AB Ermənistana hərbi yardımdan imtina etdi
Avropa Birliyi (AB) Ermənistana AB tərəfdaşlarının müdafiə qabiliyyətini artırmaq üçün nəzərdə tutulmuş xüsusi fonddan hərbi yardım göstərməkdən imtina edib.
Bu barədə Ermənistan parlamentinin sədri Alen Simonyan məlumat verib.
O, Polşaya səfəri zamanı Prezident Andjey Duda ilə görüşdə AB-nin qərarından şikayət edib.
Bildirib ki, Ermənistan hökuməti inkişaf etməkdə olan ölkələrə hərbi texnika almağa kömək etmək üçün AB-nin 2021-ci ildə yaratdığı Avropa Sülh Fondundan (EPF) “texniki yardım” istəyib. Bu mexanizm vasitəsilə AB Ukrayna, Moldova və Gürcüstana yardım ayırır.
“Təəssüf ki, AB-nin Ermənistanla Azərbaycan arasında münasibətləri yaxşılaşdırmaq üçün vasitəçilik səyləri göstərməsi, habelə “münaqişə həssaslığı” məsələsi əsas gətirilərək, Ermənistanın müraciəti rədd edilib”, - Simonyan vurğulayıb.
O, AB-nin bu qərarının ölkəsində etirazlara səbəb olduğunu və birmənalı qarşılanmadığını bildirib.
