Deputat mandatdan imtina ərizəsi YAZDI
Ukrayna Ali Radasının deputatı, əvvəllər ölkədə fəaliyyəti qadağan edilmiş “Ömürlük Müxalifət Platforması”nın üzvü olmuş İqor Abramoviç mandatdan imtina edib.
Bu barədə Ukraynanın Telegram kanallarında bildirilib.
Yanvarın 13-də Ukrayna Ali Radası “Ömürlük Müxalifət Platforması”nın deputatları Viktor Medvedçuk, Taras Kozak, Andrey Derkaç və Renat Kuzmini mandatlarından məhrum edib.
Prezident Volodimir Zelenski isə onları Ukrayna vətəndaşlığından çıxarıb.
Ukrayna KİV-i xəbər verir ki, Ali Rada müxalifət platformasından olan daha dörd deputatı - Natalya Korolevskaya, Aleksandr Ponomarev, Yuri Solod və Oleq Voloşini vaxtından əvvəl mandatlarından məhrum etməyi planlaşdırır. Onların Rusiya vətəndaşlıqlarına mailk olduqları barədə iddia var.
Son məlumatlarda Voloşin, Korolevskaya və Solodun istefa ərizəsi yazdıqları bildirilib.
Zelenski 2022-ci ilin yazında Ukraynada “rusiyapərəst” partiyaların fəaliyyətini qadağan edən qanun imzalayıb. Ölkənin Milli Təhlükəsizlik və Müdafiə Şurasının qərarına əsasən, onların sırasına 15-dən çox partiya daxil edilib. Bu sırada “Ömürlük Müxalifət Platforması” da var. Ədliyyə naziri Denis Malyuska partiya deputatlarının fəaliyyətinin hakimiyyətin ciddi nəzarəti altında olacağını, gələcəkdə onların mandadan məhrum edilə biləcəyini vurğulayıb.
