Nigarın verilişi bağlandı, işdən də uzaqlaşdırılacaq

"Kanal S"də yayımlanan "Sözün bitdiyi an" verilişinin yayımı dayandırılıb və veriliş də bağlanıb. Verilişin aparıcısı Nigar Fərhada hansı cəza növünün tətbiq ediləcəyi isə sabah müəyyənləşəcək".

Avrasiya.net xəbər verir ki, bu sözləri Teleqraf-a kanalın baş prodüseri Roza Allahverdiyeva deyib.

"Aparıcının kanalda fəaliyyətinə gəlincə, cəza formasının nə olacağını kanal rəhbəri müəyyən edəcək. Düşünürəm ki, aparıcı kanalda fəaliyyətinə davam edə bilməyəcək. Çünki "Kanal S" üçün cəmiyyətin fikri çox önəmlidir. Hər bir aparıcı rəy bildirəndə fikirlərinə diqqət etməlidir. Çünki bu gün televiziya cəmiyyət və tamaşaçılar üçün çalışır", - deyə baş prodüser söyləyib.

Qeyd edək ki, Nigar Fərhad aparıcısı olduğu verilişdə "Mənim oğlum olsa, mən ona atası olmayan qızı ala bilmərəm” fikirlərini səsləndirib və onun səsləndirdiyi fikirlər sosial şəbəkədə birmənalı qarşılanmayıb.

Bu gün isə Audiovizual Şura "Kanal S"in yayımının birgünlük dayandırılması ilə bağlı qərar qəbul edib.