Türkiyə davamlı turizmin qlobal nümunəsini ortaya qoyur
Qlobal Davamlı Turizm Şurası (GSTC) ilə hökumət səviyyəsində müqavilə imzalayan dünyanın ilk ölkəsi olan Türkiyə COP 28-də (UNFCCC Tərəflərinin 28-ci Konfrans) Türkiyə Pavilyonunda unikal, turizm yönümlü panel müzakirəsi təşkil etdi. Türkiyənin Birləşmiş Millətlər Təşkilatının İqlim Dəyişikliyi Konfransındakı panel müzakirəsi ölkənin qabaqcıl Milli Davamlı Turizm Proqramına həsr olunub. Kapadokya Universitetinin rektoru Prof. Dr Hasan Ali Karasarın moderatorluğu ilə keçirilən panelə Türkiyə Turizm Təşviq və İnkişaf Agentliyinin (TGA) İdarə Heyətinin üzvü Kaan Kaşif Kavaloğlu, TGA baş direktoru Dr. Elif Balcı Fisunoğlu, GSTC-nin sədr müavini CB (Ram) Ramkumar və Türkiyə Otelçilər Federasiyasının (Türofed) prezidenti Erkan Yağcı qatılıb.
Paneldə CB (Ram) Ramkumar qeyd edib: “Davamlılıq əhəmiyyətli dərəcədə təfərrüatlı bir mövzudur və biz bir çox ölkələrin turizm sənayesindəki yol xəritəsinin əsaslarını hələ də müzakirə etdiyini görürük. Türkiyə isə artıq hüquqi bazasını tamamlayıb və bütün yaşayış obyektləri üçün məcburi olan proqrama başlayıb. Proqram yüzlərlə sertifikatlı və təsdiqlənmiş mehmanxana ilə ölçülə bilən nəticələr yaratmağa imkan verir. Beləliklə, Türkiyə hazırda turizmdə davamlılıq üçün qlobal nümunədir”.
TGA-nın baş direktoru Dr. Elif Balcı Fisunoğlu Türkiyə proqramının necə qurulduğunu və həyata keçirildiyini izah edib. Dr. Fisunoğlu, “Davamlılıq yanaşmamız 2008-ci ildə Mədəniyyət və Turizm Nazirliyinin “Yaşıl Ulduz” proqramını başlatdığı vaxta əsaslanır. Türkiyə 2021-ci ildə Paris Sazişini imzaladıqdan sonra irəliləyişimiz daha da sürətləndi və 2022-ci ildə GSTC ilə əməkdaşlıq müqaviləmizi imzaladıq. Proqramımızın başlanğıcı olan 2023-cü ilin sonuna yaxınlaşdığımız müddətdə Türkiyədə milyonlarca çarpayının artıq sertifikatlaşdırılmış və təsdiqlənmiş olduğunu qürurla paylaşa bilirik.”
TGA İdarə Heyətinin Üzvü Kaan Kaşif Kavaloğlu əlavə etdi: “Turizm sənayesi milyonlarla insanın hərəkətliliyində mühüm rol oynayır və ümumi ekosistemdə təmsil olunan hər bir biznes vahidinin xalis sıfır emissiyaya nail olmaq üçün vacib vəzifə və öhdəlikləri var. 2030-cu ilə qədər biz Türkiyədə 100% sertifikatlı yaşayış infrastrukturuna malik olacağıq və turizm sektorunun bütün maraqlı tərəfləri ilə beynəlxalq dayanıqlı turizm standartlarını təmin edəcəyik. Buna görə də Türkiyə turizm sənayesi olaraq dayanıqlı turizmdə dünyada qabaqcıl ölkələr sırasında yer aldığımız üçün böyük qürur və məmnunluq duyuruq.”
Türkiyənin Milli Davamlı Turizm Proqramının davamlı idarəetmə, ətraf mühitin davamlılığı, mədəni davamlılıq və sosial-iqtisadi davamlılıq olmaqla dörd əsas prioriteti var. Bu kontekstdə Türkiyənin 19 Mədəni, 2 qarışıq UNESCO Dünya İrs Saytı, UNESCO-nun İlkin Siyahısında yer alan 82 Mədəni və Təbii İrs Saytı, 8 UNESCO-nun Yaradıcı Şəhəri və 25 Qeyri-Maddi Mədəni İrsi var ki, bu da onu dünyada 2-ci yerin sahibi edir. Türkiyənin Michelin Bələdçisində dayanıqlılığa diqqət yetirən yaşıl ulduzlu 5 restoranı da var ki, bu da Türkiyənin qastronomiya ekosisteminin də davamlı yanaşmalara çox diqqətli olduğunu göstərir.
Türkiyə Otelçilər Federasiyasının prezidenti Erkan Yağcı bildirib ki, proqramın gətirdiyi qeyri-maddi faydalarla yanaşı, Türkiyədəki otellər sertifikatlaşdırmanın iqtisadi faydalarını da görməyə başlayıb. Yağcı, "Davamlı turizmə açıq bir tələbat var və biz sertifikatlı otellərimizin səyahətçilərin seçim siyahısında yüksəldiyinin şahidi oluruq" qeyd edib.
TGA-nın proqram partnyoru, Kapadokya Universitetinin rektoru Prof. Dr. Hasan Ali Karasar bildirib ki, proqram turizm obyektlərinin standartlarını daha da yüksəldəcək və təkcə davamlı və məsuliyyətli turizm təcrübələrini təşviq etmək deyil, həm də turizmin davamlılığını təmin etmək, təbii və mədəni irs ehtiyatlarını qorumaq, sosial-iqtisadi inkişafı dəstəkləmək, qlobal iqlim dəyişikliyinin mənfi təsirlərini yumşaltmaq, davamlılığa yönəlmiş istehlakçıların dəyişən gözləntilərini qarşılamaq və destinasiyaların rifahına müsbət töhfə vermək məqsədi daşıyır.
