Ermənistan ikinci əsgərimizi də saxladığını elan etdi
Ermənistan ərazisində itkin düşən azərbaycanlı əsgərlərdən ikincisi də tapılıb.
Bu barədə Ermənistan MN məlumat yayıb.
Bildirilib ki, 13 apreldə Ermənistan ərazisində itkin düşən ikinci azərbaycanlı əsgər tapılaraq saxlanılıb.
Qeyd edək ki, bundan öncə Azərbaycan Müdafiə Nazirliyi iki əsgərimizin Naxçıvanda, Şahbuz istiqamətində duman səbəbindən azdığı haqda məlumat yaymışdı. Bu məlumatdan az sonra Ermənistan MN Zəngəzur (Sünik) mahalının Bnunis kəndində bir azərbaycanlı əsgərin saxlanıldığını, digərinin isə qaçdığını bildirmişdi.
Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının bu gün yaydığı məlumatda itkin düşən 2004-cü il təvəllüdlü Aqşin Qabil oğlu Bəbirov və 2003-cü il təvəllüdlü Hüseyn Əhliman oğlu Axundovun Ermənistan ərazisində saxlanıldığı ehtimalı nəzərə alınaraq, onların azad edilməsi üçün beynəlxalq təşkilatlara müraciət edildiyi bildirilib.
