Sülhün bərqərar olması üçün regional münasibətlərin məzmununu və keyfiyyətini dəyişmək lazımdır. Bunun üçün sadə, lakin vacib şeylərdən başlamalıyıq.

Axar.az xəbər verir ki, bunu Ermənistanın Baş naziri Nikol Paşinyan deyib.

Paşinyan Ermənistanda və ya Azərbaycanda siyasi opponentləri incitmək üçün müvafiq olaraq “türk”, “erməni” “söyüş praktikası”na son qoyulmasının vacibliyini bəyan edib:

“Ermənistanda mənim özümü də çox vaxt “türk” adlandırırlar. Ancaq bunu özümə təhqir kimi qəbul etmirəm. Sülhə nail olmaq istəyi varsa, bu çirkin əmələ son qoymalıdır. Etnik qrupların adları heç vaxt təhqir olmamalıdır”.

2023-cü maliyyə ilinin müdafiə büdcəsi qanun layihəsi bir neçə “A-10” qırıcısının istismardan çıxarılmasını ehtiva edir və ABŞ Müdafiə Nazirliyinə beşinci nəsil “F-22” qırıcılarını saxlamağa icazə verir.

“Report” xəbər verir ki, bu barədə “Breaking Defence” nəşri məlumat yayıb.

Qeyd edilib ki, İndiana ştatındakı Fort Ueyn Hərbi Hava Qüvvələri bazasının 21 qırıcısı istismardan çıxarılacaq, onların yerini yeni modifikasiyalı dördüncü nəsil “F-16” qırıcıları alacaq.

Digər tərəfdən, qanun layihəsi Pentaqona döyüş təyyarələri parkını 1 970-dən 1 800 ədədə qədər azaltmaq imkanı verir, xüsusən də köhnəlmiş 26 ədəd “F-16” qırıcısından və 67 ədəd “F-15” təyyarəsindən imtina etməyə imkan verir.

Fotoqraf Xalid əl-Misslam Qətərdə keçirilən dünya çempionatını işıqlandırarkən dünyasını dəyişən ikinci jurnalist olub.

Avrasiya.net xəbər verir ki, fotomüxbirin ölümü barədə Qətərin “Gulf Tayms” qəzeti məlumat yayıb.

Qətərli Xalid əl-Misslam Al Kass TV-nin fotomüxbiri olub. Ölümün səbəbi barədə məlumat verilməyib.

Qeyd edək ki, dekabrın 9-da Lusaildəki Milli Stadionda Argentina və Niderland milli komandaları arasında keçirilən dünya çempionatının 1/4 final matçında “CBS Sports” şəbəkəsində işləyən amerikalı idman jurnalisti Qrant Uol vəfat edib. Jurnalistin qardaşı sosial şəbəkədə bildirib ki, Qrant mətbuat lojasında huşunu itirib, tibb işçiləri ürək-ağciyər reanimasiyası aparıblar, amma bu onun həyatını xilas etməyib. Futbol icmalçısı dekabrın 10-da səhər saatlarında yerli xəstəxanada dünyasını dəyişib.

Hindistanın Baş naziri Narendra Modi Rusiya Prezidenti Vladimir Putinlə təkbətək görüşdən imtina edib.

Bu barədə "Blumberg" məlumat yayıb.

Bildirilib ki, Putinin Ukraynada nüvə silahından istifadə ilə bağlı hədələrindən dolayı ənənəvi olaraq dekabr ayında keçirilən tədbir ləğv olunub.

Finlandiya və İsveç NATO-ya üzv olmağa hazırdır.

Bunu ABŞ dövlət katibi Antoni Blinken deyib.

ABŞ rəsmisi İsveç və Finlandiyanın NATO-ya rəsmi daxil olmasının tezliklə başa çatacağına əminliyini ifadə edib.

“Səudiyyə Ərəbistanı Pakistana maliyyə yardımı edəcək”.

“Report” xəbər verir ki, bunu Səudiyyə Ərəbistanının maliyyə naziri Məhəmməd əl-Cədaan bildirib.

Onun sözlərinə görə, Səudiyyə hökuməti Pakistana mümkün olduğu qədər dəstəyini davam etdirəcək:

“Krallıq müttəfiqləri ilə əlaqələri gücləndirməyə çalışaraq region ölkələrinə maliyyə dəstəyi göstərmək üçün bir sıra addımlar atıb. Valyuta ehtiyatlarını artırmaq və Pakistana bu ayın əvvəlində koronavirus pandemiyasının iqtisadi təsirini aradan qaldırmağa kömək etmək üçün 3 milyard dollarlıq əmanətin müddətini uzadıb”.

Nazir əlavə edib ki, Səudiyyə Ərəbistanı Misirə daha çox sərmayə qoymağı və Türkiyədə sövdələşmələrə başlamağı planlaşdırır:

Türkiyə ilə əlaqələrimiz xeyli yaxşılaşır və ümid edirik ki, investisiya imkanlarımız olacaq. Biz Misirə aktiv şəkildə sərmayə qoymağa başlamışıq və investisiya imkanları axtarmağa davam edəcəyik və bu, depozitlərdən daha vacibdir. Depozitlər geri götürülə bilər, lakin investisiyalar qalır”.

Avropa Birliyi İrana qarşı sanksiyalar hazırlayır.

Axar.az xəbər verir ki, sanksiyalar müəyyən fiziki və hüquqi şəxslər üçün səyahət qadağaları və xarici aktivlərin dondurulmasını özündə ehtiva edir.

Dekabrın 12-də Avropa Birliyi xarici işlər nazirlərinin Brüsseldə keçiriləcək iclasında yeni sanksiyalar paketinin təsdiqlənəcəyi gözlənilir.

Rusiya müharibə başladandan bəri yüzlərlə ukraynalı mülki şəxsi edam edib.

Axar.az xəbər verir ki, bunu BMT-nin Ukraynadakı İnsan Haqları Monitorinq Missiyasının rəhbəri Matilda Boqner deyib.

“Martın 5-dən 30-dək rus qoşunlarının nəzarətində olan Kiyev yaxınlığındakı Buça şəhərində 73 dinc sakinin öldürülməsini sənədləşdirib. Ölənlər arasında 54 kişi, 16 qadın, 2 oğlan və 1 qız var. Daha 105 iddia edilən qətl faktı təsdiqlənmə mərhələsindədir. BMT indi təkcə Rusiyanın işğalının ilk 6 həftəsində üç regionda 441 mülki şəxsin (341 kişi, 72 qadın, 20 oğlan və 8 qız) zorakılıqla öldürülməsini sənədləşdirib”,- o bildirib.

O qeyd edib ki, Ukraynanın Kiyev, Çerniqov və Sum bölgələrinin işğalı zamanı baş vermiş daha 198 qətlin təsdiqlənməsi istiqamətində işlər davam etdiyi üçün faktiki rəqəmlərin daha çox olacağı ehtimalı var:

“İşğalçılar tərəfindən edam edilən bütün qurbanların 88%-i kişi və oğlanlardır”.

Belarusda dövlətə xəyanətə görə məmurlar və hərbçilər üçün ölüm cəzası tətbiq ediləcək.

Avrasiya.net Modern.az-a istinadən xəbər verir ki, bu barədə Respublika Milli Assambleyasının Nümayəndələr Palatasının mətbuat xidməti bildirib.

Müvafiq qanun layihəsi deputatlar tərəfindən birinci oxunuşda qəbul edilib.

Qeyd olunur ki, qanun layihəsinin hazırlanmasında məqsəd ekstremist xarakterli cinayətlərin qarşısının alınması üçün tədbirlər görməkdir.

Belarus Avropada ölüm cəzasının hələ də tətbiq olunduğu yeganə ölkə olaraq qalır. 1996-cı ildə keçirilən referendumda edam cəzasının qanunvericiliyə salınması qərarı ölkə sakinləri tərəfindən dəstəkləndi. Respublikada ölüm hökmü xüsusilə ağır cinayətlərə görə verilir.

"Almaniyanın 11 əyalətində 130 nöqtədə 3 min polisin iştirakı ilə keçirilən əməliyyat nəticə verib".

"Report"un Avropa bürosunun məlumatına görə, bu barədə Almaniya Federal Prokurorluğundan məlumat verilib.

Bildirilib ki, Almaniyada dövlət çevrilişi etməyə hazırlaşan qrupun 52 üzvü saxlanılıb.

Onlar Almaniya Federativ Respublikasının konstitusiya quruluşunu devirmək və 1871-ci il Almaniya İmperiyasından nümunə götürülmüş dövlət qurmaq məqsədilə terror təşkilatı yaratmaqda ittiham edilirlər.

Məlumata görə, saxlanılanlar arasında keçmiş hərbçilər də var. İddia olunur ki, həbs qərarı verilən şəxslər tərəfindən Almaniya Bundestaqına basqın etmək planlaşdırılıb.

Almaniyanın Federal ədliyyə naziri Marko Buşman öz tviter hesabındakı paylaşımda bu gün səhər saatlarından etibarən böyük bir terrorla mübarizə əməliyyatının keçirildiyini, federal prokurorun terror şəbəkəsi ilə bağlı araşdırma aparıldığını bildirib.

“Konstitusiya institutlarına silahlı hücumun planlaşdırıldığına dair bir şübhə var. Onlar 1871-ci il Almaniya İmperiyasını nümunə götürən bir dövlət qurmağı hədəfləyirlər”- deyə Buşman əlavə edib.

Saxlanılanlar arasında uzun müddətdir alman polisinin diqqət mərkəzində olan ekstremist “Reichsbürger” (Reyx vətəndaşları) hərəkatının üzvlərinin də olduğu bildirilir.

Qeyd edək ki, “Reichsbürger” üzvləri müasir Almaniya dövlətini tanımaqdan imtina edir, hətta vergi vermirlər. Bu səbəbdən də onlarla bağlı hazırda minlərlə məhkəmə işi var.