ilə mümkündür.
Hər bir dövlət müəssisəsinin uğurlu fəaliyyəti ilk növbədə onun qabaqcıl korporativ idarəetmə standartlarına uyğun olaraq idarə edilməsi ilə şərtlənir, bu isə, əsasən onun təsisçisi olan dövlətlə fəaliyyətinə cari rəhbərliyi həyata keçirən icra orqanı arasında Müşahidə Şurasının fəaliyyət göstərməsi, həmçinin bu idarəetmə orqanları arasında dəqiq və işlək səlahiyyət bölgüsünün aparılması ilə təmin edilir.

Hər bir dövlət müəssisəsinin Müşahidə Şurası korporativ idarəetmə orqanlarının sırasında mərkəzi yer tutmaqla ona ümumi rəhbərliyi və nəzarəti həyata keçirir, strategiyasını müəyyənləşdirir, icra orqanının fəaliyyətini qiymətləndirir, lakin cari əməliyyat fəaliyyətini idarə etmir. Yəni dövlət müəssisəsinə müəyyən edilən strategiyanın müstəqil şəkildə həyata keçirlməsi üçün imkan yaradır.

Dövlət müəssisələrində hazırda aparılan struktur islahatları, onların fəaliyyətinə səmərəli və işlək nəzarət mexanizminin qurulmasını təmin edir, yeni yaradılan Müşahidə Şuraları dövlət müəssisələrinin fəaliyyəti ilə bağlı vacib qərarları təsdiqləyir, məsuliyyəti bölüşür, hesabatlılığı təmin edirlər.

Dövlət müəssisələrində yaradılan Müşahidə Şuralarının əsas məqsədləri – onların cari rəhbərliyinin fəaliyyətinin səmərəliliyinə nəzarətin təmin olunması, peşəkar yardım və dəstəyin göstərilməsi, həmçinin dövlətin tənzimləyici qismində olan funksiyalarının onun səhmdar (təsisçi, mülkiyyətçi) kimi funksiyalarından ayrılmasıdır.

Müşahidə Şuraları dövlət müəssisələrinin icra orqanları üzərində nəzarəti və strateji idarəetməni həyata keçirən, habelə dövlət müəssisələrinin fəaliyyəti ilə bağlı əsaslı, dəqiq, hərtərəfli və şəffaf qərarların qəbul olunmasını təmin edən orqan kimi çıxış edir.

Məlum olduğu kimi, indiyədək bir sıra dövlət müəssisələrinin fəaliyyəti ilə bağlı olan vacib qərarların böyük əksəriyyəti onların icra orqanları tərəfindən qəbul edilirdi. Müşahidə Şuralarının yaradılması ilə bu qərarların qəbul edilməsi zamanı səlahiyyət və məsuliyyət bölüşdürülür, təsisçi olan dövlətin maraqlarını təmin edəcək yeni model formalaşdırılır.
Aparılan struktur islahatları, xüsusilə, strateji rəhbərlik və nəzarəti həyata keçirəcək Müşahidə Şuralarının yaradılması və fəaliyyətinin təmin edilməsi dövlət müəssisələrinin fəaliyyətinin effektivliyinin və şəffaflığının təmin edilməsinə xidmət edir.

Dövlət müəssisələrində yeni yaradılan idarəetmə modeli (Müşahidə Şuralarının yaradılması, onların fəaliyyətinin təmin edilməsi və s.) dövlətin tənzimləyici və səhmdar (təsisçi, mülkiyyətçi) kimi funksiyalarının bölüşdürülməsi, qərarların qəbul edilməsi və icra olunmasına nəzarət üçün vahid məsuliyyət və maraqların toqquşmasının qarşısının alınması prinsiplərinə uyğundur.

Dövlət müəssisələrinin idarə edilməsində Azərbaycan İnvestisiya Holdinqinin rolu –dövlətin adından səhmdar (təsisçi, mülkiyyətçi) qismində onların idarə edilməsindən, korporativ idarəetmənin vahid standartlarının müəyyən edilməsindən, qərarların qəbul edilməsi zamanı dövlətin maraqlarını əks etdirən mövqenin müdafiə edilməsindən, vacib inkişaf məsələləri üzrə onların cari rəhbərliklərinə dəstəyin göstərilməsindən ibarətdir.

Bu isə öz növbəsində dövlət müəssisələrinin idarə edilməsində konkret hədəfə, nəticəyə hesablanmış fəaliyyətin həyata keçirilməsinə zəmin yaradır, səmərəliliyi artırır, yaradıcı, çevik və sağlam atmosferin formalaşmasını təmin edir.

Qəanətimə görə, Azərbaycan İnvestisiya Holdinqinin fəaliyyəti gələcəkdə özəl sektorun inkişafı üçün də nümunə rolunu oynaya bilər. Bəlkə də bu prosesin paralel olaraq aparılmasına ehtiyac var. Prezident İlham Əliyevin, yazının əvvəlində iqtibas gətirdiyim fikirləri - müasir menecment, müasir idarəetmə, dürüstlük, təmizlik və vicdan ölkə həyatının bütün sahələrinin, o cümlədən özəl sektorun inkişafı üçün də mühüm əhəmiyyətə malikdir. Və çalışdığı sahədən, sektordan asılı olmayaraq, hər bir Azərbaycan vətəndaşı özünü bu islahatların mərkəzində hiss etməli, islahatların ruhuna uyğun olaraq dəyişikliyə özündən başlamalıdır.

Elçin Mirzəbəyli
"Azərsu" əhalinin içməli su təchizatının yaxşılaşdırılması layihələrini davam etdirir“Azərsu” Açıq Səhmdar Cəmiyyəti Bakı şəhəri və ətraf qəsəbələrdə əhalinin içməli su təchizatının yaxşılaşdırılması məqsədilə layihələrin icrasını davam etdirir.

Qurumdan Avrasiya.net-ə verilən məlumata görə, Səhmdar Cəmiyyətin daxili imkanları hesabına Abşeron rayonunun Aşağı Güzdək qəsəbəsində əhalinin içməli su təchizatının yaxşılaşdırılması məqsədilə yeni layihənin icrasına başlanıb.
Abşeron rayonunun Aşağı Güzdək qəsəbəsində mərkəzləşdirilmiş su təchizatı sistemləri mövcud olmayıb. Qəsəbənin yalnız bir hissəsində əhali tərəfindən fərdi qaydada su xətləri çəkilib. Tikinti normalarına cavab verməyən həmin xətlər istismara yararsız vəziyyətdədir. İndiyədək Aşağı Güzdək qəsəbəsinə meliorasiya kanalından suvarma məqsədilə su verilib və sakinlər təsərrüfatda həmin sudan istifadə edib.

Qəsəbə sakinlərini dayanıqlı və keyfiyyətli içməli su ilə təmin etmək məqsədilə “Azərsu” Açıq Səhmdar Cəmiyyəti tərəfindən layihə hazırlanıb. Daxili imkanlar hesabına icra edilən layihənin birinci mərhələsində müxtəlif diametrli borularla 8 km içməli su şəbəkəsi inşa ediləcək. Bu mərhələ çərçivəsində 500 fərdi yaşayış evi və obyekt yeni şəbəkəyə qoşulacaq. Növbəti mərhələlərdə qəsəbənin digər hissələrndə yeni içməli su şəbəkəsi yaradılacaq. Ümumilikdə layihə çərçivəsində 25 km içməli su şəbəkəsi yaradılacaq və 1400 ev su ilə təmin olunacaq.

Layihəyə əsasən Aşağı Güzdək qəsəbəsi içməli su ilə Ceyranbatan Ultrasüzgəcli Sutəmizləyici Qurğular Kompleksi hesabına təmin olunacaq. Bu məqsədlə qəsəbənin yaxınlığından keçən magistral xətdən birləşmə verilərək 160 mm diametrli borularla 500 metr uzunluğunda magistral su xətti çəkiləcək. Bununla da qəsəbədəki fərdi xətlər ləğv olunacaq, eyni zamanda meliorasiya kanalından suyun verilişi dayandırılacaq. Layihənin icrası nəticəsində qəsəbə sakinləri yeni mənbə hesabına dayanıqlı və keyfiyyətli içməli su ilə təmin olunacaq.

Qeyd edək ki, “Azərsu” ASC-nin daxili imkanları hesabına hazırda Abşeron rayonu ilə yanaşı, Binəqədi, Səbail, Sabunçu, Suraxanı, Xəzər rayonlarında, həmçinin regionlarda Hacıqabul, Saatlı, Tovuz rayonlarının kənd və qəsəbələrində içməli su təchizatının yaxşılaşdırılması məqsədilə layihələrin icrası davam etdirilir.