"Azərbaycanın bütün sahələrində İranın kifayət qədər agenti var" — Partiya sədri"Bir ölkənin başqa ölkədə agent qurmaqda əsas məqsədi həmin ölkə daxilində öz ölkəsinin maraqlarını təmin etmək, həmin ölkəyə bu və ya digər şəkildə təzyiq etməkdir. Sosial, siyasi iqtisadi və digər sosial metodlarla, təxribatlar törətmək, həmin ölkənin siyasi rəhbərliyini fakt qarşısında qoymaqdır".

Bu sözləri Demokrat.az -a açıqlamasında Ağ Partiyanın sədri Tural Abbaslı deyib. Partiya rəhbəri bildirib ki, İran Azərbaycanda yaratdığı casus şəbəkəsiylə ölkədə qarışıqlığın yaradılmasına çalışıb:

"İran hər zaman Azərbaycanın müstəqil siyasət yürütməsinin qarşısı almağa çalışıb. Yəni, Azərbaycan öz maraqlarından daha çox İranın maraqlarını müdafiə etsin, yaxud da, İran əleyhinə addımlar ata bilməsin. Artıq illərdir ki, ölkəmizdə din adı altında İran özünün imzası üçün şəbəkəsini yaradır. Bununla da, Azərbaycana təsir mexanizmlərini formalaşdırmağa çalışır. Həm mediada, həm din xadimləri arasında kifayət qədər agenti var. Əminəm ki, biznes, iqtisadi, mədəni sahədə də var. Azərbaycan xüsusi xidmət orqanları çalışmalıdır ki, Azərbaycandakı İran bütün casus şəbəkəsini ifşa etsin".
İranda etirazları dəstəkləyən professorlar universitetlərdən qovulurİranın şimal-şərqi Məşhəd şəhərindəki Firdovsi Universitetinin azı 10 professoru ölkədəki etirazlara dəstək nümayişindən sonra işdən çıxarılıb. Ötən ilin sentyabrında 22 yaşlı Məhsa Əmini polisdə öləndən sonra İranı kütləvi etirazlar bürüyüb.

İran Tələbələrinin Birlik Şurasının məlumatına görə, 11 professor tələbələrin hüquqlarını dəstəklədiyinə və müdafiə etdiyinə görə işdən çıxarılıb. Şura professorların adlarını açıqlamasa da, onların təmsil etdiyi fakültələrin adlarını yayıb.

Əmini guya hicab qaydasını pozduğuna görə saxlanandan sonra polisdə vəfat edib. Bunun ardınca minlərlə iranlı küçələrə çıxaraq daha çox azadlıq, qadınların hüquqlarının müdafiə olunmasını tələb edib.

Bir çox universitetlərdə, xüsusilə Tehranda saysız etirazlar keçirilib, bir çox tələbə dərslərə girməkdən imtina edib. Tələbələr “qadın, həyat, azadlıq”, “diktatora ölüm” şüarları səsləndiriblər. Bəzi qadın tələbələr baş örtüklərini çıxararaq yandırıblar.

Tələbələr etirazlar vaxtı professorlardan dəstək istəyiblər. Bəzi universitetlərdə professorlar və mühazirəçilər etirazçılarla həmrəylik bildiriblər.

HRANA xəbər agentliyinin yanvarın 26-da bildirdiyinə görə, azı 700 universitet tələbəsi son iğtişaşlarda həbs olunub. Onların çoxuna həbs, şallaq cəzaları kəsilib. Onlara tələbə universitetlərdən qovulub.

Təhlükəsizlik qüvvələri ölkədə etirazçılara amansızlıqla divan tutub. İnsan haqları təşkilatları indiyədək etirazlarda 500-dən çox insanın öldürüldüyünü, yüzlərlə xəsarət alanların olduğunu bildirir.

Etirazlarla bağlı jurnalistlər, vəkillər, fəallar və başqaları da daxil minlərlə şəxs saxlanıb. Onların bir çoxuna ölüm cəzası nəzərdə tutan ittihamlar irəli sürülüb.
Azərbaycan zəlzələdən zərər çəkmiş soydaşlarımıza yardım göstərməyə hazırdır - İran imkan vermirAzərbaycan dövləti Xoyda zəlzələdən zərər çəkmiş soydaşlarımıza yardım etməyə hazırdır, lakin İran buna imkan vermir.

Bu barədə APA-ya diplomatik mənbələrdən informasiya daxil olub.

Məlumata görə, Azərbaycan dövləti Xoyda zəlzələdən zərərçəkmiş soydaşlarımıza hər cür yardım göstərməyə hazırdır və buna bütün resurslar da var. Lakin İran dövləti Azərbaycanın bu yardımı soydaşlarımıza çatdırmasına imkan vermir.

Qeyd edək ki, yanvarın 18 və 28-də İranın mütləq əksəriyyəti azərbaycanlıların yaşadığı Xoy əyalətində zəlzələ baş verib.

Zəlzələlər nəticəsində mindən artıq insan yaralanıb, 3 nəfər ölüb. Təbii fəlakətin baş verməsindən xeyli vaxt keçməsinə baxmayaraq, İran hökuməti soydaşlarımıza heç bir yardım göstərmir. Minlərlə ailə kəskin soyuq və qarlı hava şəraitində çöldə gecələyir. Çadır, isti geyim və qidaya olan tələbat ödənmir, insanlar arasında kütləvi xəstəliklər yayılır. Xəstəxanalarda tibb heyət və dərman çatışmazlığı var. Xəstəxanalarda yer və tibbi heyət olmadığı üçün xəstə qəbulundan imtina olunur.

İran mediası isə Xoyda zəlzələdən zərərçəkənlərin problemlərini işıqlandırmaqdan imtina edir.

Türkiyənin Qızıl Ay Cəmiyyətinin açıqlamasına görə, İran bu ölkənin yardım təklifindən də imtina edib.

Milli Məclisin deputatı Hikmət Babaoğlu deyib ki, İranın zəlzələdən zərər çəkənlərə qarşı aqressiv davranışı, heç bir yardım göstərməməsi və yardım göstərənlərə mane olması İranın daxili siyasətində azərbaycanlılara qarşı etnik ayrı-seçkiliyin göstəricisidir.

“Bu, öz vətəndaşlarına münasibətdə humanitar terrordur. Eyni zamanda İslam dininin bütün humanitar və mənəvi dəyərlərinə ziddir” deyə, deputat qeyd edib.

Hikmət Babaoğlu bildirib ki, İranın Xoyda baş verən zəlzələdən sonra zərərçəkmiş soydaşlarımıza ediləcək yardımlardan imtinası “şovinist fars rejiminin azərbaycanlıların hüquqlarını tapdalamasının, onları adi humanitar hüquqlardan belə məhrum etməsinin” göstəricisidir.

“İranın bu cür anti-humanist, anti-hüquqi və anti-islami mövqeyi qətiyyətlə pislənilməlidir. İranda yaşayan 30 milyon azərbaycanlı ən çətin anlarda belə vətəndaşı olduğu dövlətdən humanitar yardım görmürsə, əlbəttə ki, onlar beynəlxalq hüquqa uyğun olaraq özünü təyinetmə, özünü ifadəetmə vasitələrindən istifadə etməyə məcbur qalacaqlar. İran rejimi azərbaycanlıları öz müqəddəratlarını təyin etməyə doğru itələyir” - deyə, Hikmət Babaoğlu qeyd edib.
“Azərbaycan öz ərazilərini geri qaytarıb”"Azərbaycan öz ərazilərini geri qaytarıb".

“Report”un Rusiya bürosunun məlumatına görə, bunu Rusiyanın xarici işlər naziri Sergey Lavrov “Rossiya 24” telekanalına müsahibəsində deyib.

“Azərbaycanın əraziləri Ermənistan tərəfindən işğal edilmişdi, Azərbaycan həmin əraziləri geri qaytarıb”, - Rusiya XİN rəhbəri bildirib.

Onun sözlərinə görə, Kollektiv Təhlükəsizlik Müqaviləsi Təşkilatı (KTMT) Ermənistan və Azərbaycana Qafqazda vəziyyəti sabitləşdirmək yollarını axtarmaqda kömək etməyə hazırdır: “Ötən ilin sentyabr ayında zorakılıq halları artdıqdan sonra biz Ermənistanın sorğusu əsasında KTMT-nin Baş katibinin rəhbərliyi altında ora xüsusi missiya göndərdik. Baş katib Azərbaycanla sərhəddə yerləşən Ermənistan ərazisində KTMT missiyasının yaradılması ilə bağlı planı təqdim etdi. Plan çoxdan hazır idi, lakin Ermənistan tərəfi özü bizi tələsdirmirdi. Nəticədə İrəvanda keçirilən sammitdə müvafiq qərarın mətni hazırlandı. Amma rəsmi İrəvan bəyan etdi ki, qərar yalnız o halda lazım olar ki, onun mətnində Azərbaycanın davranışı qəti şəkildə pislənsin. Təşkilata üzv dövlətlərin heç də hamısı buna hazır deyildi".

S.Lavrov vurğulayıb ki, Qarabağ müharibəsinin tarixi onilliklərə ölçülür: "Ermənistan uzun illər Azərbaycanın Qarabağ ətrafında yerləşən 7 rayonunu işğal etmişdi. Rusiya çoxsaylı həll variantları təklif etsə də, Ermənistanın hələ keçmiş rəhbərliyi bu variantları müsbət qəbul etmirdi və heç vaxt iddia etmədiyi əraziləri əlində saxlamağa çalışırdı”.
"Qərb Moldovanı növbəti Ukrayna kimi görür""Qərb Moldovanı növbəti Ukrayna kimi görür".

“Report”un Rusiya bürosunun məlumatına görə, bunu Rusiyanın xarici işlər naziri Sergey Lavrov “Rossiya 24” telekanalına müsahibəsində deyib.

“Qərb inkişaf etməkdə olan ölkələrin neytrallığına hörmət etmir və demək olar ki, hər gün Rusiyaya qarşı sanksiyalara qoşulmayanlara təzyiq göstərir”, - o qeyd edib.

S.Lavrov Rusiyanın Ukrayna ilə bağlı danışıqlardan imtina etməsi ilə bağlı tezisinin yalan olduğunu və Rusiyanın bunu təkzib etməyə davam edəcəyini vurğulayıb.
İsrail təhlükəsizlik qüvvələri terrorda şübhəli bilinən 17 şəxsi saxlayıbİsrail təhlükəsizlik qüvvələri İordan çayının qərb sahilində terror fəaliyyətlərində iştirakda şübhəli bilinən 17 fələstinlini saxlayıb.

"Report" TASS-a istinadən xəbər verir ki, bu barədə İsrail ordusunun mətbuat xidməti məlumat yayıb.

“İsrail Müdafiə Qüvvələri, Baş Təhlükəsizlik Xidməti və Sərhəd Polisi bu gecə İudeya və Samariyada 17 şübhəlinin tutulması üçün tədbirlər həyata keçirib”, - məlumatda qeyd edilib.

Bildirilib ki, digər məsələlərlə yanaşı, Hevron, Nablus və Kalkilya şəhərlərində, həmçinin İordan çayının qərb sahilinin bir sıra kənd və qəsəbələrində reydlər keçirilib, bəzi ərazilərdə atışma səsləri eşidilib və toqquşmalar baş verib. Cenin şəhəri yaxınlığında naməlum şəxslər gecə saatlarında İsrail ordusunun postunu atəşə tutublar. Mətbuat xidməti hərbçilər arasında xəsarət alanın olmadığını əlavə edib.


Güneyli rejissor ölüm aclığına başladıTehranın Evin həbsxanasında saxlanılan tanınmış rejissor Cəfər Pənahi aclıq aksiyasına başlayıb.

Bu barədə rejissorun həyat yoldaşı Tahirə Səidi özünün sosial media hesabında yazıb.

“Qanunsuzluqlara və hüquqlarımın pozulmasına görə, fevralın 1-dən quru aclığa başlayıram. Bunu sərbət buraxılana və ya həyatımı itirənə kimi davam etdirəcəyəm”, - Cəfər Pənahi həyat yoldaşına bildirib.

İran və dünya kinosunun tanınmış simalarından biri, dünyada beynəlxalq və nüfuzlu festivalların bir çox mükafatlarının sahibi Cəfər Pənahi iyulun 11-də təhlükəsizlik məmurları tərəfindən həbs edilib.
Donbas uğrunda şiddətli döyüşlər başlayırRusiyanın hücum əməliyyatında və Donbas uğrunda ağır döyüşlərin pik nöqtə mart ayında baş verə bilər, o zaman Rusiya əsas qüvvələrini oraya köçürəcək, texnika və silahlar gətirəcək.

Avrasiya.net xəbər verir ki, bunu ukraynalı hərbi ekspert Oleq Jdanov deyib.

"Donbas uğrunda epik döyüşün ikinci mərhələsi başlayır. Onlar artıq hücum əməliyyatına start veriblər. Mümkün qədər təzyiq göstərməyə, hücum cəhdlərini artırmağa çalışırlar və bundan sonra da artıracaqlar. Sadəcə olaraq, proqnozlara görə, bu hücum cəhdlərinin pik nöqtəsi martda ola bilər”, - ekspert qeyd edib.
Yasin Hüseynzadəni aradan götürəcəklər – BaşbuğBelə adamlar həmişə istifadə edilir. Qurulan isə İranın öz oyunu və vəziyyəti öz xeyrinə dəyişdirmə cəhdidir. Terrorçunun ağlı yerindədir, bunu səfirlikdəki görüntülər də sübut edir.

Bu sözləri Axar.az-a 27 yanvarda ölkəmizin İrandakı səfirliyində terror aktı törədən Yasin Hüseynzadənin ruhi xəstəxanaya yerləşdirilməsi haqqında danışan Türkiyənin istefada olan kəşfiyyat polkovniki Coşqun Başbuğ deyib.

Polkovnik terrorçunun ruhi xəstəxanada öldürülməsi ehtimalının olduğunu vurğulayıb:

“Hazırda səfirlikdə törədilən terror aktına görə İrana çox böyük etiraz və təzyiq var. Terrorçunun ruhi xəstə olduğunu deyib, onu xəstəxanaya yerləşdirmək sözügedən təzyiqlərin ən asan yoludur. Məsələnin tamamilə bağlanması üçün xəstəxanada Yasin Hüseynzadənin ölümü təşkil edilə və hadisəyə intihar görüntüsü verilə bilər”.

Qeyd edək ki, istintaqı aparan Tehran Cinayət Prokurorluğu Y.Hüseynzadənin şizofreniya da daxil olmaqla, bir sıra psixi problemlərdən “əziyyət çəkdiyi” qənaətinə gəlib. Terrorçu ən azı bir ay Tehranda yerləşən psixiatriya xəstəxanalarından birində qalacaq və burada müxtəlif müayinələrdən keçiriləcək.
İran terrorçular üçün 4 milyard ayırdı - Zamaniİranın növbəti il büdcəsində, vergilərin 47 faiz artımına baxmayaraq, 10 faiz kəsr olacaq. Buna rəğmən, milləti əzən qurumlar üçün ayrılan büdcə artırılıb.

Bu sözləri Axar.az-a Güney Azərbaycandan olan iqtisadçı ekspert Sabir Zamani deyib.

Onun sözlərinə görə, SEPAH-ın büdcəsi önümüzdəki il 28 faiz artaraq, 120 trilyon tümənə (4 milyard ABŞ dolları) çatacaq.

“Polisin büdcəsi 62 trilyon, ETTELAAT-ın isə 20 trilyon təşkil edir. Həbsxanalar üçün 10 trilyon vəsait ayrılıb. Bunları bir yerə toplasaq, ölkə vətəndaşı üçün adambaşına 3 milyon tümən, təxminən yüz dollar düşür. Yəni rejim hər iranlını əzmək üçün bu qədər büdcə ayırıb”.

O bildirib ki, İran rejimi yeni il üçün (21 mart) əlillərə ayrılan büdcəni azaldaraq, həbsxana və polis binalarının tikintisinə yatırır:

“Əlillərə xidmət mərkəzlərinin büdcəsi kəsilib. Bizim xəstəxanalarımızın 60 faizi və hər 3 məktəbdən biri standarta uyğun deyil. İran rejimi isə milləti əzmək üçün növbəti ildə 59 həbsxana tikəcək. Həmçinin polislər üçün yeni binaların tikilməsi də planlaşdırılır. Bunun da xərci 200 milyon dollar edir. Güc strukturları üçün nəzərdə tutulan büdcə təkcə rəsmi büdcə ilə kifayətlənmir. Belə ki, ölkədə SEPAH-ın özünün özəl şirkətləri var, orada on minlərlə işçi çalışır. İranın iqtisadiyyatında böyük bir payı var və oradan da böyük gəlir əldə edir”.

İqtisadçının sözlərinə görə, büdcədən İran ideologiyasının reklamı və təbliğatına da böyük məbləğdə pul ayrılıb:

“İslamı təbliğ mərkəzinin büdcəsi 53 faiz artırılaraq, 2,3 trilyon tümənə çıxıb. Xomeyninin məzarına da hər il olduğu kimi yenə maddi vəsait ayrılıb. Bu il isə bu rəqəm 36 milyard tüməndir. SEPAH-a tabe “Camaatul Mustafa” ideologiya mərkəzinə 900 milyard tümən pul veriləcək. Qumdakı beyinyuma mərkəzi var, orada müxtəlif ölkələrdən gələnləri terrorçu kimi yetişdirirlər, onlar üçün də 9 trilyon tümən vəsait nəzərdə tutulub. İranın Əmək Nazirliyinin son məlumatına görə, ölkədə hər 3 insandan biri yetərincə bəslənə bilmir. Buna səbəb isə qida məhsullarında 65 faizdən çox inflyasiyanın olmasıdır. Bu, çox önəmli məsələdir ki, bir ölkədə insanlar yetərincə bəslənə bilmir, amma Xomeyninin məzarına külli miqdarda pul xərclənir”