İrandan sonra hədəf Rusiyadlr - Züqanov
Rusiyada Kommunist Partiyasının lideri Gennadi Züqanov Yaxın Şərqdəki müharibənin gələcəkdə Rusiyaya da təhlükə yarada biləcəyi barədə xəbərdarlıq edib.
O, Dövlət Dumasının iclasında çıxışı zamanı bildirib ki, ABŞ-ın strategiyasında əsas rəqiblər sırasında əvvəlcə Donald Trump tərəfindən Çin, sonra Rusiya, üçüncü sırada isə İran göstərilir. Züqanovun sözlərinə görə, hazırda “yaşamaq uğrunda döyüşən” ölkə İrandır və gələcəkdə növbənin Rusiyaya çata biləcəyini iddia edib.
Kommunist lider ABŞ siyasətini “aqressiya və prinsipsizlik” kimi qiymətləndirərək bildirib ki, Vaşinqtonun İrana qarşı planlaşdırdığı “blitskriq” uğursuz olub və Tehranın tez təslim olacağı ilə bağlı hesablamalar doğrulmayıb.
Zyüqanov həmçinin müharibənin region üçün ağır nəticələrə səbəb olduğunu deyib. Onun sözlərinə görə, döyüşlər nəticəsində infrastruktura və duzsuzlaşdırma qurğularına zərər dəyib, bu isə su və ərzaq problemləri yaradıb.
Xatırladaq ki, ABŞ və İsrailin İrana qarşı hərbi əməliyyatları 28 fevralda başlayıb. Vaşinqton bu əməliyyatın məqsədinin İranın nüvə proqramını məhv etmək olduğunu açıqlayıb. İran isə cavab olaraq İsrailə və Yaxın Şərqdə yerləşən ABŞ hərbi bazalarına hücumlar həyata keçirir.
