İrandakı səfirliyimizdə törədilən teraktdan 2 il ötür

Azərbaycanın İrandakı səfirliyində törədilən terror aktından iki il ötür.

Avrasiya.net xəbər verir ki, 27 yanvar 2023-cü ildə səhər saatlarında Azərbaycanın İrandakı səfirliyinə ağır silahlı hücum baş verib. Təhlükəsizlik kamerasına düşən görüntülərə əsasən, hücum edən şəxs silahlı şəkildə səfirliyə daxil olaraq ciddi hadisələrə səbəb olub.

Hücum zamanı səfirliyin mühafizə xidmətinin rəhbəri Orxan Əsgərov həyatını itirib. Səfirliyin digər əməkdaşları Vasif Tağıyev və Mahir İmanov hücuma müdaxilə edərkən yaralanıblar. Hadisə nəticəsində terrorçu dərhal zərərsizləşdirilib və saxlanılıb.

Orxan Əsgərov Azərbaycan dövlətinin yüksək səviyyədə ehtiramı ilə dəfn edilib və ölümündən sonra "Vətən uğrunda" medalı ilə təltif olunub. Vasif Tağıyev və Mahir İmanov isə göstərdikləri şücaətə görə müvafiq dövlət mükafatları ilə təltif ediliblər.

Hadisədən sonra Azərbaycan Tehrandakı səfirliyinin fəaliyyətini dayandırıb və bütün əməkdaşlar, həmçinin onların ailə üzvləri Bakıya evakuasiya olunub.

2024-cü ildə isə diplomatik danışıqlar nəticəsində Azərbaycanın İrandakı səfirliyi yeni ünvanda fəaliyyətini bərpa edib və səfirlik heyəti öz işinə qayıdıb.

Hadisəni törədən şəxs, Yasin Hüseynzadə, İran məhkəmələri tərəfindən ölüm hökmünə məhkum edilib. Hökm təsdiqləndikdən sonra icra üçün müvafiq qurumlara göndərilib.