İranda aksiyaçı qadın təhlükəsizlik qüvvələrinin əməkdaşları tərəfindən öldürülüb

İranda aksiyaçı qadın təhlükəsizlik qüvvələrinin əməkdaşları tərəfindən öldürülübİranda hicab qaydasını pozduğuna görə saxlanılan Məhsa Əmininin şübhəli ölümündən sonra başlayan etiraz aksiyalarında daha bir qadın - 20 yaşlı Hadis Nəcəfi təhlükəsizlik qüvvələrinin açdığı atəş nəticəsində həlak olub.

“Report” xarici mətbuata istinadən xəbər verir ki, bu barədə jurnalist və qadın hüquqları müdafiəçisi Məsih Əlinejad sosial media hesabında bildirib.

O, vurğulayıb ki, Nəcəf qarın, boyun, ürək nahiyələrindən və əlindən yaralanıb. Yaralı aparıldığı xəstəxanada dünyasını dəyişib.

Qeyd edək ki, sentyabrın 13-də İranın paytaxtı Tehranda hicab qaydasını pozduğuna görə 22 yaşlı Məhsa Əmini əxlaq polisi tərəfindən öldürülüb. Hadisə ölkədə geniş etiraz aksiyalarına səbəb olub. Təhlükəsizlik qüvvələri aksiyaları dağıtmaq üçün güc tətbiq edir. Nəticədə 41 nəfər öldürülüb.