Şabran rayonunda növbəti genişmiqyaslı iməcilik aksiyası keçirilib

“Konstitusiya və Suverenlik İli”nə həsr olunmuş aksiyada Şabran Rayon İcra Hakimiyyətinin, Şabran Suvarma Sistemləri İdarəsinin, "3 nömrəli Yol İstismarı" MMC-nin, Şabran Rayon Mərkəzi Xəstəxanası PHŞ-nin, Şabran rayon Yaşıllıq və Təmizlik İdarəsinin, Şabran Dövlət Aqrar İnkişaf Mərkəzinin, Şabran Regional Meşə Təsərüffatı Mərkəzinin texnikaları və əməkdaşları iştirak ediblər.

Şəhərin Asəf Zeynallı küçəsində keçirilmiş aksiyada ərazi kol-koslardan və məişət tullantılarından təmizlənib.

Tədbirin keçirilməsində məqsəd ölkə ərazisində ətraf mühitin məişət və digər tullantılarla çirkləndirilməsinin qarşısının alınması, əhalinin tullantıların düzgün idarə edilməsi ilə ətraf mühitin neqativ təsirlərdən qorunması istiqamətində maarifləndirilməsi, o cümlədən insanların ətraf mühitin mühafizəsinə münasibətini dəyişməklə ekoloji vəziyyətinin yaxşılaşdırılmasında ictimaiyyətin rolunu artırmaq və bu sahədə ictimaiyyətlə əməkdaşlığı gücləndirməkdir.