Dəhşətli qətl: "Qardaşıma 6 bıçaq vurub, biri ürəyinə dəyib" - TƏFƏRRÜATLAR

Bu gün səhər saatlarında Şamaxıda törədilmiş qətl hadisəsi ilə bağlı bəzi təfərrüatlar məlum olub.

Məlumata görə, 1995-ci il təvəllüdlü Elbrus Şeydayev Şamaxı-Pirqulu yolunun Əngəxaran kəndi ərazisindən keçən hissəsində yolun kənarında keçmiş qayınatası 1979-cu il təvəllüdlü Əlağa Hüseynov və qayınanası 1985-ci il təvəllüdlü Püstə Hüseynovaya bıçaqla xəsarətlər yetirib. Daha sonra özünə məxsus avtomobillə Əlağa Hüseynovun üzərindən keçərək onu öldürüb.

Əlağa Hüseynovun anası jurnalistlərə açıqlamasında bildirib ki, Elbrus Şeydayev boşanmamışdan əvvəl yoldaşını hər gün döyür, təhdid edirdi.

"Bir gün qız gələrək bunları mənə dedi. Mən oğlana dedim, niyə belə edirsən? Səs yazıları var, dəfələrlə deyir səni də, Əliağanı da, qızı da öldürəcəm. Dedim istəmirsənsə, boşan bitsin. Mən bilsəydim ki, o, dediyini edəcək, polislərə xəbər verərdim. Səhər şəhərə gedəndə də onları öldürüb", - o qeyd edib.

Əlağa Hüseynovun qardaşı isə hadisədən səhər saatlarında xəbər tutduğunu bildirib: "Gəldim gördüm ki, qardaşım qan içində yerdədir". Onun sözlərinə görə, əvvəllər də onların arasında mübahisə yaşanıb.

"Dünən qızın yüklərini yığışdırıb evə gətiriblər. Bu gün səhər tezdən şəhərə getmək üçün yola çıxıblar. Özü də şəhərdə işləyirdi. Qardaşım yolun kənarında maşın gözləyən zaman onu maşınla vurub. Sonra düşüb ona 6 bıçaq zərbəsi endirib. Zərbənin biri ürək nahiyəsindən dəyib. Qardaşımı qan içində yerdə saxlayıb qaçmışdı", - Əlağa Hüseynovun qardaşı qeyd edib.

Faktla bağlı Şamaxı rayon prokurorluğunda Cinayət Məcəlləsinin 120.1-ci (qəsdən adam öldürmə) və 29, 120.2.7-ci (iki şəxsi qəsdən öldürməyə cəhd) maddələrilə cinayət işi başlanıb.

Elbrus Şeydayev iş üzrə şübhəli şəxs qismində tutulub.

İbtidai istintaq davam etdirilir.