Ermənistan tərəfinin Qarabağda – Cəbrayılda apardığı axtarış işləri nəticəsində daha 7 hərbçinin cəsəd qalıqları tapılıb.

Avrasiya.net xəbər verir ki, dünən Talış kəndi istiqamətində daha 2 nəfərin qalıqlarını da Azərbaycan tərəfi ermənilərə təhvil verib.

Erməni tərəfi hərbçi cəsədlərinin kimliyini müəyyənləşdirmək üçün məhkəmə tibbi ekspertizası təyin edəcək.

Ermənistan mətbuatının yazdığına görə, bu günə kimi Qarabağın işğaldan azad olunmuş ərazilərində aparılan axtarışlar nəticəsində 1539 nəfərin cəsədi tapılıb.

Azərbaycanda koronavirus (COVID-19) infeksiyasına 2 717 yeni yoluxma faktı qeydə alınıb, 1 341 nəfər müalicə olunaraq sağalıb.

Nazirlər Kabineti yanında Operativ Qərargahdan Avrasiya.net-ə verilən məlumata görə, COVID-19 üçün götürülən analiz nümunələri müsbət çıxmış 31 nəfər vəfat edib.

İndiyədək ölkədə ümumilikdə 279 181 nəfərin koronavirus infeksiyasına yoluxması faktı müəyyən edilib, onlardan 245 881 nəfər müalicə olunaraq sağalıb, 3811 nəfər vəfat edib, aktiv xəstə sayı 29489 nəfərdir

Bakı və Abşeron yarımadasında aprelin 9-dan 10-na keçən gecədən başlayaraq 12-dək şimal-qərb küləyinin əsəcəyi, 15-20, arabir 23-25 m/s, 10-u gün ərzində, 11-i gecə və səhər bəzi yerlərdə arabir 28 m/s-dək güclənəcəyi gözlənilir.

ETSN Milli Hidrometeorologiya Xidmətindən Avrasiya.net-ə verilən məlumata görə, Azərbaycanın əsasən şimal və qərb rayonlarında aprelin 10-u günün ikinci yarısından 12-si gündüzədək şimşək çaxacağı, fasilələrlə yağış yağacağı, bəzi yerlərdə intensiv olacağı, dolu düşəcəyi, yüksək dağlıq ərazilərdə qar yağacağı gözlənilir. Qərb küləyi əsəcək, arabir 18-23 m/s, 10-11-də ayrı-ayrı yerlərdə arabir 25-30 m/s-dək güclənəcək. Çaylarda sululuğun artacağı gözlənilir.

Azərbaycanda media işçilərinin vaksinasiyası Azərbaycan Mətbuat Şurasının binasıda baş tutacaq.

Avrasiya.net xəbər verir ki, bu barədə Trend-ə Mətbuat Şurasının sədri Əflatun Amaşov bildirib. O qeyd edib ki, jurnalistlərə Çinin "Sinovac Biotech" şirkətinin istehsal etdiyi "CoronaVAC" vaksini vurulacaq:

“Artıq iki gündür Azərbaycan Mətbuat Şurasına redaksiyalardan siyahılar daxil olur. Hazırda 150-dən çox müraciət daxil olub və qeydiyyata alınma prosesi davam etməkdədir. Qeydiyyata alınmada jurnalsitlərin adı, soyadı və mobil nömrəsi lazımdır. Media işçiləri vaksinasiyasına gəldikdə isə üzərlərində mütləq şəxsiyyət vəsiqələri olmalıdır”.

Ə.Amaşov bildirib ki, vaksinasiya prosesi mərhələli şəkildə davam edəcək:

“Təqribən gün ərzində 50 və daha çox şəxs vaksinasiya olunacaq”.

Deputat Siyavuş Novruzov ötən gün “Yeni Müsavat” qəzetinin internet televiziyasında yayımlanan müsahibəsi sosial şəbəkələrdə və mediada müzakirələrə səbəb olub.

Deputatın çıxışı və davranışına münasibət bildirən Ədalət Partiyasının sədr müavini Elxan Şükürlü fikirlərini daha kəskin ifadə edib.

Elxan Şükürlü S.Novruzovun həm hakim partiyanın sıralarından, həm də Milli Məclisdən qovulmalı olduğunu söyləyib:

“YAP-ın və Milli Məclisin təəssübünü çəkən, YAP-a və Milli Məclisə hörmət qoyulmasını istəyən ziyalı insanlar varsa, Naxçıvandakı 5 saylı Şahbuz-Babək Seçki Dairəsindən 20 ildir YAP-ın dəyişməz deputatı olan Siyavuş Novruzovun Müsavat TV-yə məlum müsahibəsindən sonra mütləq YAP-dan və Milli Məclisdən qovulması barədə təşəbbüs qaldırmalıdırlar.

Bunun üçün tam hüquqi əsas da var: adam efirlərə içkili halda gəlir, anlaqlı durumda deyil və qeyri-etik davranışları təkrarlanan xarakter alır!

Onu YAP-dan və Milli Məclisdən qovmadıqca, Siyavuş Novruzov YAP-ın və parlamentin dəyişməz siması olaraq qalacaq!”.

Elxan Şükürlünün bu fikirlərinə münasibət bildirən Siyavuş Novruzov isə Modern.az-a açıqlamasında daha sərt şəkildə cavab verib. Siyavuş Novruzov Yeni Azərbaycan Partiyasından və Milli Məclisdən qovulması haqqında təkliflərə “Necə istəyirlər, qoy elə yazsınlar. Çıxartsınlar. Məni xalq seçib” şəklində fikir bildirib.

“Efirlərə içkili halda gəlir” iddiasına isə deputatın cavabı sərt olub.

“Axmaq-axmaq danışır. Verilişdə iki saata yaxın oturmuşuq, çıxış etmişik. Elxan Şükürlü kimdir ki? Ömür boyu o mənim yanımda gəzən olub. Mən onu adam hesab eləmirəm. Tam məsuliyyətimlə deyirəm...”.

S.Novruzov özünün verilişdəki çıxışından narazı olmadığını dilə gətirib:

“Çıxışlarım müzakirələrə səbəb olursa, deməli yaxşı çıxışdır. Müzakirə yaratmırsa, onda nə çıxış eləmisən ki?! Efirdən sonra zəng edən olmadı. Mən heç kimlə danışmıram, telefon əlaqəsi saxlamıram”.

“Məktəblərdə əyani təhsilin dayandırılması ilə bağlı qərar tək sorğu əsasında deyil, elmi təhlillər, tədqiqatlar nəzərə alınmaqla verilib. Təbii ki, qərarvermə prosesində bütün istəkləri təmin etmək mümkün deyil”.

Avrasiya.net xəbər verir ki, bunu təhsil naziri Emin Əmrullayev deyib.

Nazir qeyd edib ki, proqnozlara görə məktəblərdə yoluxma hallarının artması gözlənilirdi: “Məktəblər tədricən distant tədrisə keçirdi. Eyni zamanda davamiyyət məsələsi də gündəmə gəlirdi. Yoluxmalar artdıqca valideynlər övladlarını məktəbə göndərmirdi. Bütün bunlarla yanaşı icitmaiyyətin də fikirlərini öyrənmək məqsədilə sorğu təşkil etdik. Bu da birmənalı qarşılanmadı. Bir qisim valideyn övladını məktəbə göndərmək istəsə də, çoxluq distant təhsilə keçilməsinin tərəfdarı idi. Ona görə də qərarın vaxtında qəbul edildiyini düşünürəm”.

E.Əmrullayevin sözlərinə görə, növbəti həftələr ərzində əgər COVID-19-a yoluxma sayları aşağı düşərsə, Təhsil Nazirliyi əyani tədrisə qayıtmaq istəyən ən maraqlı tərəflərdən biri olacaq: “Gərək ictimaiyyət də vəziyyəti düzgün başa düşsün. Həm müəllimlərin, həm də yaşlı valideynlərin sağlamlığını qorumağı da düşünməliyik. Bəzi insanlar qərardan narazı qala bilər. Biz daha çox balanslaşdırılmış qərar qəbul etməliyik. Regionlarda ayrı-ayrı məktəblərdə yoluxma faktları olanda distant təhsilə keçirilir. Hər gün distant təhsilə keçən məktəblər olur”.

Qax rayonunda məktəb direktoru koronavirusdan dünyasını dəyişib.

Avrasiya.net Report-a istinadla xəbər verir ki, bu, Qax şəhər 2 saylı məktəb-liseyin direktoru, 1937-ci il təvəllüdlü Şəkər Abdullayevadır.

Qeyd edək ki, 84 yaşlı məktəb direktoru bir müddət əvvəl koronavirusa yoluxub. O, Bakıdakı xəstəxanalardan birində müalicə olunurdu.

Ş.Abdullayeva 1959-cu ildən pedaqoji fəaliyyətinə başlayıb, işlədiyi müddət ərzində 69-a qədər diplom və fəxri fərmanlarla təltif olunub. O, 1979-cu ildən ömrünün sonuna qədər rayonun ən böyük məktəbinə rəhbərlik edib. Ş.Abdullayeva 2005-ci ildə "Əməkdar müəllim" fəxri adına layiq görülüb.

Azərbaycanda son sutkada 43499 nəfərə koronavirus (COVID-19) əleyhinə peyvənd vurulub.

Nazirlər Kabineti yanında Operativ Qərargahdan Avrasiya.net-ə verilən məlumata görə, birinci mərhələ üzrə vaksinasiyadan keçənlərin sayı 27992 nəfər, ikinci mərhələdə vaksinasiyadan keçənlərin sayı 15507 nəfərdir.

Ölkədə 18 yanvar 2021-ci ildən indiyədək ümumilikdə 1025790 nəfərə COVID-19 əlyehinə vaksin vurulub. Onlardan birinci mərhələ üzrə vaksinasiya olunanların sayı 639463 nəfər, ikinci mərhələ üzrə vaksinasiya olunanların sayı isə 386327 nəfərdir.

Milli Məclisin İqtisadi Siyasət, Sənaye və Sahibkarlıq komitəsinin üzvü Vahid Əhmədov səhhətində yaranan problemlə əlaqədar yenidən Türkiyədədir.

Avrasiya.net xəbər verir ki, bu müddət ərzində deputat müayinə və müalicələrdən keçəcək.

Parlamentarinin bir neçə gün sonra vətənə dönəcəyi bildirilib.


Qeyd edək ki, V.Əhmədov bir müddət əvvəl də ürəyində yaranmış problem səbəbilə Türkiyədə müalicə alıb.

Müdafiə Nazirliyinin vəzifəli şəxsi koronavirusdan vəfat edib.

Avrasiya.net Unikal.org-a istinadən xəbər verir ki, nazirliyin Hüquq Şöbəsinin polkovniki Bəxtiyar Rəsulzadə koronavirusdan dünyasını dəyişib.

Qeyd edək ki, mərhum polkovnikin bir müddət öncə verdiyi COVİD-19 testinin nəticəsi pozitiv çıxmışdı və müalicə alırdı.