"Sputnik Azərbaycan"ın Bakıdakı ofisi fəaliyyətini dayandırdı

Rusiyanın “Rossiya Seqodnya” Beynəlxalq İnformasiya Agentliyinin filialı kimi fəaliyyət göstərən "Sputnik Azərbaycan"ın Bakıdakı ofisi fəaliyyətini dayandırıb.

Agentliyin əməkdaşları Lent.az-a bildirib ki, artıq ofis fəaliyyət göstərmir.

Saytın fəaliyyəti davam edir

Ofis fəaliyyətini dayandırsa da, “Sputnik Azərbaycan” saytında xəbər yenilənməsi davam edir. Bu gün saytın Azərbaycan dili versiyasında xəbər yenilənməsə də, rus dili versiyası fəaliyyətini davam etdirib.

BBC və “Sputnik Azərbaycan” ofislərinin bağlanması

Qeyd edək ki, “Sputnik Azərbaycan” və “BBC News Azərbaycanca”nın Azərbaycan ofislərinin fəaliyyəti dayandırılıb.

Azərbaycan Xarici İşlər Nazirliyinin mətbuat xidməti idarəsinin rəisi Ayxan Hacızadə bildirib ki, BBC və “Rossiya Seqodnya”nın (“Sputnik Azərbaycan”) nümayəndəlikləri ləğv edilib. XİN rəsmisinin sözlərinə görə, onlar yalnız bir müxbir vasitəsilə akkreditasiyadan keçə bilərlər.

Bundan əlavə, “Amerikanın Səsi” radiosunun da müxbir akkreditasiyası ləğv edilib.

“Sputnik Azərbaycan”ın fəaliyyəti

“Sputnik Azərbaycan”, 2015-ci ildən etibarən Azərbaycanda fəaliyyət göstərirdi. Sayt Azərbaycan və rus dillərində xəbərlər yayımlayırdı. Agentlik, əsasən siyasi, iqtisadi və sosial mövzularla bağlı xəbərlər və analitik materiallar təqdim edirdi.

Son dövrlərdə Azərbaycan hökuməti xarici media qurumlarının fəaliyyətini tənzimləməyə başlayıb və bu çərçivədə bir sıra xarici media qurumlarının akkreditasiyası yenidən nəzərdən keçirilib.