Quzey Kıbrısda yeni hökumətin qurulacağı tarix açıqlandı
Quzey Kıbrıs Türk Cümhuriyyətində (KKTC) yeni hökumətin qurulması səyləri çərçivəsində Milli Birlik Partiyası (UBP) dünən Xalq Partiyasını (HP) ziyarət edib.
Avrasiya.net xəbər verir ki, görüşdə UBP sədri, baş nazir Faiz Sucuoğlu, UBP-nin baş katibi Oğuzhan Hasipoğlu, iqtisadiyyat və energetika naziri Sunat Atun, daxili işlər naziri Kutlu Evren, kənd təsərrüfatı və təbii sərvətlər naziri Nazım Çavuşoğlu iştirak edib.
HP heyətində partiya sədri Kudret Özersay, millət vəkilləri Ayşegül Baybars və Jale Refik Rogers və partiya rəsmisi Gülşah Manavoğlu iştirak edib.
Bir saata yaxın davam edən görüşün sonunda mətbuata açıqlama verilib.
Baş nazir Faiz Sucuoğlu açıqlamasında daha əvvəl HP ilə qeyri-rəsmi danışıqlar apardıqlarını, lakin dünən rəsmi görüş keçirdiklərini və bir heyət olaraq fikirlərini bölüşdüklərini qeyd edib.
Nümayəndə heyətinin əvvəlki hökumətlərdə Nazirlər Kabinetində çalışdıqları dostlarının olduğunu və görüşün səmimi şəraitdə keçdiyini bildirən Sucuoğlu, görüş zamanı HP sədri və millət vəkillərinin də öz fikirlərini irəli sürdüklərini söyləyib.
Sucuoğlu 4 partiyaya rəsmi ziyarətlərini bu gün CTP-yə edəcəkləri səfərlə yekunlaşdıracaqlarını, daha sonra dəyərləndirmələr aparacaqlarını, hökuməti qurmaq üçün göstərdikləri səylər baxımından müəyyən partiyalarla yenidən görüşə biləcəklərini bildirib.
Faiz Sucuoğlu KKTC-nin yeni hökumətinin gələn həftə sona yetmədən qura biləcəklərini söyləyib.
