"İran nüvə silahı əldə etmək niyyətində deyil"

İranın uranı 60% saflığa qədər zənginləşdirməsi Avropa tərəflərinin 2015-ci il nüvə sazişindən irəli gələn öhdəlikləri yerinə yetirməməsinə cavab idi.

Bunu İran prezidenti İbrahim Rəisi CNN telekanalına müsahibəsində deyib.

İranın Atom Enerjisi Təşkilatının (AEOI) rəhbəri Məhəmməd Eslami iyun ayında bəyan etmişdi ki, uranın müəyyən edilmiş saflıq səviyyəsinə qədər zənginləşdirilməsi 2020-ci ilin dekabrında qəbul edilmiş parlament qanununa, Sanksiyalara Qarşı Mübarizə üzrə Strateji Fəaliyyət Planına uyğundur.

Rəisi ölkədə uranın silah səviyyəsinə qədər zənginləşdirilməsi ideyasını qəti şəkildə rədd edib. “Rəsmi olaraq bildirildi ki, bizim həyata keçirmək niyyətində olduğumuz hərəkətlər heç bir növ nüvə silahı əldə etmək məqsədi daşımır. Bu, avropalıların nümayiş etdirdiyi (müqaviləyə) bağlılığın olmamasına cavabdır”.

O, həmçinin Tehranın İslam Respublikasının nüvə bombası əldə etmək planının olmadığına dair çoxdankı mövqeyini təkrarlayıb.