Elçin Mirzəbəyli Qarabağlı və Rəhimli kəndlərində seçicilərlə görüşüb
Bu gün Ədalət, Hüquq, Demokratiya Partiyası sədrinin müavini, 90 saylı Ağsu Seçki Dairəsindən deputatlığa namizəd Elçin Mirzəbəyli Ağsu rayonunun Qaradağlı və Çiyni kəndində seçicilərlə görüşüb.
Görüşdə deputatlığa namizədin vəkili Elçin Şahbazov onun tərcümeyi-halı, keçdiyi yol haqqında seçiciləri məlumatlandırıb.
Sonra Beynəlxalq Avrasiya Mətbuat Fondunun sədri, Azərbaycan Mətbuat Şurası İdarə Heyətinin üzvü Umud Rəhimoğlu deputatlığa namizəd Elçin Mirzəbəylinin peşəkar fəaliyyətindən söz açıb, onun yüksək mənəvi keyfiyyətlərə malik bir insan olduğunu bildirib.
Umid Rəhimoğlu deyib ki, Ağsu seçiciləri Elçin Mirzəbəyliyə səs verəcəkləri təqdirdə, onun timsalında öz öhdəliklərinə, prinsiplərinə sadiq qalan, səmimi, dialoqa açıq bir təmsilçi qazanacaqlar.
Daha sonra çıxış edən deputatlığa namizəd Elçin Mirzəbəyli qeyd edib ki, müstəqillik tariximizdə parlament seçkiləri ilk dəfədir ərazi bütövlüyü, suverenliyi təmin edilmiş Azərbaycanda keçirilir və bunun böyük mənəvi və siyasi əhəmiyyəti var. Bizə tarixi Zəfərimizi bəxş edən insanlara dərin minnətdarlıq hissini dilə gətirən deputatlığa namizəd bildirib ki, qələbədən və suverenliyimizin bərpasından sonra yeni bir şərait yaranıb və ölkə həyatının bütün sahələrində çalışan insanlar öz fəaliyyətlərini böyük Zəfərin ruhuna uyğun şəkildə həyata qurmalıdırlar.
Daha sonra deputatlığa namizəd seçki platformasının əsas istiqamətləri ilə bağlı Qarabağlı və Rəhimli kəndlərinin sakinlərinə məlumat verib, onların suallarını cavablandırıb.
