Komitə sədri erməniəsilli şəxslərin saxlanma şəraiti ilə tanış oldu

İşgəncələrə qarşı Azərbaycan Komitəsinin sədri Tural Hüseynov, onun müavini Elçin Şirinov və hüquqşünas Rövşən Məmmədov Dövlət Təhlükəsizliyi Xidmətinin (DTX) müvəqqəti saxlanma yeri və istintaq təcrdixanasında monitorinqlər keçirib.

Avrasiya.net xəbər verir ki, Tural Hüseynov Report-a açıqlamasında monitorinqin keçirilməsində məqsədin saxlanılan şəxslərin saxlanma şəraiti, onlara qarşı rəftar, qida, eyni zamanda dərman preparatları ilə təminatları vəziyyətini öyrənmək olduğunu bildirib.

“Başçəkmə zamanı hərbi cinayətlər törətməkdə təqsirləndirilən erməniəsilli şəxslər, Qusar rayonunda saxlanılan terrora cəhddə təqsirləndirilən 6 nəfər, axtarışda olduğu üçün İordaniyadan Azərbaycana gətirilən Azər Bağırov, dövlətə xəyanətdə təqsirləndirilən İlkin Qəmbərov və digərləri ilə görüşlər keçirilib. Həmin şəxslər saxlanma şəraitindən, onlara qarşı rəftardan şikayət etməyiblər. Bütün kameralar televizorlarla və radiolarla təmin olunub. Vəkilləri ilə rahat görüşürlər. Saxlanılan şəxslərə həftədə 2 dəfə 15 dəqiqəlik telefonla danışmağa şərait yaradılır və onlar ailə üzvləri ilə görüşə bilirlər. Saxlanılan şəxslər idman zalından, kitabxanadan rahat istifadə edirlər. Evdən göndərilən qidaların hamısı saxlanılan şəxslərə verilir”, - sədr vurğulayıb.

Tural Hüseynov qeyd edib ki, təcridxana yeni təmirdən çıxdığından saxlanma şəraiti daha da yaxşılaşıb:

“Bütün otaqlarda havalandırma sistemi var. Hər kameranın özünün hamamı, tualeti mövcuddur. Saxlanılan şəxslər hər gün müvafiq saatlarda təmiz havaya çıxarılır”.