Komitə sədrinin Milli Məclisdə HESABATI - Mətn

Sadiq Qurbanov
Təbii ehtiyatlar, energetika və ekologiya komitəsinin sədri

Dəyərli Sahibə xanım! Hörmətli Baş nazir, Millət vəkilləri və hökumət üzvləri!

Öncə "Konstitusiya və Suverenlik İli"ndə müzakirə etdiyimiz Azərbaycan Respublikası Nazirlər Kabinetinin 2024-cü ildə fəaliyyəti haqqında Hesabatına dəstəyimi ifadə edirəm. Çünki bu hesabatda göstərilən uğurlar cənab prezidentimiz İlham Əliyevin çox səmərəli idarəçilik keyfiyyətlərinin, düşünülmüş, bir-birini tamamlayan və bir-birini gücləndirən iqtisadi, sosial, hüquqi, humanitar, ekoloji siyasətin uğurlu tətbiqinin nəticəsidir.

Uğurlarının təməlində isə ümummilli lider Heydər Əliyevin uzaqgörən siyasi kursunun davamlılığının dayandığı qeyd etməliyik. Unutmamalıyıq ki, Dahi Rəhbərin uzaqgörən və müdrik siyasəti sayəsində ölkəmiz bu gün azad, müstəqil və güclüdür. Hələ 30 il əvvəl xalqımız Heydər Əliyev zəkasının süzgəcindən keçən, dünyanın ən demokratik, tarixi reallıqlara uyğun, insana dəyəri bütün prinsiplərin mərkəzində saxlayan konstitusiyasını qəbul etmişdir.

Prezident İlham Əliyevin 2025-ci ilin "Konstitusiya və Suverenlik İli" haqqında sərəncamında deyilir: "Konstitusiya dövlətimizin müstəqilliyinin, suverenliyinin və ərazi bütövlüyünün qorunması, hüquqi, dünyəvi dövlət quruculuğu, vətəndaşlarımızın layiqli həyat səviyyəsinin, dünya ölkələri ilə dostluq və əmin-amanlıq şəraitində əməkdaşlığın təmin edilməsi kimi ali niyyətlərin həyata keçirilməsi üçün mühüm qanunvericilik bazası rolunu oynamışdır".

Sosial dövlət prinsipinə əsaslanan Azərbaycan Konstitusiyası vətəndaşların rifahına yönəlib və insanın ləyaqətinin toxunulmaz olduğunu və dövlətin bu ləyaqətin qorunmasına cavabdehliyini qeyd edərək onların sosial təminat hüquqlarını açıq şəkildə müdafiə edir.

Hər bir vətəndaşın Prezidenti olmağı qarşısına məqsəd qoyan cənab İlham Əliyevin apardığı məqsədyönlü siyasət suveren Azərbaycana şanlı tariximizin ən uğurlu illərini yaşatmaqla onu bütün sahələrdə regionun, eyni zamanda dünyanın aparıcı dövlətinə çevirib. Dünyada ən iri miqyaslı və mötəbər COP-29 kimi bir tədbirin keçirilməsi də buna bariz nümunədir. Eyni zamanda Şərq-Qərb və Şimal-Cənub beynəlxalq nəqliyyat dəhlizlərinin inkişaf etdirilməsi, Azərbaycanın strateji və etibarlı dövlət kimi nüfuzunun artmasına xidmət etmişdir.

Hesabatda təqdim olunan iqtisadi göstəricilər, əks olunan rəqəmlər, milli səviyyədə siyasi sabitliyin və təhlükəsizliyin qorunub saxlanması, möhkəmləndirilməsini ifadə etməklə, həm də iqtisadiyyatın inkişafını, xalqının mənəvi irsinin qorunmasını, dirçəldilməsini və s. xarakterizə edir.

Mən sosial-iqtisadi göstəricilər barədə geniş danışmağı zəruri hesab etmirəm. Çünki,bu haqqda həmkarlarım kifayət qədər bu istiqamətdə geniş danışdılar. Cənab Prezidentin də qeyd etdiyi kimi “2024-cü il iqtisadi inkişaf baxımından uğurlu il olmuşdur və Azərbaycan iqtisadiyyatı inkişaf etmişdir.

Əgər dünya iqtisadiyyatının artım templərinə və inkişaf etmiş ölkələrin inkişafına, yaxud da tənəzzülünə nəzər salsaq görərik ki, Azərbaycan iqtisadiyyatı uğurla inkişaf edib.”

Ümumi daxili məhsul istehsalının 2023-cü ilə nisbətdə 4,1 % artımı, qeyri-neft sektorunda iqtisadi fəallığın təmin edilməsi, işğaldan azad edilmiş ərazilərdə yenidən qurulması, bərpası və ölkə iqtisadiyyatına reinteqrasiyası istiqamətində görülən işlər xüsusi qürurvericidir.

Qeyd etmək yerinə düşərdi ki, adambaşına düşən ÜDM-in həcmi iqtisadiyyatın vəziyyətini, son nəticədə dövlətin, ordunun gücünü, əhalinin sosial vəziyyətini əks etdirirsə, onun strukturu, illik artımı və ÜDM-ə nisbəti isə ölkənin strateji hədəflərindən irəli gəlməklə, dövlət siyasətini və iqtisadiyyatın inkişaf istiqamətini əks etdirir. Bu mənada sənaye sahəsinin ÜDM-də payının 36 faizə çatması ölkəmizin inkişaf etmiş sənaye ölkəsi kimi güclənməsini əks etdirir. Turizmin 2023-cü ilə nisbətən 13 faiz artaraq son nəticədə ÜDM-də payının 2,4 faizə çatması da ölkəmizin beynəlxalq imicinin formalaşması və cəlbediciliyini ifadə edir. Bunu rəqəmsal sektor barədə də deyə bilərik.

Profilimizə uyğun olaraq Enerji siyasətinin həyata keçirilməsi haqqında bir neçə kəlmə söz demək istərdim. Prezident İlham Əliyevin rəhbərliyi ilə Azərbaycan enerji istehsalı və infrastrukturunun inkişafı sahəsində dünyada özünü əsas oyunçu kimi uğurla təsdiq edib, enerji ehtiyatlarını əhəmiyyətli dərəcədə inkişaf etdirib və şaxələndirib, regionun enerji təhlükəsizliyinə və sabitliyinə töhfə verib, ölkənin qlobal enerji birliyinə inteqrasiyasını təmin edib.

"Energetika sahəsində siyasətin uğurlu olmasının, qlobal strateji düşüncə və planlaşdırılmaya əsaslanmasının bir sübutu da ondadır ki, Azərbaycan Aralıq dənizində qaz yatağının işlənilməsi üçün yaradılan beynəlxalq konsorsiumda Şevron kimi bir nəhənglə bir yerdə iştirak edəcək".

Azərbaycanın 2030-cu ilə qədər sosial-iqtisadi İnkişafa dair beş milli prioritetindən biri “Təmiz ətraf mühit və yaşıl artım ölkəsi” müəyyən edilmişdir ki, həmin prioritetə uyğun olaraq, enerji sektorunda həyata keçirilən bütün islahatlar həm ölkəmizin enerji təhlükəsizliyinin təmin edilməsi, həm ekoloji tarazlığın qorunması və həm də iqtisadi inkişafın davamlılığının təmin edilməsi istiqamətində atılan mühüm addımlardır.

Milli Məclis üzvləri olaraq ölkədə aparılan bütün iqtisadi siyasəti dəstəkləyir, fəaliyyətimizdə hökumətin nəzərdə tutduğu işlərin həyata keçməsi üçün qanunvericilik bazasının möhkəmlənməsinə çalışırıq.

Hökümət üzvlərinin diqqətinə çatdırmaq istəyirəm ki, bir neçə gün öncə, 03.03.2025 tarixdə hörmətli sədrimiz Sahibə xanım Qafarovanın tövsiyəsi ilə Təbii ehtiyatlar, energetika və ekologiya komitəsi olaraq “Enerji səmərəliliyi: nəticələr və gözləntilər” mövzusunda hökumətin tərkibinə daxil olan aidiyyəti qurumların və elm adamlarının iştirakı ilə ətraflı içtimai müzakirə keçirdik. PA və NK-nin səlahiyyətli nümayəndələrinin bu müzakirələrdə iştirakı vahid dövlət siyasətinin, eyni zamanda hakimiyyət qolları arasındaki möhkəm iş birliyinin göstəricisi kimi qiymətləndirilməlidir.

Nəfis şəkildə bizə təqdim olunan Hesabatın son səhifələrində komitə olaraq qaldırdığımız

1. 2024-cü ilin "Yaşıl dünya naminə həmrəylik ili" olduğunu nəzərə alaraq ekoloji sahəyə diqqətin daha da artırılması.
2. Ekoloji fəlakət yaşayan Hacıqabul gölünün qismən və ya mərhələli şəkildə bərpa edilməsinə diqqətin yetirilməsi
3. kənd təsərrüfatı sahələrində əkin suyu ilə təminat sahəsində problemlərin aradan qaldırılması

kimi məsələlərə diqqətlə yanaşıb həll etdiyiniz və cavablandırdığınız üçünsə ayrıca təşəkkür edirəm.
Təmsil etdiyim Salyan rayonundakı problemləri stenoqrama əlavə edib hökümətə göndərəcəyəm.
Hesabatı mükəmməl hazırladıqları üçün Əli müəllim başda olmaqla Hökumət üzvlərinə bir daha minnətdarlığımı bildirir və uğurlar arzulayıram.