Xankəndidə təxribat, Rusiyanın planları və Ermənistanla yaxınlaşmanın zəruriliyi...
Vasif Əfəndi
Siyasi ekspert
Xankəndi şəhərində baş verən son erməni təxribatı bir daha göstərdi ki, bölgədə sabitlik və təhlükəsizlik hələ də tam təmin edilməyib. Azərbaycan hüquq-mühafizə orqanlarının peşəkarlığı nəticəsində təxribatçı-terrorçu dərhal zərərsizləşdirilərək həbs olunub. Bu hadisə bütün dünya ictimaiyyətinə təqdim edilməlidir ki, reallıq aydın görünsün.
Ermənistan ərazisindən qaynaqlanan bu tip hücumların arxasında çox zaman Rusiyanın gizli dəstəyi dayanır. Məlumdur ki, Rusiya Zəngəzur dəhlizinin açılmasında oyundankənar qalmasını həzm edə bilmir. Bu dəhliz reallaşarsa, Azərbaycan və Türkiyə arasında birbaşa quru əlaqəsi möhkəmlənəcək, regionda yeni iqtisadi və siyasi güc balansı formalaşacaq. Bu isə Kremlin strateji maraqlarına ziddir. Ona görə də Rusiya müxtəlif yollarla bölgədə sabitliyi pozmağa, Azərbaycan-Ermənistan münasibətlərinə maneələr yaratmağa çalışır.
Putinin məqsədi təkcə SSRİ-nin deyil, həm də keçmiş Varşava Müqaviləsi ölkələrinin üzərində nəzarəti bərpa etməkdir. Ukraynada apardığı işğalçı müharibə, Gürcüstan və Moldovaya qarşı təzyiqlər, Qazaxıstanda nüfuz mübarizəsi bunun açıq nümunələridir. Kreml başa düşür ki, Cənubi Qafqazı itirsə, imperiya qurmaq planı tam çökəcək. Buna görə də Ermənistan ərazisindən istifadə etməklə regionda xaos yaratmağa cəhd göstərir.
Bu şəraitdə Azərbaycanın Ermənistanla maksimum yaxınlaşması strateji zərurətdir. Çünki Rusiya ilə Ermənistan arasındakı asılılıq zənciri yalnız iqtisadi alternativlər yaradılarsa qırılar. Azərbaycan Ermənistanın iqtisadiyyatına sərmayə qoymaqla, infrastruktur layihələrinə dəstək verməklə və güzəştli kreditlər ayırmaqla həm bölgədə sülhü möhkəmləndirə, həm də Moskvanın təsir imkanlarını minimuma endirə bilər.
Xankəndidəki təxribat əslində Rusiyanın regionda sabitliyi pozmaq cəhdlərinin tərkib hissəsidir. Dünya ictimaiyyəti bu həqiqəti görməli, terrorçunun arxasında dayanan güc mərkəzlərini tanımalıdır. Azərbaycan isə həm siyasi, həm də iqtisadi addımlarla Ermənistanı Moskvanın təsir dairəsindən uzaqlaşdıraraq Cənubi Qafqazda dayanıqlı sülhün təminatçısı rolunu oynamalıdır.
