İranda bioterror: 343 nəfər zəhərləndi, 41 nəfər öldü

Son 10 gün ərzində İranın Gilan, Mazandaran, Həmədan və Kürdüstan əyalətlərində saxta spirtli içkidən 343 nəfər zəhərlənib, onlardan 41 nəfəri ölüb.

Axar.az xəbər verir ki, bu barədə "Etimad" qəzeti məlumat yayıb.

“10 gün ərzində zəhərlənmə və ölüm hallarının çoxluğu qeyri-adidir və bu, müəyyən şəxslər və qruplar tərəfindən bioterrorizmin həyata keçirilməsindən xəbər verir”, - qəzet yazıb.

Nəşr qeyd edib ki, dörd istehsalçının dörd əyalətdə eyni anda zəhərli məhsul istehsal etməsi mümkün deyil və burada araşdırılması vacib olan şübhəli məqamlar var.

Qeyd edək ki, bütün məhdudiyyətlərə baxmayaraq, İran əhalisi spirtli içkidən istifadə sahəsində dünyada ön yerlərdən birini tutur. 2018-ci ildə Ümumdünya Səhiyyə Təşkilatı İranın adambaşına spirtli içki istehlakına görə 189 ölkə arasında 9-cu yerdə olduğunu açıqlayıb.