AŞPA-ya göndərilən “talış hesabat”ında düşmən təsirləriÖzünü “Azərbaycan talışlarının ictimai şurası” adlandıran qurumun Avropa Şurasının Parlament Assambleyasına hesabatı kənar təsirlər nəticəsində ortaya çıxan cızma-qaradır. Bu “hesabat”da açıq-aşkar şimaldan və cənubdan diktələrin edildiyi aydın sezilir.

Bu sözləri Axar.az-a politoloq Qabil Hüseyinli deyib.

Politoloq bildirib ki, Azərbaycan multikultural məkan kimi, milli azlıqlara və müxtəlif dini konfensiyalara müsbət münasibətilə tanınır:

“Talışlarla bağlı hazırlanıb AŞPA-nın nəzərinə çatdırılan hesabat başdan-ayağa Azərbaycan dövlətinin bu sahədə yeritdiyi siyasətə kölgə salmaq məqsədi güdür. Çünki talışlarla Azərbaycan türkü arasında qohumluq, mənəvi yaxınlıq, qaynayıb-qarışmaq minillərə dayanır. Talışlarla türklər hər zaman bir yerdə olub və həmişə ortaq mövqe nümayiş etdirib. Avropa Şurasının Milli azlıqların hüquqlarının qorunması barədə Çərçivə Sazişinə uyğun olaraq, ölkəmizdə talışlarla və digər milli azlıqlarla bağlı xeyli tədbirlər həyata keçirilib. Lənkəranda fəaliyyət göstərən Lənkəran Dövlət Universitetində talış dili və ədəbiyyatı üçün müəllimlər hazırlayan xüsusi fakültə mövcuddur. Bu bölgədə orta məktəblərdə 1-4-cü siniflərə talış dili tədris edilir. Yəni talış dilinə bu kimi diqqət ayrılır. Lənkəranda dövlət tərəfindən maliyələşdirilən Lənkəran Dövlət Teatrında həm Azərbaycan, həm də talış dilində tamaşalar hazırlanıb nümayiş olunur. Bundan başqa orda regional televiziya var. Sözügedən regional televiziyada həftənin üç günü talış dilində proqramlar hazırlanıb təqdim edilir. Regional televiziyanın nəzdində radio da var və orda da talış dilində verilişlər yayımlanır.

Milli kimlik məsələsinə gəlincə, millətin fəlsəfi-siyasi qiymətləndirməsi var; millət - ayrıca bir ərazidə yaşayan, ayrıca iqtisadiyyatı və tamamilə buna xas olan mədəniyyətə sahib olan toplumlara deyilir. Bizdə isə talışları Azərbaycanla heç bir coğrafi sərhədlər ayrılmır, biz bir yerdə yaşayırıq, bir xalqıq, çünki müxtəlif millətlərdən olub, bir dövləti təmsil edirik, aramızda minillik mədəniyyət, din birliyi, geniş qohumluq əlaqələri var. Azərbaycan türklərinə ən yaxın, doğma olan milli azlıqlardan biri də talışlardır. Talışların nümayəndələri Azərbaycan parlamentində, müxtəlif strukturlarında təmsil olunurlar. Mənsubiyyət etibarilə talış olanlar sırf Azərbaycan türklərinin yaşadığı rayonlarda həm icra başçısı, həm polis rəisi, həm də digər vəzifələrdə olurlar. Yəni bizdə heç bir məhdudiyyət və ayrı-seçkilik yoxdur, kadr seçimində şəxsi keyfiyyətə baxılır, milliyyətə deyil”.

Q.Hüseyinli vurğulayıb ki, dünyada 6 mindən çox millət olsa da, cəmi 202 dövlət quruluşu var:

“Amerikada 2 mindən çox millətin nümayəndəsi var. Amma o 2 mindən artıq millətin ayrıca məktəb və ya başqa müəssisəsi yoxdur. Ölkədə amerikanizm ideologiyası hər şeyi idarə edir. Kanadada da belədir. Qonşu Rusiyanı götürək. Orda 26-dan çox türkdilli etnosun muxtar və vilayət qurumları var. Amma əksəriyyətinin dilində nə orta məktəb var, nə də universitet. Həmişə xalqlar arasında nifaq salmağa çalışan İranda 40 milyon Azərbaycan türkü və digər türk etnosları yaşayır. Onların dilində tədris, teatr, mədəniyyət müəssiləri yoxdur. Hətta onlara küçələrdə öz dilində danışmağı qadağan edirlər. Bizdə milli azlıqlara xüsusi diqqət göstərilir. 44 günlük Vətən müharibəsində talışlar xüsusi cəsarət, qəhrəmanlıq göstərdilər. Hər zaman talışlar bu cür davranıb, çünki Azərbaycan onların vətənidir və bu vətəni qorumaq üçün həmişə öndə olublar. Elə bu səbəbdəndir ki, Şuşa şəhərindən Zəfər bayramı keçirilərkən Azərbaycanda yaşayan millətlərin folklor ansamblı da çıxış etdilər. Bu onu göstərir ki, Azərbaycan multikultural ölkədir və milli azlıqların dilinin, məxsus olduğu mədəniyyətinin inkişafı üçün hər bir şərait yaradır. Bu sistem gündən-günə fərqli formalarda zənginləşir. Sadəcə buna kənardan bədnam qüvvələr tərəfindən ilmələr atılır. Azərbaycanda əsası ulu öndər Heydər Əliyev tərəfindən qoyulan və bütün xalqları birləşdirən azərbaycançılıq məfkurəsi bütün millətləri vahid çətir altında birləşdirir”.
“Ermənistan Azərbaycana dörd dəfə “İskəndər” atıb” - Sensasion ETİRAFLARErməni hərbi ekspert Van Ambarçumyan 2020-ci ilin Tovuz hadisələri və 44 günlük Vətən müharibəsi ilə bağlı Ermənistanın yalanlarını ifşa edib.

Hərbi ekspert "Budrooo news” yutub kanalında Armen Qriqoryan ilə müsahibəsi zamanı bir sıra maraqlı faktların üstünü açıb.

O, 2020-ci ilin iyul ayında baş verən hadisələrdən danışarkən bildirib ki, Ermənistanın Azərbaycanın xüsusi təyinatlılarının "UAZ” markalı maşın ilə bu ölkənin dövlət sərhədini pozmağa cəhd etməsi ilə bağlı iddiasına görə ölkəsinin adına utanc hissi keçirib.

"Azərbaycanın xüsusi təyinatlıları nəyə görə gündüz vaxtı adi "UAZ” ilə hər hansı cəhd etmək istəsin ki? O hadisələrin təşəbbüskarı Ermənistan oldu. Ağlıma yalnızca bir fikir gəlir: hazırkı rəhbərlik göstərməyə çalışdı ki, 2016-cı ildə hektarlarla torpaq itirən əvvəlki rəhbərlərdən fərqli olaraq yalnızca irəli hərəkət edirlər və geri çəkilmirlər. Əslində isə azərbaycanlı hərbçilər sadəcə öz nəzarətləri altında olan ərazilərdə patrul həyata keçirirdilər. Ermənistan tərəfi isə bu "UAZ”ı atəşə tutmağa başladı. Nəticədə isə, o yandı”, - deyə ekspert qeyd edib.

Hərbi ekspert, həmçinin vurğulayıb ki, vəziyyəti kəskinləşdirmək münaqişədə açıq-aydın zəif tərəf olan Ermənistanın maraqlarına uyğun deyildi. Lakin Ermənistan tərəfi bu addımı atdı: "O zaman mən bunu bilirdim, lakin deyə bilmirdim, məni başa düşməzdilər”.

Van Ambarçumyan bildirib ki, Ermənistan tərəfi həmin dövrdə İsrail istehsalı olan və istənilən hava şəraitinə uyğun taktiki pilotsuz uçuş aparatı "Hermes-900”u vuran dünyada ilk ölkə olduqlarını iddia edəndə də utanc hissi yaşayıb. Ermənistan tərəfi o zaman iddia edirdi ki, sözügedən dronu "OSA-AK” zenit raket kompleksinin köməkliyi ilə vurub:

"İnformasiya müharibəsi aparmaq istəyirsinizsə, bunu etməyi bacarın. Bu məlumat tamamilə yalandır. Pilotsuz uçuş aparatı 9100 metr hündürlükdə uçur. Bu aparat vurulması çətin olsun deyə xüsusi olaraq layihələndirilib. "OSA-AK” zenit raket kompleksinin maksimum zərbə hündürlüyü 5000 metr təşkil edir. Düşünürəm ki, başqa nəsə demək əhəmiyyət kəsb etmir. Onlar özlərini gülünc vəziyyətə salıblar”.

Hərbi ekspert, həmçinin ölkə rəhbərliyini Rusiyanın "Su-30SM” təyyarələrini almasına görə kəskin tənqib edib: "Mən deyirdim ki, nəyi idarə edə bilirlərsə, onu almaq lazımdır. Bu təyyarəyə 120 milyon dollar xərclənib. Bu dövlətin piarı üçün edilmişdi. Çünki o vaxt Ermənistanın ilk dəfə qırıcı təyyarə alması barədə çox danışılırdı”.

Bununla yanaşı, 44 günlük Vətən müharibəsindən danışan erməni ekspert Ermənistanın Azərbaycanın Xankəndini və dinc sakinləri bombardman etməsi ilə bağlı bütün iddialarını yalanlayıb. O bildirir ki, Azərbaycan istəsəydi, Xankəndinin əsas meydanındakı "hökumət binaları”nı asanlıqla vura bilərdi: "Onlar nəinki Qarabağda, hətta İrəvandakı hədəfləri vura bilərdilər”.

Hərbi ekspert əlavə edib ki, Ermənistan 4 dəfə "İskəndər” taktiki raket kompleklərindən istifadə edib:

"Onlar iki dəfə Şuşaya, iki dəfə Bakı istiqamətində atəş açıblar. Lakin raketlərin qarşısı Azərbaycan tərəfindən alınıb və məhv edilib”.
"İran ikibaşlı siyasətindən əl çəkməlidir"Əlisahib Hüseynov
Milli Həmrəylik Partiyasının sədri


Şanxay Əməkdaşlıq Təşkilatının (ŞƏT) Düşənbədə keçrilən zirvə toplantısında bir araya gələn Ermənistan baş naziri Nikol Paşinyanla İranın yeni prezidenti İbrahim Rəisinin görüşündə tərəflərin iki ölkənin hökumətinin razılaşdırılmış birgə hərəkətlərinin önəmliliyini vurğulaması xüsusi maraq doğurur. Görəsən, söhbət hansı birgə hərəkətlərdən gedir? Bu hərəkətlərin sırasında qonşu ölkələrə, xüsusən də Azərbaycan və Türkiyəyə qarşı atılması nəzərdə tutulan addımlar da varmı? Böyük ehtimalla yəqin ki, var.

Azərbaycanın Qarabağ bölgəsinin Rusiya sülhməramlı kontingentinin müvəqqəti nəzarətinda olan hissəsinə qanunsuz yük dolu karvanların göndərilməsindən tutmuş, Xocalı rayonunun Daşbulaq kəndi yaxınlığında aparılan tikinti işlərinə iranlı fəhlələrin cəlb olunmasına qədər bir çox istiqamətlərdə İranla Ermənistanın Qarabağda üzə çıxan işbirliyi danılması mümkün olmayan faktlarla sübut olunmaqdadır. Əlbəttə, İranın bu qəbildən olan məkrli addımlarının Ermənistanın ayaqda saxlanmasına və regionda mövqelərinin möhkəmlənməsinə xidmət etməsi üçün nəzərdə tutulduğu artıq heç kimdə şübhə doğurmur. Lakin İranı idarə edən molla rejimi bilməlidir ki, Cənubi Qafqazda möhkəmlənməyin yolu Ermənistan kimi uğursuz “proyekt”i və məğlub dövləti dəstəkləməkdən, bəsləməkdən yox, regionun aparıcı dövləti sayılan Azərbaycanla sağlam qonşuluq münasibətlərinin qurulmasından və konstruktiv əməkdaşlıqdan keçir.

Ermənistanı dəstəkləmək siyasəti artıq köhnəlmiş, kiflənmiş siyasətdir. Bu siyasətin vaxtı keçib. Ermənistan kimi autsayder ölkəni dəstəkləməyin heç bir uğurlu perspektivi ola bilməz. Rəsmi Tehran nəhayət ki, bu aksiom xarakterli həqiqəti anlamalıdır. İranın yeni rəhbərliyi öz sələflərinin ermənipərəst siyasətindən əl çəkməli, yeni siyasi doktrindən çıxış etməlidir. Və bu yeni siyasi kursda qonşularla münasibətlər müstəvisində əsas ağırlıq ilk növbədə məhz Azərbaycanla normal münasibətlərin qurulmasına verilməlidir. Əks halda, Tehranın Ermənistana dəstək yönümlü yanlış addımlarının ağır fəsadlarının aradan qaldırılmasından ötrü İranın Azərbaycandakı səfiri Seyid Abbas Musəvinin günü Azərbaycan Prezidentinin köməkçisi Hikmət Hacıyevin qapısında yatmaqla, görüş üçün növbə gözləməklə keçəcək.

Molla hökumətinin Azərbaycana yönəlik siyasətində ciddi korrektələr, müsbət dəyişikliklər etməsi günün tələbidir. İran ikibaşlı siyasətindən əl çəkməlidir, eyni vaxtda həm mənfur Ermənistanla, həm də bizim ölkəmizlə dostluq və qardaşlıqdan dəm vurmağın absurd olduğunu başa düşməlidir və bütün anlaşılmazlıqları tezliklə aradan qaldırmalıdır. Real vəziyyət onu göstərir ki, İranın Ermənistana yönəlik dəstək addımlarına və Qarabağda üzə çıxan İran-Ermənistan işbirliyinə qarşı Azərbaycanın ata biləcəyi adekvat cavab addımları çoxdur. Gorus-Qafan yolunun Qubadlı rayonundan keçən hissəsini İranın Ermənistana müxtəlif təyinatlı yüklər daşıyan maşınlarının üzünə bağlamağımızın bu ölkələrdə yaratdığı psixoloji böhran və vurduğu iqtisadi zərər də buna əyani sübutdur. Bütün bunlar İran tərəfini ciddi düşündürməlidir. Hər kəs bilir ki, biz İranla mehriban qonşuluğun, sıx əməkdaşlığın və dostluğun tərəfdarıyıq. Ona görə də, İranın yeni rəhbərliyi tərəfindən də eyni mövqenin sərgilənəcəyini gözləyirik və cənub qonşumuzun hakim dairələrinin Azərbaycan ictimaiyyətində qıcıq yaradan addımlarına tamamilə son qoyulacağına ümid bəsləyirik. Tehran Bakının xoş məramını düzgün qiymətləndirməlidir.

"Çoxsaylı media təsisatları var ki, Ermənistanın gündəmindən xəbər daşımaq üçün az qala yarışa çıxıblar"Elçin Mirzəbəyli

Ermənistanın “Qrapark” qəzetinin, daha sonra isə sözügedən nəşrə istinadən bütün erməni mediasının “Azərbaycanla Ermənistan arasında sülh müqaviləsi ətrafında Rusiyanın paytaxtında aparılan danışıqlar”la bağlı tirajladığı məlumat, əsasən ictimai rəyin öyrənilməsinə xidmət edir.

Sözügedən məlumatda Ermənistan tərəfinin “artıq başa çatmış danışıqların nəticəsindən çox razı qaldığı” bildirilir. Eyni zamanda qeyd olunur ki, “görünür SSRİ-nin inzibati xəritələri əsasında, “Arsax”ın (ermənilərin kompakt yaşadığı və Rusiya sülhməramlılarının müşahidəsi altında olan Azərbaycan əraziləri) statusuna toxunulmadan delimitasiya və demarkasiya prosesinin başlanaılmasına dair razılıq əldə olunub. Rusiya sülhmərmlılarının Azərbaycan ərazilərindəki mövcudluğunu təmin edən 5 illik müddətlə bağlı məhdudiyyət aradan qaldırılıb və sülhməramlı missiyanın “mandatı” qeyri-müəyyən vaxta kimi uzadılıb”.

Göründüyü kimi “ermənilərin razı qaldığı nəticələrə” görə, “status” cəhənnəmin dibindəcə qalır, sərhədlərin delimitasiya və demarkasiya prosesi isə SSRİ-nin xəritələrindəki inzibati ərazi bölgüsünə əsasən aparılır. “Xəbər”in bu hissəsi çox güman ki, Ermənistanın ictimai rəyinin öyrənilməsinə və obyektivlik görüntüsünün yaradılmasına hesablanıb.

Rusiya sülhməramlılarının Azərbaycan ərazilərində qeyri-müəyyən vaxta qədər qalacaqları barədə razılığın əldə olunması ilə bağlı iddia isə, istisnasız olaraq, Azərbaycanın ictimai rəyinə ötürülmək üçün düşünülüb. Məqsəd isə ictimai rəydə çat yaratmaqdan ibarətdir.
Məlum “xəbər”də Zəngəzur dəhlizi ilə bağlı irəli sürülən iddialar da dezinformasiya xarakterlidir.

Çünki “xəbər”də öncə azərbaycanlıların fərdi qaydada bu yoldan istifadə üçün müəyyən vəsait ödəyəcəkləri qeyd olunduğu halda, daha sonra konkret məbləğdən – Azərbaycan tərəfindən hər il Ermənistana ödəniləcək 150 milyon ABŞ dollarından söz açılır. Bu isə Zəngəzur dəhlizindən istifadə ilə bağlı bir-biri ilə ziddiyyət təşkil edən iki fərqli yanaşma olmaqla bərabər, açıq-aşkar nəzərə çarpan məntiqsizliyi də ortaya qoyur: Bəlkə Azərbaycan, ümumiyyətlə bu dəhlizdən istifadə etməyəcək? Digər tərəfdən, sual olunur, bəs Ermənistan Azərbaycan ərazisindən keçən kommunikasiyalardan istifadəyə görə hər il ölkəmizə nə qədər vəsit ödəyəcək?

Doğrusunu deyim, əsasən dezinformasiya və təbliğat xarakterli tezislərdən ibarət olan materialdan daha çox məni narahat edən, Ermənistanın “beyin mətbəxləri”ndə “bişirilən” bu “xəbər”in Azərbaycan oxucusunun menyusuna olduğu kimi, şərh edilmədən təqdim olunmasıdır. “Xəbər” olduğu kimi Azərbaycan mediasında tirajlanır, bundan bir neçə saat sonra isə, əsasən səthi və tələsik yanaşmalardan ibarət olan şərhlər yayımlanır. Və bununla da mediamızın gündəminin Ermənistan tərəfindən ötürülən dezinformasiyalarla zəbt edilməsinə imkan yaradırıq.

Son cümlələrim təkcə “sülh danışıqları” barədə iddiaların əks olunduğu məlum “xəbər”lə bağlı deyil... Hər gün Ermənistan mediasının gündəmindən Azərbaycanın gündəminə saysız-hesabsız, əksəriyyəti təbliğat, təxribat xarakterli olan “xəbər”, “şərh” daşıyırıq. Çoxsaylı media təsisatları var ki, Ermənistanın gündəmindən xəbər daşımaq üçün az qala yarışa çıxıblar. Amma bunun əksi baş verməlidir. Ölkəmizin maraqları və informasiya təhlükəsilziyimiz bunu tələb edir.

Sülh müqaviləsi müzakirə edilir? – Detallar məlum olduErmənistan mediası Moskvada “sülh müqaviləsi” ilə bağlı müzakirələrin aparıldığı iddiasını tirajlayıb. İddiaya görə, Ermənistan müdafiə naziri Arşak Karapetyanın rəhbərlik etdiyi nümayəndə heyəti Rusiyada keçirilən “Qərb-2021” hərbi təlimləri çərçivəsində Azərbaycanla “sülh müqaviləsi”nin detallarını müzakirə edib.

Son dövrlər Azərbaycanın siyasi-hərbi rəhbərliyindən heç kimin Rusiyaya səfər etmədiyini nəzərə alsaq, bu iddianın reallıqla məsafəsi daha da uzaqlaşır, lakin detallar maraqlıdır:

- Sərhədin delimitasiya və demarkasiya prosesinin SSRİ xəritəsinə uyğun aparılması razılaşdırılıb;

- Qarabağın “statusu” ilə bağlı erməni tərəfi heç nəyə nail olmayıb: bu məsələ İrəvan tərəfindən hələ də açıq saxlanılır;

- Rusiya sülhməramlılarının Qarabağda qalma müddətinə 5 ildən sonra baxılacaq;

- Zəngəzur dəhlizinin açılması reallaşacaq: Ermənistanın yola görə tranzit haqqı alması mümkündür;

- Sənədin tamamlanması yanvar ayına qədər yekunlaşacaq;

Bu məqamlar Azərbaycanın Ermənistana təqdim etdiyi yekun sülh müqaviləsi proqramına uyğundur. Erməni mənbələrin “sülh müqaviləsi” ilə bağlı müzakirələrin aparıldığı və tirajladıqları detalların həqiqiliyi sual altındadır.

Lakin Azərbaycan-Türkiyə və Azərbaycan-Türkiyə-Pakistan hərbi təlimlərinin “sülh müqaviləsi” masasında Bakının əlini gücləndirəcəyi şübhəsizdir.

Asif Nərimanlı
XİN rəsmisi Ermənistanla bağlı açıqlama yaydıAzərbaycan tərəfindən cari ilin yanvar ayında Avropa İnsan Hüquqları Məhkəməsində Ermənistana qarşı qaldırılan iddiaya əlavə olaraq, yaxın günlərdə Azərbaycan İrqi ayrı-seçkiliyin bütün formalarının ləğvi haqqında Beynəlxalq Konvensiyanın (ICERD) sistematik şəkildə pozulmasına görə Ermənistanı məsuliyyətə cəlb etmək üçün məhkəməyə müraciət edəcək.

Avrasiya.net xəbər verir ki, bunu Xarici İşlər Nazirliyinin Mətbuat xidməti idarəsinin rəisi Leyla Abdullayeva KİV-in Ermənistana qarşı beynəlxalq məhkəmə işlərindəki son vəziyyətlə bağlı sualını cavablandırarkən deyib.

“Ərazilərimizin bir hissəsinin Ermənistan tərəfindən qanunsuz işğalına son verildikdən sonra, azərbaycanlılara qarşı insan hüquqlarının kobud şəkildə pozulmasına dair faktlar tərəfimizdən diqqətlə toplanmış və sənədləşdirilmişdir. Buraya Ermənistanın azərbaycanlıları etnik mənşəyinə görə zor gücünə qovması, işgəncə verməsi, öldürməsi və qəddar rəftar etməsi halları daxildir. Bir milyondan çox azərbaycanlı Ermənistanın təcavüzü nəticəsində evlərindən zorla qovulmuşdur. Azərbaycanın şəhərləri tamamilə yer üzündən silinmişdir. Üçtərəfli bəyannamənin imzalanmasından sonra Ermənistan keçmiş işğal olunmuş ərazilərdə minaların basdırılması vasitəsilə azərbaycanlı məcburi köçkünlərin evlərinə geri dönüşünün qarşısını alaraq və minalanmış ərazilərin xəritələrini Azərbaycana verməkdən imtina etməklə ICERD-ni pozmağa davam etdi.

Biz, Ermənistan tərəfindən ICERD-nin müddəalarının kobud şəkildə pozulması ilə əlaqədar beynəlxalq hüquq çərçivəsində ədaləti təmin edəcəyik”, - deyə Leyla Abdullayeva vurğulayıb.
Hikmət Hacıyev İran səfiri ilə ikinci dəfə görüşdüPrezidentin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev İranın ölkəmizdəki səfiri Seyid Abbas Musəvi ilə görüşüb.

Avrasiya.net xəbər verir ki, bu barədə səfir Tviter səhifəsində paylaşım edib.

"Bu həftə ikinci dəfə cənab Hikmət Hacıyevlə görüşmək şansım oldu. Səmimi müzakirələrimiz zamanı yaxşı münasibətlərimizin mövcud vəziyyəti, gələcəyi və maraq doğuran digər məsələləri nəzərdən keçirdik", - səfir yazıb.
"Soydaşlarımızın bir hissəsi ayağa qalxarsa İran diz üstə çökə bilər"Avrasiya.net xəbər verir ki, bunu Azərbaycan Liberal Demokrat Partiyasının sədri Fuad Əliyev "Xalq Cəbhəsi"nə bildirib.

Partiya sədri qeyd edib ki, İran tarixən Azərbaycana düşmən gözü ilə baxıb. Özünü İslam Respublikası adlandırsa da islam qaydalarına həmişə arxa çevirib, ona zidd hərəkətlər edib, siyasət yürüdüb: "Uzaga getməyək, ötən ayın əvvəlində İranın Ermənistandakı səfiri Abbas Bədəxşan Zohuri, səfirliyin hərbi attaşesi polkovnik Bəhmən Sadeginlə birlikdə Ermənistan Müdafiə Nazirliyi nümayəndələrinin müşayiəti ilə Qeqarkunik bölgəsinə səfər ediblər. Hərbi hissənin komandiri, general-mayor Arayik Arutyunyan qonaqlara Ermənistan-Azərbaycan sərhədindəki vəziyyət barədə məlumat verib. Qeyd edək ki, indiyədək yalnız ABŞ və Fransa səfirlərinin ziyarət etdikləri Ermənistanın Azərbaycanla həmsərhəd ərazilərinə İran rəsmilərinin səfəri bir sıra haqlı suallar doğurur. Ermənistan-Azərbaycan sərhəddini yalnız ABŞ və Fransanın Ermənistandakı səfirləri ziyarət edib. Təkcə onu xatırlamaq kifayətdir ki, ikinci Qarabağ müharibəsi zamanı İranın xarici işlər naziri Cavad Zərif Ermənistanın ərazi bütövlüyünü İranın qırmızı xətti adlandırıb. Bu vaxtadək İran Ermənistanın işğal etdiyi Azərbaycan torpaqlarından islam abidələrini dağıtmasına bir etiraz edibmi? Əksinə orada Azərbaycana məxsus dini abidə və ibadət yerlərini öz adına çıxarmağa cəhdlər ediblər. İran şirkətləri Qarabağda yeraltı və yerüstü bütün sərvətlərimizi talan edin. Ermənilər farslara böyük qucaq açmışdılar".

Partiya sədri onu da vurğulayıb ki, bu gün də İran Qarabağdakı ermənilərə yanacaq daşıyırsa, buna heç də təəccüblənmək lazım deyil: "Paşinyan seçkidən sonra ilk səfərini İrana etdi və bununla da İrəvanın Tehranın qardaşı olduğunu göstərdi. İran həmişə Azərbaycanın uğuruna göz yumub, qəbul etməyib. Xüsusən də 44 günlük müharibədə qazandığımız qələbə İranı da sındırdı. Azərbaycan-Türkiyə qardaşlığı da İranın kürkünə birə salıb. İran regionda özünü güc, məğlubedilməz hesab edir. Amma unudur ki, 30 milyondan çox soydaşımız var. Onların üçdə bir hissəsi ayağa qalxarsa İran diz üstə çökə bilər. İranın Azərbaycana qarşı nə Rusiyaya, nə də Ermənistana dostluq əlinin uzatmasının vaxtıdır. İranın özü bu gün Azərbaycandan asılıdır, bunu unutmasın. İslam haqq, ədalət dinidir. İslam Respublikası olan İran haqqın, ədalətin yanında durnalıdır".
Azərbaycandan İrəvana ötürülən milyonlar: İran nələr itirdi?Azərbaycanın torpaqlarını işğaldan azad etməsi ilə İran həm də sanksiyaların dəlinməsi üçün istifadə etdiyi platformanı itirdi: işğal dövründə Tehran Qarabağda “çirkli pulların yuyulması” mexanizmini qurmuşdu.

İrandan Qarabağa gətirilən pullar burada iranlılar tərəfindən qurulmuş banklar vasitəsilə İrəvanda yenə iranlıların qurduğu banklara ötürülür və “təmizlənirdi”.

Dünya Bankının 2019-cu il hesabatında konkret faktlar əksini tapıb: hesabatda qeyd olunur ki, 2017-ci ildə Azərbaycandan Ermənistana 7 milyon, 2018-ci ildə 211 milyon dollar pul köçürülüb.

Erməni müxalifəti 44 günlük müharibədən sonra “Azərbaycandan Ermənistana 211 milyon pul köçürülüb” detalından Paşinyana qarşı “türklərə satılıb” ittihamında arqument kimi istifadə edirdi. Hərçənd, Azərbaycandan köçürülən pul əslində Qarabağdan köçürülən İran pulu idi.

Dünya Bankı beynəlxalq hüquqa əsasən Qarabağı Azərbaycan ərazisi kimi tanıdığı üçün pul transferini də bu prinsiplə hesablayır.

ABŞ Konqresinin Nümayəndələr Palatasının keçmiş üzvü Dan Barton da 2018-ci ildə verdiyi müsahibəsində İranın Qarabağdakı banklar vasitəsilə pulları “yuduğunu” və Hizbullahı maliyyələşdirdiyini açıqlamışdı.

Bu, İranın işğal dövründə Azərbaycan torpaqlarında həyata keçirdiyi qanunsuzluqların kiçik bir hissəsidir. Müharibədən sonra bu mexanizmdən məhrum oldular. Bu gün Tehranın Xankəndidəki separatçı-terrorçu rejimə dəstək vermək üçün “min bir əziyyətə” qatlanmasının səbəblərindən biri də “bəlkə bu mexanizmi xilas” etmək ümididir.
Siyasi partiyaların nümayəndələri Türk Şəhidliyini ziyarət edibAzərbaycanda bir qrup siyasi partiyaların nümayəndələri Bakının işğaldan azad olunmasının 103-cü ildönümü münasibətilə Türk Şəhidliyini ziyarət ediblər.

Avrasiya.net-in məlumatına görə, ziyarətdə Yeni Azərbaycan Partiyasının sədr müavini - Mərkəzi Aparatın rəhbəri Tahir Budaqov, Vətəndaş Həmrəyliyi Partiyasının sədri Sabir Rüstəmxanlı, Ana Vətən Partiyasının sədri Fəzail Ağamalı, Böyük Quruluş Partiyasının sədri Fazil Mustafa, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Azərbaycan Sosial Rifah Partiyasının sədri Əsli Kazımova, REAL Partiyasının üzvləri Erkin Qədirli və Natiq Cəfərli, Böyük Azərbaycan Partiyasının sədri Elşad Musayev iştirak ediblər.

Ziyarətçilər sırasında partiyaların rəhbər şəxsləri ilə yanaşı digər üzvləri də olub.