Rusiya son 5 ayda 20 min itki verib - Kirbi
Rusiya ordusu son 5 ayda Baxmutda və Ukraynanın digər bölgələrində gedən döyüşlər zamanı 20 min itki verib.
Avrasiya.net xəbər verir ki, bu barədə Ağ Evin milli təhlükəsizlik şurasının sözçüsü Con Kirbi bildirib.
Onun sözlərinə görə, ABŞ kəşfiyyatının hesablamalarına əsaslanan, son 5 ayda Rusiya ordusunun 20 mindən çox hərbçisi ölüb. Bunların yarısı "Vaqner" muzdluları, o cümlədən döyüşlərə qoşulmaq üçün həbsdən buraxılan məhkumlardır.
"Rusiyanın qış aylarında əsasən Baxmut vasitəsilə Donbasda hücumu cəhdi uğursuzluğa düçar olub", - Kirbi deyib.
O qeyd edib ki, ruslar Baxmutda müəyyən irəliləyişlərə nail olublar, lakin bunlar çox ağır itkilər hesabına baş verib. ABŞ rəsmisi onu da vurğulayıb ki, Ukraynanın bölgədəki müdafiəsi güclüdür.
“Rusiya hərbi ehtiyatlarını və silahlı qüvvələrini tükəndirib", - Kirbi əlavə edib. O, tezliklə Ukrayna üçün yeni silah yardımının elan ediləcəyini diqqətə çatdırıb.