Magistral su xəttində baş vermiş qəza ilə əlaqədar Binəqədi rayonu 7-ci və 8-ci mikrorayonlara, həmçinin Nərimanov rayonunun bir hissəsinə içməli suyun verilməsində məhdudiyyət yaranıb.

Bu barədə "Azərsu" ASC-dən verilən məlumatda bildirilib.

Hazırda qəzanın aradan qaldırılması istiqamətində tədbirlər görülür.

Yaranmış narahatlıqla əlaqədar “Azərsu” ASC abonentlərdən üzr istəyir.

Əziz Məlikovun atası Şamaxı rayonu Məlhəm kənd bələdiyyəsinin sədri Soltanpaşa Məlikovun mətbuata verdiyi açıqlama ilə tanış oldum. Əlbəttə, istəməzdim ki, gənc bir insanı bu formada sərt şəkildə cəzalandırsınlar. Azərbaycan Hərbi Prokurorluğunun təqdimatına əsasən, Bakı Hərbi Məhkəməsinin verdiyi qərarı əsla alqışlamıram.

Bu sözləri Axar.az-a Müdafiə Nazirliyinin N saylı hərbi hissəsinin hərbi qulluqçusu, əsgər Əziz Soltanpaşa oğlu Məlikovun həbs edilməsini şərh edən hərbi ekspert, istefada olan polkovnik Üzeyir Cəfərov deyib.

Polkovnikin sözlərinə görə, əsgər daha yüngül formada cəzalandırıla və ona şans verilə bilərdi:

“Bu əsgər qatı cinayətkar deyil ki, onun haqqında belə sərt addımlar atılsın. Fikrimcə, Hərbi Prokurorluq daha ciddi işlərlə məşğul olmalıdır. Hazırda haqqında danışdığımız qurumun nüfuzuna son vaxtlar müxtəlif məsələlərlə bağlı zərər dəyib. Hərbi Prokurorluq da bəhs etdiyimiz addımlarla özünü prinsipial təqdim etmək istəyir. Guya bunlar o qədər prinsipial hərəkət edirlər ki, hər şey birdən-birə ortaya çıxır və avtoşluq edən əsgərin haqqında ağır maddələrlə iş qaldırırlar. Verilən qərar Azərbaycan hüququna xələl gətirir. Ən azından o əsgərin xidmət yeri dəyişdirilə və ona yeni şans verilə bilərdi. Bu adam kimisə öldürməyib, kiməsə xəsarət yetirməyib. Məgər hər avtoxuliqanlıq edəni bu cürə formada cəzalandırırlar? Yanaşma doğru deyil. Əsgəri hər an məsuliyyətə cəlb etmək olar, o, heç bir yerə gedə, gizlənə bilməz. Sən ona etdiyi səhvi başa sal, şans ver, əgər özünü doğrultmasa, qanunlara uyğun formada dörd ay yox, daha uzun müddətə də həbs etmək olar”.

Polkovnik qeyd edib ki, onun hansı formada hərbi hissəni tərk etməsi haqda rəsmi məlumatda heç nə deyilmir:

“Bildiyim qədər belə məsələlərdə ilkin mərhələdə Müdafiə Nazirliyinin tərkibində təhqiqat aparılmalıdır. Hər kəs məmur oğlunun həbsindən danışdı. Əziz Məlikovun atası adi bir bələdiyyə sədridir. Mən heç onu tanımıram. Ancaq elə danışılır ki, guya Soltanpaşa Məlikov çox böyük vəzifə sahibidir. O əsgərin avtoşluğu kameraya düşməsə idi, heç kimin ondan xəbəri belə olmayacaqdı. Bu gənc nə edib ki, ona istintaq müddətində 4 ay həbs veriblər? Çox ağır cəzadır, çox. Yenə deyirəm ki, ümumiyyətlə həmin əsgəri, onun ailəsini tanımıram. Ancaq mən Əziz Məlikovu öz övladım kimi qəbul edirəm. Əsgər hərbi hissəni özbaşına tərk edib, yoxsa döyüş postunu qoyub qaçıb? Ona məzuniyyət düzgün şəkildə verilibmi? Yəni burada çoxlu suallar var. Onlar aydınlaşmalı və daha humanist qərar verilməlidir”.

Ü.Cəfərovun sözlərinə görə, indiyədək heç bir həbsxana, cəzaçəkmə müəssisəsi insanı islah etməyib:

“Əksinə, verilən qərar o gəncdə Azərbaycan qanunvericiliyinə, cəmiyyətə inamsızlıq, etibarsızlıq yaradacaq və onun gələcək həyatına mənfi təsir edəcək. Çağırış edərdim ki, rəhbərlik bu ağır cəzanı aradan qaldırsın”.

Sumqayıt şəhərində yaşayan şəhid atası Əziz Əliyev Əmək və Əhalinin Sosial Müdafiəsi Nazirliyindən şikayət edib.

Modern.az-ın məlumatına görə, şəhid atası bildirib ki, ailəsi əvvəllər 4 nəfərdən ibarət idi. Böyük oğlu Əliyev Emil Əziz oğlu 6 oktyabr 2020-ci il tarixində Vətən müharibəsində şəhid olub.

Hazırda 17 kvadratmetr sahəsi olan 1 otaqlı mənzildə yaşayan ailə başçısı kömək üçün Əmək və Əhalinin Sosial Müdafiəsi Nazirliyinə müraciət edib.

Şəhid atası bildirib ki, onların müraciətinə nazir müavini Hidayət Abdullayev və Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin sədr müavini Zaur İbrahimov baxıb:

“Biz Hidayət Abdullayevlə videoformatda danışdıq və 1 otaqlı mənzildə subay oğlumla birgə yaşadığımızı çatdırdım. Hidayət Abdullayev Zaur İbrahimova göstəriş verdi ki, şəhid ailəsini 2 otaqlı mənzillə təmin edin. Biz 2 ay gözlədik evdən bir xəbər gəlməyincə təkrar müraciət etdik və cavabında “sizə 2 otaq deyil, 1 otaqlı mənzil veririk” dedilər. Səbəb kimi bizə 1 otaqlı evimizin olduğunu dedilər. Biz isə Hidayət Abdullayevin 2 otaqlı mənzil barədə göstəriş verdiyini xatırlatdır. Qeyd edim ki, əksər şəhid ailələrini 2 otaqlı və ya 3 otaqlı mənzillə təmin ediblər”.

Şəhid atası bildirib ki, haqları pozulduğuna görə, Prezident Administrasiyasına teleqram vurublar.

“Prezident Administrasiyasından bizimlə əlaqə saxladılar. Problemimizi əməkdaşlara bildirdik, bizə dedilər ki, “Administrasiyadan göstəriş verəcəyik ki, probleminiz həll olunsun”".

Əziz Əliyevin sözlərinə görə, artıq 1 ildir nazirliyin Sosial Xidmətlər Agentliyi problemi həll etmir, göstərişləri qulaqardına vurur.

Məsələylə bağlı açıqlama verən açıqlama verən Sosial Xidmətlər Agentliyinin mətbuat katibi Murad Həşimov isə bildirib ki, Vətən müharibəsindən sonra 3500-dən çox şəhid ailəsi və müharibə əlilinə Əmək və Əhalinin Sosial Müdafiəsi Nazirliyi tərəfindən mənzil təqdim edilib. Proses davam etməkdədir. Bu ilin sonunadək daha 1000 ailəyə mənzil və ya fərdi ev veriləcək.

Agentlik rəsmisi şikayətçi şəhid atasının narazılığını belə cavablandırıb:

“Vətən Müharibəsi şəhidi Emil Əliyevin atası Əziz Məcid oğlu Əliyev də Sumqayıt Şəhər İcra Hakimiyyətinin 04.06.2021-ci il tarixli sərəncamı ilə ailə tərkibi 3 nəfər (özü, həyat yoldaşı və oğlu) olmaqla yaşayış sahəsinə ehtiyacı olan qismində uçota alınıb. Təqdim olunan sənədlərə Sosial Xidmətlər Agentliyində baxılıb və məlum olub ki, Əliyev Əziz Məcid oğlu ailə tərkibi ilə mülkiyyətində olan Sumqayıt şəhərində yerləşən 1 otaqlı mənzildə qeydiyyatdadırlar. Uçota alınmış ailənin tərkibi nəzərə alınmaqla qanunverciliyə uyğun olaraq Sumqayıt şəhərində 1 otaqlı mənzillə təmin edilməsi təklif edilib. Təəssüf ki, ailə bu təklifdən imtina edib”.

M.Həşimovun sözlərinə görə, şəhidin atasının razılığı olduğu təqdirdə ailə növbəliliklə 1 otaqlı mənzillə təmin ediləcək.

Şəhid Emil Əliyev 1993-cü il avqustun 1-i Sumqayıt şəhərində anadan olub. 2000–2011-ci illərdə Sumqayıt şəhərində yerləşən Tofiq İsmayılov adına 29 saylı tam orta məktəbində təhsil alıb. Həmin ildə Azərbaycan Dövlət Aqrar Universitetinin Energetika fakültəsinə daxil oluv. 2015-ci ildə isə həmin universiteti bitirib, müddətli hərbi xidmətə yollanıb. 2016-cı ildə Aprel döyüşlərində iştirak edib və böyük şücaət göstərib. Hərbi xidməti bitirdikdən sonra 2016–2017-ci illərdə Sumqayıt şəhərində işləyib.

2020-ci il sentyabrın 21-də könüllü olaraq Vətən müharibəsinə yollanıb. Müxtəlif istiqamətlərdə döyüşlərə qatılan Emil Əliyev 6 oktyabr 2020-ci il tarixində Füzuli rayonu uğrunda gedən döyüşlərdə qşəhid olub.

Emil Əliyev Sumqayıt Şəhidlər Xiyabanında dəfn edilib.

Ölkə başçısının sərəncamlarına əsasən, "Füzulinin azad olunmasına görə", "Xocavəndin azad olunmasına görə" və “Vətən uğrunda” medalları ilə təltif edilib.

Rusiya ən böyük neft və qaz tədarükçülərindən biri olduğuna görə yanacaq məhsullarının qiyməti qlobal miqyasda yüksəlib və bu daha çox yanacaq idxal edən İEÖ-də inflyasiyanı artırıb.

Bunu Azərbaycan Mərkəzi Bankının (AMB) Pul siyasəti departamentinin direktor müavini Elçin Güləliyev bildirib.

AMB rəsmisi deyib ki, həm Rusiya, həm də Ukrayna eyni zamanda əsas ərzaq ixracatçılarıdır, bu səbəblə müharibədən və sanksiyalardan yaranan tədarük zəncirinin qırılması halları qlobal ərzaq qiymətlərinin bir az da bahalaşması ilə nəticələnib:

"Məlumat üçün qeyd edək ki, Ukrayna və Rusiyanın dünya buğda ixracında payı 30 faizdir, buna görə də buğdanın qiyməti rekord həddə çatıb. Bundan əlavə region üzrə logistika xətlərinin qırılması digər məhsulların da tədarükündə problemlərə və dolayısıyla bahalaşmaya səbəb olub.

Ərzaq və enerjinin istehlakda daha çox paya malik olduğu (Afrikada 50 faizə qədər) aşağı gəlirli ölkələr və inkişaf etməkdə olan bazarlar üçün təsir çox güman ki, daha böyük və uzunmüddətli ola bilər. Aşağı gəlirli ölkələrdəki insanlar yüksək qiymətlərə daha çox həssasdırlar, çünki ərzaq istehlakın orta hesabla 44% təşkil edir. İnkişaf etmiş iqtisadiyyatlarda bu göstərici 16 faizdir. Kəskin artan neft və qaz qiymətləri həm yanacaq, həm də mineral gübrələrin qiymətlərini artıraraq kənd təsərrüfatı və təzə ərzaq istehsalını da bahalaşdırır".

İyunun 23-də Bakıda Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin “QHT-dövlət əməkdaşlığında yeni çağırışlar: ictimai nəzarət mexanizmlərinin gücləndirilməsi” adlı sonuncu respublika zona konfransı keçirilib.

Avrasiya.net xəbər verir ki, konfranda çıxış edən Azərbaycan Respublikası Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev dövlət və cəmiyyət həyatında qeyri-hökumət təşkilatlarının rolunun artırılmasının önəmindən danışaraq, bildirib ki, may ayından etibarən bütün iqtisadi zonalarda baş tutan konfranslar uğurla yekunlaşıb: “Bütün zona konfranslarının yekunu olaraq QHT-lər və ictimai şuralar öz fəaliyyətlərində dönüş yaratmalı, cəmiyyətin və dövlətin həyatında fəal iştirak etməli, qarşıya çıxan çatışmazlıqların aradan qaldırılmasında dövlət orqanlarının fəaliyyətinə dəstək göstərməlidir”.

V.Quliyev bildirib ki, İctimai Şuraların fəaliyyəti, əsasən, cəmiyyətlə qarşılıqlı əlaqələrin gücləndirilməsindən, sağlam dialoqun qurulmasından, qərarların qəbulunda ictimai rəyin, vətəndaş maraqlarının nəzərə alınmasından ibarətdir və onların fəaliyyətində şəffaflığın, hesabatlılığın təmin edilməsi, təcrübəli QHT-lərin bu prosesə cəlb edilməsi vacib amildir.

Azərsu ASC Bakının Binəqədi qəsəbəsinin bir hissəsinin su təchizatı və kanalizasiya sisteminin yenidən qurulması ilə bağlı elan etdiyi açıq tenderə yekun vurub.

Axar.az xəbər verir ki, “Protean Construction” ASC tenderdə qalib gəlib və buna görə şirkətə təxminən 12,9 milyon manat ödəniləcək.

Şirkətlə bağlı apardığımız kiçik araşdırma nəticəsində məlum oldu ki, “Protean Construction” Azərsu ASC-nin elan etdiyi əksər tenderlərin qalibi olub.

2021-ci ilin avqustunda "Azərsu" ASC-nin Şuşa şəhərinin içməli su təchizatının təmin olunması üçün qurğuların əsaslı təmiri ilə bağlı elan etdiyi açıq tenderin qalibi də “Protean Construction" MMC olub. Bununla bağlı şirkətə 8.6 milyon manat ödənilib.

Maraqlıdır ki, şirkətlə 2019-cu ildə də Binəqədi və Biləcəri qəsəbəsinin su təchizatı və kanalizasiya sisteminin yenidən qurulması üçün müvafiq olaraq 987 min manatlıq və 789 min 600 manatlıq, Babək prospektinin yenidən qurulması ilə əlaqədar yol boyu su və kanalizasiya xətlərinin tikintisi üçün 1 milyon 480 min 500 manatlıq müqavilə bağlanılıb. Üzərindən 3 il keçməmiş şirkət Binəqədi qəsəbəsinin bir hissəsinin su təchizatının yaxşılaşdırılması ilə bağlı yenidən 13 milyona yaxın tenderin qalibi olur.

2021-ci ilin əvvəlində Azərsu ASC-nin Pirşağı Tullantı Sutəmizləyici Qurğusunun gətirici kanalizasiya kollektorlarının tikintisi (Pirşağı-Kürdəxanı-Zabrat kollektoru, Ceyranbatan gölünün şimal şərq hissəsində, Saray qəsəbəsi istiqamətində), yağış və tullantı sularının idarə olunması sisteminin yaradılması ilə bağlı elan etdiyi 2 açıq tenderin qalibləri “Tunel Tikinti Servis” MMC və “Protean Construction” ASC olub. Hər iki şirkətlə məbləği 34 milyon 444,5 min manat və 3 milyon 891,7 min manat, ümumilikdə isə 38 milyon 336,2 min manatlıq müqavilələr imzalanıb.

Şirkət bundan başqa Azərbaycan Avtomobil Yolları Dövlət Agentliyi ilə birgə Qubadlı şəhəri daxil olmaqla, Mahmudlu, Xıdırlı, Məlikəhmədli, Qudanlı, Davudlu, Eyvazlı kəndlərinin ərazisindən keçən Qubadlı-Eyvazlı yolunun inşasında da iştirak edir.

Beləliklə, şirkətin son 3 ildə yalnız açıq tenderlərdə udduğu məbləğlərin həcmi 63 milyon manatdan (bunun 38.3 milyon manatı “Tunel Tikinti Servis” MMC ilə birlikdə udulub) çoxdur.

Amma bu qədər tenderlərin qalibi olan, əhəmiyyətli layihələrdə iştirak edən və dövlətdən külli miqdarda vəsait alan şirkətin kimə məxsus olması hələ də qaranlıqdır. Mətbuatın iddiasına görə, “Protean Construction” ASC Azərsu Açıq Səhmdar Cəmiyyətinin (ASC) sabiq sədri Qorxmaz Hüseynovun ən yaxın kadrlardan biri, Tikilməkdə Olan Obyektlərin Müdiriyyətinin keçmiş rəhbəri, hazırda həbsdə olan Elman Məmmədova məxsusdur. Elman Məmmədovun həbsi ilə bağlı məlumat ötən ilin may ayında yayılıb. Onun “Azərsu”nun kommersiya departamentinin rəisi Xanvər Abbasovla birlikdə saxlanıldığı bildirilirdi.

İndiyə qədər “Protean Construction” ASC-nin Elman Məmmədova məxsus olub-olmaması ilə bağlı isə heç bir rəsmi açıqlama verilməyib.

İyunun 23-də Milli Məclisin Ailə, qadın və uşaq məsələləri komitəsinin sədri Hicran Hüseynova İran İslam Respublikası İslam Şurası Məclisinin deputatları Sumayyə Rəfii və Zöhrə Sadər Lacevərdi ilə görüşüb.

Komitə sədri qonaqları Azərbaycan parlamentində görməkdən məmnunluğunu ifadə edərək, bildirib ki, ölkələrimiz arasında əlaqələr yüksələn xətlə inkişaf edir. Parlamentlər, müvafiq dövlət qurumları arasında yaxşı əməkdaşlıq mövcuddur.

Hicran Hüseynova Azərbaycanın dünyəvi, demokratik dövlət olduğunu, ölkəmizdə qadınların hələ 1918-ci ildə seçmək və seçilmək hüququ qazandıqlarını söyləyib. Bu gün qadınların ölkənin ictimai-siyasi həyatında fəal iştirak etdiyini deyən komitə sədri Milli Məclisin, onun komitələrinin rəhbərliyində qadınların təmsil olunduğunu bildirib. O, Milli Məclisdə gender bərabərliyi, ailə, uşaq məsələlərinə aid qəbul edilən qanunlardan bəhs edib.

Komitə sədri torpaqlarımızın uzun müddət erməni işğalı altında olduğunu deyərək, 2020-ci ildə Ali Baş Komandan İlham Əliyevin başçılığı ilə Azərbaycan ordusunun 44 günlük Vətən müharibəsində torpaqlarımızı işğaldan azad etdiyini, ərazi bütövlüyümüzün bərpa olunduğunu diqqətə çatdırıb. Bildirib ki, hazırda azad edilmiş torpaqlarda geniş quruculuq işləri həyata keçirilir. Qaçqınların öz doğma yurdlarına tezliklə qayıtması üçün lazımi şərait yaradılır. O, ölkəmizdə şəhid ailələri və qazilərə dövlət tərəfindən göstərilən diqqət və qayğıdan da bəhs edib. Bu istiqamətdə Heydər Əliyev Fondunun həyata keçirdiyi layihələr barədə məlumat verib.

İran İslam Şurası Məclisinin deputatları Sumayyə Rəfii və Zöhrə Sadər Lacevərdi səmimi görüşə görə təşəkkürlərini bildiriblər. Qonaqlar İran parlamentinin strukturu, qadınların parlamentdə təmsilçiliyi barədə məlumat veriblər. İranlı deputatlar İran İslam Şurası Məclisinin komitələri, o cümlədən Ailə, qadın və uşaq, Mədəniyyət və Ətraf mühit komitələrinin fəaliyyətindən bəhs ediblər. Onlar bu sahələrdə ölkələrində həyata keçirilən layihələr, qəbul edilən qanunlar, cəmiyyətin maarifləndirilməsi istiqamətində görülən işlər barədə danışıblar.

Söhbətdə tərəflər parlamentlərarası əlaqələrin genişləndirilməsi, qanunvericilik sahəsində təcrübə və informasiya mübadiləsinin aparılması və digər məsələlərlə bağlı fikirlərini bölüşüblər.

Görüşdə Milli Məclisin Ailə, qadın və uşaq məsələləri komitəsinin üzvləri Sevil Mikayılova, Ramin Məmmədov, gənclər və idman nazirinin müavini İndira Hacıyeva, İran İslam Respublikasının Azərbaycandakı səfirliyinin müşaviri Sayed Ali Mousavi və digər rəsmi şəxslər iştirak ediblər.

Rəşad Rəhmanov: "Hərbi və hərbi-texniki sahələrdə nəzərdə tutulan əməkdaşlıq xüsusi əhəmiyyət kəsb edir"

İki ölkə arasında diplomatik əlaqələr 1995-! ci ilin oktyabrın 2-də qurulmuşdur. 1996-cı ilin ortalarında Azərbaycan Respublikasının Özbəkistanda ,1998-ci ilin mayında Özbəkistan Respublikasının Azərbaycanda səfirlikləri fəaliyyətə başlayıb. İkitərəfli münasibətlərin inkişafında dövlət başçılarının səfərləri xüsusi əhəmiyyət kəsb edir. NATO, İKT, MDB, GUAM sammitlərində Azərbaycan Özbəkistan Prezidentlərinin görüşləri ikitərəfli münasibətlərin daha da inkişafına səbəb oldu. 2004- cü ildə İlham Əliyevin Özbəkistana səfəri, 2008 - ci ildə Özbəkistan Prezidentinin Azərbaycana səfəri zamanı bir çox məsələlər müzakirə edilmişdir.

21 iyun 2022 - ci il Azərbaycan Respublikasının Prezidenti Özbəkistana dövlət səfəri etmişdir.
Özbəkistanda geniş tərkibli görüşdə Azərbaycan Prezidenti İlham Əliyev cıxışı zamanı bildirib ki, Şavkat Mirziyoyevin ölkəsi investisiya baxımından cəlbediciliyi, sənaye potensialının artırılması ,sosial məsələlərin həlli üzrə apardığı islahatları çox yüksək qiymətləndirib. Prezident Şavkat Mirziyoyev ilə müxtəlif beynəlxalq tədbirlər çərçivəsində o, cümlədən Bakıda dəfələrlə görüşlər keçirilmiş, fikir mübadiləsi aparılmışdır.

Azərbaycan Respublikası Prezidenti Ilham Əliyev dəfələrlə görüşdüklərini xatırladaraq bildirdi ki, "Sənaye istehsalı, iş yerləri ,xalqın sosial rifahı bütün bu mövzular daim diqqət mərkəzindədir və Azərbaycanda da Özbəkistanda da əminəm ki, sakinlər də bu istiqamətdə böyük nailiyyətlər əldə edirlər. BIz qardaş özbək xalqının uğurlarına sevinirik və əminik ki, qardaş özbək xalqının ardıcıl inkişafı davam edəcək"
Biz həmişə ikitərəfli fəaliyyətimizi genişləndirmək üçün səy göstərməliyik. Azərbaycan Respublikası Prezidenti İlham Əliyev Özbəkistan Respublikası ilə hərbi əməkdaşlıq, hərbi - texniki əməkdaşlıq istiqamətində addımlar atıldığı iki ölkə arasında qarşılıqlı əlaqələr daha da möhkəmlənəcək. İki ölkə arasında təcrübə mübadiləsi aparılacaq. Bu gün hər iki ölkə də kənar təhdidlərlə üzləşir. Bu səbəbdən bu sahədə əməkdaşlığımızı artırmalıyıq və təcrübə mübadiləsi aparmalıyıq. Biz Özbəkistanla hərbi əməkdaşlıq istiqamətində əlavə addımlar atmalıyıq.
Özbəkistan Prezidenti həm də bildirib ki, qardaşlığımızın rəmzi olaraq işğaldan azad olunan Füzuli rayonunda məktəb tikdirəcək. Məlumdur ki, ll Qarabağ müharibəsindən sonra biz Qarabağı öz gücümüzlə bərpa edirik. Müharibədən sonra Özbəkistan Prezidenti görüşəndə belə bir təşəbbüs irəli sürmüş və Prezidentimiz bu təklifi minnətdarlıqla qəbul etdiyini bildirmişdi. Bu məktəb həm də bizim qardaşlığımızın rəmzi olaraq yüzillər boyu Azərbaycan xalqının xatirində qalacaq.

Türk dövlətlərinin qarşılıqlı münasibət qurmaları və hərbi əməkdaşlıq etmələri həqiqətən önəmli hadisədir. Qardaş özbək xalqı ilə Azərbaycan xalqı həmişə dost və qardaş olacaqdır.

Rəşad Rəhmanov
Siyəzən şəhər 2 saylı tam orta məktəbin direktoru

İyunun 21-də Dövlət Gömrük Komitəsində İran İslam Respublikası Hüquq Mühafizə Qüvvələrinin Komandanlığının Narkotiklərlə Mübarizə Polisinin nümayəndələrilə görüş keçirilib.

Avrasiya.net xəbər verir ki, görüşdə Dövlət Gömrük Komitəsi sədrinin müavini, gömrük xidməti general-mayoru Cavad Qasımov, Əməliyyat-İstintaq Baş İdarəsinin rəisi, gömrük xidməti general-mayoru Məsum Rəsulov və İran İslam Respublikası Hüquq Mühafizə Qüvvələrinin Komandanlığının Narkotiklərlə Mübarizə Polisinin rəisi Məcid Kəriminin rəhbərlik etdiyi nümayəndə heyəti iştirak edib.

Dövlət Gömrük Komitəsi sədrinin müavini Cavad Qasımov gömrük orqanlarının narkotiklərin qanunsuz dövriyyəsinə qarşı mübarizə sahəsində faəliyyətindən bəhs edib və bu istiqamətdə regional və beynəlxalq əməkdaşlığın mühüm əhəmiyyət daşıdığını vurğulayıb. Qeyd olunub ki, Azərbaycan Şərqdən Qərbə daşınan narkotik vasitələrin marşrutu üzərində yerləşir və qaçaqmalçılar ölkəmizdən əsasən tranzit məqsədilə istifadə edirlər.

Cavad Qasımov narkotik vasitələrin qanunsuz dövriyyəsinin qarşısının alınması məqsədilə əməkdaşların potensialının gücləndirilməsi, kinoloji xidmətin keyfiyyətinin artırılması istiqamətində mühüm addımlar atıldığını, gömrük-sərhəd keçid məntəqələrinin ən müasit texniki nəzarət vasitələri, rentgen qurğuları ilə təchiz olunduğunu diqqətə çatdırıb. O da qeyd olunub ki, həyata keçirilən məqsədyönlü fəaliyyət nəticəsində son illər bu sahədə mühüm nailiyyətlər əldə olunub.

İran İslam Respublikası Hüquq Mühafizə Qüvvələrinin Komandanlığının Narkotiklərlə Mübarizə Polisinin rəisi Məcid Kərimi təmsil etdiyi qurumun fəaliyyətindən, ölkəsində narkotik vasitələrin qanunsuz dövriyyəsinə qarşı mübarizə istiqamətində görülən işlərdən danışıb. Məcid Kərimi bu sahədə səmrəli fəaliyyətin həyata keçirilməsi üçün birgə səylərin artırılması, qarşılıqlı məlumat və təcrübə mübadiləsinin önəmini vurğulayıb.

Sonra qarşılıqlı maraq doğuran məsələlər ətrafında fikir mübadiləsi aparılıb.

Görüş başa çatdıqdan sonra isə nümayəndə heyəti Dövlət Gömrük Komitəsinin Kinoloji Mərkəzini ziyarət edib və qurumun fəaliyyəti ilə tanış olub.

Dələduzluqda təqsirləndirilən Ramin Hacılının cinayət işi üzrə məhkəmənin baxış iclası davam etdirilib.

"Report" xəbər verir ki, Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə təqsirləndirilən şəxs bir neçə vəsatət qaldırıb.

O, vəsatətində heç bir mütəşəkkil cinayətkar dəstə yaratmadığını bildirib: "Cinayət işi yenidən ibtidai istintaqa qaytarılmalıdır".

R.Hacılının vəkili Rəşad Əliyev müvəkilinin vəsatətini müdafiə etdiyini söyləyib.

Prokuror isə vəsatəti əsassız hesab edib.

R.Hacılı ikinci vəsatətində barəsində seçilmiş həbs qətimkan tədbirinin dəyişdirilməsini istəyib.

Müşavirədən sonra məhkəmə vəsatəti təmin etməyib.

Daha sonra zərəçəkmiş Azər Əliyev ifadə verib. O deyib ki, R.Hacılı Şengen vizası almaq adı ilə ona 22 min manat zərər vurub.

Təqsirləndirilən şəxs A.Əliyevin ifadəsinə münasibət bildirib. O qeyd edib ki, zərərçəkmişə Şengen vizası alandan sonra həbs olunub.

Bu zaman R.Hacılı məhkəmədə əsəbiləşərək şüşə qəfəsə yumruq vurub. Daha sorna o, məhkəmə zalından çıxarılıb.

Proses təqsirləndirilən şəxsin iştirakı olmadan davam etdirilib.

R.Hacılının vəkili R.Əliyev iclası təqsirləndirilən şəxsin iştirakı olmadan keçirilməsinə etiraz edib. Hakim isə vəkilə xəbərdarlıq edib.

Məhkəmədə ifadə verən digər zərərçəkmiş Pənah Hüseynli söyləyib ki, 2016-cı ilin yay aylarında ABŞ-a təhsil vizası üçün R.Hacılıya müraciət edib. O, bunun üçün təqsirləndiirlən şəxsə 800 dollar verdiyini deyib: "Ora gedə bilmədiyim üçün Ramin həmin məbləği mənə geri qaytardı".

Məhkəmənin növbəti iclası iyunun 27-nə təyin edilib.

Qeyd edək ki, Azərbaycan Avropa Hərəkatının və “No Border Travel Agency” MMC-nin rəhbəri Ramin Hacılı, “Gəncliyin Elmi-Mədəni İnkişafı” ictimai birliyinin sədri Sərdar İsgəndərov, “Yes Travel” MMC-nin vəzifəli şəxsləri Sərxan Abdullayev, Üzeyir Bağırlı, “HMH Baku Travel” MMC-nin rəhbəri Nərminə Dadaşova, Zakir Əmirov, Əziz Səfərəliyev, Akif Əsədov külli miqdarda qazanc əldə etmək məqsədi ilə ABŞ, Kanada və Avropa ölkələrinə səfər etmələri üçün Azərbaycan vətəndaşlarına viza alınması və səfər etdikləri ölkələrdə mühacir statusu alaraq yaşaya bilmələri üçün iş yerindən arayış, bank hesabından çıxarış, daşınar və daşınmaz əmlaka mülkiyyət hüququnu təsdiq edən sənədlər, hüquq mühafizə orqanlarına çağırış məktubu, guya xəsarət almalarına dair tibbi arayış və digər hüquq verən rəsmi sənədləri saxtalaşdırıb satmaqla, onlara müraciət edən şəxslərin qanunsuz miqrasiyalarını təşkil ediblər.

Qeyd edilənlərlə bağlı əvvəllər eyni xarakterli əməllərə görə dəfələrlə məhkum olunmuş Ramin Hacılı, eləcə də yuxarıda adları çəkilən digər şəxslər Cinayət Məcəlləsinin 178.3.1-ci (mütəşəkkil dəstə tərkibində dələduzluq) və digər maddələri ilə təqsirləndirilən şəxs qismində cəlb edilməklə, barələrində müvafiq olaraq həbs və başqa yerə getməmək haqqında iltizam qətimkan tədbirləri seçilib.

Xatırladaq ki, digər şəxslərin cinayət işi ayrıca icraata götürülüb.