“Görüşlər Astana və ya Almatıda başlaya bilər”

“Qazaxıstan Prezidenti Kasım-Jomart Tokayev Azərbaycanla Ermənistan arasında danışıqlara ölkəsinin ev sahibliyi təklifini israrla gündəmə gətirir. O bu dəfə erməni həmkarı Vaaqn Xaçaturyanla görüşdə təklifini təkrarlayıb: “Qazaxıstan Azərbaycan və Ermənistan arasında sülh müqaviləsinin bağlanması ilə bağlı danışıqlar üçün Almatı platformasını təmin etməyə hazırdır”. Tokayev sentyabrın 9-da Azərbaycan Prezidenti İlham Əliyevə telefon zəngində eyni təklifi səsləndirib”.

Avrasiya.net xəbər verir ki, bunu politoloq Elxan Şahinoğlu deyib. Politoloq bildirib ki, Prezident İlham Əliyev Azərbaycan üçün Astanada iki ölkə arasında bu danışıqların aparılması təklifinin məqbul olduğunu qeyd edib:

“Yəni əgər Ermənistanın baş naziri Nikol Paşinyan Tokayevin təklifini qəbul etsə, yaxın müddətdə görüşlər Astana və ya Almatıda başlaya bilər. Bu hamı üçün faydalı olar. Cənubi Qafqaz və Türküstan uğrunda mübarizə aparan dövlətlərin hər birinin Qazaxıstanla yaxşı münasibətləri var.

Tokayev ölkəsini bir dəfəlik görüş yeri kimi deyil, platforma kimi təklif edib. Yəni Tokayev Azərbaycan və Ermənistan rəsmiləri və dipolmatları arasında Qazaxıstan ərazisindəki görüşlərinin sülh sazişi imzalana qədər davam edirilməsinin tərəfdarıdır”.