Türkiyə Ermənistan sərhədinə ordu yeridib? - General
Bu xəbər sırf erməni yalanıdır, dezinformasiyadır.
Bu sözləri Axar.az-a Türkiyənin ölkəmizdəki keçmiş hərbi attaşesi, general-leytenant Yücel Karauz Türkiyənin Ermənistanla sərhədə hərbi texnika toplaması ilə bağlı yayılan xəbərlərə münasibət bildirərkən deyib.
Onun sözlərinə görə, Türkiyə Ermənistanla sərhəddə hər hansı problem görmür və hazırda heç bir hərəkətlənmədən söhbət gedə bilməz:
“Türkiyə niyə sərhədə ağır texnika toplamalıdır? Ermənistan hara, Türkiyə hara? Türkiyənin 85 milyona yaxın əhalisi var, dünyanın 8-ci, NATO-nun isə ikinci güclü ordusuna malik bir ölkə Ermənistanla eyni ola bilərmi? Ermənistanla sərhəddə heç bir təhlükə və hərəkətlənmə yoxdur. Olsa da bu, Türkiyə Silahlı Qüvvələrinin zaman-zaman müxtəlif təlimlər keçməsi və bu məqsədlə həyata keçirilən bir hərəkətlər ola bilər. Əks halda, heç bir təhlükə və başqa heç nə olmadığı halda Ermənistan sərhədində hər hansı hərəkətləndən söhbət gedə bilməz və bu dezinformasiyadır. Təhlükə hiss etsə də, Türkiyə hazırda sahib olduğu hava vasitələri, digər qabaqcıl müasir müdafiə sənayesi texnikaları və güclü ordusu ilə ehtiyat tədbirləri ala bilər”.
Onun sözlərinə görə, bu dezinformasiyalar Qafqazı qarışdırmaq məqsədi ilə ortaya atılıb:
“Bu, Azərbaycan və Türkiyənin birlikdə Ermənistanı çətin vəziyyətə saldığı, guya Ermənistana qarşı riskin olduğu təəssüratı yaratmaqla Qərbdən kömək istəyənlərin oyun və yalançı qışqırıqlarından başqa bir şey deyil. Qafqazı qızışdırmaq məqsədi ilə ortaya atılıb”.
Qeyd edək ki, Gümrüdən olan erməni hüquq müdafiəçisi Karapet Poqosyan Türkiyənin artilleriya sistemlərini və minaatan qurğularını Ermənistanla sərhədə yerləşdirdiyi haqda iddia yayıb.
