Kreml Putinlə Ərdoğanın müzakirə mövzularını açıqlayıbRusiya prezidenti Vladimir Putin və Türkiyənin dövlət başçısı Rəcəb Tayyib Ərdoğan qarşıdakı danışıqlarda bir çox məsələləri, xüsusi halda, Suriyada, Əfqanıstanda və Liviyada yaranmış vəziyyəti geniş müzakirə edəcəklər.

“Report” xəbər verir ki, bu barədə Rusiya liderinin mətbuat katibi Dmitri Peskov bildirib.

"Düşünürəm ki, ilk növbədə Suriya mövzusu gündəlikdə olacaq, əlbəttə, Əfqanıstan, Liviya barədə və başqa beynəlxalq məsələlər üzrə ənənəvi fikir mübadiləsi aparılacaq", - Kremlin nümayəndəsi vurğulayıb.

Putinlə Ərdoğan arasında danışıqların sentyabrın 29-da Soçidə keçiriləcəyi gözlənilir.

Daha əvvəl Ərdoğan bildirib ki, həmkarı ilə Türkiyə-Rusiya əlaqələrini və Suriyada vəziyyətin necə olduğunu, bundan sonrakı mərhələdə atılacaq addımları geniş şəkildə müzakirə edəcək.

İki prezidentin son birbaşa görüşü 2020-ci ilin martında Kremldə olub. Koronavirus pandemiyası səbəbindən yaranmış vəziyyətə görə sonrakı danışıqlar ya telefonla, ya da videokonfrans rejimində keçirilib.

AŞPA mina xəritələrinin verilməsinin vacib olduğunu bildirdiAvropa Şurası Parlament Assambleyasının (AŞPA) bu gün işə başlayan payız sessiyasında "Ermənistan və Azərbaycan arasındakı münaqişənin humanitar nəticələri" adlı qətnamə qəbul edilib.

Avrasiya.net xəbər verir ki, qətnamədə 1991-1994-cü illərdə baş verən birinci Qarabağ müharibəsi və 2020-ci ildə 44 günlik ikinci Qarabağ müharibəsi zamanı həlak olanlar, itkin, qaçqın, məcburi köçkün düşənlər, mədəni irsə dəyən ziyanlar, minalanmış ərazilər və digər məsələlər yer alıb.

Qarabağ müharibəsi zamanı baş verən insan faciəsinin aradan qaldırılması məqsədilə hər iki tərəfə tövsiyələr ünvanlanıb.

AŞPA birinci Qarabağ müharibəsinə son qoyan 9-10 noyabr tarixli atəşkəs elan olunmasına dair üçtərəfli razılaşmanı yüksək qiymətləndirib, sənədin atəşkəs üçün əsas elementlərdən ibarət olduğunu, müharibənin humanitar nəticələrinin həll edilməsinə imkan yaradan aparıcı sənəd olduğunu bildirib.

Qətnamənin müzakirəsi zamanı çıxış edən AŞPA üzvləri mina xəritələrinin Azərbaycana verilməsinin bundan sonrakı insan ölümünün qarşısının alınması üçün vacib olduğunu xüsusi vurğulayıblar.

Beynəlxalq icma xüsusilə Avropa Şurası hər iki ölkəyə yardım göstərməyə dəvət edilib.
Əliyevin şəhidlərin xatirəsi önündə tarixi mesajlarıMüharibənin ildönümündə hələ də Qarabağla bağlı təhdidlər, risklər mövcuddur. Və Əliyev Anım Günündə bu təhdidlərlə bağlı Azərbaycanın mövqeyini təkrarladı, lakin diqqətçəkən məqam təhdidlərə qarşı atılacaq addımları bu dəfə şəhidlərin xatirəsi önündə elan etməsi idi.

Azərbaycanın ərazi bütövlüyü bərpa edilib: Qarabağda nəzarətdən kənar ərazilər müzakirə mövzusu deyil.

Əliyev bildirir: “Azərbaycanda “Dağlıq Qarabağ” adlı inzibati ərazi mövcud deyil və əgər kimsə “Dağlıq Qarabağ” adlı ölünü diriltmək istəyirsə, onu öz ərazisində diriltsin, öz ərazisində “Dağlıq Qarabağ” adlı qurum yaratsın, respublika yaratsın, cəmiyyət yaratsın. Biz də onu tanıyarıq, ancaq Azərbaycanda yox! Bu məsələ öz həllini tapdı. Bunu mən deyirəm - Azərbaycanın Prezidenti, Silahlı Qüvvələrin Ali Baş Komandanı. Hər kəs bu sözlərlə hesablaşmalıdır və hesablaşacaqdır”.

Rəsmi Bakının Qarabağla bağlı mövqeyi dəyişmir, lakin bu dəfə bir qədər də sərtləşdirilir. Əliyev əslində nə deyir?

1. Azərbaycana qarşı separatizmi körükləyənlərin özləri eyni halla üzləşə bilərlər;

2. Ölünü diriltmək istəyənlərə qarşı Bakı da eyni taktikanı seçə bilər: bu, “hücum diplomatiyası”na əsaslanan mesajdır;

3. Bakının hərbi güc addımı təkcə Ermənistana yox, “Dağlıq Qarabağı” diriltmək istəyən bütün tərəflərə şamil edilə bilər: Əliyev ordunun komandanı kimi xəbərdarlıq edir.

Xəbərdarlığını şəhidlərin xatirəsi önündə etməsi şəhidlərin ruhu önündə verilən söz idi.

“Anım Günündə şəhidlərimizin əziz xatirəsi önündə bir daha deyirəm, əgər biz görsək ki, erməni faşizmi baş qaldırır, əgər biz görsək ki, xalqımıza, dövlətimizə yeni təhlükə mənbəyi yaranır, heç tərəddüd etmədən erməni faşizminin başını bir daha əzəcəyik. Bunu hər kəs bilsin!”, - Əliyev deyir.

Və bununla Əliyev Qarabağla bağlı geriyədönüşün olmadığı, heç bir güzəştin olmayacağı mesajını bu məsələdə maraqlı olan hər kəsə bəyan edir.

Əliyevin çıxışında iki mesaj da önəmli idi:

Birincisi, müharibənin ildönümündə xəbərdarlığı Ermənistana yox, üçüncü tərəflərə etdi: bu, “İrəvan artıq tərəf deyil, tərəf olmaq istəyənlər də Ermənistana qarşı atılan addımlarla üzləşəcək” deməkdir;

İkincisi, bölgədə və Azərbaycan-Ermənistan münasibətlərində gündəliyi formalaşdıran tərəf Bakıdır, yəni “regionda bizimlə hesablaşmalısınız”.

Asif Nərimanlı
ABŞ səfiri şəhidlərimizin xatirəsini yad etdi - FotoABŞ-ın Azərbaycandakı səfiri Örl Litzenberger İkinci Qarabağ müharibəsində şəhid olanların xatirəsini ehtiramla yad edib.

Avrasiya.net xəbər verir ki, bu barədə ABŞ-ın Azərbaycandakı səfiriyin Tvitter səhifəsində məlumat yayılıb.

"Ötən il və illər ərzində Qarabağ münaqişəsində ölən və yaralananların ailələrinə dərin hüznlə başsağlığı veririk", - diplomatik nümayəndəlikdən bildirilib.
Azərbaycan Müzəffər Xalqın Qalib Dövlətinə çevrilibNail Cəlil: “Prezident İlham Əliyevin qətiyyətli, düşünülmüş, prinsipial siyasəti ölkəmizi addım-addım zəfərə yaxınlaşdırıb”

““Güclü dövlət, güclü ordu” devizi hər zaman Prezident İlham Əliyevin siyasi fəaliyyətinin aparıcı xəttini təşkil edib. Dövlət başçısı hakimiyyətə gəldiyi gündən işğal edilmiş torpaqlarımızın azad edilməsinin başlıca hədəf olduğunu bildirib. Məhz onun rəhbərliyi, Ali Baş Komandanlığı ilə ən müasir, modern silahlarla təchiz edilmiş, yüksək hazırlıqlı, peşəkar, məğlubedilməz, yenilməz Azərbaycan ordusu qurulub. Prezident İlham Əliyevin qətiyyətli, düşünülmüş, prinsipial siyasəti ölkəmizi addım-addım zəfərə yaxınlaşdırıb. O, güclü, sivil siyasi sistem qurmaqla ölkənin beynəlxalq nüfuzunu da əhəmiyyətli dərəcədə gücləndirib. Xalqın bu istiqamətdə səfərbər edilməsi nəticəsində 44 günlük müharibədə Azərbaycan işğalçı Ermənistanın silahlı qüvvələrini tam məğlub edərək, işğal altda olan ərazilərimizi geri qaytarıb”.

Bu fikirləri “Xalq Cəbhəsi”nə eksklüziv açıqlamasında 44 günlük Vətən Müharibəsində qələbəyə zəmin hazırlayan şərtləri və amilləri şərh edən politoloq Nail Cəlil səsləndirib.

Siyasi ekspert vurğulayıb ki, əldə etdiyimiz böyük uğur, parlaq qələbə ölkəmizin hərbi-siyasi, sosial-iqtisadi qüdrətinin davamlı, məqsədyönlü şəkildə artırılmasının, beynəlxalq səviyyədə çevik diplomatiyanın, haqq səsimizin bütün dünya ictimaiyyətinə çatdırılmasının, sonda qəti və dönməz addımların məntiqi yekunudur: “Azərbaycan dövləti və xalqı bu qələbəyə nail olmaq, ərazi bütövlüyümüzü bərpa etməkdən ötrü uzun illər, hətta onilliklər ərzində çalışıb, ciddi səylər göstərib. Nəticədə zəruri tarixi şərait yetişib, çoxdan arzulanan və gözlənilən qələbə əldə edilib”.

Nail Cəlil daha sonra əlavə edib ki, ərazilərimizin işğaldan azad edilməsi həm də milli qürurumuzun təsdiqlənməsi, təmin olunması deməkdir: “Bunun biz düşmənin məkrli bir şəkildə bizə aşılamağa çalışdığı “məğlub xalq” sindromunu darmadağın etmişik, lap kobud da səslənsə, cəhənnəmə, gora göndərmişik. Bu mənada, ərazi bütövlüyümüzün bərpası həm də milli ləyaqətimizin təntənəsidir. Bununla biz bütün dünyaya böyük, tarixi dövlətçilik ənənələrinə malik olduğumuzu, ermənilərin cəfəng iddialarının mif olduğunu sübut etmişik. Azərbaycan artıq Prezident İlham Əliyevin siyasi iradəsi, qətiyyətli idarəçiliyi sayəsində Müzəffər Xalqın Qalib Dövlətinə çevrilib. Bu, xalqın böyük həmrəyliyi, qazilərimizin və şəhidlərimizin canı, qanı, böyük rəşadəti, qəhrəmanlığı sayəsində əldə edilmiş misilsiz qələbədir”.
BAXCP-dən Anım Günü ilə bağlı açıqlamaBu gün 50 milyondan çox azərbaycanlı üçün həm qürur, həm də kədər günüdür

Bütöv Azərbaycan Xalq Cəbhəsi Partiyası (BAXCP) Anım Günü ilə bağlı açıqlama yayıb. Açıqlamada deyilir:
Bu gün bir il öncə Azərbaycan Respublikasının ərazi bütövlüyünün bərpası məqsədilə başladılan əks-hücum əməliyyatının ildönümü, Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizin, şəhidlərimizin Anım Günüdür. Bu gün o taylı-bu taylı Azərbaycanda yaşayan, qəlblərində Vətən, Bayraq sevgisi, müxtəlif dövlətlərin ərazisində ömür sürən 50 milyondan çox azərbaycanlı üçün həm qürur, həm də kədər günüdür.

Torpaqlarımızın 30 ilə yaxın bir zaman ərzində işğal altında qalmasına, bir milyondan çox soydaşımızın öz yurdlarından didərgin düşməsinə, yaşayış məntəqələrimizin viran qoyulmasına, xalqımıza və dövlətimizə qarşı nümayiş etdirilən misli görünməmiş haqsızlığa baxmayaraq, yenidən toparlanaraq düşməni torpaqlarımızdan qovduğumuz, gücümüzü, iradəmizi, birliyimizi bütün dünyaya nümayiş etdirdiyimiz üçün qürurluyuq. Bu müqəddəs müharibədə bəşəriyyətin hər tarixinə qızıl hərflərlə yazılan qəhrəmanlıq nümayiş etdirən, hər biri bir orduya bərabər igidlərimizi cismən itirdiyimiz üçün kədərliyik.

Azərbaycan xalqı və dövləti 30 ilə yaxın bir zaman kəsiyində Ermənistanın torpaqlarımızı işğal etməsi nəticəsində başlayan münaqişənin dinc yolla həll edilməsi üçün böyük səbr və iradə nümayiş etdirdi, BMT Təhlükəsizlik Şurasının Azərbaycan torpaqlarının işğaldan qeyd-şərtsiz azad edilməsi ilə bağlı qətnamələrinin icra olunacağına ümid bəslədi və bunun baş verməsi üçün mümkün olan bütün vasitələrdən istifadə etdi. Bu müddət ərzində münaqişənin həllində vasitəçilik missiyasını yerinə yetirən, BMT Təhlükəsizlik Şurasının üç daimi üzvünün həmsədrlik etdiyi ATƏT-in Minsk Qrupu işğalçıya qarşı beynəlxalq hüququn norma və prinsiplərindən irəli gələn təzyiq mexanizmlərinin tətbiqi istiqamətində konkret addımlar atmadan, nəticəsiz və uzun-uzadı danışıqlar vasitəsilə işğalın əbədiləşməsi üçün əlverişli zəmin yaratmağa səy göstərdi.

2018-ci ildə Ermənistanda siyasi hakimiyyəti ələ keçirən Nikol Paşinyanın, həmçinin vaxtilə Ermənistana rəhbərlik etmiş müharibə caniləri, Xocalı qatilləri Robert Köçaryan və Serj Sarkisyanın açıqlamalarından da bəlli oldu ki, rəsmi İrəvan danışıqlar prosesinin davam etdiyi müddətdə “bir qarış torpaq da verməmək” prinsipi ilə hərəkət edib.

Yaranmış vəziyyət Azərbaycan üçün başqa yol və seçim qoymadığı üçün, ötən il sentrabrın 27-də Ermənistanın davamlı təxribatlarına qarşı “Dəmir yumruq” əməliyyatı başladıldı. Azərbaycan xalqı Ali Baş Komandanın ətrasında yumruq kimi birləşdi, tarixdə görünməmiş birlik, iradə nümayiş etdirdi.

Qardaş Türkiyə və Pakistanın siyasi və mənəvi dəstəyi ilə müzəffər Azərbaycan Ordusunun qəhrəman əsgər və zabitləri 30 ilə yaxın qürurumuza basılmış işğal damğasını qanlarıyla təmizlədilər, müqəddəs üçrəngli bayrağımızı işğaldan azad edilmiş yurd yerlərimizə, ən uca zirvələrdə dalğalandırdılar.

Bu müddət ərzində Azərbaycanın siyasi partiyaları, mediası, qeyri-hökumət təşkilatları ölkəmizin ədlətli mövqeyinin müdafiəsi üçün informasiya savaşının içərisində yer aldılar, xalqı Ali Bş Komandanın ətrafında səfərbər edərək düşmənin təxrinatlarına qarşı vahid mövqe sərgilədilər.

44 gün ərzində Ermənistan ordusunda 10 mindən artıq fərarilik faktı qeydə alındığı halda, Azərbaycanda bir nəfər də fərari olmadı. Azərbaycan vətəndaşları Vətənimizin ərazi bütövlüyünü təmin etmək, müharibəyə getmək üçün kütləvi şəkildə Səfərbərlik və Hərbi Xidmətə Çağırış üzrə Dövlət Xidmətinə müraciət ünvanladılar, sözügedən xidmətin yerli idarələrinin qarşısına axışdılar.

44 gün ərzində bütün Azərbaycan vətəndaşları, dünya azərbaycanlıları Ordumuza, dövlətimizə dəstək oldular. Hər kəs bacardığı qədər bu müqəddəs mücadilənin içərisində yer almağa çalışdı.

Şübhəsiz ki, 44 günlük müharibə nəticəsində əldə etdiyimiz qələbənin memarları Azərbaycan Bayrağını işğaldan azad edilən torpaqlarımızda dalğalandıran, ölkəmizin ərazi bütövlüyü yolunda sağlamlıqlarını itirən, canlarını fəda edən əsgər və zabitlərimiz, şəhidlərimizdir.

Bu gün Vətənimizin ayrılmaz bir parçası olan Qarabağımızın qurtuluşu üçün canlarını qurbam verən, ölümləriylə milli qürurumuzu dirçəldən şəhidlərimizi dərin ehtiramla anır, onların müqəddəs ruhları qarşısında baş əyirik!
Tanrı Azərbaycanı qorusun!
Komitə sədri Anım günü ilə bağlı paylaşım edibMilli Məclisin Təbii ehtiyatlar, energetika və ekologiya komitəsinin sədri Sadiq Qurbanov Anım günü ilə bağlı paylaşım edib:

Bu gün Vətən müharibəsinin başlamasından bir il ötür.
2020-ci ilin sentyabrın 27-də Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu Ermənistan silahlı qüvvələrinin hərbi təxribatlarının, döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə bütün cəbhə boyu əks-hücum əməliyyatlarına başlayaraq, çox qısa bir müddətdə qəhrəman ordumuz düşmənin müdafiə xəttini yaradı və sürətli əks-hücum əməliyyatı həyata keçirməyə, ərazilərimizi düşmən tapdağı altından azad etməyə başladı.

Azərbaycan Prezidenti İlham Əliyevin diplomatik məharəti, prinsipiallığı, dəmir iradəsi və rəşadətli ordumuzun müqayisə edilməz qəhrəmanlığı, igidliyi, qorxmazlığı nəticəsində 2020-ci il 8 noyabrda Azərbaycanın qədim mədəniyyət paytaxtı Şuşa şəhəri 28 il 6 aydan sonra düşmən işğalından azad olunaraq şəhərdə Azərbaycan Bayrağı qaldırıldı və bununla da düşmənin belini qırdı.

Məhz Şuşanın azad olunması müharibədə həlledici nöqtə oldu və Ermənistan kapitulyasiya aktını imzalamağa məcbur oldu. Təsadüfi deyil ki, məhz həmin gün Azərbaycan tarixinə Zəfər günü kimi həkk olundu. Lakin bütün bu qazanılan qələbələr şəhid qardaşlarımızın qanı və igid oğullarımızın sağlamlığı bahasına başa gəldi.

Azərbaycan Prezidenti İlham Əliyevin 2 dekabr 2020-ci il sərəncamına əsasən Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq hər il sentyabrın 27-i Azərbaycanda Anım Günü kimi qeyd ediləcək. Tanrıdan bütün şəhidlərimizə rəhmət, qazilərimizə isə şəfa arzulayırıq!

"Prezident BMT-dəki çıxışı ilə bir daha ədalətli və sülhsevər siyasətçi olduğunu nümayiş etdirdi"Əlisahib Hüseynov
Milli Həmrəylik Partiyasının sədri


Azərbaycan prezidenti İlham Əliyevin BMT Baş Assambleyasının 76-cı sessiyasında çıxışını həqiqətən də tarixi hadisə hesab etmək olar. Bu çıxışı mühüm hadisə kimi dəyərləndirməyə imkan verən əsas məqam orada yer alan fikirlərin, çağırışların aktuallığında idi. Türk dünyasının iki fəal liderinin – Türkiyə və Azərbaycanın dövlət başçılarının çıxışlarında dünya birliyinin, BMT-nin özünün və böyük dövlətlərin ünvanına səsləndirilən iradlar və tənqidi fikirlər istər dünyada, istərsə də bölgəmizdə sülhün, haqq və ədalətin, ümumbəşəri dəyərlərin bərqərar olması üçün olduqca mühüm əhəmiyyət kəsb edir.

İlham Əliyev öz çıxışında pandemiya ilə mübarizə sahəsində Azərbaycanın gördüyü işlərdən və irəli sürdüyü təşəbbüslərdən tutmuş, pandemiyanın öhdəsindən gəlmək üçün daha güclü qlobal həmrəyliyin vacibliyi, peyvənd alınması məsələsində zəngin ölkələrlə inkişaf etməkdə olan dövlətlər arasında dərinləşən qeyri-bərabərliyin aradan qaldırılması, “peyvənd millətçiliyi” ilə bağlı məsələlərə beynəlxalq diqqətin cəlb edilməsi, Qoşulmama Hərəkatının sədri kimi Azərbaycanın beynəlxalq ədalətin və beynəlxalq hüquq normalarının təmin edilməsinə çalışması, Hərəkata üzv dövlətlərin legitim maraqlarını güclü şəkildə müdafiə etməsi, BMT-nin Dayanıqlı İnkişaf Məqsədlərinin həyata keçirilməsinə Azərbaycanın xüsusi önəm verməsi, beynəlxalq öhdəlikləri icra edən Azərbaycanın Paris İqlim Sazişini ratifikasiya etməsi və bu sazişin prinsiplərinə əməl etməsi, bərpa olunan enerji istehsalına önəm verməyimiz və işğaldan azad edilmiş Qarabağ və Şərqi Zəngəzurun “ Yaşıl Enerji” zonası elan edilməsi, 2008-ci ildə Azərbaycanın təşəbbüsü ilə başlanılmış və müsəlman dünyası ilə Avropa arasında dialoq və əməkdaşlığın gücləndirilməsi məqsədini daşıyan “Bakı Prosesi”nin BMT tərəfindən güclü şəkildə dəstəklənməsi, BMT Baş Assambleyasının qətnamələrində Azərbaycanda müntəzəm olaraq təşkil olunan Mədəniyyətlərarası Dialoq üzrə Ümumdünya Forumunun “mədəniyyətlərarası dialoqun təşviqi üçün mühüm qlobal platforma” olaraq tanınması, habelə “Nizami ili”nin mərkəzi xəttini təşkil edən Nizami Gəncəvinin hələ 12-ci əsrdə öz əsərlərində təbliğ etdiyi sülh, ədalət, humanizm, azadlıq və bərabərlik kimi idealların və dəyərlərin bu gün BMT-nin təşviq və müdafiə etdiyi prinsiplərlə üst-üstə düşməsinə kimi bir çox önəmli məsələlərə toxundu. Bu məsələlərin hər biri bu gün təkcə bizim üçün yox, bütün ölkələr üçün vacib əhəmiyyət daşıyan məsələlərdir. Azərbaycanın dövlət başçısı bu məsələləri dünyanın iki ən mötəbər beynəlxalq təşkilatından birinə - Qoşulmama Hərəkatına rəhbərlik edən siyasi lider kimi gündəmə gətirir, ictimailəşdirir.

Prezident İlham Əliyev BMT Baş Assambleyasının 76-cı sessiyasında çıxışı zamanı həmçinin torpaqlarımızın nəyə görə 30 il Ermənistanın işğalı altında qalmasının səbəbləri və günahkarları üzərində də geniş dayandı və bu məsələni dünyaya təhdid yaradan beynəlxalq riyakarlıq fonunda dəyərləndirdi , “ikili standartlar”ın hazırkı qlobal münasibətlər sistemi üçün ciddi təhdidlər yaratdığını xüsusi olaraq vurğuladı. BMT kürsüsündən dünya ictimaiyyətinin diqqətinə çatdırıldı ki, Azərbaycan torpaqlarının Ermənistan silahlı qüvvələrinin işğalı altında olduğu ötən illər ərzində təcavüzkara qarşı beynəlxalq hüququn norma və prinsiplərindən irəli gələn heç bir kəsərli addımlar atılmayıb və təcavüzkara qarşı beynəlxalq sanksiyalar tətbiq edilməyib. Bütün bunlar isə son nəticədə işğalın 30 ilə yaxın davam etməsinə zəmin yaradıb. BMT Təhlükəsizlik Şurasının üzvləri bu illər ərzində özlərinin qəbul etdikləri məlum qətnamələrin icrası üçün heç bir addım atmayıblar, əksinə, təcavüzkara qarşı heç bir tədbir həyata keçirməməklə işğalın və talanların, ekoloji soyqırımının, maddi-mədəniyyət abidələrimizə qarşı erməni vandalizminin davam etməsinə biraz da rəvac veriblər.

Prezident çıxışında ATƏT-in Minsk Qrupunun fəaliyyətinə (daha doğrusu, fəaliyyətsizliyinə) də toxundu, bu qrupun mövcud olduğu dövr ərzində keçmiş “Dağlıq Qarabağ münaqişəsi”nin dinc yolla çözülməsi istiqamətində və beynəlxalq hüququn norma və prinsiplərinin təmin edilməsi yönündə heç bir ciddi irəliləyişə nail ola bilmədiyini vurğuladı. Həmsədrlik institutu sanki münaqişənin həlli üçün yox, əksinə, həll edilməməsi üçün, münaqişənin konservasiya olunub həllinin mümkün qədər uzadılması üçün yaradılmışdı. Həmsədrlər açıq şəkildə riyakar, ikiüzlü siyasət yürüdərək işğalçı Ermənistanın qeyri-konstruktiv addımlarının davam etməsinə və münaqişənin həllinin uzadılmasına, mənfur “status-kvo”nun qorunub saxlanılmasına kömək edirdilər. 1992-ci ildə yaradılan Minsk Qrupu bu illər ərzində istər BMT Nizamnaməsinə və BMT Təhlükəsilzik Şurasının müvafiq qətnamələrinə, istərsə də ATƏT sədrinin onlara verdiyi xüsusi mandatın tələblərinə hörmətsizlik etdi, saymazyanalıq göstərdi. Həmsədrlər Ermənistanı işğalçı ölkə kimi sanksiyalara məruz qoymaq, cəzalandırmaq əvəzinə, onu himayə etdilər, bəslədilər.

Azərbaycan xalqı və dövləti isə təbii ki, beynəxalq təşkilatların bu cür rüsvayçı riyakarlığı və Ermənistanın işğalçılıq faktı ilə barışa bilməzdi. Odur ki, Azərbaycan 2020-ci il sentyabrın 27-də Ermənistanın Azərbaycanın hərbi mövqelərinə və mülki şəxslərinə qarşı irimiqyaslı hücuma başlamasına cavab vermək məqsədilə, BMT Nizamnaməsinin 51-ci maddəsində təsbit edilmiş özünümüdafiə hüququndan istifadə edərək, öz ərazisində Ermənistana qarşı əks-hücum əməliyyatına başladı və beləliklə də BMT Təhlükəsizlik Şurasının qətnamələrinin icrasını özü döyüşərək təmin etdi. Bu bir presedentdir. Azərbaycan bu addımı ilə müsbət mənada presedent yaratdı. Yəni ki, BMT-nin təsis edildiyi vaxtdan bu günə qədər dünyada ilk belə haldır ki, bir ölkə BMT-nin yerinə yetirməli olduğu missiyanı özü təkbaşına və həm də uğurla yerinə yetirir.

Azərbaycan BMT və ATƏT-in Minsk Qrupunun 30 il ərzində həll edə bilmədiyi münaqişəni cəmi 44 günə hərbi-siyasi yollarla həll etdi və bununla da həm ərazi bütövlüyümüzün bərpa edilməsinə, həm də tarixi ədalətini bərqərar olmasına nail oldu. Nəticədə isə Dağlıq Qarabağ münaqişəsi keçmişdə qaldı. Və dövlət başçımız da BMT kürsüsündən bütün dünyaya bir daha bəyan etdi ki, Azərbaycanda artıq Dağlıq Qarabağ adında inzibati ərazi vahidi yoxdur. Azərbaycan Respublikası Prezidentinin 2021-ci il 7 iyul tarixli Fərmanı ilə Qarabağ və Şərqi Zəngəzur iqtisadi zonaları yaradılıb. Prezident bir məqamı da xüsusi olaraq vurğuladı ki, indi istər dünya KİV-də, istərsə də beynəlxalq təşkilatların və ayrı-ayrı ölkələrin rəsmi sənədlərində, rəsmi şəxslərin açıqlamalarında bizim ərazilərimizə istinad edilərkən hüquqi cəhətdən mövcud olmayan, siyasi baxımdan qərəzli və manipulyasiya xarakterli adların istifadəsinə yol verilməməlidir. Yəni ki, “Dağlıq Qarabağ” yox, Qarabağ, Şərqi Zəngəzur kimi coğrafi terminlərdən istifadə edilməlidir.

Ali Baş Komandanımız bir məqamı da özəlliklə vurğuladı ki, biz yenidən öz suverenliyimizə, ərazi bütövlüyümüzə və xalqımızın təhlükəsizliyinə hər hansı bir təhdid görsək, qanuni özünümüdafiə hüququmuzdan heç bir tərəddüd etmədən istifadə edəcəyik və hər kəs buna əmin ola bilər ki, ölkəmiz öz hərbi gücü ilə istənilən təhdidin qarşısını almaq iqtidarındadır. Bu mesaj birbaşa revanşist Ermənistana və onun havadarlarına ünvanlanmış açıq mesaj idi. İlham Əliyev bu mesajı ilə əslində hər kəsi yeni reallıqlarla hesablaşmağa çağırdı. Bəli, Azərbaycan 44 günlük müharibədə əldə etdiyi parlaq Qələbə nəticəsində Cənubi Qafqazda və onun hüdudlarından kənarda yeni reallıqlar yaradıb. Odur ki, hər kəs bu amili nəzərə almalıdır. Ermənistan da öz növbəsində revanşizmdən, etnik nifrət və düşmənçilik üzərində qurulmuş, erməni cəmiyyətinə aşılanan irqçi ideologiyadan, Azərbaycanofobiya və türkofobiyadan imtina etməli, o cümlədən qonşularına (Azərbaycana və Türkiyəyə) qarşı qanunsuz və əsassız ərazi iddialarına həmişəlik son qoymalı, sülh və əməkdaşlıq yolunu seçməlidir.

İlham Əliyev bəyan etdi ki, Ermənistanın sülhdən başqa heç bir yolu yoxdur. Odur ki, beynəlxalq ictimaiyyət də nəhayət ki, 30 ildən sonra bu prosesdə müsbət rol oynamağa başlamalı və sülhün alternativinin olmadığını dərk etmək üçün Ermənistana həm çağırış, həm də kömək etməlidir. Əks təqdirdə, revanşizm Ermənistanın sonunu gətirə bilər. Azərbaycan Prezidenti BMT Baş Assambleyasının sessiyasında təqdim edilən bu nitqi ilə bir daha dünya miqyasında ədalətli və sülhsevər siyasətçi olduğunu nümayiş etdirdi.

Rəfail Becanov: “Rusiya sülhməramlılara separatçılıq təcrübəsi olanları komandan təyin edir”“Azərbaycan ərazisi olan Xankəndində yerləşən Rusiya sülhməramlıları özünü Ermənistan Müdafiə Nazirliyinin altqurumu kimi aparır. Gah humanitar aksiya təşkil edirlər, gah erməniləri kontingentin yerləşdiyi ərazilərdəki kilsələrə daşıyırlar”.

Bunu “Cümhuriyət” qəzeti və Cebhe.info xəbər portalının baş redaktoru Rəfail Becanov deyib.

O bildirib ki, səlahiyyətlərindən kənar fəaliyyətlər onların təkcə ermənilərə xüsusi simpatiya ilə yanaşması təəssüratını yaratmır, həm də gizli məqsədlərindən xəbər verir:

“Bizim cəmiyyətdə sülhməramlıların fəaliyyətinə, davranışına və onların ədalətli olmasına onsuz da inam azdır. Fəaliyyətləri ilə isə o azacıq inamımızı da yerləyeksan edirlər. Təəssüf ki, belə əməlləri tez-tez təkrar olunur.

Növbəti dəfə də belə bir fəaliyyət sərgilədilər. Sülhmərmalıların yeni təyin olunan komandanı general-leytenant Gennadi Anaşkin da ilk səfərini Ermənistana etdi və müdafiə naziri Arşak Karapetyanla görüşdü. Bundan əvvəl isə Rusiya sülhməramlılarının komandanı Rüstəm Muradovu iki həftəlik əvəz edən Kosobokov da Anaşkin kimi birinci səfərini İrəvana etmişdi.

Niyə sülhməramlıların komandanı birinci Ermənistana getməlidir ki?

Sülhməramlı kontingent Azərbaycan ərazisində yerləşdiyinə görə yeni komandan ən azı tanışlıq və etiket xatirinə birinci Bakıya gəlməliydi. Onlar fəaliyyətlərini Azərbaycan ərazisində həyata keçirirlər. Deməli, birinci Bakıya gəlmək və fəaliyyətləri ilə bağlı rəsmi məlumat verəndən sonra vəzifələrinin icrasına başlamalıdırlar. Lakin Anaşkin də sələfi kimi bunu etmədi. Bu addımı ən yumşaq şəkildə sayğısızlıq adlandırmaq olar.

Digər maraqlı məqam isə Rusiyanın sülhməramlılara təyin etdiyi komandanların kimliyi ilə bağlıdır. Rusiya sülhməramlılara ancaq separatçılıq təcrübəsi olanları komandan təyin edir. Muradovu əvəz edən Kosobokov Abxaziyada xidmət edirdi. Yeni komandan Gennadi Anaşkinin belə bir təcrübəsi var. O, əvvəllər Cənubi Osetiyada xidmət edib. Yəni separatçılığa dəstək verib və Gürcüstan ərazilərinin işğalında iştirak edib.

Rusiyanın bu addımı çox düşündürücüdür...”
Həmsədrlər nazirlərin görüşü ilə bağlı BƏYANAT yaydılarATƏT Minsk qrupunun həmsədrləri Azərbaycan və Ermənistan xarici işlər nazirlərinin İkinci Qarabağ müharibəsindən sonra ilk görüşünü alqışlayır.

Avrasiya.net-in məlumatına görə, bu barədə həmsədrlər, Stefan Viskonti (Fransa), Endrü Şofer (ABŞ) və İqor Xovayevin (Rusiya) bəyanatında deyilir.

Qeyd olunur ki, ATƏT Minsk qrupunun həmsədrləri BMT Baş Assambleyasının 76-cı sessiyası çərçivəsində Azərbaycanın xarici işlər naziri Ceyhun Bayramov və Ermənistanın xarici işlər naziri Ararat Mirzoyanla ayrı-ayrılıqda görüşüb.

Daha sonra həmsədrlərin iştirakı ilə nazirlərin görüşü baş tutub.

Bəyanatda qeyd olunur ki, görüşlər zamanı Ermənistanla Azərbaycan arasında həll olunmamış məsələlər müzakirə olunub.

Həmsədrlər hər iki ölkənin xarici işlər nazirlərinin 2020-ci ilin noyabrından bəri keçirilən ilk görüşünü alqışlayıblar və mandatlarına uyğun olaraq bütün qalan məsələlərin hərtərəfli həllini tapması üçün tərəflərlə işləməyə davam etməyə sadiq qaldıqlarını bildiriblər.