Ermənilər Laçını talayır – PolkovnikRus sülhməramlılar müvəqqəti məsuliyyət zonalarında olan ərazilərdə separatçı ünsürlərin qanunsuz, vəhşi əməllərinə göz yumublar və yumurlar. Orada biabırçı bir vəziyyət var. Separatçı tör-töküntüləri, orada yaşayanlar alternativ yol açıldıqdan sonra Laçını tərk etməli olacaqlarını bilirlər. Ona görə əllərinə keçən hər şeyi talayırlar və əgər imkanları olsa, torpağı da maşınlara yükləyib apararlar.

Bu sözləri Axar.az-a Laçında separatçıların və orada yaşayan ermənilərin talançılıq etməsindən danışan hərbi ekspert, istefada olan polkovnik Üzeyir Cəfərov deyib.

Polkovnik bu talançılığın, vəhşiliyin qarşısının alınmalı olduğunu bildirib:

“Müdafiə Nazirliyimiz, Daxili İşlər Nazirliyi, Hərbi Prokurorluq, Baş Prokurorluq, Xarici İşlər Nazirliyi həm sülhməramlılara, həm də Ermənistan tərəfinə konkret və qəti xəbərdarlıq etməlidir. Törədilən cinayətlərə görə Ermənistan rəhbərliyinin və separatçıların beynəlxalq səviyyədə mühakimə edilməsinə nail olmalıyıq. Ukraynanın da sözügedən istiqamətdə fəaliyyətləri var və artıq nəticəsini verir – o təcrübədən istifadə edə bilərik. Əgər torpaqlarımızda talançılıqla məşğul olan və milyonlar yığan separatçıların bir neçəsi Bakıda cinayət məsuliyyətinə cəlb olunsa, digərləri bu əməlləri davam etdirməyə cəsarət etməz. Bir daha vurğulamaq istəyirəm ki, sülhməramlılar və Ermənistanın qarşısında məsələni elə qoymaq lazımdır ki, onlar öz məsuliyyətlərini hiss etsinlər”.
ORDUMUZ LAÇIN ŞƏHƏRİNƏ DAXİL OLDU - Laçın dəhlizi bağlanır... + VİDEOAzərbaycan ordusunun bölmələri iyunun 17-də Rusiya sülhməramlılarının müvəqqəti nəzarəti altında olan Laçın şəhərinə daxil olub.

Avrasiya.net xəbər verir ki, bu barədə AzTV eksklüziv görüntülər paylaşıb.

Görüntülərdə Azərbaycan ordusunun Laçın şəhərinin mərkəzində hərəkət etdiyi əks olunur.

Qeyd edək ki, bu gün bir sıra erməni KİV-lərində yayılan məlumatlara görə, iyulun 1-dən Laçın şəhəri, Zabux və ermənilərin vaxtilə qanunsuz olaraq məskunlaşdığı və hələ də yaşadığı daha bir neçə kənd Azərbaycan ordusunun nəzarətinə qaytarılacaq.

Xatırladaq ki, bu ayın sonlarında Laçın dəhlizinə alternativ olaraq çəkilən yeni yolun istifadəyə verilməsi gözlənilir. Bu isə Laçın dəhlizinin də Azərbaycan ordusunun nəzarətinə veriləcəyi və bağlanılacağı deməkdir.

Qeyd edək ki, üçtərəfli bəyanata əsasən, yeni hərəkət marşrutu hazır olduqdan sonra Laçın dəhlizi boyunca dayanan Rusiya sülhməramlı kontingentinin də yerdəyişməsi həyata keçiriləcək. Onlar müvəqqəti olaraq Laçın şəhərindən yan keçən yeni marşrut xətti üzrə yerləşəcəklər.
Püşk atıldı: Zəngilana qayıdış başladıYaxın günlərdə azad edilmiş ərazilərdə daimi məskunlaşacaq insanların ilk köçürülməsi olacaq.

Avrasiya.net xəbər verir ki, bu barədə Azərbaycan Qaçqınların və Məcburi Köçkünlərin İşləri üzrə Dövlət Komitəsinin sədr müavini Fuad Hüseynov "Amerikanın səsi"nə müsahibəsində bildirib.

“Artıq ilk köçürülmə ilə bağlı püşkatma tədbiri də olub. Bu yaxın günlərdə ilk məcburi köçkün ailələri daimi məskunlamaq üçün Zəngilan rayonunda yeni salınmış Ağalı kəndinə köçürüləcək. İlkin olaraq 41 ailə Ağalı kəndinə köçəcək", - o qeyd edib.

Məcburi köçkünlərin qayıdışı üçün ilk olaraq Zəngilan rayonunun Ağalı kəndi yenidən qurulur. Burada ölkədə ilk dəfə müasir texnologiyaların tətbiqi ilə “ağıllı kənd” layihəsi icra olunur. Rəsmi məlumatlara görə, hazırda 200 evin inşası başa çatdırılıb, daha 150 evin, o cümlədən ikimərtəbəli, üçmərtəbəli mənzil tipli evlərin tikilməsi davam etdirilir.

Rəsmi statistikaya görə, Ermənistan-Azərbaycan münaqişəsi nəticəsində hazırda Azərbaycanda 1,138,450 nəfər qaçqın və məcburi köçkün var.

Azərbaycan Qaçqınların və Məcburi Köçkünlərin İşləri üzrə Dövlət Komitəsi bildirir ki, onlardan 350,000 nəfəri Ermənistandan qovulmuş azərbaycanlı qaçqınlardır.

Münaqişə zamanı 1988-1993-cü illərdə Dağlıq Qarabağdan, eləcə də ona bitişik yeddi rayondan olan yaşayış məntəqələrindən zorla qovulmuş məcburi köçkünlərin sayı 788 950 nəfər təşkil edir.

2020-ci il sentyabr-noyabr aylarındakı 44 günlük müharibə nəticəsində bir çox yaşayış məntəqəsində Azərbaycan hökumətinin nəzarəti bərpa edilib. Hazırda keçmiş silahlı münaqişə ərazisinin minalardan təmizlənməsi işləri ilə yanaşı, əhalinin yenidən doğma yurdlarına qaytarılması üçün işlər aparılır.

Azərbaycan hökuməti azad edilmiş ərazilərdə kommunikasiya qurğularının bərpası, sosial obyektlərin, avtomobil və dəmir yollarının tikintisi, həmçinin hava limanlarının salınması işlərini davam etdirir. Eyni zamanda, elektrik xətləri çəkilir, su, külək elektrik stansiyaları qurulur.

Hazırda ərazilərdə insanların daimi məskunlaşması üçün yeni şəhər və qəsəbələr salınır.

Ordumuz bu istiqaməti nəzarətə götürdü – Şok detallarBiz İkinci Qarabağ müharibəsindən sonra davamlı şəkildə belə informasiyalarla rastlaşırıq. Ya Rusiya sülhməramlıları adlandırılan hərbi kontingent hansısa əraziləri nəzarətə götürməyə çalışır, yaxud da Azərbaycan Ordusu təhlükəsizlik tədbirləri üçün hansısa əraziyə qalxır. Bu proses permanent, yəni daimi gedən prosesdir.

Bu sözləri Axar.az-a açıqlamasında Aşağı Şorca kəndi yaxınlığındakı mövqeləri Azərbaycan Ordusunun nəzarətə götürməsi ilə bağlı yayılan informasiyalar haqda danışan təhlükəsizlik üzrə ekspert Ərəstun Oruclu deyib.

Ekspertin sözlərinə görə, hazırda strateji nöqtələr uğrunda mübarizə gedir:

“Etiraf etmək lazımdır ki, burada bəzən dezinformasiya, qeyri-dəqiq məlumatlar olur. Məsələn, Fərrux kəndi və yüksəkliyi ilə bağlı məsələdə də həddindən artıq ziddiyyətli məqamlar var idi. Hələ də bəhs etdiyimiz məsələdə qeyri-müəyyənliklər qalmaqdadır. Hətta Fərrux kəndində rus sülhməramlılarının bayraq sancmalarının da görüntüləri yayıldı.

Burada söhbət nədən gedir? İlk növbədə qeyd etməliyəm ki, rus sülhməramlıları Qarabağın dağlıq hissəsinə yerləşdirildikləri zaman bütün strateji nöqtələri, yüksəklikləri öz nəzarətlərinə götürməyə çalışdılar. Onlar Laçında, Şuşanın ətrafında bəzi nöqtələrdə, eyni zamanda bizim üçün vacib əhəmiyyətli Ağdərə məsələsində qismən buna nail oldular. Müharibə zamanı torpaqlarımızı işğaldan azad etməyimiz Azərbaycanın məğlub statusundan qalib statusuna keçməsi deməkdir. Amma bütün müharibələrin arxasında regional siyasi və geosiyasi amillər dayanır. Bu mənada Qarabağ müharibəsi, ümumiyyətlə, oradakı separatizmin hələ SSRİ dönəmindən başlayaraq qızışdırılması, stimullaşdırılması, dəstəklənməsi, Azərbaycan torpaqlarının faktiki olaraq Rusiya tərəfindən işğal edilərək Ermənistana verilməsi ilk gündən etibarən geosiyasi məsələ olub. Əgər biz aparılan işlərə, atılan addımlara diqqətli şəkildə nəzər yetirsək, onda kəndlərin, yüksəkliklərin, üçüncü dərəcəli önəmli məntəqələrin ələ keçirilməsi uğrunda gedən gizli mübarizənin əsasən strateji nöqtələrin ətrafında getdiyini görərik”.

Ərəstun Oruclu Aşağı Şorca kəndinin Basarkeçər-Ağdərə yolu üzərində yerləşdiyini, sözügedən yolun isə Ağdərənin, Tərtərin və digər bölgələrin təhlükəsizliyi üçün xüsusi əhəmiyyət kəsb etdiyini vurğulayıb:

“Bizim bəhs etdiyimiz Aşağı Şorca kəndi də Basarkeçər və Ağdərə yolunun üzərindədir. Diqqət yetirirsinizsə, Azərbaycan Ordusu da həmin yolun yaxınlığındadır. Hədəf isə ən azından həmin yola artilleriya məsafəsində yaxınlaşmaqdır. Bütün hallarda söhbət həmin yola nəzarətdən gedir. Biz həm də rus sülhməramlılarının və onların himayə etdikləri separatçı tör-töküntülərin silahlı dəstələrinin Tərtər istiqamətində fəallaşdığını müşahidə etdirik. Bu, təsadüfi deyil. Ağdərəyə çıxışı təmin edən həmin Basarkeçər-Ağdərə yoludur. Təbii ki, Azərbaycan Ordusu o yolu atəş nəzarətinə götürməlidir ki, sabah hansısa bir gərginlik yarandığı halda Ağdərəni əldə saxlasın. Rus-erməni koalisiyasının Ağdərədən Tərtər istiqamətində fəallaşması isə oranı təhlükə altında qoymaqdır. Çünki Tərtər strateji əhəmiyyət kəsb edir, hazırlanmış düşmən planına görə, 44 günlük müharibə ərzində işğal olunmalı idi. Rus qoşunları yalnız Qarabağın dağlıq hissəsinə deyil, həm də Goranboya daxil olmalı idi ki, Gəncə dəhlizini nəzarətə götürsün. Bu, faktiki olaraq Azərbaycanı iki yerə bölmək, o cümlədən Bakı-Tiflis-Qars dəmir yoluna, Bakı-Tiflis-Ceyhan neft kəmərinə, TANAP qaz kəmərinə, Trans-Avropa-Asiya internet və kommunikasiya xəttinə, Bakı-Tiflis avtomobil yoluna nəzarət demək idi. Mübarizə kommunikasiya xətləri uğrunda gedir. Ona görə də Azərbaycan Ordusunun Basarkeçər-Ağdərə yolunu nəzarəti bərpa etmək, yaxud onu təmin etməklə bağlı atdığı addım strateji məsələdir. Çünki Azərbaycana təhdid yarana biləcək nöqtələrdən biri, bəlkə də birincisi Ağdərədir. Məhz o səbəbdən Rusiya Ermənistanı Kəlbəcərdən çıxmağa və rayonu Azərbaycana qaytarmağa məcbur etdi, lakin Ağdərədə bunu etmədi. Kəlbəcərə gedən yol Ağdərə ərazisindən keçir. Azərbaycana Basarkeçər-Ağdərə yolunun nəzarətə götürülməsi çox ciddi üstünlük qazandırır”.

Ekspert Azərbaycanda Rusiya üçün əhəmiyyətli olan üç strateji istiqamətdən də bəhs edib:

“Azərbaycanda Rusiya üçün əhəmiyyətli olan üç strateji istiqamət var. Bunlardan biri Gəncə dəhlizinə çıxmaq və onu kəsmək üçün Tərtər istiqamətidir, digəri Tovuz istiqamətidir, üçüncüsü isə Şuşadan keçməklə Cəbrayıl istiqamətidir. Cəbrayıldan Xudafərin nəqliyyat-kommunikasiya xətti İrana, oradan da Yaxın Şərqə keçir. Bu, Azərbaycan üçün böyük siyasətin tam mərkəzində, ortasında olmaq deməkdir. Diqqət yetirsək görərik ki, əslində İkinci Qarabağ müharibəsi 2020-ci ilin iyul ayında Tovuzdan başladı. Çünki Tovuz Gəncə dəhlizinin çıxışına ən yaxın məsafələrdən biridir. İkinci yaxın məsafə Tərtərdir.

Biz hər üç nöqtədə təxribatları gördük. İyulda Tovuza, sentyabrda Tərtərə hücum oldu. Nəticədə müharibə başladı və Azərbaycan çox unikal əməliyyat keçirərək Şuşanı işğaldan azad etdi. Sonra Şuşaya iki “İsgəndər” raketi atıldı. Bu fakt artıq sübut olunub və nəhayət biz bəhs etdiyimiz üç istiqamətdə Azərbaycan Ordusunun öz mövqelərini gücləndirdiyini görürük. Komandolar üçün Cəbrayıl istiqamətində yeni hərbi hissələrin, bazaların inşası təsadüfi deyil. Azərbaycan Şuşada, Kəlbəcər istiqamətində güclənir, Tovuz istiqamətində də yəqin ki, mövqelərimiz möhkəmləndirilir. Bütün sadaladığımız addımların atılması, qarşı tərəfin təhdid yarada biləcəyi strateji yollara, yüksəkliklərə nəzarət ərazi bütövlüyümüz üçün zərurətdir”.
Qarabağda ölən 86 erməni hərbçinin cəsədi hələ də morqdadırİkinci Qarabağ müharibəsində ölmüş 86 erməni hərbçinin cəsədi hələ də Ermənistandakı Metsamor və Heratsi morqlarlarında saxlanılır.

Bu barədə “Joğovurd” qəzeti məlumat yayıb.

Bildirilir ki, yaxınları cəsədlərin onların övladları olduqlarını qəbul etmək istəmirlər.

“Müharibədən təxminən 2 il keçməsinə baxmayaraq, övladlarını itirən bəzi valideynlər onların sağ olduğuna inanır, ümidlərini itirmirlər”, - deyə qəzet yazır.

Qeyd edilir ki, Ermənistanda bəzi valideynlər ölkədə həyata keçirlən DNT testinə etibar etmirlər. Bu səbəbdən də bəziləri öz vəsaitləri hesabına xaricdə DNT testini təşkil etdiriblər. Nəticədə 1 il əvvəl morqlarda saxlanılan 100 cəsəd sayı 86-ya enib.
İşğaldan azad olunmuş ərazilərdə quruculuq işləri durmadan davam edirBiz XX əsrdə iki dəfə müstəqillik əldə etdik. Ilk müstəqillik dövründə çox güclü ola bilmədik ,hətta bir gün sonra qədim diyarımız İrəvan ermənilərə verildi .Xalqımız bundan sonra da faciələrlə üz-üzə gəldi. Həm Şərqi Zəngəzur, həm Qarabağ işğala məruz qaldı.1920 ci ilin noyabrında əsassız bir şəkildə Qərbi Zəngəzur Ermənistana verildi.

Əsl müstəqillik 1993 cü ildən başladı.Ulu Öndərin yenidən başlatdığı güclü siyasəti nəticəsində Azərbaycan iqtisadi ,hərbi gücü olan ,dünya miqyasında sürətlə inkişaf edən ölkəyə çevrildi. Prezidentimiz İlham Əliyevin də dediyi kimi bizim kimsənin yardımına ,kreditinə ehtiyacımız yoxdur. Biz Azərbaycanın sabit və təhlükəsiz bir diyar halına gəlməsi üçün əlimizdən gələni əsirgəmirik.

Ermənistandakı bu günki vəziyyət onun işğalçı siyasətinin nəticəsidir.Biz 44 günlük müharibə zamanı gücümüzü onlara göstərdik.Biz onlardan fərqli olaraq kimsənin torpağına göz dikmirik,dinc əhaliyə etnik təmizləmə etmirik. Biz sərhədlərimizin müəyyənləşdirilməsini ,sülh müqaviləsinin imzalanmasını istəyirik. Ermənistanın 5 prinsipi qəbul edib,ərazi bütünlüyümüzü tanıması,sərhədlərin dəqiqləşməsi çox önəm daşıyir.Biz çoxmillətli dövlətik.Bütün xalqlar heç bir problem olmadan əmin amanlıq içində torpaqlarımızda yaşayır .

Azərbaycan öz ərazi bütövlüyünü bərpa etdi və"Böyük qayıdış"prosesinə start verildi.Bərpa quruculuq işləri sürətli bir şəkildə davam edir.Zəngilan gözəl təbiəti olan rayonumuzdur.Ermənilər vəhşilik etmiş evləri yerlə_yeksan etmiş ,meşələri məhv etmişdir.Bizim birinci pilot layihəmiz məhz Zəngilanda tətbiq edildi.Ağalı kəndində "Ağıllı kənd "layihəsi tətbiq olundu.200 evdən ibarət kənd salınıb ,məşğulluq ,məktəb ,bağça ,tibb məntəqəsi"Asan","Dost" xidmətləri mövcuddur. Dəmir yolları, avtomobil yolları çəkilir.Zəngilanda hava limanı tikilir. Böyük aqropark salınıb ,bu il ilk məhsul əldə ediləcək.Gənclərimiz bu qayıdışa artıq hazırdır. Onlar öz yurdlarına qayıtmağa çox həvəslidirlər. Vətən müharibəsi dövründə belə öz yurdlarını görməyən gənclər onun uğrunda ölümə belə getmişdilər.

Artıq Zəngilanın yeni dövrü başlayır.Zəngilanda müasir gözəl kəndlər, gözəl şəhərlər salınır.Zəngilan artıq öz doğmalarını qəbul etməyə hazırlaşır.

Quruculuq işləri bütün bölgələrimizdə gedir və tezliklə hamı öz yurduna qayıdacaq və Qarabağımıza dogma nəfəs ,doğma səs geri qayıdacaq. Bunun üçün dövlətimiz ,prezidentimiz durmadan çalışır. Bizim birliyimiz ,əzmimiz sayəsində torpaqlarımız daha abad , daha firavan olacaq.

Rəşad Rəhmanov
Siyəzən şəhər M.Müşfiq adına 2 saylı tam orta məktəbin direktoru
Mişelin eyhamı: Sülhməramlılar Qarabağı tərk edirŞarl Mişel Brüsseldə İlham Əliyev və Nikol Paşinyanla görüşüb. Hər şey adi görünürdü, amma bu görüşdən sonra biz Ermənistan-Azərbaycan münaqişəsində real irəliləyiş müşahidə etdik. Son aylarda demək olar ki, bu ilk əhəmiyyətli görüş oldu. Paşinyan və Əliyev sənədi imzalayan kimi dərhal sərhədin demarkasiyası üzrə komissiyaların yaradılması elan edilir, daha bir neçə saat keçir və bu komissiyaların rəhbərləri sərhəddə görüşür. Mişel buna necə nail oldu?

Axar.az xəbər verir ki, bu fikirləri erməni siyasi şərhçi Samvel Aqanesyan bölüşüb.

“Tamamilə məntiqli sual yaranır ki, Mişel Ermənistanın Baş nazirinin və Azərbaycan Prezidentinin ürəyinə nə cür yol tapa, konstruktiv dialoqa başlamaq üçün nə edə bilərdi? Prinsipcə, Əliyev dialoqun və əvvəllər əldə edilmiş razılaşmaların həyata keçirilməsinin əleyhinə deyildi, Paşinyan haqqında isə bunun əksini demək olar. Bəs o, Nikola nə təklif etdi ki, Paşinyan imtina edə bilmədi?” - erməni ekspert qeyd edib.

Onun sözlərinə görə, Rusiya ilə hər şey aydındır, o öz sərhədlərində “kənar adamları” sevmir. Eyni zamanda, o, münaqişə tərəflərinə heç nə vəd edə bilməz. Amma Qərb bir şey təklif etdi!

“Mən güman edə bilərəm ki, Paşinyana eyham vurulub ki, sərhəd münaqişəsinin həlli AB-də Ermənistan vətəndaşları üçün viza məsələsini onun tamamilə ləğvinə qədər xeyli sadələşdirə bilər. Ən əsası isə şübhəsiz ki, tərəflərə Rusiya sülhməramlılarının yaxın vaxtlarda regionu tərk edəcəyi vəd edilib”, - erməni ekspert qeyd edib.
"Ermənilər tərəfindən darmadağın edilən yerlər dirçəldilir, yenilənir, canlanır"Azərbaycan Respublikasının Prezidenti İlham Əliyev, birinci xanım Mehriban Əliyevanın Füzuli, Cəbrayıl və Zəngilan rayonlarına səfəri azad olunmuş ərazilərimizdə aparılan quruculuq-abadlıq işləri ilə yerindəcə tanış olunması, yeni tikililərin əsasının qoyulması və s. baxımından çox mühümdür.

Bunu "Xalq Cəbhəsi"nə Müasir İnkişaf Birliyinin sədri, siyasi şərhçi Mübariz Göyüşlü deyib.

O, qeyd edib ki, bu səfər də bundan əvvəlki səfərlər kimi görülən işlərin birbaşa prezidentin nəzarəti altında olduğunu göstərir. Uzun müddət işğal altında qalan, ermənilər tərəfindən darmadağın edilən yerlər dövlətimizin qayğısı nəticəsində dirçəldilir, yenilənir, canlanır:

"Aparılan nəhəng quruculuq-abadlıq işləri bütün sahələri əhatə edir. Yollar, yeni binalar, məscidlər, elektrik və qaz xətləri, məktəblər, xəstəxanalar, yenidən salınan bütöv kəndlər və s. görülən işlər dosta güvən, düşmənə göz dağıdır.

Dövlət başçısı bu səfərində də əməli çalışmalarla Zəngəzur dəhlizinin reallaşması üçün işlər görüldüyünü nümayiş etdirdi. Zəngəzur dəhlizi nəinki beynəlxalq terminə çevrilib. Azərbaycan dəhlizin açılması və hər kəsin rahat istifadə edə biləcəyi avtomobil, dəmir və hava yollarının tikintisini müasir texnologiyaların vasitəsilə möhtəşəm bir şəkildə aparır. Füzuli hava limanının açılışından sonra Zəngilanda da yeni bir aeroportun əsasının qoyulması bölgəni mühüm nəqliyyat qovşağına çevirəcək. Bu nəqliyyat qovşaqları Zəngilanı Azərbaycanın digər rayonları və Naxçıvan Muxtar Respublikası ilə birləşdirmək baxımından çox böyük əhəmiyyətə malikdir".

Səfər zamanı Prezident İlham Əliyev və birinci xanım Mehriban Əliyeva yalnız yol, bina və s. deyil eyni zamanda mənəvi dəyərlərimizin yaşadılmasında mühüm rola malik olan məscidlərimizin tikintisi və bərpasına da çox böyük diqqət ayırırlar: "Ötən ilin aprel ayında əsası qoyulan Zəngilan məscidinin tikintisi ilə dövlət başçısının şəxsən maraqlanması milli-mənəvi irsimizə qayğının, onun yaşadılmasına olan isti münasibətin göstəricisidir. Dini-mənəvi abidələrimizin, elm-təhsil müəssisələrimizin tikinti və bərpasında Heydər Əliyev Fondunun əvəzsiz rolu və böyük təcrübəsi var. Bu baxımından Zəngilan məscidinin də Fond tərəfindən inşa olunması faydalı nəticələr doğuracaqdır.

Prezidenti İlham Əliyev və birinci xanım Mehriban Əliyevanın Zəngilan rayonunda İşğal və Zəfər muzeyləri kompleksinin təməlqoyma mərasimində iştirakı diqqəti cəlb edir. İşğal muzeyi bizim faciəli tariximizi gələcək nəsillərə, əcnəbilərə çatdıracaq. Xalqımızın başına gətirilən müsibətlər, erməni vandalizmi əyani şəkildə, canlı tarix olaraq tanıtdırılacaq. Zəfər muzeyi isə xalqımızın, onun qəhrəman oğullarının şücaətini, mübarizliyini həm gələcək nəsillərə, həm də səfər edəcək qonaqlara təqdim edəcək.

Bütün bu amillərdən sonra əminliklə deyə bilərik ki, xalqımız bütün maneələrə rəğmən torpaqlarını işğaldan azad etməyi, ona sahiblənməyi, orada qurub-yaratmağı və gələcəkdə azad-firavan şəkildə yaşamağı bacarır və bunu artıqlamasıyla haqq edir".
Şuşada dini liderlərin toplantısı keçiriləcəkŞuşada türkdilli dövlətlərin dini liderlərinin toplantısı keçiriləcək.

Avrasiya.net xəbər verir ki, bunu Qafqaz Müsəlmanları İdarəsinin sədri Şeyxülislam Allahşükür Paşazadə deyib.

Sədrin sözlərinə görə, tədbirin bu ilin sentyabr ayının sonu oktyabr ayının əvvəlində keçirilməsi planlaşdırılır:

“Tədbirdə Qazaxıstan, Qırğızıstan, Özbəkistan, Türkmənistan, Türkiyə və Azərbaycan dini liderlərinin iştirakı nəzərdə tutulub. Ümid edirəm ki, gələcəkdə bu kimi konfrans və görüşləri azad olunan ərazilərdə keçirmək mümkün olacaq. Bununla da Azərbaycan həqiqətlərini, azad olunan ərazilərdəki erməni vandalizmini beynəlxalq ictimaiyyətin diqqətinə çatdıra biləcəyik”.
Şuşa azərbaycanlılarla ermənilərin fərqini göstərən əyani güzgüyə çevrilib2022-ci il sözdə yox, gerçəkdən də “Şuşa ili”nə çevrilməkdədir. İlin ilk beş ayı hələ başa çatmamış bizim mədəniyyət paytaxtımız sözün həqiqi mənasında beynəlxalq tədbirlər məkanı kimi şöhrət qazanmağa başlayıb. İşğal dönəminin və 44 günlük müharibənin izlərindən hələ tam qurtula bilməyən bu qədim şəhərimizdə ard-arda keçirilən çeşidli tədbirlər Azərbaycan xalqının həm quruculuq və yaradıcılıq potensialını, həm də mədəni səviyyəsinin yüksəkliyini ortaya qoyur.

Dünən Şuşada baş tutan V “Xarıbülbül” Beyəlxalq Folklor Festivalına da məhz bu potensialın nümayişi kimi baxmaq lazımdır. Bu, sıradan bir mədəniyyət hadisəsi, hansısa bir musiqi məclisi deyildi. Bu tədbirin hətta repertuarı da həm düşmənlərimizə, həm də dünyaya mesaj xarakteri daşıyırdı. İndi Şuşa azərbaycanlılarla ermənilərin fərqini göstərən əyani güzgüyə çevrilib.

Bu gün Şuşanı yenidən ələ keçirməkdən dəm vuran revanşist ermənilər 30 ilə yaxın işğal altında saxladıqları bu şəhərdə mədəniyyət adına heç bir iş görməyiblər. Əksinə, onlar burda özlərini əsl vəhşi qəbilələr kimi aparıblar, vandallıq ediblər, abidələrimizi dağıdıblar, heykəllərimizi güllələyiblər, muzeylərimizi talayıb aparıblar. Bir sözlə, Şuşanın adından tutmuş memarlıq üslubuna qədər hər şeyini “erməniləşdirməyə” çalışan erməni xalqının terrorçu və işğalçı qüvvələri Şuşada Azərbaycan xalqının, Azərbaycan mədəniyyətinin izlərini silməyə çalışıblar.

Lakin onlar bu mənfur məqsədlərinə tam nail ola bilmədilər. Müzəffər Azərbaycan Ordusu 44 günlük İkinci Qarabağ müharibəsində digər torpaqlarımız kimi Şuşanı da işğaldan azad etməklə ermənilərin vandalizm siyasətinə son qoydu. Savaşın hərbi mərhələsi bitəndən sonra azərbaycanlılar bu şəhərə “ikinci nəfəs” verdilər, böyük bir canlanma gətirdilər. Ermənilərin işğal dönəmində demək olar ki, “ölü şəhər”ə çevirdikləri Şuşada əvvəlki mədəni həyat yenidən bərpa olunmağa, canlanmağa başladı.

İndi Azərbaycan ermənilərin işğalçı siyasətinə qarşı hərb meydanında yox, mədəni-humanitar müstəvidə mübarizə aparır. Bu mənada, V “Xarıbülbül” Beyəlxalq Folklor Festivalı da bizim bütün dünyaya mədəni ismarıcımız sayıla bilər. Dünya məhz bu cür tədbirlərin sayəsində bizlə ermənilərin kəskin fərqini əyani görmək imkanı qazanır. Ermənistanı monoetnik bir ölkəyə, yalnız ermənilərin yaşadığı bir əraziyə çevirən millətçi-faşist əqidəli erməni siyasi elitasından fərqli olaraq Azərbaycan dövləti multikultural siyasət yürüdür.

Bizim ölkəmizdə polietnik mühit, mədəni müxtəliflik hökm sürür. Bu ölkədə yaşayan xalqların mədəniyyətinə də, adət-ənənlərinə də hörmətlə yanaşılır, tolerant münasibət sərgilənir. Sözügedən beynəlxalq folklor festivalının repertuarı da bunu əyani şəkildə göstərdi. “Xarıbülbül” Beynəlxalq Folklor Festivalı həm ermənilərə, həm də dünyaya Azərbaycanda hökm sürən milli həmrəyliyi, bu ölkədə yaşayan xalqların birlik və bərabərliyini nümayiş etdirdi. Şuşa növbəti dəfə bizim hamımızı birləşdirən bir şəhərə çevrildi. Bəli, Şuşa milli həmrəylik şəhəridir.

Əlisahib Hüseynov,
Milli Həmrəylik Partiyasının sədri