Müəllimləri təhqir edən direktor işdən çıxarıldı

Bakı şəhəri 301 nömrəli tam orta məktəbin direktorunun müəllimlərə qarşı uyğunsuz davranışı ilə bağlı aşkara çıxarılan faktlar üzrə araşdırmalar aparılıb.

Bu barədə Məkəbəqədər və Ümumitəhsil üzrə Dövlət Agentliyindən məlumat verilib.

"Araşdırma nəticəsində fəaliyyətində yol verdiyi nöqsanlara görə Məktəbəqədər və Ümumi Təhsil üzrə Dövlət Agentliyinin müvafiq əmri ilə təhsil müəsissəsinin direktoru ilə bağlanmış əmək müqaviləsinə xitam verilib.

Bildiririk ki, təhsil müəssisələrində sağlam işgüzar mühitin təmin olunması, vətəndaşların təhsil müəssisəsinə etimadının, təhsil müəssisələrinin fəaliyyətində səmərəliliyin və şəffaflığın artırılması əsas prioritetlərdəndir. Təhsil müəssisələrində hər hansı neqativ halların baş verməsi yolverilməzdir", - məlumatda bildirilib.

Xatırladaq ki, 301 nömrəli məktəbin direktoru Sevda Sarıyeva idi. O, əvvəlcə müəllimlərə “hinduşkabaş” deməklə, sonra isə şagirdlərdən rüşvət tələb etməsi ilə gündəmə gəlmişdi.