"Azərbaycan gəncinə milli-mənəvi dəyərlərimiz təlqin edilməlidir"Prezident İlham Əliyev: "Milli-mənəvi dəyərlər dövlətimizin əsasını təşkil edir və mən dəfələrlə demişəm ki, müasir və müstəqil Azərbaycan dövləti milli dəyərlər üzərində qurulub" .

Azərbaycan xalqı hər zaman milli dəyərlərə sadiqliyini göstərib, bu dəyərləri əsrlərlə yaşadaraq onu inkişaf etdirib. Tarixin hər bir dövründə ölkəmizdə milli dəyərlərimizin qorunması və onun gələcək nəsillərə çatdırılması aktual olub. Elə günümüzdə də bu müsbət tendensiya özünü qoruyub saxlayır. Çünki milli dəyərlərimizin Azərbaycan xalqının formalaşmasına təsiri böyük olduğu kimi, milli dövlətçiliyimizin möhkəmləndirilməsində də xüsusi rolu var.

YAP Siyəzən rayon təşkilatının sədri Samir Baxşiyev bildirib ki, müasir Azərbaycan tarixinə nəzər saldıqda milli-mənəvi dəyərlərimizin qorunması və inkişafı prinsiplərinin banisi kimi Ulu Öndər Heydər Əliyevi görürük. Ulu Öndər milli-mənəvi dəyərlərimizi təkcə milli varlığımızın yox, həm də siyasi varlığımızın – dövlət quruculuğu prosesinin mühüm atributu hesab edirdi. Mənsub olduğu xalqın tarixi keçmişinə, mənəvi irsinə və milli dəyərlər sisteminə sönməz məhəbbət duyğularıyla yanaşan Ulu Öndər deyirdi: “Hər xalqın özünə, öz tarixi köklərinə, əcdadları tərəfindən yaradılmış milli-mənəvi dəyərlərinə bağlılığı böyük amildir. Biz də indi dünyanın mütərəqqi mənəvi dəyərlərindən istifadə edərək, xalqımızın mədəni səviyyəsini daha da inkişaf etdirərək, gənc nəsli daha da sağlam əhval-ruhiyyədə, saf əxlaqi əhval-ruhiyyədə tərbiyələndirməliyik”.

Azərbaycanın görkəmli şəxsiyyətləri, xalqını,dövlətini sevən ziyalıları daim mədəniyyətimizin inkişafına, adət-ənənələrimizin zənginləşdirilməsinə çalışıb, öz töhfələrini veriblər. Onlar gənclərimizin milli-mənəvi dəyərlər əsasında tərbiyələndirilməsinə böyük diqqət və həssaslıqla yanaşıblar.

Mənəvi dəyərlər sisteminin əsasını ailə, böyüklərə ehtiram, humanistlik, mərhəmət, xeyirxahlıq, əxlaq, sülhsevərlik, vətənpərvərlik,dini dəyərlərə hörmət təşkil edir. Onların qorunması daim dövlətin diqqət mərkəzindədir. Bu gün şəhid ailələrinin, müharibə veteranlarının, valideyn himayəsindən məhrumolmuş uşaqların, aztəminatlı ailələrin, qaçqınların və məcburi köçkünlərin, fiziki imkanları məhdud insanların dövlətin diqqət və qayğısı ilə əhatə olunması həm sosial, həm də mənəvi sahədə həyata keçirilənsiyasətin bariz nümunəsidir.

Bu gün Azərbaycan gəncinə milli-mənəvi dəyərlərimiz təlqin edilməlidir. Düşmən zatən bəllidir. Ona görə də bu istiqamətdə hər bir gənc öz üzərinə düşən vəzifəni yerinə yetirməli olduğunu dərk etməlidir. Əgər bu gün gənclərimizin bir hissəsi cəbhədə vuruşursa, digər bir hissəsi elm, təhsil sahəsində irəli getməlidir. Hər kəs əlinə silah ala bilməz. Ancaq hər kəs olduğu yerdə öz dövlətini, dəyərlərini müxtəlif üsullarla müdafiə edə bilər. Mühüm olan gənclərimizə bunun öyrədilməsidir.

Bu gün dünyanın bir çox ölkələrində gənclərimiz təhsil alır, işləyir. Onlar bizim milli-mənəvi dəyərlərimizi dünya müstəvisində tanıtmalıdır. Bunun üçünsə valideynlər öz övladlarına bu ruhda, bu istiqamətdə tərbiyə verməyi bacarmalıdır. Uşaq öz dövlətini, bayrağını tanımalı, adət-ənənəsinə, milli dəyərlərinə yaxından bələd olmalıdır.

Son illərdə Prezident İlham Əliyevin rəhbərliyi ilə Azərbaycan mədəniyyətinin inkişafı sahəsində də böyük işlər həyata keçirilib. Bu istiqamətdə atılan addımlar hər bir Azərbaycan gəncini sevindirir. Fərəhlənirik ki, Azərbaycan gəncləri bu təqdirəlayiq işlərə, gözəl əməllərə seyrçi qalmırlar. Bu sahədə də fəallıq nümayiş etdirir, milli-mənəvi dəyərlərimizin qorunmasına, yaşadılmasına öz töhfələrini verirlər. Hər bir gənc dövlətini, millətini sevməli və ona xidmət etməlidir. Azərbaycan gəncliyi böyük potensiala malikdir, sağlamdır, güclüdür, mübarizdir. Bizim gənclik heç vaxt yad təsirlərin altına düşməz, çünki o gənclik dövlətini, dövlətçiliyini sevir, Prezidentinə sadiqdir.

Rüstəm Cəfərov

Yazı Azərbaycan Demokratik İslahatların İnkişafı Mərkəzi (ADİİM) İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Milli-mənəvi dəyərlərimiz tariximiz və gələcəyimizdir» layihəsi çərçivəsində hazırlanıb
Rusiyanın Ukrayna ilə bağlı iddialarını qəbul etməyəcəyik - BaydenBirləşmiş Ştatlar Rusiyanın suveren Ukrayna ərazisi ilə bağlı iddialarını heç vaxt qəbul etməyəcək.

Bunu ABŞ Prezidenti Co Bayden deyib.

O, Rusiya-Ukrayna müharibəsində hər zaman Ukraynanın yanında olacaqlarını bildirib.

"Bu qondarma referendum tamamilə saxtadır. Referendumun nəticələri Moskvada hazırlanıb”, - deyə Bayden bildirib.
Xoş xəbərlər gözləyirik, ordu irəliləyir - QaydayLuqansk vilayətində cəbhədən xoş xəbərlər gözləyirik. Ordu inamla irəliləyir.

Bu barədə Luqansk vilayət administrasiyasının rəhbəri Sergey Qayday deyib.

“Cəbhədə baş verən hadisələri indi şərh etmək istəməzdim. Bununla biz ancaq ordumuza zərər verə bilərik, ona görə də ancaq kömək edəcəyik. Baş Qərargahdan rəsmi məlumat gözləyək. Bizdə Xarkov istiqamətində olduğundan daha çətin vəziyyət var. Bir şeyi deyim: Ukrayna Silahlı Qüvvələri planlaşdırıldığı kimi, hər şeyi edir, hərəkət edir. Ümid edirəm ki, yaxın gələcəkdə çox müsbət xəbərlər alacağıq”, - Qayday söyləyib.
Rəhim Rəhimli vəfat etdiTanınmış müğənni, bəstəkar Rəhim Rəhimli vəfat edib.

Kult.az xəbər verir ki, bu barədə Xalq artisti Faiq Ağayev İnstaqram hesabında yazıb.

F.Ağayev R.Rəhimlinin ölüm səbəbini açıqlamayıb.

Qeyd edək ki, R.Rəhimli bir sıra klipləri, mahnıları ilə tanınıb. 2018-ci ilin iyunundan 2020-ci ilin yanvar ayına kimi "MTV Azərbaycan" telekanalının direktoru işləyib. O, eyni zamanda bəstəkarlıq fəaliyyəti ilə məşğul olub. İlkin məlumata görə, 43 yaşlı musiqiçi ürəktutmadan vəfat edib. Allah rəhmət eləsin!
İrəvan müharibəyə hazırlaşır - Erməni general: "Əmr almışıq!""Ermənistanın suveren sərhədlərinin bərpası ilə bağlı aydın və konkret əmr var".

Modern.az Ermənistan KİV-nə istinadən xəbər verir ki, bunu sentyabrın 29-da Silahlı Qüvvələrin Baş Qərargah rəisinin müavini, general-mayor Arakel Martikyan Qeqarkunik vilayətinin Kut kəndində Ermənistanda akkreditə olunmuş səfirlərlə görüşündə bildirib.

Onun sözlərinə görə, Silahlı Qüvvələrin vəzifəsi Ali Baş Komandanın əmrini yerinə yetirməkdir.

Arakel Martikyanın açıqlamasından belə məlum olur ki, Ermənistan Azərbaycan ordusunu sərhəddə əvvəlki mövqelərə qaytarmaq üçün hücuma hazırlaşır.
YAP rəsmiləri şəhid ailəsini ziyarət ediblər - Şabranda29 sentyabr 2022-ci il tarixdə Yeni Azərbaycan Partiyası Şabran rayon təşkilatının Sədri Mehdi Balabəyov, Şabran rayon İcra Hakimiyyəti başçısının birinci müavini Hüseyin İlyasov, rayon İcra Hakimiyyəti başçısının Humanitar məsələlər üzrə müavini İlkin Ağayev oartiya əməkdaşları ilə birgə 44 günlük Vətən müharibəsi şəhidi Şabran rayonunun Pirəmsən kəndindən olan şəhid-leytenant Həsənov Aqil Nofəl oğlunun 2-ci ildönümü ilə əlaqədar olaraq ailəsini ziyarət etmişlər.

Şəhid ailəsinin üzvləri göstərilən diqqət və qayğıya görə Azərbaycan Respublikasının Prezidenti Cənab İlham Əliyevə və Azərbaycan Respublikasının Birinci vitse-prezidenti Mehriban xanım Əliyevaya öz dərin təşəkkürlərini bildirmişlər.Vətənimizin ərazi bütövlüyü, torpaqlarımızın azadlığı uğrunda canlarını qurban vermiş bütün Şəhidlərimizin əziz xatirəsini ehtiramla anırıq.

Allah bütün Şəhidlərimizə rəhmət etsin!

Tanınmış azərbaycanlı bloger də Rusiyanı tərk etdiRusiyada yaşayan məşhur azərbaycanlı bloger Hüseyn Həsənov daimi yaşayış yerini tərk edib.

Kult.az xəbər verir ki, gömrük məntəqəsindəki kompüterdən çəkilən fotoda Azərbaycan əsilli blogerin Rusiyanı tərk etdiyi görünür.

Bir neçə saat sonra isə Hüseyn Həsənov öz İnstaqram səhifəsinin hekayə bölməsində hava limanından video paylaşaraq “bir neçə günlük atamın yanına və sonra geriyə evə” cümləsini yazıb.

Bloqerin yerləşdirdiyi məlumatlardan onun Azərbaycanda olduğu ehtimal edilir.
Hulusi Akar: "Türkiyə daim Azərbaycanın yanındadır"“Türkiyə daim Azərbaycanın, Liviyanın yanındadır”.

Avrasiya.net xəbər verir ki, bunu Türkiyənin milli müdafiə naziri Hulusi Akar deyib.

O bildirib ki, Türkiyə ordusunun terrorla mübarizəsi uğurla davam edir: “Dayanmaq yoxdur. Dənizdə, havada, quruda mübarizə davam edir”.

H.Akar Türkiyənin bütün qonşularının ərazi bütövlüyünə hörmət etdiyini söyləyib: “Bizim kiminsə torpağında gözümüz yoxdur”.

“Harada terroçu varsa, ora bizim hədəfimizdir. “Pənçə Kilid” əməliyyatı uğurla davam edir. Bütün mağaralar bir-bir təmizlənir. Biz çalışırıq ki, mülki əhaliyə, tarixi abidələrə zərər dəyməsin”, - milli müdafiə naziri vurğulayıb.
Zelenski iki azərbaycanlını təltif etdi - ADLARPrezident Vladimir Zelenski Ukraynanın Rusiyaya qarşı apardığı müharibədə şücaət göstərmiş bir qrup hərbçini mükafatlandırıb.

Prezidentin mükafatlandırdığı müdafiəçilər sırasında iki azərbaycanlı da var.

Kiçik çavuş Azad Sultan oğlu Cəlalov 3-cu dərəcəli "İgidliyə görə" ordeni ilə təltif olunub.

Kiçik çavuş Vitali Maşallah oğlu Əmirşahov isə "Ukraynaya hərbi xidmət" medalı alıb.
İranın Azərbaycandakı səfirliyinin qarşısında aksiya keçirilibBu gün bir qrup şəxs İranın Azərbaycandakı səfirliyinin qarşısında piket keçirib.

Aksiya iştirakçıları İranda baş verən hadisələrlə bağlı etirazlarını bildiriliblər.

İştirakçılar "Cənubi Azərbaycana azadlıq", "Molla rejimi rədd olsun", "Fars rejimi rədd olsun", "Ölüm olsun İrana", "Diktator rədd olsun", "Molla rejimi qətliamı dayandır" , "Azadlıq, ədalət , "Milli Hökümət" kimi şüarlar səsləndiriblər.

Səfirliyin qarşısında aksiya iştirakçılarının bəyanatı səsləndirilib. Bəyanat səfirliyə təqdim edilib.

Aksiya insidentsiz başa çatıb.