Fazil Mustafa seçicilərlə görüşüb - FOTOLAR
Böyük Quruluş Partiyasının sədri, 26 saylı Sabunçu Birinci Seçki Dairəsindən deputatlığa namizəd Fazil Mustafa 271 saylı məktəbdə seçicilərlə görüşüb.
Avrasiya.net xəbər verir ki, tədbiri açan F.Mustafanın vəkili Fəxrəddin Sadıqov seçiciləri salamladıqdan sonra əvvəlcə seçiciləri namizədin seçki platforması ilə tanış edib.
Daha sonra Fazil Mustafa qeyd edib ki, parlament seçkiləri ilk dəfədir ki, ərazi bütövlüyü, suverenliyi təmin edilən Azərbaycanda keçirilir və bunun böyük mənəvi və siyasi əhəmiyyəti var.
F.Mustafa seçicilərinə seçki platformasının əsas istiqamətləri barədə geniş məlumat verib, bu dəfə də ona etimad göstəriləcəyi təqdirdə görəcəyi işlərdən bəhs edib.
Görüşün sonunda F.Mustafa seçicilərlə fərdi qaydada görüşüb, onların suallarını cavablandırıb. Seçicilər bu dəfə də daha çox sosial problemlərini dilə gətirib, onların həllində namizədin yardımçı olmasını xahiş ediblər.
F.Mustafa ona dəstək verən hər bir seçiciyə ayrı-ayrılıqda təşəkkür edərək onlara öz minnətdarlığını bildirib.
