“Rusiya Donbasa zərbələrini artırıb”.

“Report” xəbər verir ki, bunu Böyük Britaniya Müdafiə Nazirliyi kəşfiyyat məlumatlarına əsaslanaraq açıqlayıb.

“Rusiyaya mane olan onların üzləşdiyi ekoloji, maddi-texniki və nəqliyyat problemləridir. Həmçinin Ukrayna Silahlı Qüvvələrinin müqaviməti də qarşı tərəfin qarşısını alır. Onların mülki əhalini hədəf alması göstərir ki, Rusiya ordusu hələ də məqsədinə çata bilməyib”, - məlumatda bildirilib.

Qeyd edək ki, Donbasın Kremennaya, Torskoye və Zelenaya Dolina yaşayış məntəqələri ərazilərində Rusiya və Ukrayna qoşunları arasında döyüşlər davam edir. Rusiya hərbçiləri Liman qəsəbəsi istiqamətində növbəti dəfə hücuma keçmək məqsədi ilə yenidən qruplaşır. Onlar həmçinin Popasnaya kəndinin dərinliyinə irəliləmək üçün hücuma keçməyə çalışırlar. Rubejnoye və Severodonetskdə Rusiya hərbçilərinin basqın etmək cəhdlərindən sonra 130-a yaxın yaralı hərbçi Novoaidar şəhərinin yerli xəstəxanasına çatdırılıb. Hazırda bununla bağlı rəqəmlər dəqiqləşdirilir.

Rusiya ordusu Donetsk istiqamətində Maryinka qəsəbəsi ərazisində hücum əməliyyatları keçirib. Onlar əsas səylərini Mariupol şəhərini ələ keçirməyə, Azovstal zavodunun ərazisində hücum əməliyyatlarını davam etdirməyə yönəldir.

Rusiya 21 belçikalı diplomatı ölkədən çıxarmaq qərarına gəlib.

Axar.az xəbər verir ki, bu barədə “Brusel Tayms” məlumat yayıb.

Məlumata görə, aprelin 19-da Rusiya 21 belçikalı diplomatı arzuolunmaz şəxs elan edib. Diplomatlar mayın 3-dək ölkəni tərk etməlidirlər.

Belçika hökuməti məsələ ilə bağlı şərh verməyib. Belçikalı diplomatlarla yanaşı, Moskva Niderlandı təmsil edən 15 diplomatı da ölkədən çıxarıb.

Bildirilir ki, rus diplomatlarının AB ölkələrindən qovulmasına cavab olaraq Rusiya da bu addımı atır.

Ukraynaya hərbi yardım edən ABŞ-ın daha 7 təyyarəsi yaxın 24 saat ərzində Avropaya yola düşəcək.

"Report" "Reuters"ə istinadən xəbər verir ki, bu barədə Pentaqonun yüksək rütbəli nümayəndəsi bildirib.

Bir gün əvvəl Ağ Evin mətbuat katibi Cen Psaki demişdi ki, Birləşmiş Ştatlar həftə sonu Ukraynaya 800 milyon dollarlıq yeni hərbi yardım paketindən silahla dolu 4 təyyarə göndərib.

ABŞ Prezidenti Cozef Baydenin aprelin 13-də elan etdiyi kimi, Vaşinqton Kiyevə daha 800 milyon dollar dəyərində hərbi yardım göstərəcək, o cümlədən 11 Mi-17 helikopteri, 200 zirehli transportyor, 18 155 mm-lik haubitsa və 40 min artilleriya mərmisi, həmçinin 300 mərmi göndərəcək.

ABŞ Ukraynaya yüz milyonlarla dollarlıq yeni hərbi yardım paketi elan etmək niyyətindədir.

Bu barədə NBS telekanalı məlumat yayıb.

Yeni yardım paketinin bu həftə elan ediləcəyi gözlənilir.

Fransa Ukraynaya müdafiə silahları verməyə davam edəcək.

Bunu Fransa Nazirlər Kabinetinin rəsmisi Qabriel Attal deyib.

“Biz müharibəyə son qoymağa çalışmaq üçün bütün faydalı təşəbbüsləri davam etdirəcəyik. Bu o deməkdir ki, Kiyevə həm humanitar yardım edəcəyik, həm də müdafiə silahları verəcəyik”, - Attal bildirib.

“Ukraynaya təcili olaraq Almaniyadan ağır silahlar lazımdır”.

“Report” xəbər verir ki, bunu Kiyevin meri Vitali Kliçko “Bild” qəzetinə müsahibəsində bildirib.

“Bizə təcili olaraq Almaniyadan ağır silahlar lazımdır. Hər gecikmə insan həyatı bahasına başa gəlir. Ağır silahlar gətirilənə qədər daha nə qədər insan ölməlidir”, - deyə o, əlavə edib.

Fevralın 26-da Almaniya hökuməti ilk dəfə olaraq Ukraynaya silah tədarükünü təsdiqləyib. Berlin Kiyevdəki hakimiyyət orqanlarına 1000 tank əleyhinə silah və 500 Stinger raketi göndərmək qərarına gəlib.

Ukrayna Rusiyanın NATO-nun silah təchizatı marşrutlarına zərbələr endirməsini istisna edə bilməz, lakin Moskva onu da başa düşməlidir ki, bu, alyansın müharibəyə birbaşa cəlb olunması demək olardı.

Axar.az xəbər verir ki, bu barədə “Defense Express” informasiya və konsaltinq şirkətinin direktoru Sergey Zqurets deyib.

Onun fikrincə, ruslar uzaqmənzilli silahların əldə edilməsi perspektivindən çox narahatdırlar:

“Rusları ən çox maraqlandıran modellərdən danışanda düşünürəm ki, bunlar həqiqətən də 300 km-ə qədər məsafədə təyyarə və helikopterləri, yaxud onların daşıma vasitələrini, logistikasını məhv etməyə qadir olan uzaqmənzilli silahlardır. Bu gün bizim tamamilə çatışmayan cəhətimiz budur. Çünki bu gün bizdə ən böyük zərbə məsafəsi 100-120 kilometrə qədərdir. Bu kifayət deyil. Donbas uğrunda Rusiya ilə müharibənin ikinci mərhələsinə hazırlaşırıqsa, o zaman bu modellərə həqiqətən ehtiyacımız var. İndiyə qədər bizdə çatışmazlıq çoxdur. Ancaq xarici artilleriya, məsələn, artıq döyüş meydanında olan Çexiyadan haubitsalar çatdırılıb. Bunlar sovet modelləri ilə müqayisədə tamamilə effektiv olan haubitsalardır və 152 və 155 millimetrdir. Amerikanın əks batareya radarları da var”.

Çin Rusiyaya silah tədarük etsə və ya sanksiyalardan yan keçməyə kömək etsə, ciddi nəticələrlə üzləşəcək.

“Report” xəbər verir ki, bunu ABŞ Dövlət Departamentinin nümayəndəsi Ned Prays deyib.

“Əgər Çin Xalq Respublikası Rusiyaya silah tədarükü üzərində işləsə, Rusiyaya sanksiyalardan yan keçməyə kömək etsə, bu, təkcə bizim tərəfimizdən deyil, həm də müttəfiqlərimiz, tərəfdaşlarımız tərəfindən ciddi nəticələrə səbəb olacaq”, - o deyib.

Bundan əvvəl maliyyə nazirinin müavini Uolli Adeyemo bildirmişdi ki, Rusiya əleyhinə sanksiyaların növbəti hədəfi hərbi sənaye kompleksidir.

Rusiyanın Müdafiə Nazirliyi ilk dəfə olaraq müharibədə həlak olan Ukrayna Silahlı Qüvvələrinin əsgərləri haqda siyahı dərc edib.

Siyahıda həlak olan Ukrayna əsgərlərinin şəxsi məlumatları əks olunub.

Bu barədə bazar ertəsi, aprelin 18-də Rusiyanın Müdafiə Nazirliyi rəsmi Telegram kanalında məlumat verib.

Siyahıda hərbçilərin doğum tarixi, hərbi ixtisasları və vəzifələri, hərbi hissələrin nömrəsi, habelə ölüm halları göstərilir. Siyahı müvafiq olaraq üç və dörd hissədən ibarət iki böyük qrupa bölünür.

Müdafiə Nazirliyinin məlumatında ​​vurğulanır ki, hərbi idarə Ukrayna ordusunun, milli qvardiyasının və gələn xarici muzdluların həqiqi itkiləri barədə etibarlı məlumatlara malikdir.

Rusiya tərəfinin iddiasına görə, bu günə qədər Ukrayna tərəfindən real sənədləşdirilmiş itkilər 23367 nəfərdir.

“Rusiya Müdafiə Nazirliyinin sərəncamında olan sənədlər də çoxlu sayda fərari, yaralı və itkin düşmüş hərbçilərin olduğuna dəlalət edir”, - deyə məlumatda bildirilir.

Xatırladaq ki. Ukrayna prezidenti Vladimir Zelenski bir neçə gün öncə müharibədə ölən ukraynalı hərbçilərin sayının təxminən 3 nəfər olduğunu bildirmişdi.

Ukrayna Silahlı Qüvvələri Baş Qərargahının məlumatına görə, Rusiya tərəfi bu günə kimi müharibədə 20600 nəfər itirib.

Rusiya Ukraynada müharibəyə fevralın 24-də başlayıb.

Rusiya ordusunun 49-cu zenit raket briqadasının komandiri polkovnik İvan Qrişin Ukraynada öldürülüb.

Bu barədə Ukrayna Silahlı Qüvvələri məlumat yayıb.

“Rusiya Silahlı Qüvvələrinin tərkibindəki yeni işğalçını qarşılayın: Smolenskdəki 49-cu zenit raket briqadasının komandiri polkovnik İvan Qrişin. “Təlim”lərdə azmışdı, artıq evinə “qayıdır”, - məlumatda qeyd olunub.