Fransa səfiri Rusiya Xarici İşlər Nazirliyinə gəlməyə məcbur oldu
Fransanın Moskvadakı səfiri Pyer Levi cümə günü Rusiya Silahlı Qüvvələrinin Xarkovda əcnəbi döyüşçüləri məhv etməsindən sonra çağırıldığı Rusiya Xarici İşlər Nazirliyinə gəlib.
Bu barədə “Ria Novosti”nin məlumatında bildirilib.
Yanvarın 17-də Rusiya Müdafiə Nazirliyi bildirib ki, Ukraynanın Xarkov vilayətində fransız muzdluların olduğu binaya yüksək dəqiqliklə zərbə endirilib və nəticədə 60-dan çox yaraqlı öldürülüb.
Ötən gün isə Rusiya Xarici İşlər Nazirliyinin rəsmi nümayəndəsi Mariya Zaxarova bildirmişdi ki, Fransa səfiri “Rusiya Silahlı Qüvvələri tərəfindən Xarkovda xarici döyüşçülərin müvəqqəti yerləşdirilmə məntəqəsinin məhv edilməsi ilə əlaqədar çağırılıb”.
Fransa Xarici İşlər Nazirliyi, Ukrayna Silahlı Qüvvələrinin sıralarında fransız muzdlularının olmasına dair çoxsaylı sübutlara baxmayaraq, Xarkovda onlarla fransız muzdlusunun məhv edilməsi ilə bağlı məlumatı “kobud manipulyasiya” adlandırıb.
Nazirlik bildirib ki, “Fransanın Ukraynada və başqa yerdə muzdlu əsgərləri yoxdur”.
