Teymur Rəcəbov 1/4 finala vəsiqə qazandıOnlayn formada keçirilən blits şahmat üzrə “Airthings Masters” turnirində iştirak edən azərbaycanlı qrossmeyster Teymur Rəcəbov yarışın üçüncü günündə 3 qarşılaşma keçirib.

"Report" xəbər verir ki, Uesli So (ABŞ), Maksim Vaşye-Laqrav (Fransa) və Pentala Harikrişna (Hindistan) ilə üz-üzə gələn Rəcəbov bütün görüşləri heç-heçə ilə başa vurub.

Xal hesabını 6-ya çatdıran 33 yaşlı şahmatçı ilkin mərhələdə 5-ci pilləni tutaraq, 1/4 finala vəsiqə qazanıb. .

Qeyd edək ki, turnir 2021-ci il yanvarın 3-də başa çatacaq.

Əməkdar məşqçidən əhəmiyyətli tövsiyələr
Asif Abdullayev
Cüdo üzrə əməkdar məşqçi

Bugünkü gündə ölkəmizdə idmana olan maraq, qayğı çox yüksək səviyyədədir. Dövlət başçımızın əməyi və səyi nəticəsində, xalqımızın mübariz ruhu sayəsində idmançılarımız son zamanlar fantastik nəticələrə və uğurlara sahib olurlar. O cümlədən mənim işlədiyim doğma və əziz olan cüdo idman növü də populyarlığa və uğurlara görə ölkəmizdə yüksək reytinqə malikdir. Həmçinin cüdo idman növü artıq regionlarda da geniş yayılmışdır və inkişaf edir. Bu gün hər bir məşqçi işini böyük həvəslə davam etdirir. Bu məqaləni yazmaqda bir məsələni xatırladıb və qeyd etmək istərdim.
Uşaq və yeniyetmə idmanının qarşıya qoyduğu əsas vəzifə və həll etdiyi məsələ sağlamlığın möhkəmlənməsi, orqanizmin xarici faktorlara qarşı müqavimətinin artırılması və hormonik fiziki inkişafa nail olunmasıdır.

Amma məşqçi-müəllimlərin qarşısına qoyulan iş prinsipi, maraq, konkret nəticənin tələb olunması ona gətirir ki, Ümumi Fiziki Hazırlıq həcminin azalmasının sayəsində erkən yaşlardan belə sırf ixtisaslaşma, yarışa hazırlanma istiqamətində məşqlər aparılır. Bunun da nəticəsində gələcəkdə hərtərəfli fiziki inkiafın keyfiyyəti azalır.

Misal üçün belə bir cədvəli təqdim edək:

Azyaşlı uşaqlarda və yeniyetmələrdə ürəyin həcmi və frontal sahəsi
13 yaş 105,8 sm2 ------ --- 443 sm3±10
14 yaş 113 sm2 --------- 530 sm3±15
15 yaş 135 sm2 --------- 548 sm3±20
16 yaş 143,5 sm2 -------- 698 sm3±13,6

10 yaşında olan uşağın ÜRƏK HƏCMİ isə 138 sm3-dir. Fərqə baxın, dostlar. Artıq 13 yaşında ürəyin həcmi 443 sm3-ə çatır. Demək olar ki, 3 il ərzində ürəyin həcmi 3 dəfəyə yaxın artır. Ürəklə bərabər digər daxili orqanlar da böyüyür. Amma bu zaman daxili orqanları qanla təmin edən damar sistemi lazımi səviyyədə inkişaf etmir. Bunun nəticəsində isə ürəyi, əzələləri, fəaliyyətdə olan orqanları qidalandırıcı maddələr və oksigenlə tam təmin edə bilmir ki, bu da öz növbəsində gələcəkdə mənfi fəsadlar yarada bilər. İnkişaf dövrü artıq fiziki yükün verilməsi məqsədə uyğun deyil. Onu dəqiq bilirəm ki, istər paytaxt Bakıda, istərsə də regionlarda cüdo sahəsində fəaliyyət göstərən peşəkar, məndən də artıq biliklərə sahib olan məşqçi-müəllimlər çoxdur və onlar mənim nə demək istədiyimi çox gözəl bilirlər.

İnkişaf dövrü yaşayan uşaqların və yeniyetmələrin aerob istiqamətində məşq etmələri məqsədə müvafiqdir. Cüdo idman növünün gözəlliyi ondan ibarətdir ki, məşq prosesinin təşkili nəticəsində, məsələn, kəmər sisteminin öyrədilməsi, orta templi dinamik Uçi-komi adlanan hərəkətlərin üzərində işlənməsi, Ne-vadza texniki fəndlər və s. məşq prosesində geniş idmançı kütləsinin cəlb olunmasına və onların düzgün, sağlam inkişafına imkan yaradır. Yarışlarda tələb olunan enerji təmin olunma anaerob mexanizmi istiqamətində aparılan məşqlər inkişaf dövründə minimuma endirilməlidir.

Uşaqlar vaxtaşırı həkim müayinəsindən keçməli, “İdmançı” ürəyi sindromuna diqqət yetirilməlidir. Hamımız bilirik ki, məşq zamanı ürəkdə “L” və “D” gipertrofiyası baş verir. Məşqin hansı istiqamətdə təşkil olunması hansı növdə gipertrofiyaya gətirə bilər. Çalışmaq lazımdır ki, aeorob enerji təmin etmə mexanizmi nəticəsində, məşqlər hesabına ürəyin daxili həcminin böyüsün.

Bu da gələcəkdə yüksək idman nəticələrinin əldə olunmasına gətirəcək. Pubertal inkişaf dövründə (cinsi inkişaf dövrü) əzələlər sürtlə inkişaf etsə də, ürək hələ də lazım olan səviyyədə inkişaf etmir. Və bu zaman yarış intensivliyində anaerob enerji təmin etmə mexanizmi inkişafı istiqamətində verilən məşq ürəkdə hüceyrələrin, yəni kardiomiositlərin ölməsinə səbəb olur, gələcəkdə də idman nəticələrinin zəifləməsinə gətirə bilər. Astenik konstitusiyaya malik olan uşaq və yeniyetmələr də var. Onlara fiziki yükün verilməsi son dərəcə ehtiyyatla həyata keçirilməlidir.

Azyaşlı uşaqların və yeniyetməlirn yarışlarında son zamanlar elə bir səs-küy, mübahisələr yaranır ki, bu da heç məqsədə uyğun deyil. Həmin uşaqlardan nəsə nəticə tələb etmək çox tezdir. Onlar hələ inkişaf yolundadırlar.

2000-ci illərdə gənc yaşlarımda Sumqayıt şəhərində yarış zamanı maraqlı faktla üzləşdim. Korifey məşqçi-müəllim Əhməddin Rəcəblinin məktəbini keçmiş övladı, bu günkü gündə Respublikanın Əməkdar məşqçisi Zaur Rəcəbli hansısa bir gənc kolleqamıza deyirdi: “Ağacı budaqlarından yuxarı dartıb böyütmürlər.

Çox dartdıqda, kötüyü boşalar, sonra ağac quruyar, böyüməz.” İlk baxımdan sadə görünsə də bu sözlərdə dərin məna və məntiq var. Misal üçün onu deyim ki, Azərbaycanın ilk və yeganə dünya çempionu Elxan Məmmədov erkən və yeniyetmə yaşlarında böyük bir idman uğuru əldə etməsə də, dünya çempionu adına orta yaşlarında yiyələnib. Elxan Rəcəbli son illərə qədər güləşirdi və bugünkü gündə də əmisi Fərhad Rəcəbli ilə birlikdə veteran cüdoçuların yarışlarında da uğurla çıxış edir.

Bu günkü gündə region və respublika yarışlarında uğur və nəticə əldə etməyən komandalar, məşqçi-müəllimlər ona dəlalət etmir ki, onalar zəifdirlər, nəticə əldə etmək üçün morfo-funksional, fizioloji quruluşa, fiziki inkişafa, müəyyən istedada, qavrama və qabiliyyətə malik olan uşaqların ələ düşməsi və eyni zamanda maddi-texniki bazanın olması böyük rol oynayır.

Hazırda hər hansı məşqçi müəllim hansısa bir regionda ətrafına müəyyən sayda uşaqları toplayıb onları pis vərdişlərdən, mənfi əməllərdən çəkindirir, cüdo idman növünün elmini və sirlərini öyrədirsə, yarışlara uşaqları hazırlayırsa, aparıcı klubların, cəmiyyətlərin, məktəblərin qarşısına çıxara bilirsə, rəqəbat yaradırsa bu özü özlüyündə artıq böyük nəticədir.

Hər birimiz, istər gənc, istər yaşlı, istər titullu, istərsə də titulsuz belə məşqçi-müəllimlərə hörmətlə yanaşmalı, əməklərinə qiymət verməyi bacarmalıyıq. Hər bir valideynin arzusu, övladının sağlam, gümrah böyüməsidir. Bizim də başlıca vəzifəmiz dövlətimizə, cəmiyyətimizə sağlam, vətənpərvər ruhda böyümüş, xalqına, dövlətinə sadiq, sabahkı xoş gələcəyimiz olan gənclər yetişdirməkdir. Ən böyük nəticə budur!
Güləşçimiz dünya kubokunun finalına yüksəldiSerbiyanın paytaxtı Belqradda keçirilən güləş üzrə fərdi dünya kuboku yarışları sona yaxınlaşır.

Avrasiya.net xəbər verir ki, altıncı yarış günündə - dekabrın 17-də 61, 65, 79, 86 və 97 kiloqram çəki dərəcəsində çıxış edən sərbəst güləşçilər mübarizəyə qoşulublar.

Güləşçimiz Əhmədnəbi Qvarzatilov (61 kq) startda Fransanı təmsil edən erməni güləşçi üzərində inamlı qələbə qazanıb. Bolqarıstan və Tacikistan güləşçilərindən də güclü olan Ə.Qvarzatilov finala yüksəlib.

Üçqat Avropa və dünya çempionu Hacı Əliyev debütdə prinsipial rəqiblə qarşılaşıb. 65 kiloqram çəki dərəcəsində dünya çempionu Hacımurad Rəşidovla görüşə əla start verən H.Əliyev 4 xal qazandıqdan sonra görüş yarımçıq saxlanılıb. Buna səbəb rəqibin zədələnməsi olub. Güləşçimiz dörddəbir finalda qırğız güləşçi ilə gərgin keçən görüşdən də qalib ayrılaraq adını yarımfinala yazdırıb. Macarıstan təmsilçisi ilə görüş gərgin idman mübarizəsi şəraitində keçib. H.Əliyev əzmkarlıq nümayiş etdirsə də, onu qələbədən 1 xal ayırıb. Güləşçimiz bürünc medal üçün xalça üzərinə çıxacaq.

Rəşad Yusifli (79 kq) ilk görüşdə türk həmkarına məğlub olub. Ancaq rəqib finala yüksəldiyi üçün həmyerlimiz təsəlliverici görüşə çıxacaq.

Abubakr Abakarov (86 kq) startda Bolqarıstan təmsilçisinə "tuşe" ilə qalib gəlib. Ancaq dörddəbir finalda İspaniya idmançısına uduzub.

Mübarizəyə dörddəbir finaldan qoşulan Şamil Zubairov (97 kq) Moldova təmsilçisini çətinlik çəkmədən məğlub edərək yarımfinala yüksəlib. Ancaq finalın bir addımlığında Belarus təmsilçisinə yenilib və ümidini bürünc medala bağlayıb.

Bu çəki dərəcələri üzrə təsəlliverici görüşlər və medal qarşılaşmaları dekabrın 18-də keçiriləcək.

Qeyd edək ki, daha əvvəl yunan-Roma güləşçilərindən İslambek Dadov (67 kq) gümüş, Eldəniz Əzizli (55 kq) və Beka Kandelaki (130 kq) bürünc medal əldə ediblər. Qadınlardan isə Elis Manolova (65 kq) fəxri kürsünün 3-cü pilləsinə qalxıb.
Dünyanın ən yaxşı futbolçusu bəlli olduFİFA 2020-ci ilin ən yaxşı futbolçusunun adını açıqlayıb.

Avrasiya.net xəbər verir ki, Almaniyanın "Bavariya" klubunun polşalı futbolçusu Robert Levandovski "ən yaxşı" adına layiq görülüb. O, siyahıda "Barselona"nın futbolçusu Lionel Messi və "Yuventus"un üzvü Kristiano Ronaldonu qabaqlayıb.

Qeyd edək ki, Levandovski bu il "Bavariya"nın heyətində Almaniya çempionu, ölkə Super Kuboku, Çempionlar Liqası və UEFA Super Kubokunun qalibi olub.
“Qarabağ” UEFA-ya müraciət etdiUEFA Avropa Liqası turnirinin qrup mərhələsi çərçivəsində dekabrın 10-da keçirilməli olan “Vilyarreal” – “Qarabağ” oyunu ilə bağlı “Qarabağ” klubu tərəfindən UEFA-ya müraciət ünvanlanıb.

Avrasiya.net-in məlumatına görə, müraciətdə qeyd olunub ki, “Qarabağ”ın koronavirus testi pozitiv nəticələnmiş və zədəli olan futbolçuları (A və B iştirak ərizəsində yer alan 23 futbolçudan 13 nəfər, ikisi qapıçı olmaqla) "Vilyarreal"la oyunda iştirak edə bilməyəcək və göstərilən səbəbdən dekabrın 10-da “Vilyarreal” – “Qarabağ” oyunu baş tutmayacaq.

Məsələ ilə bağlı yekun qərar UEFA tərəfindən veriləcək.
"Qarabağ" Avopa Liqasında ilk xalını qazandıFutbol üzrə UEFA Avropa Liqasının qrup mərhələsi çərçivəsində keçirilən “Qarabağ” - “Makkabi” (İsrail) oyunu başa çatıb.

Avrasiya.net xəbər verir ki, “Başakşəhər Fatih Terim” stadionunda keçiriləcək oyun 1:1 hesabı ilə heç-heçə yekunlaşıb.

Oyunda hesabı qonaqlar matçın 22-ci dəqiqəsində açıb. Yonatan Koen hakimin təyin etdiyi penaltini dəqiq yerinə yetirib. Qoldan sonra irəli atılan ağdamlılar oyunun 37-ci dəqiqəsində hesaba tarazlıq gətiriblər. Abdulla Zubirin ötürməsindən sonra Xayme Romero adını tabloya yazdırıb.

Bu nəticədən sonra “Qarabağ” UEFA Avropa Liqasında ilk xalın qazanıb.

Paralel keçən oyunda “Sivasspor” klubu “Vilarreal” (İspaniya) komandasını qəbul edib. Görüş qonaqların minimal hesabla qələbəsi ilə yekunlaşıb.

Beş turdan sonra I qrupa 13 xalla İspaniyanın “Vilyarreal” komandası başçılıq edir. Təl-Əviv təmsilçisi 8 xalla ikinci, “Sivasspor” klubu 6 xalla üçüncü, “Qarabağ” isə 1 xalla dördüncü sırada qərarlaşıb.

Son turda “Sivasspor” səfərdə “Makkabi”ni məğlub edəcəyi halda bu qrupda pley-off mərhələsinə vəsiqə qazanan ikinci komanda olacaq. Xatırladaq ki, “Vilarreal” ötən tur vəsiqəsini vaxtından əvvəl qazanıb. “Qarabağ”ın son oyunu səfərdə Valensiya təmsilçisi ilə olacaq. Həmin görüşlər dekabrın 11-də təşkil ediləcək.
“Qarabağ” “Makkabi”yə qarşıAzərbaycan çempionu “Qarabağ” bu gün Avropa Liqasının qrup mərhələsində növbəti oyununu keçirəcək.

Avrasiya.net xəbər verir ki, Qurban Qurbanovun çalışdırdığı Ağdam təmsilçisi qrupdakı sonuncu ev matçında İsrail təmsilçisi “Makkabi” (Təl-Əviv) ilə üz-üzə gələcək.

Əvvəlki ev oyunlarında olduğu kimi, “Qarabağ” bu rəqibini də məlum səbəblərdən İstanbulda qəbul edəcək. İsraildə bu komandaya 0:1 hesabı ilə uduzan ağdamlılar ilk xal üçün mübarizə aparacaq.

Qeyd edək ki, qrupun eyni vaxtda başlayacaq digər görüşündə “Vilyarreal”la “Sivasspor” üz-üzə gələcək.

Avropa Liqası

İ qrupu

3 dekabr

21:55. “Qarabağ” - “Makkabi”

Baş hakim: Robert Hennessi (İrlandiya).

İstanbul (Türkiyə). “Başakşəhər Fatih Terim” stadionu.

Vilyarreal – 10, Makkabi – 7, Sivasspor – 6, Qarabağ – 0.
Mahir Emreli koronavirusa yoluxdu"Qarabağ"ın futbolçusu Mahir Emreli koronavirusa yoluxub.

Ağdam klubundan Avrasiya.net-ə verilən məlumata görə, 23 yaşlı hücumçunun testi müsbət çıxıb.

Emreli bu səbəbdən Avropa Liqasının IV tur matçı üçün Türkiyənin İstanbul şəhərinə yollanmayıb.

Qeyd edək ki, dekabrın 3-də Türkiyənin İstanbul şəhərindəki “Başakşəhər Fatih Terim” stadionunda keçiriləcək “Qarabağ” – “Makkabi” matçı Bakı vaxtı ilə saat 21:55-də başlayacaq. Azərbaycan klubu ölkədəki hərbi vəziyyətlə əlaqədar ev oyunlarını neytral meydanda keçirir.
Çempionlar Liqası: Daha 3 komanda üçün 1/8 final şansıUEFA Çempionlar Liqasının qrup mərhələsində V tura yekun vurulacaq.

"Report"un məlumatına görə, bu gün keçiriləcək 8 oyundan sonra daha 3 komandanın pley-offa çıxması rəsmiləşə bilər.

F qrupunda Almaniyada İtaliya "Latsio"su ilə qarşılaşacaq Dortmund "Borussiya"sı qələbə qazanacağı təqdirdə mərhələ adlayacaq. Eyni sözləri Roma təmsilçisi barədə də söyləmək olar. Hətta "Brügge" (Belçika) - "Zenit" (Rusiya) matçının nəticəsindən asılı olaraq, ilk iki sırada qərarlaşmış komandaların hər ikisi 1/8 finala yüksəlmək şansına malikdir.

H qrupunda isə İngiltərənin "Mançester Yunayted" klubu evdə Fransa PSJ-sini məğlub etsə, sona 1 tur qalmış adını pley-offa yazdıracaq. Qrupun digər oyununda isə "Başakşehir" Türkiyədə Almaniyanın "Leyptsiq" komandası ilə görüşəcək.

UEFA Çempionlar Liqası

Qrup mərhələsi, V tur

E qrupu

21:55. "Krasnodar" (Rusiya) - "Renn" (Fransa)

00:00. "Sevilya" (İspaniya) - "Çelsi" (İngiltərə)

Xal durumu: "Çelsi" - 10, "Sevilya" - 10, "Krasnodar" - 1, "Renn" - 1.

F qrupu

00:00. "Borussiya" (Dortmund, Almaniya) - "Latsio" (İtaliya)

00:00. "Brügge" (Belçika) - "Zenit" (Rusiya)

Xal durumu: "Borussiya" (Dortmund) - 9, "Latsio" - 8, "Brügge" - 4, "Zenit" - 1.

G qrupu

00:00. "Yuventus" (İtaliya) - "Dinamo" (Kiyev, Ukrayna)

00:00. "Fenertsvaroş" (Macarıstan) - "Barselona" (İspaniya)

Xal durumu: "Barselona" - 12, "Yuventus" - 9, "Dinamo" (Kiyev) - 1, "Ferentsvaroş" - 1.

H qrupu

21:55. "Başakşehir" (Türkiyə) - "Leyptsiq" (Almaniya)

00:00. "Mançester Yunayted" (İngiltərə) - PSJ (Fransa)

Xal durumu: "Mançester Yunayted" - 9, PSJ - 6, "Leyptsiq" - 6, "Başakşehir" - 3.

Qeyd edək ki, ilk oyun günündən sonra İngiltərə "Liverpul"u və Portuqaliya "Portu"su qrupdan çıxmağı təmin edib. Daha əvvəl isə İspaniyanın "Sevilya", "Barselona", İngiltərənin "Çelsi", "Mançester Siti", İtaliyanın "Yuventus" və Almaniyanın "Bavariya" klubları 1/8 finala vəsiqə qazanıblar.

“Real”dan acı məğlubiyyətUEFA Çempionlar Liqasının qrup mərhələsində V tura start verilib.

Avrasiya.net xəbər verir ki, Madridin “Real” klubu səfərdə Ukraynanın “Şaxtyor” klubuna 2:0 hesabı ilə məğlub olub.

Bu məğlubiyyətlə "Kral klubu" B qrupunda vəziyyətini qəlizləşdirib.

Qeyd edək ki, bu, madridlilərin “Şaxtyor”a ikinci məğlubiyyətidir. Bundan öncə onlar 3:2 hesabı ilə uduzmuşdular.