Erməni terrorçularının Xocalıda törətdikləri misli-bərabəri olmayan barbarlıqdır
"İsraildə Azərbaycan Evi" Yəhudi Diaspor qurumu və təşkilatları Azərbaycanın haqq səsinin dünyaya çatdırılmasında‚ məkrli erməni lobbisi ilə mübarizədə hər zaman əlindən gələni etmiş və daim qardaş Azərbaycan xalqının yanında olmuşdur.
Ermənistanın Azərbaycana qarşı 30 ilə yaxın davam edən işğalçılıq siyasəti‚ həmçinin 44 günlük İkinci Qarabağ müharibəsi zamanı‚ postmüharibə dövründə Azərbaycanın haqlı mövqeyinin dünya birliyində müdafiə edilməsində və erməni vəhşiliyinin‚ terrorunun və işğalının dünyaya çatdırılmasında uzun illərdir ki‚ əzmlə mübarizə aparır.
"İsraildə Azərbaycan Evi"nin və Dağ Yəhudilərinin Koordinasiya Mərkəzi və Akko Şəhər Dağ Yəhudiləri İcması tərəfindən İsraildə Xocalı faciəsinin erməni terrorçularının törətdikləri bu dəhşətli və qanlı qətliamın tanınmasına dair müntəzəm olaraq rəsmi tədbirlər və soyqırımı həqiqətlərini əks etdirən lövhələr və sərgilər nümayiş etdirilir.
"İsraildə Azərbaycan Evi"nin‚ İsraildə Dağ Yəhudilərinin Koordinasiya Mərkəzinin direktoru‚ Akko Şəhər Dağ Yəhudiləri İcmasının sədri, Ümumisrail Dağ Yəhudiləri Birliyinin sədr müavini Nexemiya Şirin Mixaeli bildirib ki, vəhşi erməni terrorçularının Xocalıda azərbaycanlılara qarşı etnik təmizləmə siyasəti apararaq törətdikləri kütləvi qətliam və soyqırımı görünməmiş‚ misli-bərabəri olmayan barbarlıqdır. Hələ sovet dövründən ermənilər azərbaycanlıları bu ərazilərdən sıxışdırıb çıxarmağa başlamışdırlar. Məhz bu mənfur siyasətin davamı olaraq‚ havadarlarının köməyi ilə 1992-ci il fevralın 25-dən 26-na keçən gecə Azərbaycanın Xocalı şəhərinə hücum edərək şəhərin bütün əhalisini kütləvi məhv etmişlər. Beləcə‚ Xocalı bütün əhalisi ilə birgə dünya xəritəsindən silinmişdir. Çox təəssüf ki‚ əsrin dəhşətli soyqırımlarından olan Xocalı faciəsini törədən hərbi canilər və erməni terrorçuları bu günə qədər məsuliyyətə cəlb edilməyib.
Beynəlxalq hüququn və beynəlxalq təşkilatların 30 ildə bacarmadığını Azərbaycan təkbaşına həyata keçirmiş, Qarabağı işğaldan azad etmiş və Xocalının günahsız qurbanlarının qisası məhz döyüş meydanında mərdliklə və igidliklə alınmışdır. Xocalı faciəsinin günahsız qurbanlarını hörmətlə anır və Allahdan rəhmət diləyirik. Hər zaman Azərbaycanın yanındayıq.
"Respublika".
